1 Reis 12:1-33
12 Rü nüma ga Charumáu nane ga Robuáũ rü ĩane ga Chiquéü̃wa naxũ yerü guxü̃ma ga Iraéuanecüã̱xgü yéma naxĩ nax yéma ãẽ̱xgacüxü̃ yangucuchixẽẽgüaxü̃ca̱x.
2 Notürü ga Nebáchi nane ga Yerubuã́ũ ga ü̃paacü Charumáucha̱xwa Eyítuanewa nhacü, rü yéma nüxü̃ nacuáchiga nax ãẽ̱xgacüxü̃ yangucuchixü̃ ga Robuáũ.
3 Rü Yerubuã́ũca̱x nangemagü ga namücügü. Rü nüma rü Iraéuaneca̱x natáegu rü guxü̃ma ga Iraéuanecüã̱xgümaxã ãẽ̱xgacü ga Robuáũxü̃tawa naxĩ nax namaxã yadexagüxü̃ca̱x. Rü nhanagürügü nüxü̃:
4 —Gumá cunatü ga Charumáu rü poraãcü taxü̃ ga diẽru toxü̃tawa nayaxu. Rü nhu̱xmax i cuma rü tama tanaxwa̱xe i cunatürüxü̃ quixĩ. Rü tanaxwa̱xe i toxü̃́ ícunaxĩxẽẽxü̃ i ngẽma. Rü ngẽxguma tomaxã cumecümagu rü toxü̃́ ícunaxĩxẽẽgu rü mea tomaxã icucua̱xgux, rü tá cuga taxĩnüe rü cuxü̃́ tapuracüe —nhanagürügü.
5 Rü nüma ga Robuáũ nanangãxü̃ga rü nhanagürü: —¡Ípixĩ rü tamaepü̱x i ngunexü̃guwena nua pexĩ! —nhanagürü. Rü nüma ga duü̃xü̃gü rü nawoegu.
6 Rü yexgumayane ga nüma ga ãẽ̱xgacü ga Robuáũ rü naxca̱x nangema ga yema ucu̱xẽruü̃gü ga nanatü ga Charumáuaxü̃́ puracüexü̃ ga yexguma namaxü̱̃xgux. Rü nüxna naca rü nhanagürü: —¿Ta̱xacümaxã i choxü̃ pexucu̱xẽxü̃ i pemax, rü nhuxãcü tá chanangãxü̃gaxü̃ i nhaa duü̃xü̃gü? —nhanagürü.
7 Rü nümagü rü nanangãxü̃gü rü nhanagürügü: —Ngẽxguma chi mea quixĩxgu namaxã i nhaa duü̃xü̃gü rü mexü̃ i dexamaxã cunangãxü̃gagu, rü nümagü rü guxü̃gutáma cuxme̱xwa nügü nangexmagüxẽxẽ —nhanagürügü.
8 Notürü ga Robuáũ rü tama yema nanatüarü ucu̱xẽruü̃güaxü̃́ inaxĩnü. Rü naxca̱x nangema ga yema namücügü ga wüxigu namaxã yaexü̃ rü nüxü̃́ puracüexü̃, rü nüxna naca rü nhanagürü:
9 —¿Ta̱xacümaxã i choxü̃ pexucu̱xẽxü̃ i pemax? ¿Rü nhuxãcü tá chanangãxü̃gaxü̃ i nhaa duü̃xü̃gü i choxna cagüxü̃ nax namaxã íchanaxĩxẽẽxü̃ca̱x i ngẽma diẽru i natanüwa chayaxuxü̃ rü tama chaunatürüxü̃ poraãcü taxü̃ i diẽru natanüwa chayaxuxü̃ca̱x? —nhanagürü.
10 Rü nümagü ga yema namücügü ga namaxã wüxigu yaexü̃ rü nanangãxü̃gagü rü nhanagürügü: —Ngẽma duü̃xü̃gü i cuxna cagüxü̃ nax tama cunatürüxü̃ taxü̃ i diẽru natanüwa cuyaxuxü̃ca̱x rü nhaãcü tá cunangãxü̃: “Gumá chaunatü rü poraãcü pexü̃ namu, notürü i chama rü tá norü yexera poraãcü pexü̃ chamu.
11 Rü aixcuma nixĩ ga chaunatü rü poraãcü taxü̃ ga diẽru petanüwa nayaxu notürü i chamax rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, notürü i chama rü tá cua̱i̱xruxü̃ i férumaxã ãpe̱xexü̃maxã pexü̃ chicua̱i̱xgüxü̃” —nhanagürügü nüxü̃.
12 Rü yema ãẽ̱xgacü ga Robuáũ nüxü̃ ixuxü̃rüxü̃, rü tamaepü̱x ga ngunexü̃ ngupetüguwena rü wenaxarü Robuáũca̱x natáegu ga Yerubuã́ũ namaxã ga guxü̃ma ga duü̃xü̃gü.
13 Notürü nüma ga ãẽ̱xgacü ga Robuáũ rü nanuãcüma nanangãxü̃, rü tama naga naxĩnü ga yema nanatüarü ucu̱xẽruü̃gü ga yaexü̃.
14 Rü duü̃xü̃gümaxã nüxü̃ nixu ga yema ore ga namücügü ga namaxã wüxigu yaexü̃ nüxü̃ ixugüxü̃, rü nhanagürü: —Aixcuma nixĩ ga chaunatü rü poraãcü taxü̃ ga diẽru petanüwa nayaxuxü̃ notürü i chama rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, notürü i chama rü tá cua̱i̱xruxü̃ i férumaxã ãpe̱xexü̃maxã pexü̃ chicua̱i̱xgüxü̃ —nhanagürü.
15 Rü yemaacü ga nüma ga ãẽ̱xgacü rü tama yema duü̃xü̃güga naxĩnü yerü woetama Cori ya Tupana rü yemaacü nayaxĩxẽxẽ nax yanguxü̃ca̱x ga norü ore ga Nebáchi nane ga Yerubuã́ũmaxã nüxü̃ yaxuxü̃ naa̱xwa ga norü orearü uruxü̃ ga Aía ga Chírucüã̱x.
16 12:16-17 Rü yexguma yema duü̃xü̃gü nüxü̃ icua̱xãchitanügu nax nüma ga ãẽ̱xgacü tama nayauxãxü̃ ga yema naxca̱x ínacagüxü̃, rü inanaxügüe nax yaxáixchaxü̃ rü nhagüxü̃: —Taxuwama tüxü̃́ name i Dawí rü natanüxü̃gü. ¡Ngĩxã tachixü̃aneca̱x tawoegu! ¡Rü Robuáũ rü natanüxü̃güarü ãẽ̱xgacü yixĩ rü tama i tóxrü! —nhagüxü̃. Rü guxü̃ma nawoegu. Rü yema Yudátanüxü̃xica yéma nayaxügü rü Robuáũxü̃ nayauxgü ga ãẽ̱xgacü nax yixĩxü̃.
17 Nüü̃ nadau 12:16
18 Rü nüma ga ãẽ̱xgacü ga Robuáũ rü nanamu ga norü ngü̃xẽẽruxü̃ ga Aduráũ ga norü puracümaxã icuácü. Rü namaxã nüxü̃ nixu nax norü puracüca̱x nangutaque̱xexẽẽãxü̃ca̱x ga yema Iraéuanecüã̱xgü ga tama naga ĩnüechaü̃xü̃. Notürü nüma ga yema duü̃xü̃gü rü nanueama rü nutamaxã Aduráũxü̃ nima̱xgü. Rü yexguma yemaxü̃ nacua̱xgu ga ãẽ̱xgacü ga Robuáũ rü paxa naweü̃ ga cowaru itúchigünegu nixüe rü Yerucharéü̃wa nanha.
19 Rü yemaacü ga yema togü ga Iraéuanecüã̱xgü rü nanue Robuáũmaxã rü guxü̃ma ga Dawítanüxü̃maxã. Rü nhu̱xmax rü ta ngẽmaãcü nixĩ.
20 Rü guxü̃ma ga yema Iraéuanecüã̱xgü ga tama Robuáũga ĩnüechaü̃xü̃ rü nüxü̃ nacuáchigagü nax Eyítuanewa ne naxũxü̃ ga Yerubuã́ũ. Rü yemaca̱x ga yema duü̃xü̃gü rü Yerubuã́ũca̱x nangemagü nax namaxã nangutaque̱xexü̃ca̱x. Rü nayangucuchixẽẽgü nax Iraéuanecüã̱xarü ãẽ̱xgacü yixĩxü̃ca̱x. Rü guxü̃ma ga yema duü̃xü̃gü rü Yerubuã́ũwe narüxĩ. Rü Yudátanüxü̃xicatama nixĩ ga naxwa̱xegüxü̃ ga Dawítaxa ga Robuáũwe rüxĩxü̃.
21 --
22 --
23 --
24 --
Yerubuã́ũ rü Iraéuanecüã̱xgüxü̃ namu nax tupananetachicüna̱xãgüxü̃ yacua̱xüü̃güxü̃ca̱x
25 Rü nüma ga Yerubuã́ũ rü wenaxarü nanamexẽxẽ ga guma ĩane ga Chiquéü̃ ga Efraĩ́arü ma̱xpǘneanewa yexmane. Rü gumagu naxãchiü̃ ga nüma ga ãẽ̱xgacü ga Yerubuã́ũ. Rü guma Chiquéü̃ namexẽẽguwena rü nanamexẽxẽ ga guma ĩane ga Penué.
26 Notürü ga nüma ga Yerubuã́ũ rü nhaxü̃gu narüxĩnü: “Ngẽxguma taxũtáma chaxũãxẽgu, rü ngürüãchi ngẽma Dawítanüxü̃ rü tá choxü̃ ínata̱xüchigü nax Iraéuanecüã̱xarü ãẽ̱xgacü chixĩxü̃.
27 Rü ngẽxguma nhaa duü̃xü̃gü Yerucharéü̃wa ĩxgu nax tupauca ya taxü̃negu Cori ya Tupanaca̱x naxü̃nagü yadaixü̃ca̱x, rü ngürüãchi tá Robuáũ ya Yudáanearü ãẽ̱xgacüxü̃ nangechaü̃gü, rü tá choxü̃ nima̱xgü, rü wena táxarü Robuáũwe narüxĩ”, nhaxü̃gu narüxĩnü ga Yerubuã́ũ.
28 Rü norü ucu̱xẽruü̃güna naca ga yemachiga. Rü yemawena ga nüma ga ãẽ̱xgacü ga Yerubuã́ũ rü taxre ga wocaxacü ga úirunaxca̱x naxü̱xẽxẽ rü duü̃xü̃güxü̃ nhanagürü: —Pemax, Pa Iraéuanecüã̱xgüx, rü wüxi i taxü̃ i guxchaxü̃ nixĩ nax Yerucharéü̃wa pexĩĩĩxü̃ nax ngẽ́ma Tupanaxü̃ peyarücua̱xüü̃güxü̃ca̱x. Rü dücax, nhaa wocaxacüchicüna̱xãgü nixĩ i perü tupanagü ga Eyítuanewa pexü̃ ígaxü̃xü̃ —nhanagürü.
29 Rü yexguma rü ĩane ga Betéugu nanaxǘ ga wüxi, rü yema to rü ĩane ga Dáü̃gu nanaxǘ.
30 Rü yemagagu nixĩ ga chixexü̃gu nayi̱xiixü̃ ga Iraéuanecüã̱xgü. Rü yema duü̃xü̃gü rü Betéuwa rü Dáü̃wa naxĩĩxü̃ nax yema wocaxacüchicüna̱xãgüxü̃ yanacua̱xüü̃güxü̃ca̱x.
31 --
32 --
33 --
