1 Pedru 3:1-22
3 3:1-2 Rü pemax, Pa Ngexü̃güx, rü name nixĩ i petega pexĩnüẽ na ngẽma pete i tama jaxõxü̃ nüxü̃ dauxü̃ca̱x i perü maxü̃ i mexü̃ i Tupanape̱xewa rü duü̃xü̃güpe̱xewa rü ngẽmaca̱x na jaxõõxü̃ca̱x woo taxuü̃ma i Tupanaãrü orexü̃ namaã peixugu.
2 Nüü̃ nadau 3:1
3 Rü ngẽma na aixcuma pemexü̃ca̱x, rü tama name i nagu perüxĩnüẽ na nhuxãcü pegü pemexẽẽjaexü̃chixü̃, rü e̱xna uirunaxca̱x i nga̱xãẽruü̃maã penga̱xãẽgüxü̃, rü e̱xna tatanüxü̃chixü̃ i naxchirugu na peicu̱xgüxü̃.
4 Notürü name nixĩ i perü maxü̃wa pegü pemexẽẽgü rü guxü̃ma i duü̃xü̃gümaã pemecümagü rü taguma texémaã penuãẽgü, erü ngẽma nixĩ i perü mexü̃ i taguma ijarüxoxü̃ i aixcuma mexü̃ i Tupanape̱xewa.
5 Rü jemaãcü norü maxü̃ i mexü̃maã nixĩ ga nügü janga̱xãẽgüxü̃ ga jema nuxcümaxü̃güxü̃ ga ngexü̃gü ga Tupanape̱xewa ixüünexü̃. Rü nümagü rü Tupanaãxü̃́ najaxõgü rü natega naxĩnüẽ.
6 Rü jemaãcü ta ijixĩ ga Chara ga ngĩte ga Abrã́ũga na naxĩnüxü̃, rü ngĩrü corimaã naxuaxü̃. Rü pemagü rü tá ta ngĩrüü̃ peixĩgü ega mexü̃ pexügügu. Rü nhu̱xmachi taxuü̃ca̱xtáma tü̱xcüü̃ peteca̱x pemuü̃ẽ.
7 Rü ngẽxgumarüü̃ ta i pemax, Pa Jatügüx, rü name nixĩ i meã pema̱xü̃ pengechaü̃gü rü aixcuma jaxna ngĩmaã pexĩnüẽ, erü ngĩma rü irüturamaẽ. Rü name nixĩ i ngĩmaã petaãẽgü erü Tupana rü pexna naxããxü̃rüü̃ ngĩxna nanaxã i ngẽma maxü̃ i taguma gúxü̃. Rü name nixĩ i ngẽmaãcü meã ngĩmaã pemaxẽ na Tupana nüxü̃ ĩnüxü̃ca̱x i perü jumuxẽgü.
Jíxema mexü̃ ügüxe ja ngúxü̃ ingegüxechiga
8 Rü ngẽmaãcü chanaxwa̱xe i guxãma i pema rü pegüxü̃́ pengechaü̃tümüü̃gü rü wüxigu perüxĩnüẽ, rü aixcuma nüxü̃ pengechaü̃gü i guxü̃ma i taeneẽgü i jaxõgüxü̃. Rü chanaxwa̱xe i aixcuma pemecümagü rü guxãmaã pegü pewüxiguxẽẽ.
9 Rü ngẽxguma texé chixexü̃ pemaã ü̱xgu, rü tama name i pema rü ta chixexü̃ tümamaã pexü. Rü ngẽxguma texé pemaã guxchigagu, rü tama name i pema rü ta tümamaã peguxchiga. Notürü narümemaẽ nixĩ i mexü̃ i oremaã tüxü̃ pengãxü̃ga rü tüxü̃ perüngü̃xẽẽ, erü Tupana pexü̃ nidexechi na pexü̃ nangü̃xẽẽxü̃ca̱x.
10 Erü Tupanaãrü ore i ümatüxü̃wa rü nhanagürü:“Ngẽxguma texé taãẽãcüma maxchaü̃gu, rü name nixĩ i nüxna tadau ja tümaãrü conü na tama chixexü̃ i oremaã jadeaxü̃ca̱x. Rü ngẽxgumarüü̃ ta name nixĩ i nüxna tadau i tümaã̱x na tama doraxü̃ jaxuxü̃ca̱x.
11 Rü name nixĩ i nüxna tajaxü̃ i guxü̃ma i chixexü̃gü, rü mexü̃ taxü. Rü ngẽxgumarüü̃ ta name nixĩ i guxü̃guma naxca̱x tadau na togümaã tataãẽxü̃.
12 Erü tórü Cori rü tüxna nadau ja jíxema aixcuma ímexẽ, rü nüxü̃ naxĩnü i tümaãrü jumuxẽ. Notürü tümamaã nanu ja jíxema chixexü̃ ügüxe”,
nhanagürü i ngẽma Tupanaãrü orewa.
13 ¿Rü texé tá chixexü̃ pemaã üxü̃ ega pema rü aixcuma guxü̃guma mexü̃ pexügügu?
14 Notürü ngẽxguma chi ngẽma mexü̃ na pexügüxü̃ca̱x ngúxü̃ peingegügu, rü name nixĩ i petaãẽgü. ¡Rü taxuü̃ca̱xma texéxü̃ pemuü̃ẽ, rü taxuü̃ca̱xma ṯacüca̱x pexoegaãẽgü!
15 Rü name nixĩ i perü Corixü̃ pejaxĩxẽẽ ja Cristu rü aixcuma naga pexĩnüẽ, rü guxü̃guma ípememare na meã penangãxü̃xü̃ca̱x i guxü̃ma i duü̃xü̃gü i pexna c̱axü̃ na tü̱xcüü̃ Cristuaxü̃́ pejaxõgüxü̃.
16 Notürü name nixĩ i nüxü̃ pengechaü̃ãcüma penangãxü̃ rü tama pegügu perüxĩnüẽãcüma na norü jexera peixĩgüxü̃. Rü name nixĩ i meã pemaxẽ na taxuü̃ca̱xma pexoegaãẽxü̃ca̱x. Rü ngẽxguma ngẽmaãcü pemaxẽgu rü tá naxãneẽ i ngẽma duü̃xü̃gü i chixri pechiga idexagüxü̃ na nhuxãcü Cristuca̱x pemaxẽxü̃.
17 Jixema rü ngúxü̃ tingegü ega chixexü̃ ixügügu. Notürü narümemaẽ nixĩ na mexü̃ ixügüxü̃ca̱x ngúxü̃ na ingegüxü̃, ega ngẽmaãcü Tupana naxwa̱xegu.
18 Jerü nümatama ga Cristu rü ngúxü̃ ninge, rü wüxicanatama guxããrü pecaduca̱x naju. Rü woo na mecü jiĩxü̃ rü taxca̱x naju i jixema i chixexü̃ i duü̃xü̃gü ixĩgüxü̃. Rü jemaãcü nanaxü na Tupanaxü̃tawa tüxü̃ nagagüxü̃ca̱x. Rü woo naju ga naxü̃ne, notürü ga naãẽ rü tama naju.
19 Rü jexguma naxü̃ne ju̱xgu rü naãẽ rü natanüwa naxũ ga jema naãẽgü ga Tupana pocuexü̃, rü orexü̃ namaã najarüxu.
20 Rü jema naãẽgü ga jexma pocuexü̃, rü jema nixĩ ga naãẽgü ga jema duü̃xü̃gü ga Noẽ́ maxü̃gu tama Tupanaga ĩnüẽxü̃ woo jaxna namaã naxĩnü ga jexguma Noẽ́ naxüjane ga guma wapuru. Rü 8 ga duü̃xü̃güxicatama nixĩ ga guma wapurugu ichoü̃xü̃, rü jema nixĩ ga guma mucü ga taxüchicüarü dexáétüwa maxẽxü̃.
21 Rü jema dexá rü wüxi ga cua̱xruü̃ nixĩ. Erü ngẽxguma dexáwa íibaiegu, rü duü̃xü̃güxü̃ nüxü̃ tacua̱xẽẽ na Ngechuchu ja Cristu wena maxü̃xü̃gagu jiĩxü̃ i tüxü̃́ nangẽxmaxü̃ i maxü̃ i taguma gúxü̃. Rü tama taxüneãrü düxétüwa na imexü̃ca̱x nixĩ i íibaiexü̃, notürü ítabaie jerü marü Tupanana naxca̱x taca na tüxü̃́ ijanaxoxẽẽãxü̃ca̱x ga tórü pecadugü na aixcuma nape̱xewa imexü̃ca̱x rü aixcuma mexü̃gu rüxĩnüẽxü̃ca̱x.
22 Rü nüma ga Ngechuchu ja Cristu, rü dauxü̃guxü̃ i naãnewa naxũ, rü nhu̱xma rü Tupanaãrü tügünecüwawa nangẽxma. Rü nhu̱xma rü name̱xwa nangẽxmagü i guxü̃ma i Tupanaãrü orearü ngeruü̃gü i dauxü̃cü̱̃ã̱x rü guxü̃ma i ãẽ̱xgacügü i dauxü̃cü̱̃ã̱x.
