1 Timúteu 3:1-16
3 Rü pemaã nüxü̃ chixuxchaü̃ i wüxi i ore i aixcuma ixĩxü̃. Rü ngẽxguma chi texé naxwa̱xegu na jaxõgüxü̃ãrü ãẽ̱xgacü tiĩxü̃, rü mexü̃ i puracü nixĩ i naxca̱x tadauxü̃.
2 Rü jíxema jaxõgüxü̃ãrü ãẽ̱xgacü rü tanaxwa̱xe na aixcuma mecü tiĩxü̃ na taxúema tümachiga chixri idexaxü̃ca̱x. Rü tanaxwa̱xe i wüxixicatama tixĩ ja tümama̱x, rü aixcuma meã tamaxü̃ rü mexü̃guxicatama tarüxĩnü na guxü̃ i duü̃xü̃gü tüxü̃ ngechaü̃güxü̃ca̱x. Rü tanaxwa̱xe i guxü̃guma meã duü̃xü̃güxü̃ tajaxu i tümapatawa, rü mexü̃ i ngúexẽẽruü̃ tixĩ.
3 Rü tama name i wüxi i ngãxwa̱xexü̃ rü nuwa̱xexü̃ tiĩxü̃, rü tama name i tümaãrü dĩẽruguama rüxĩnüxẽ tiĩxü̃. Notürü name nixĩ i guxü̃ i duü̃xü̃gümaã jaxna taxĩnü rü namaã tamecüma.
4 Rü tanaxwa̱xe i meãma tümachiü̃maã itacua̱x, rü tümaxãcügü rü meã tümaga naxĩnüẽ, rü tüxü̃ nangechaü̃gü.
5 Erü ngẽxguma chi tama tümachiü̃maã meã itacua̱xgu rü ¿nhuxãcü i guxü̃ma i Tupanaãxü̃́ jaxõgüxü̃maã meã itacuáxü̃?
6 Rü jíxema jaxõgüxü̃ãrü ãẽ̱xgacü ixĩxẽ rü tama tanaxwa̱xe na ngexwacax jaxṍxẽ na tiĩxü̃, erü nhuxguacü rü ngẽmaca̱x tügü ticua̱xüü̃. Rü ngẽmagagu düxwa nagu tangu i ngẽma pocu i Chatanáxü̃ namaã napocuxü̃ ja Tupana.
7 Rü tanaxwa̱xe i a̱i̱xrüxü̃ i ngẽma duü̃xü̃gü i tama jaxõgüxü̃ rü tüxü̃ nangechaü̃gü na taxúema chixri tümachiga idexagüxü̃ca̱x rü tama Chataná chixexü̃gu tüxü̃ na nguxẽẽxü̃ca̱x.
Jatügü i diácunugü i tupaucawa ngü̃xẽẽtaegüxü̃chiga
8 Rü ngẽxgumarüü̃ ta i ngẽma jatügü i tupaucawa ngü̃xẽẽtaegüxü̃ ixĩgüxü̃ rü nanaxwa̱xe i mexü̃guxicatama rüxĩnüẽxü̃ nixĩgü. Rü nanaxwa̱xe i aixcuma najanguxẽẽgü i ngẽma nüxü̃ jaxugüexü̃. Rü tama nanaxwa̱xe i ngãxẽẽchagüxü̃ nixĩgü rü e̱xna norü dĩẽruguama rüxĩnüẽxü̃ nixĩgü.
9 Rü name nixĩ i meãma nüxü̃ nacua̱xgü i guxü̃ma i Tupanaãrü ore, na nüxü̃ nacua̱xgüxü̃ca̱x na ṯacüca̱x na jaxõgüãxü̃. Rü nanaxwa̱xe i nügüãẽwatama nüxü̃ nacua̱xgü na norü maxü̃ rü aixcuma jamexü̃ i Tupanape̱xewa.
10 Rü tanaxwa̱xe i to i puracüwa nüxü̃ taxügüxira i noxrix. Rü ngẽxguma marü taguma chixexü̃ naxügügu, rü marü name i tupaucawaarü ngü̃xẽẽruü̃ tajaxĩgüxẽẽ.
11 Rü ngẽma jatügü i tupaucawa ngü̃xẽẽtaegüxü̃ ixĩgüxü̃ rü nanaxwa̱xe i naxma̱xgü rü ta mexü̃guxicatama tarüxĩnüẽ. Rü tama name i oregüta̱a̱xgüxe tixĩgü, notürü tanaxwa̱xe i meã namaxẽ rü aixcuma najanguxẽẽgü i ngẽma nüxü̃ tixugüxü̃.
12 Rü ngẽma jatügü i tupaucawa ngü̃xẽẽtaegüxü̃ ixĩgüxü̃ rü nanaxwa̱xe i wüxixicatama tixĩ ja naxma̱x. Rü nanaxwa̱xe i meãma napatacü̱̃ã̱xgümaã inacua̱x, rü naxãcügü rü meã naga naxĩnüẽ.
13 Rü ngẽma jatügü i tupaucawa ngü̃xẽẽtaegüxü̃ ixĩgüxü̃, rü ngẽxguma meãma naxügüãgu i norü puracü i tupaucawa rü guxü̃ma i duü̃xü̃gü tá nüxü̃ nangechaü̃gü. Rü nhu̱xmachi i nümagütama i ngẽma jatügü rü tá jexeraãcü nüxü̃́ natauxcha na nüxü̃ jaxugüexü̃ i nhuxãcü Tupana nanaxwa̱xexü̃ i Ngechuchu ja Cristuaxü̃́ na jaxõgüãxü̃ i duü̃xü̃gü.
Aixcuma nixĩ i ngẽma ore i Tupana tüxü̃ nüxü̃ cua̱xẽẽxü̃ i Cristuchiga
14 3:14-15 Rü chama chanaxwa̱xe i paxa ngẽ́ma chaxũ na cuxü̃ íchajadauxü̃ca̱x. Notürü ngürüãchi tama paxa ngẽ́ma chaxũ, rü ngẽmaca̱x cuxca̱x chanaxümatü i nhaã popera na nüxü̃ cucuáxü̃ca̱x i nhuxãcü tanaxwa̱xe na namaxẽxü̃ i ngẽma duü̃xü̃gü i jaxõgüxü̃. Erü nümagü nixĩ i Tupana ja maxü̃cüarü duü̃xü̃gü jixĩgüxü̃ rü nüxü̃ jaxugügüxü̃ rü ínapoxü̃güaxü̃ i Tupanaãrü ore i aixcuma ixĩxü̃.
15 Nüü̃ nadau 3:14
16 Rü jixema nüxü̃ tacua̱x rü aixcuma namexẽchi i ngẽma ore ga noxri ẽxü̃guxü̃ i nhu̱xma Tupana tüxü̃ nüxü̃ cua̱xẽẽxü̃ i Cristuchiga. Rü nüma ga Cristu rü duü̃xü̃güxü̃ nügü nawe̱x ga jexguma nhama ga naãnewa najexmagu. Rü Naãẽ i Üünexü̃ nüxü̃ nixu na mecü jiĩxü̃. Rü Tupanaãrü orearü ngeruü̃gü i dauxü̃cü̱̃ã̱x nüxü̃ nadaugü. Rü guxü̃ i nachiü̃ãnegüwa rü duü̃xü̃gü nüxü̃ nixugüe i nachiga, rü guxü̃wama duü̃xü̃gü nüxü̃́ najaxõgü. Rü Nanatü rü wenaxãrü dauxü̃guxü̃ i naãnewa nanaga i ngextá ínamexẽchixü̃wa.
