1 Timúteu 4:1-16
4 Tupanaãẽ i Üünexü̃ rü nüxü̃ nixu rü ngẽxguma jangaicagu na nagúxchaü̃xü̃ i naãne rü nümaxü̃ i duü̃xü̃gü rü tá nüxü̃ narüxoe na jaxõgüãxü̃ i Tupanaãrü ore i mexü̃. Rü tá nawe narüxĩ i duü̃xü̃gü i doramare i orexü̃ ixugüxü̃ i Chatanáãrü ngu̱xẽẽtae nangúexẽẽxü̃.
2 Rü ngẽma jaxõgüxü̃ rü tá nüxü̃́ inarüxĩnüẽ i ngẽma duü̃xü̃gü i meã maxẽnetaxü̃ rü idorata̱a̱xgüxü̃. Rü ngẽma duü̃xü̃gü rü jeü̃cürü nanaxügü i ngẽma chixexü̃ rü düxwa namaã nixü na chixexü̃guxicatama naxĩnüẽxü̃.
3 Rü ngẽma duü̃xü̃gü rü nanachu̱xu na ijangĩgüxü̃ i duü̃xü̃gü. Rü nanachu̱xu na duü̃xü̃gü nangõ̱xgüxü̃ i nhuxre i õnagü rü woochire̱x Tupana nanaxü i guxü̃ma i õnagü na moxẽ naxca̱x inaxãgüãcüma nangõ̱xgüãxü̃ca̱x i norü duü̃xü̃gü i jaxõgüxü̃ rü nüxü̃ cua̱xgüxü̃ i norü ore i aixcuma ixĩxü̃.
4 4:4-5 Notürü guxü̃ma i Tupana üxü̃ rü name. Rü taxuacüma nüxü̃ taxo ega Tupanana moxẽ naxca̱x ixãxiraãcüma najau̱xgu. Erü Tupanaãrü ore rü ngẽma jumuxẽ rü nanaxüünexẽẽ i ngẽma õna i Tupanape̱xewa, rü ngẽmaca̱x name nixĩ na nangṍxü̃.
5 Nüü̃ nadau 4:4
Wüxi i mexü̃ i Ngechuchu ja Cristuarü ngü̃xẽẽruü̃ rü mexü̃maã nangu̱xẽẽtae
6 Rü ngẽxguma ngẽma cumaã nüxü̃ chixuxü̃ i oremaã cunangúexẽẽgu i taeneẽ i jaxõgüxü̃, rü ngẽxguma nawa cungúechagu i ngẽma ore i marü cuixõxü̃, rü ngẽxguma nagu cuixũẽchagu i ngẽma mexü̃ i ngu̱xẽẽtae i marü nagu cuixũxü̃, rü ngẽxguma tá nixĩ i wüxi i mexü̃ i Ngechuchu ja Cristuarü ngü̃xẽẽruü̃ cuiĩxü̃.
7 Rü tama name na naga cuxĩnüxü̃ i nhama i naãnecü̱̃ã̱xãrü dexagümare i tama aixcuma ixĩxü̃. Notürü name nixĩ i guxü̃guma cugü cuporaxẽẽ na jexeraãcü Tupanaxü̃ cungechaü̃xü̃ca̱x rü nawe curüxũxü̃ca̱x rü naxca̱x cumaxü̃xü̃ca̱x.
8 Rü wüxi i mexü̃ nixĩ na naporaxẽẽxü̃ rü jaxĩã̱xcüxẽẽxü̃ i taxüne na aixcuma naporaxü̃ca̱x. Notürü ngẽmaãrü jexera narümemaẽ nixĩ na jigü iporaxẽẽxü̃ na Tupanaxü̃ ingechaü̃xü̃ca̱x erü ngẽma rü guxü̃wama tüxü̃́ name i nhama i naãnewa rü dauxü̃guxü̃ i naãnewa rü ta.
9 Rü aixcuma nixĩ i ngẽma ore i cumaã nüxü̃ chixuxü̃, rü name nixĩ i guxãma tajaxõgü.
10 Rü ngẽmaca̱x nixĩ i ipuracüexü̃ rü jigü iporaexẽẽxü̃ na nüxü̃ ixuxü̃ca̱x i ngẽma ore i mexü̃, erü nüxü̃́ tajaxõgü ja tórü Tupana ja maxü̃cü ja guxããrü maxẽxẽẽruü̃ ixĩcü. Erü nüma nixĩ i namaxẽxẽẽãxü̃ i ngẽma duü̃xü̃gü i nüxü̃́ jaxõgüxü̃.
11 Rü chanaxwa̱xe i cunangúexẽẽ i ngẽma ore rü duü̃xü̃güxü̃ cumu na naxauregüãxü̃ca̱x.
12 ¡Meã cugüna nadau na taxúema cuxü̃ naxoxü̃ca̱x naxca̱x i ngẽma na cungextü̱xüxü̃! Rü name nixĩ i wüxi i mexü̃ i cua̱xruü̃ cuixĩ naxca̱x i guxü̃ma i ngẽma jaxõgüxü̃. Rü ngẽmaca̱x cunaxwa̱xe i mexü̃ i oremaã cuidexa, rü meã duü̃xü̃güpe̱xewa cumaxü̃, rü aixcuma nüxü̃ cungechaü̃ i guxü̃ma i duü̃xü̃gü, rü meã Tupanaãxü̃́ cujaxõ, rü nape̱xewa meã cumaxü̃.
13 Rü chanaxwa̱xe i ngutaque̱xewa rü guxü̃ i duü̃xü̃güpe̱xewa nüxü̃ cudaumatü i Tupanaãrü ore, rü duü̃xü̃gümaã nüxü̃ cuixu na nhuxũ nhaxü̃chiga jiĩxü̃. Rü chanaxwa̱xe i ngẽmaãcü cunangúexẽẽ rü nüxü̃́ cunangúchaü̃xẽẽ i ngẽma taeneẽgü nhu̱xmatáta ngẽ́ma changu i chamax.
14 Rü ngẽmaca̱x name nixĩ i aixcuma namaã cupuracü i ngẽma cua̱x ga Tupana cuxna ãxü̃ ga jexguma norü puracüca̱x cuxü̃ naxunetagu rü jema jaxõgüxü̃ãrü ãẽ̱xgacügü cuxü̃ jangõgüãcüma cumaã nüxü̃ jaxuxgu na cuxna naxããxü̃ ga jema cua̱x.
15 ¡Meã naxü i guxü̃ma i ngẽma cumaã nüxü̃ chixuxü̃, na ngẽmaãcü guxü̃ i duü̃xü̃gü nüxü̃ daugüxü̃ca̱x na nhuxãcü guxü̃ i ngunexü̃gu jexeraãcü meã Tupanaca̱x na cumaxü̃xü̃!
16 ¡Inaxuãẽ na nhuxãcü meã cugüna cudauxü̃ rü nhuxãcü meã cunangúexẽẽxü̃ i ngẽma togü! Erü ngẽxguma meã cunaxü̱xgu i guxü̃ma, rü tá cunajaxu i maxü̃ i taguma gúxü̃ rü ngẽma togü i cuxü̃́ irüxĩnüẽxü̃ rü tá ta nüxü̃ curüngü̃xẽẽ na nümagü rü ta najauxgüãxü̃ca̱x i ngẽma maxü̃.
