1 Timúteu 6:1-21
6 Guxãma ja jíxema jaxõgüxe rü ixããrü coriã́xẽ, rü tanaxwa̱xe i tümaãrü corixü̃ tangechaü̃ na ngẽmaãcü taxucürüwa texé Tupanachiga rü tórü ngu̱xẽẽtaechiga chixri idexaxü̃ca̱x.
2 Rü ngẽxguma chi wüxi ja duü̃xẽ ja Tupanaãxü̃́ jaxṍxẽ rü wüxi i cori i tümarüü̃ jaxõxü̃maã tacoriã̱xgu, rü tama tanaxwa̱xe i ngẽma na tümaẽneẽ jiĩxü̃ca̱x nüxü̃ tarüxo na nüxü̃ tangechaü̃xü̃ i tümaãrü cori. Notürü tanaxwa̱xe i jexeraãcü meã nüxü̃́ tapuracü erü tümaãrü cori i nüxü̃ tarüngü̃xẽẽxü̃ i tümarüü̃ jaxõxü̃ nixĩ rü tümaẽneẽ i Tupana nüxü̃ ngechaü̃xü̃ nixĩ. Pa Timúteux, chanaxwa̱xe i meãma cunangúexẽẽ i ngẽma ore i cumaã nüxü̃ chixuxü̃, rü guxü̃ma i jaxõgüxü̃pe̱xewa nüxü̃ cuixu.
Tupanaãrü ore rü aixcuma tüxü̃́ name
3 Rü cumaã nüxü̃ chixu rü nangẽxma i duü̃xü̃gü i namaã ngu̱xẽẽtaegüxü̃ i ngẽma ngu̱xẽẽtae i tama namaã wüxiguxü̃ i tórü ngu̱xẽẽtae, rü tama namaã wüxiguxü̃ i tórü Cori ja Ngechuchu ja Cristuarü ngu̱xẽẽtae i mexü̃, rü tama namaã wüxiguxü̃ i ngẽma ngu̱xẽẽtae i Tupanaãrü orewa ngóxü̃.
4 Rü cumaã nüxü̃ chixu rü jíxema ngẽmaãcü ngu̱xẽẽtaexe rü tügü ticua̱xüü̃ rü taxuü̃ma tacua̱x. Rü ngẽmaca̱x ngẽxü̃rüüxü̃mare i dexa rü naxca̱x tachoxü̃gawa̱xe, rü tama texéga taxĩnüchaü̃, rü düxwa nhama tiḏaawexü̃rüü̃ tixĩ namaã i ngẽma tümacüma. Rü ngẽmagagu rü taxauxãchiwa̱xe, rü tanuxwa̱xe, rü togümaã taguxchiga, rü taxúxeaxü̃́ma tajaxõ.
5 Rü ngẽmaãcü i ngẽma duü̃xü̃gü i chixeãẽgüxü̃, rü nügümaã nanuẽẽcha, rü tama nüxü̃ nacua̱xgü i ngẽma ore i aixcuma ixĩxü̃, rü nagu narüxĩnüẽ rü Tupanaãrü orewa nixĩ i dĩẽru ngĩxü̃ najauxgüxü̃.
6 Rü aixcuma nixĩ i Tupanaãrü orewa nüxü̃ ijarüṉg̱auxü̃ i taxü̃ma i mexü̃, notürü ngẽma mexü̃ rü tümaca̱xicatama nixĩ ja jíxema namaã taãẽgüxe i ngẽma marü tüxü̃́ ngẽxmaxü̃.
7 Rü jixema rü jexguma noxri ixíraegu, rü ngearü jemaxü̃ã́xẽmaã tabue i nhama i naãnewa. Rü ngẽxguma iju̱xgu rü taxucürüwa tajange i tórü ngẽmaxü̃gü.
8 Notürü ngẽxguma tüxü̃́ nangẽxmagu i taxchiru rü tórü õna rü name nixĩ i ngẽmamaãtama tataãẽgü.
9 Notürü ngẽma duü̃xü̃gü i dĩẽruã̱xgüchaü̃xü̃, rü tama jaxna namaã naxĩnüẽ i ngẽxguma ngẽma dĩẽruarü ngúchaü̃ nüxü̃ poragu. Rü ngẽmaca̱x nagu naji i muxü̃ma i ngúchaü̃gü i taxuwama mexü̃ i chixexü̃wa nagagüxü̃, rü ngẽmaca̱x düxwa i ngẽma duü̃xü̃gü rü poraãcü nachixe rü norü guxü̃maãma inajarütauxe.
10 Erü ngẽma na dĩẽruguama na rüxĩnüxü̃ rü ngẽma nixĩ i guxü̃ma i chixexü̃güarü ügü. Rü nangẽxma i nhuxre i duü̃xü̃gü i Tupanaãrü orexü̃ ítáxü̃ erü dĩẽruguama narüxĩnüẽ. Rü ngẽmaca̱x poraãcü nügü nangechaü̃güxẽẽ rü nügüxü̃́ nanangu̱xẽẽgü.
Tupanaãxü̃́ jaxõgüamaxü̃chiga
11 Notürü cumax, Pa Timúteux, rü wüxi ja jatü ja Tupanaãrüxü̃chi cuixĩ. ¡Rü ngẽmaca̱x nüxna ixũgachi i guxü̃ma i ngẽma chixexü̃! ¡Rü meã Tupanape̱xewa namaxü̃, rü norü ngúchaü̃ naxü, rü meã nüxü̃́ jaxõ, rü nüxü̃ nangechaü̃ i guxü̃ma i duü̃xü̃gü, rü jaxna namaã naxĩnü, rü tama cugü icua̱xüü̃cüraxü̃ i cuãẽwa!
12 ¡Cugü naporaxẽẽ na meã cujaxõõmaxü̃ca̱x rü cunaxüamaxü̃ca̱x i Tupanaãrü puracü ega woo ṯacü rü guxchaxü̃ cuxü̃ üpetügux! ¡Rü cugüna nadau na taguma cuxna na ijanataxuxü̃ca̱x i maxü̃ i taguma gúxü̃! Jerü jema maxü̃ca̱x nixĩ ga noxri Tupana cuxü̃ jaxuxü̃ ga jexguma muxü̃ma ga duü̃xü̃güpe̱xewa nüxü̃ cuixuxgu na nhuxãcü Ngechuchu ja Cristuaxü̃́ na cujaxõxü̃.
13 6:13-14 Rü nhu̱xma Pa Timúteux, rü nape̱xewa ja Tupana ja guxãxü̃ma maxẽxẽẽcü, rü nape̱xewa ja Ngechuchu ja Cristu ga ãẽ̱xgacü ga Piratumaã nüxü̃ ixucü ga nhuxãcü Nanatü ja Tupanaãxü̃́ na jaxõõxü̃, rü cuxü̃ chamu na naga cuxĩnüxü̃ i ngẽma ore i cumaã nüxü̃ chixuxü̃. Rü tama chanaxwa̱xe i cunaxüchicüü i ngẽma ore, na taxúema texé ṯacüca̱x cuxü̃ oregüxü̃ca̱x rü chixri cuchiga idexaxü̃ca̱x. Rü chanaxwa̱xe i ngẽmaãcü meã cunaxü nhu̱xmatáta ínangu ja tórü Cori ja Ngechuchu ja Cristu.
14 Nüü̃ nadau 6:13
15 Erü ngẽma ngunexü̃ i Tupana nagu naxwa̱xexü̃gu rü tá Cristuxü̃ nango̱xẽẽ. Erü nüxĩcatama Tupana nixĩ, rü nüma nixĩ i aixcuma mecü jiĩxü̃ rü guxü̃ẽ́tüwama nangẽxmaxü̃. Rü guxü̃ i ãẽ̱xgacügüarü Ãẽ̱xgacü jiĩxü̃, rü guxü̃ i corigüarü Cori jiĩxü̃.
16 Rü nüxĩcatama nixĩ na taguma najuxü̃. Rü nüma rü poraãcü ínangóonexü̃wa namaxü̃, rü taxucürüwa texé ngẽma ngóonexü̃na tangaicama. Taguma wüxi i duü̃xü̃ nüxü̃ nadau, rü taxuacüma texé nüxü̃ tadau. Nüma rü guxü̃guma naporaxü̃chi rü taguma inajarüxo na Ãẽ̱xgacü jiĩxü̃. Rü ngẽmaca̱x tanaxwa̱xe i guxãma nüxü̃ ticua̱xüü̃güecha. Rü ngẽmaãcü jiĩxü̃.
17 Rü jíxema tüxü̃́ nangẽxmagüxe i muxü̃ma i tümaãrü dĩẽru i nhama i naãnewa, rü tümamaã nüxü̃ ixu na tama ngẽmamaã tügü ticua̱xüü̃güxü̃ca̱x rü tama nagu tarüxĩnüẽxü̃ca̱x na ngẽma tümaãrü dĩẽruwa nüxü̃ itajangaugüxü̃ i tümaãrü maxü̃. Erü ngẽma dĩẽru rü paxa tá nagu̱x. Notürü narümemaẽ nixĩ i Tupanagu tarüxĩnüẽ, erü jimawa nixĩ i nüxü̃ itajangaugüxü̃ i tümaãrü maxü̃. Rü nüma nixĩ i poraãcü tüxna naxããxü̃ i guxü̃ma i ṯacü i inaxwa̱xexü̃ na itaãẽgüxü̃ca̱x.
18 ¡Rü namaã nüxü̃ ixu i ngẽma muãrü dĩẽruã̱xgüxü̃, rü name na ngẽmamaã mexü̃ naxügüxü̃ca̱x rü togü i duü̃xü̃güxü̃ nangü̃xẽẽgüxü̃ca̱x! Rü ngẽmaãcü tá namu i norü ü i mexü̃ i Tupanape̱xewa. Rü tanaxwa̱xe i nümagü i muãrü dĩẽruã̱xgüxü̃ rü na ínamemaregüxü̃ na togüna naxããxü̃ rü namaã naṉg̱auxü̃ i ngẽma norü ngẽmaxü̃gü.
19 Rü ngẽmaãcü tá nüxü̃́ nangẽxma i norü mexü̃gü i dauxü̃guxü̃ i naãnewa, rü tá nanajauxgü i ngẽma maxü̃ i aixcuma ixĩxü̃.
Pauru rü Timúteuxü̃ namu, rü jemaãcü inajacua̱xẽẽ ga norü popera
20 Pa Timúteux, ¡meã namaã nangúexẽẽtae i guxü̃ma i ngẽma ore i cuxü̃ chamuxü̃! Rü tama name na icurüxĩnüxü̃ i nhama i naãnecü̱̃ã̱xãrü dexagümare i taxuwama mexü̃ rü ngẽma ore i doramare ixĩxü̃ i duü̃xü̃gü nüxü̃ ixugügünetaxü̃ na ore i nawa nüxü̃ icuáxü̃ jiĩxü̃.
21 Erü nhuxre i nümagü i ngẽma noxrütama cua̱xgu ĩxü̃, rü düxwa ngẽmagagu Tupanana nixĩgachi. Rü chanaxwa̱xe i Tupana meã pexü̃ narüngü̃xẽẽ.
Rü nuãma pexna,
Pauru
