1 Timúteu 2:1-15
2 Rü nhu̱xma rü tá pemaã nüxü̃ chixu na nhuxãcü namexü̃ na pejumuxẽgüxü̃. Rü noxri chanaxwa̱xe i naxca̱x pejumuxẽgü i guxü̃ma i duü̃xü̃gü. ¡Rü Tupanana naxca̱x peca na nüxü̃ nangü̃xẽẽxü̃ca̱x rü nüxü̃́ nüxü̃ nangechaü̃xü̃ca̱x i norü pecadugü! ¡Rü moxẽ nüxna naxã ja Tupana naxca̱x i guxü̃ma i norü ngü̃xẽẽ i guxü̃ i duü̃xü̃güna naxãxü̃!
2 Rü ngẽxgumarüü̃ ta name nixĩ i naxca̱x pejumuxẽ i guxü̃ma i nachiü̃ãnegüarü ãẽ̱xgacügü i tacügü rü guxü̃ma i ngẽmatüü̃wa ngẽxmagüxü̃ i ãẽ̱xgacügü na ngẽmaãcü itaãẽgüxü̃ca̱x rü tüxü̃́ nangẽxmaxü̃ca̱x i wüxi i maxü̃ i mexü̃ i Tupanape̱xewa rü guxü̃ i duü̃xü̃güpe̱xewa.
3 Rü ngẽma nixĩ i mexü̃ rü ngẽmamaã nixĩ i nataãẽxü̃ ja jima tüxü̃ maxẽxẽẽcü ja Tupana.
4 Erü nüma nanaxwa̱xe i guxããxü̃́ma na nangẽxmaxü̃ i maxü̃ i taguma gúxü̃. Rü nanaxwa̱xe i guxãma na nüxü̃ cuáxü̃ i ngẽma ore i aixcuma ixĩxü̃.
5 Rü nüma ja Tupana rü wüxitama nixĩ. Rü ngẽxgumarüü̃ ta wüxitama nixĩ i taétüwa chogüxü̃ na Tupanaxü̃tawa tüxü̃ nangugüxẽẽxü̃ca̱x. Rü nüma nixĩ ja Ngechuchu ja Cristu ja Tupana Nane ga duü̃xü̃xü̃ ixĩcü.
6 Rü nüma ga Ngechuchu rü nügü inaxã rü naju na guxü̃ i duü̃xü̃güaxü̃́ naxütanüãxü̃ca̱x na Tupanaxü̃tawa nangugüxü̃ca̱x. Rü jexguma Ngechuchu ju̱xgu nixĩ ga Tupana janguxẽẽxü̃ ga jema ü̃paacü duü̃xü̃gümaã nüxü̃ jaxuxü̃ na nhuxãcü tá namaxẽxẽẽãxü̃.
7 Rü Tupana choxü̃ naxuneta na norü orearü ngeruü̃ chiĩxü̃ca̱x. Rü choxü̃ namu na chanangúexẽẽxü̃ca̱x i ngẽma duü̃xü̃gü i tama Judéugü ixĩgüxü̃ na nümagü rü ta jaxõgüãxü̃ca̱x rü nüxü̃ nacua̱xgüxü̃ca̱x i ngẽma ore i aixcuma ixĩxü̃. Rü ngẽma pemaã nüxü̃ chixuxü̃, rü aixcuma nixĩ, rü tama pexü̃ chawomüxẽẽ.
8 Rü nhu̱xma chanaxwa̱xe i guxü̃wama najumuxẽgü i jatügü. Rü chanaxwa̱xe i ngearü pecaduã̱xãcüma naxugüme̱xẽ rü ngẽmaãcü tama texémaã nanuẽãcüma rü tama ṯacüchiga nügü nachoxü̃gagüãcüma najumuxẽgü.
9 Rü chanaxwa̱xe i ngexü̃gü rü tauxchaãcü üxü̃ i naxchirugu nicu̱xgü, rü tauxchaãcü nügü namexẽẽjaegü, rü tama poraãcü nügü nanga̱xãẽgü uirumaã rü nuta i tatanüxü̃maã rü naxchiru i tatanüxü̃maã.
10 Notürü narümemaẽ nixĩ i meãmare Tupanaca̱x namaxẽ, rü mexü̃ i puracü naxügü, erü ngẽmaãcü nanaxwa̱xegü na namaxẽxü̃ i ngẽma ngexü̃gü i aixcuma Tupanana nügü ãgüxü̃.
11 Rü chanaxwa̱xe i ngexü̃gü rü meã inaxĩnüẽ i ucu̱xẽgü. Rü tama name na nachoxü̃gawa̱xegüxü̃.
12 Erü ngexü̃güna rü chanachu̱xu na jatügüxü̃ nangúexẽẽxü̃, rü jatüarü ãẽ̱xgacü na jiĩxü̃. Rü name nixĩ i inarüxĩnüẽmare i perü ngutaque̱xegüwa.
13 Jerü Tupana rü Adã́ũxü̃xĩra naxü rü jixcama ga Ewaxü̃.
14 Rü Chataná rü tama Adã́ũxü̃ nawomüxẽẽ, notürü jema ngecüxü̃ nixĩ ga nawomüxẽẽxü̃. Rü jemaãcü pecadugu ingu ga jema ngecü.
15 Rü jemaca̱x Tupana nüxü̃ nixu rü tá poraãcü nüxü̃́ nangu̱x i ngẽma ngexü̃gü i ngẽxguma naxíraxacügügu. Notürü ngĩma i ngecü rü tá inajaxu i maxü̃ i taguma gúxü̃ ega meã ngĩxãcügümaã inacua̱xgu, rü mexü̃gu naxĩnüãcüma jaxõõgu, rü guxü̃guma duü̃xü̃güxü̃ nangechaü̃gu rü meã Tupanape̱xewa namaxẽgu.
