1 Timúteu 5:1-25
5 Taguma name i cunanga i wüxi i jatü i cuxü̃ rüjamaẽxü̃. Rü narümemaẽ nixĩ i meãma cunaxucu̱xẽ nhama cunatürüü̃. Rü ngẽma ngextü̱xücügü rü name nixĩ i meãma namaã cuidexa nhama cueneẽgüxü̃chirüü̃.
2 Rü jíxema jaguã̱xgü ja ngexegü rü name nixĩ i meãma tümamaã cuidexa cuexü̃chirüü̃. Rü ngẽxgumarüü̃ ta i paxü̃gü rü name nixĩ i meãma namaã cuidexamare wüxi i cueja̱xü̃chirüü̃, rü tama name i chixexü̃gu namaã curüxĩnü.
3 ¡Tüxü̃ rüngü̃xẽẽ ja jíxema jutegüxe ega aixcuma ṯacü tüxü̃́ tau̱xgu!
4 Notürü ngẽxguma chi wüxi i jutecü ngĩxü̃́ nangẽxmagu i ngĩxãcügü rü e̱xna ngĩtaagü, rü name nixĩ i nümagü ngĩxü̃ narüngü̃xẽẽgü rü ngĩxna nanaxã i ṯacü i ngĩxü̃́ taxuxü̃. Erü Tupana nanaxwa̱xe na ngĩtanüxü̃ĩra ngĩxna daugüxü̃ na ngẽmaãcü jangutanüxẽẽgüãxü̃ca̱x ga jema naẽ na najaexẽẽxü̃.
5 Notürü jíxema jutexe ja tüxica irüxã́ũxẽ rü tüxü̃́ nataxúxe i tümatanüxü̃, rü Tupanaxü̃tawaxicatama ítanaṉg̱uxẽẽ i tümaãrü ngü̃xẽẽ rü guxü̃guma woo chütacü rü ngunecü rü tajumuxẽ na tüxü̃ nangü̃xẽẽxü̃ca̱x.
6 Notürü jíxema jutexe ja tümaãrü ngúchaü̃guxicatama rüxĩnüxẽ, rü Tupanape̱xewa rü nhama tajuxü̃rüü̃ tixĩ.
7 Rü ngẽma nixĩ i ore i tá cunangúexẽẽxü̃ i ngẽma jaxõgüxü̃ na nügüna nadaugüxü̃ca̱x na taxuü̃ma i chixexü̃ naxügüxü̃ca̱x rü taxúema nachiga chixri idexagüxü̃ca̱x.
8 Erü ngẽxguma chi wüxie rü tama meã nüxna tada̱xgu i tümapatacü̱̃ã̱xgü rü tümaẽ rü tümanatü, rü maneca tama aixcuma meã Tupanaãxü̃́ tajaxõ. Rü wüxi i tama jaxõxü̃ãrü jexera chixecü tixĩ.
9 Rü ngẽxguma chi wüxi i ngexü̃ i jutexü̃ naxca̱x íc̱axgu na ngẽma jaxõgüxü̃ ngĩxü̃ rüngü̃xẽẽgüxü̃ca̱x rü tanaxwa̱xe i 60 ja taunecüarü jexera ngĩxü̃́ nangẽxma rü wüxitama nixĩ ga ngĩte ga ngĩxü̃́ jexmacü ga noxrix.
10 Rü tanaxwa̱xe i guxü̃ma i duü̃xü̃gü ngĩxü̃ nacua̱xgü na wüxi i mexü̃ ü̱xcü na jiĩxü̃. Rü tanaxwa̱xe i meã ngĩxãcüxü̃ jaexẽẽcü ijixĩ, rü meã ngĩpatawa duü̃xü̃güxü̃ jaxucü ijixĩ, rü jaxõgüxü̃ãrü ngü̃xẽẽruü̃ ijixĩ, rü ḏaaweexü̃ãrü ngü̃xẽẽruü̃ ijixĩ. Rü ngẽmaãcü tanaxwa̱xe i guxü̃raü̃xü̃ i mexü̃ na naxüxü̃.
11 Notürü tama tanaxwa̱xe i jaxõgüxü̃ãrü puracü nixĩ i ngĩxna na nadaugüxü̃ i wüxi i jutecü ega tama 60 wa nanguxgu ja ngĩrü taunecü. Erü wüxi i jutecü i pacü, rü ngẽxguma ngĩrü ngúchaü̃ Cristuna ngĩxü̃ ixũgachixẽẽgu, rü tá inaxwa̱xe na wena naxãtexü̃.
12 Rü duü̃xü̃gü tá chixri ngĩchiga nidexagü, erü tama aixcuma ijanguxẽẽ ga jema Cristumaã inaxunetaxü̃ ga noxrix.
13 Rü ngĩma rü düxwa ngextá ijaxáuchigümare, rü náĩ ja ĩ rü nagu ijarüxã̱ũ̱x, rü düxwa tama ipuracüchaü̃. Rü tama ngẽmaxĩcatama, notürü düxwa ixoregüta̱a̱x, rü ijangẽxmachigü nawa i ngẽma dexa i tama mexü̃ i togüchiga, rü guxü̃wama nüxü̃ ijaxu i ngẽma ore i tama mexü̃.
14 Rü ngẽmaca̱x chanaxwa̱xe i ngẽma jutegüxü̃ i paxü̃gü na wenaxãrü naxãtegüxü̃, rü naxãxãcügüxü̃, rü mexü̃ i napataarü daruü̃gü na jixĩgüxü̃. Rü ngẽmaãcü i ngẽma duü̃xü̃gü i ngĩchi aiexü̃, rü taxucürüwa chixri ngĩchiga nidexagü.
15 Cumaã nüxü̃ chixu i nhaã ore, erü nhuxre i jutecü rü marü nüxü̃ irüxoe i ore i mexü̃ rü Chatanáwe irüxĩ.
16 Rü ngẽxguma chi wüxi i ngecü i jaxõ̱xcü rü ngĩxü̃́ nangẽxmagu i ngĩtanüxü̃ i jutexü̃, rü name nixĩ i ngĩxü̃ irüngü̃xẽẽ. Rü ngẽmaãcü tãũxü̃táma togü i jaxõgüxü̃ãrü puracü tá nixĩ na ngĩxna na nadaugüxü̃. Rü ngẽxguma tá nüxü̃́ natauxcha i ngẽma togü i jaxõgüxü̃ na ngĩxü̃ nangü̃xẽẽgüxü̃ i ngẽma jutecü i aixcuma ngĩxü̃́ natau̱xcüma i ngĩtanüxü̃gü i ngĩxü̃ rüngü̃xẽẽgüxü̃.
17 Rü ngẽma jaxõgüxü̃ãrü ãẽ̱xgacügü i meãma naxügüxü̃ i Tupanaãrü puracü, rü name nixĩ i ngẽma jaxõgüxü̃ aixcuma meã nüxü̃ nangechaü̃gü rü meã nüxü̃́ nanaxütanügü. Rü guxü̃ãrü jexera tanaxwa̱xe i nüxü̃ nangechaü̃gü rü meã nüxü̃́ nanaxütanügü i ngẽma jaxõgüxü̃ãrü ãẽ̱xgacügü i meãma nüxü̃ ixuxü̃ rü nangúexẽẽxü̃ i Tupanaãrü ore i mexü̃.
18 Erü Tupanaãrü orewa rü nhanagürü:“Tama name i nüxna taxaü i ngẽma taxü̃na i puracüxü̃”,
nhanagürü. Rü nhanagürü ta:“Wüxi i puracütanüxü̃ rü tanaxwa̱xe i nüxü̃́ na naxütanüxü̃ i norü puracü”,
nhanagürü i ngẽma Tupanaãrü orewa.
19 Rü ngẽxguma chi texé nüxü̃ ixuxgu na chixexü̃ naxüxü̃ i wüxi i jaxõgüxü̃ãrü ãẽ̱xgacü, rü tãũxü̃táma tüxü̃́ icuxĩnü ega natau̱xguma i taxre rü e̱xna tamaẽ̱xpü̱x i togü i duü̃xü̃gü i nüxü̃ daugüxü̃ na aixcuma chixexü̃ naxüxü̃.
20 Notürü ngẽma jaxõgüxü̃ãrü ãẽ̱xgacügü i aixcuma pecadugu maxẽxü̃, rü name nixĩ i guxü̃ i jaxõgüxü̃pe̱xewa cunaxucu̱xẽ, na guxü̃ma i ngẽma togü i jaxõgüxü̃ãrü ãẽ̱xgacügü rü ta namuü̃ẽxü̃ca̱x na naxügüãxü̃ i ṯacü rü chixexü̃.
21 Rü nhu̱xma Tupanape̱xewa rü tórü Cori ja Ngechuchu ja Cristupe̱xewa rü ngẽma dauxü̃cü̱̃ã̱x i orearü ngeruü̃gü i Tupana nüxü̃ ngechaü̃güxü̃pe̱xewa, rü cuxü̃ chamu na naga cuxĩnüxü̃ i nhaã ore i cumaã nüxü̃ chixuxü̃. Rü chanaxwa̱xe i ngẽma cumaã nüxü̃ chixuxü̃rüü̃ meã cunaxucu̱xẽ i guxü̃ma i ngẽma jaxõgüxü̃ rü nüẽ́tama ega woo texé tixĩgu.
22 ¡Tama cunhuxãẽ i jaxõgüxü̃ãrü ãẽ̱xgacüxü̃ na cujangucuchixẽẽxü̃ i wüxi i duü̃xü̃! Notürü name nixĩ i noxri rü meã nagu curüxĩnü i ngẽma erü ngürüãchi tá wüxi i duü̃xü̃ i pecadu üechaxü̃ cuingucuchixẽẽ, rü cugagu tá nixĩ erü tama icuxuãẽ. ¡Rü meã cugüna nadau na tama pecadugu cunguxü̃ca̱x!
23 Rü ngẽma na cungu̱xnecaü̃xü̃ i nhuxguacü, rü name nixĩ i íraruwa wĩũne cujaxaxü, rü tama i dexáxicatama.
24 Rü nangẽxma i duü̃xü̃güarü pecadugü i noxtacüma ngóxü̃ naxü̃pa na Tupana nüxna c̱axü̃. Notürü nangẽxma i to i pecadugü i duü̃xü̃güarü rü tãũxü̃táma nango̱x nhu̱xmatáta naãneãrü gu̱xwa nanguxgu rü Tupana tüxna icagügu.
25 Rü ngẽxgumarüü̃ ta nangẽxma i duü̃xü̃güarü puracügü i mexü̃ i Tupanaca̱x naxügüxü̃ i nhu̱xma marü nüxü̃ idauxü̃. Rü nangẽxma ta i puracügü i mexü̃ i nhu̱xma tama nüxü̃ idauxü̃ notürü jixcüra tá nüxü̃ idaugüamaxü̃.
