1 Pedru 4:1-19
4 4:1-2 Rü ngẽmaca̱x name nixĩ na ípememarexü̃ na ngúxü̃ peingegüxü̃ jexgumarüü̃ ga Cristu na ngúxü̃ jangexü̃. Erü jíxema ngúxü̃ ingexe rü marü nüxü̃ tarüxo i tümaãrü pecadu na guxü̃guma meã Tupana naxwa̱xexü̃ãcüma tamaxü̃xü̃ca̱x, rü tama i tümaxü̃ne naxwa̱xexü̃ãcüma na tamaxü̃xü̃ca̱x.
2 Nüü̃ nadau 4:1
3 Ü̃pa ga pemax, rü mucüma ga taunecü penaxüecha i ngẽma chixexü̃ i nhu̱xma i ngẽma duü̃xü̃gü i tama Tupanaxü̃ cua̱xgüxü̃ ügüxü̃. Rü jexguma ga pema rü pecadu pexügüãcüma pemaxẽ, rü penaxü ga pexeneãrü ngúchaü̃, rü pengãxẽ, rü peta ga nawa pexãũgatanüxü̃ pexügü, rü ṯacü i nguchia̱xgüxü̃ poraãcü peixaxcugü, rü tupananetachicüna̱xãgüxü̃ peicua̱xüü̃gü i woo Tupana na pexna nachu̱xuxü̃ i ngẽma.
4 Rü jema duü̃xü̃gü ga namaã pexãmücügüxü̃ ga jexguma chixri pemaxẽgu, rü nhu̱xma rü poraãcü nagu narüxĩnüẽ na ṯacüca̱x tama natanügu pexãgüxü̃ rü tama nawe perüxĩxü̃ i ngẽxguma norü chixexü̃ naxügügu. Rü ngẽmaca̱x nixĩ i nhu̱xma i chixri pechiga jadexagüxü̃.
5 Notürü nümagü rü tá ta Cristupe̱xewa nangugü na namaã nüxü̃ jaxugüxü̃ca̱x na nhuxãcü namaxẽxü̃. Rü nüma ja Cristu rü ínamemare na nüxna jacachigüxü̃ca̱x i guxü̃ma i duü̃xü̃gü i maxẽxü̃ rü juexü̃.
6 Rü ngẽmaca̱x ja Tupana rü naxü̃pa na najuexü̃ i duü̃xü̃gü rü marü nüxna nanaxuaxü̃ i maxü̃ i taguma gúxü̃. Erü nanaxwa̱xe na naxrüü̃ guxü̃guma mexü̃wa namaxẽẽchaxü̃ ega woo nhama i naãnewa najuegu i naxü̃negü.
7 Rü marü ningaica na nagúxü̃ i nhama i naãne rü guxü̃ma i ṯacü i nawa ngẽxmaxü̃. Rü ngẽmaca̱x name nixĩ na ípexuãẽxü̃ rü meã peãẽ ta ipexügüxü̃ rü guxü̃guma pejumuxẽgüxü̃.
8 Rü guxü̃ãrü jexera i ngẽma pexü̃́ chanaxwa̱xexü̃ nixĩ na aixcuma pegü pengechaü̃güxü̃ i wüxichigü. Erü ngẽxguma aixcuma jigü ingechaü̃gügu rü ngẽmaãcü inajarüxo i muxü̃ma i pecadugü.
9 ¡Rü meã pegü pejauxgü i wüxichigü i pechiü̃wa! Rü tama name i tümamaã penuãẽãcüma tüxü̃ pejaxu.
10 Rü wüxichigü i pemax, rü Tupana pexna nanaxã i perü cua̱x. Rü ngẽma perü cua̱xmaã rü name nixĩ i wüxichigü pegü perüngü̃xẽẽgü, na aixcuma Tupanaãrü ngü̃xẽẽruü̃ i mexü̃ na peixĩgüxü̃ca̱x rü meã namaã pepuracüexü̃ca̱x i guxü̃ma i ngẽma cua̱x i Tupana pexna ãxü̃.
11 Rü ngẽxguma texé nüxü̃ ixuxgu i ore, rü name nixĩ i aixcuma Tupanaãrü orexü̃ tixu. Rü ngẽxguma texé togüxü̃ rüngü̃xẽẽgu, rü name nixĩ i Tupana tüxna ãxü̃ i poramaã tanaxü. Rü guxü̃ma i ngẽma pexüxü̃ rü name nixĩ i meãma penaxü na ngẽmaãcü Ngechuchu ja Cristugagu Tupanaxü̃ peicua̱xüü̃güxü̃ca̱x. Erü nüma ja Tupana rü guxü̃guma namexẽchi rü naporaxü̃chi. Rü ngẽmaãcü jiĩxü̃.
Ngẽxguma Cristuaxü̃́ jaxõ̱xgu rü ngúxü̃ tinge
12 Pa Chaueneẽgü ja Pexü̃ Changechaü̃güxex, nhu̱xma na taxü̃ i guxchaxü̃gü i perü ngu̱xẽẽruü̃ pexca̱x ínguxü̃, ¡rü tãṹ i peḇaixãchiãẽgüxü̃, nhama ṯacü i taguma nüxü̃ pedauxü̃ ngupetüxü̃rüü̃!
13 Notürü narümemaẽ nixĩ i petaãẽgüama, erü jema Cristu ngúxü̃ na ingexü̃rüü̃ nixĩ i ngúxü̃ na peingexü̃ i nhu̱xmax na petaãẽgüxü̃ca̱x i ngẽxguma wena núma naxũxgu i nümax.
14 Rü ngẽxguma Cristuaxü̃́ na pejaxõgüxü̃gagu texé pemaã guxchigagu, rü wüxi i perü taãẽ nixĩ i ngẽma. Erü ngẽmaãcü nüxü̃ pecua̱x na Tupanaãẽ i Üünexü̃ rü pewa na nangẽxmaxü̃.
15 Rü ngẽxguma chi ngúxü̃ peingegügu, rü name nixĩ na wüxi i mexü̃ na pexügüxü̃gagu na jiĩxü̃ rü tama wüxi i chixexü̃gagu na jiĩxü̃, ngẽxgumarüü̃ i máẽta rü e̱xna ngíta̱a̱x rü e̱xna togüarü guxchaxü̃wa na pegü pengẽxmagüxẽẽxü̃.
16 Notürü ngẽxguma texé Cristuaxü̃́ tajaxõxü̃gagu ngúxü̃ tingexgu, rü taxuü̃ca̱xma tü̱xcüü̃ ngẽmaca̱x taxãne. Notürü tanaxwa̱xe i ngẽmaca̱x Tupanaxü̃ ticua̱xüü̃.
17 Rü nhu̱xma rü marü nawa nangu na Tupana ngúxü̃ tüxü̃ ingexẽẽxü̃ na ngẽmaãcü tüxü̃ ijanawe̱xãchixẽẽxü̃ca̱x i jixema na naxãcügü ixĩgüxü̃. Rü ngẽxguma ngẽmaãcü tamaã inaxügüãgu, rü ¿nhuxãcü tá nüxü̃ naxüpetü i ngẽma duü̃xü̃gü i tama Tupanaãrü ore i mexü̃ga ĩnüẽchaü̃xü̃?
18 Erü Tupanaãrü ore i ümatüxü̃wa rü nhanagürü:“Ngẽma duü̃xü̃gü i mexü̃ ügüxü̃ rü guxchaãcüma nanajauxgü i maxü̃ i taguma gúxü̃. Rü nhu̱xma na ngẽmaãcü jiĩxü̃, ¿rü nhuxãcü tá nüxü̃ nangupetüxü̃ i ngẽma duü̃xü̃gü i chixexü̃ ügüxü̃ rü pecaduã̱xgüxü̃?”
nhanagürü.
19 Rü ngẽmaca̱x ja jíxema Tupana naxwa̱xexü̃ãcüma ngúxü̃ ingegüxe, rü name nixĩ na mexü̃ taxügüechaxü̃ rü Tupana ja tüxü̃ ücüme̱xẽgu na tanaxüxü̃ i tümaãẽ na nüxna tüxü̃́ nadauxü̃ca̱x. Erü nüma ja Tupana rü mecü nixĩ rü taguma texéxü̃ nawomüxẽẽ.
