1 Reis 13:1-34
13 Rü yexguma Betéuwa Yerubuã́ũ pumárate̱xe íiguyane nawa ga ãmaregüarü guchicaxü̃, rü yéma nangu ga wüxi ga orearü uruxü̃ ga Yudáanewa ne ũxü̃ ga Cori ya Tupana yéma Yerubuã́ũxü̃tawa muxü̃.
2 Rü Cori ya Tupana namuxü̃ãcüma tagaãcü yema ãmaregüarü guchicaxü̃chiga nidexa rü nhanagürü: —Pa Ãmaregüarü Guchicaxü̃x, Pa Ãmaregüarü Guchicaxü̃x, rü Cori ya Tupana rü nhanagürü: “Dawítanüxü̃wa tá nabu i wüxi i õxchana rü Yochía tá nixĩ i naéga. Rü nüma tá nixĩ i cuwa ínaguaxü̃ i ngẽma tupananetachicüna̱xãgüarü chacherdótegü i nhu̱xmax cuwa pumárate̱xe ígugüxü̃. Rü ngẽmaãcü duü̃xü̃güchina̱xã tá cuétüwa ínagu” —nhanagürü.
3 Rü yematama ngunexü̃gu ga yema orearü uruxü̃ rü ãẽ̱xgacümaxã nüxü̃ nixu ga wüxi ga cua̱xruxü̃ nax yemawa nüxü̃ nacuáxü̃ca̱x nax aixcuma Tupanaarü ore yixĩxü̃ ga nüxü̃ yaxuxü̃, rü nhanagürü: —Nhaa nixĩ i cua̱xruxü̃ i Cori ya Tupana nüxü̃ ixuxü̃: “Rü nhaa ãmarearü guchicaxü̃ rü tá nangĩãchi rü yima tanimuca ya naétüwa ngẽxmacü rü tá nagüane” —nhanagürü.
4 Rü yexguma nüma ga ãẽ̱xgacü ga Yerubuã́ũ nüxü̃ ĩnügu ga yema ore ga Tupanaarü orearü uruxü̃ nüxü̃ ixuxü̃ nachiga ga yema ãmarearü guchicaxü̃ ga Betéuwa yexmaxü̃, rü nüma ga Yerubuã́ũ rü nanu rü naxunagüme̱xẽ rü norü purichíagüxü̃ namu rü nhanagürü: —¡Peyaya̱xux! —nhanagürü. Notürü guma naxme̱x ga naxunagüne rü namaxã nüxü̃ naxunetane rü yéma nayataitü rü marü taxuacüma narüxuechacüxü.
5 Rü yexgumatama ga yema ãmarearü guchicaxü̃ rü nangĩãchi rü guma tanimuca ga naétüwa yexmacü rü nagüane yema Cori ya Tupanaarü orearü uruxü̃ nüxü̃ ixuxü̃rüxü̃. Rü yemawa nango̱x nax aixcuma Tupana yixĩxü̃ ga namuxü̃ nax nüxü̃ yaxuxü̃ca̱x ga yema ore.
6 Rü yexguma ga nüma ga ãẽ̱xgacü rü yema orearü uruü̃na naca rü nhanagürü: —Cuxü̃ chaca̱a̱xü̃, rü ¡Cori ya curü Tupanana naca nax ngẽmaãcü charümeméxü̃ca̱x! —nhanagürü. Rü nüma ga orearü uruxü̃ rü Cori ya Tupanana naca, rü yemaacü narümexme̱x ga guma ãẽ̱xgacü, rü noxrirüü̃tama nixĩ.
7 Rü yemawena ga nüma ga ãẽ̱xgacü rü yema orearü uruü̃xü̃ nhanagürü: —¡Ngĩxã rü chawe rüxũ i chauchiü̃wa nax ngẽ́ma íraxü̃ cungṍxü̃ca̱x! Rü tá wüxi i ãmare cuxna chaxã —nhanagürü.
8 Notürü nüma ga orearü uruxü̃ rü ãẽ̱xgacüxü̃ nangãxü̃ga rü nhanagürü: —Woo chi norü ngãxü̃ i curü ngẽmaxü̃gü i cuchiü̃wa ngẽxmagüxü̃ choxna cuxãxgu, rü taxũchima cuwe charüxũ, rü taxũchima chachibü, rü taxũchima chaxaxe i nhaa nachicawa.
9 Yerü yemaacü choxü̃ namu ga Cori ya Tupana. Rü nhanagürü choxü̃: “¡Taxũtáma cuchibü rü taxũtáma cuxaxe rü taxũtáma ngẽma nama i noxri nagu quixũxü̃gu cutáegu!” nhanagürü.
10 Rü nüma ga yema orearü uruxü̃ rü to ga namagu natáegu nax tama yema nama ga noxri Betéuwa nagu ne naxũxü̃gu natáeguxü̃ca̱x.
11 Rü yexguma rü Betéugu naxãchiü̃ ga wüxi ga orearü uruxü̃ ga marü yacü. Rü guma nanegü rü namaxã nüxü̃ nixugüe ga guxü̃ma ga yéma Betéuwa naxüxü̃ ga guma orearü uruxü̃ ga Yudáanecüã̱x. Rü yexgumarüxü̃ ta nanatümaxã nüxü̃ nixugüe ga yema ore ga ãẽ̱xgacü nüxü̃ ixuxü̃.
12 Rü tümax ga nanatü rü tümanegüna taca rü nhatagürü: —¿Ngexü̃rüüxü̃ i namagu natáeguxü̃? —nhatagürü. Rü nüma ga tümanegü rü tümamaxã nüxü̃ nixugüe ga yema nama ga nagu natáeguxü̃ ga guma orearü uruxü̃ ga Yudáanecüã̱x.
13 Rü yexguma ga nüma ga orearü uruxü̃ rü nanegüxü̃ nhanagürü: —¡Paxa cha̱u̱xca̱x penaxüxmawe̱e̱x i chorü búru! —nhanagürü. Rü nümagü rü nanamexẽẽgü ga yema búru, rü yematagu natonagü ga nanatü.
14 Rü nüma rü gumá orearü uruxü̃ ga Yudáanecüã̱xwe nangẽ. Rü nüxü̃ inayangau nax wüxi ga carabáyutüü̃wa natoxü̃. Rü nüxna naca rü nhanagürü: —¿Cuma quixĩxü̃ i orearü uruxü̃ i Yudáanewa ne cuxũxü̃? —nhanagürü. Rü nüma nanangãxü̃ga rü nhanagürü: —Chama chixĩ —nhanagürü.
15 Rü yexguma ga gumá orearü uruxü̃ ga yacü rü nhanagürü nüxü̃: —¡Ngĩxã chauchiü̃wa taxĩ nax ngẽ́ma ichibüexü̃ca̱x! —nhanagürü.
16 Notürü nüma ga gumá orearü uruxü̃ ga Yudáanecüã̱x rü nanangãxü̃ga rü nhanagürü: —Taxuacüma cuxü̃ íchixümücü rü taxuacü cuchiü̃gu chaxücu, rü taxuacüma chachibü rü taxuacüma chaxaxe i nhaa nachicawa.
17 Erü nüma ya Cori ya Tupana rü meama chamaxã nüxü̃ nixu nax tama nua chachibüxü̃ca̱x rü chaxaxexü̃ca̱x rü tama ngẽma nama ga noxri nagu chixũxü̃gu chatáeguxü̃ca̱x —nhanagürü.
18 Notürü nüma ga guma yacü ga orearü uruxü̃ rü nhanagürü: —Chama rü ta cuxrüxü̃ orearü uruxü̃ chixĩ. Rü Cori ya Tupanaarü orearü ngeruxü̃ i dauxü̃cüã̱x choxü̃ namu nax chauchiü̃wa cuxü̃ chagaxü̃ca̱x rü ngẽ́ma cuxü̃ nax chachibüxẽẽxü̃ca̱x, rü cuxü̃ nax chaxaxexẽẽxü̃ca̱x —nhanagürü. Notürü doramare nixĩ ga yema nüxü̃ yaxuxü̃ ga guma orearü uruxü̃ ga yacü.
19 Rü yexguma ga gumá orearü uruxü̃ ga Yudáanecüã̱x rü düxwa nawe narüxũ rü nachiü̃wa nayachibü rü nayaxaxe.
20 Rü yexguma nügümaxã mechawa natogügu ga guma taxre rü nüma ga Cori ya Tupana rü guma yacü ga orearü uruü̃maxã nidexa.
21 13:21-22 Rü nüma rü tagaãcü gumá orearü uruxü̃ ga Yudáanecüã̱xü̃ nhanagürü: —Nüma ya Cori ya Tupana rü cumaxã nüxü̃ nixu rü ngẽma tama naga nax cuxĩnüxü̃ ga yema cuxü̃ namuxü̃wa, rü cugü nax cutáeguxü̃ nax cuchibüxü̃ca̱x rü cuxaxexü̃ca̱x i ngextá Cori ya Tupana tama cuxü̃́ ínaxwa̱xexü̃wa, rü ngẽmagagu rü taxũtáma curü o̱xigü íta̱xgüxü̃gu cuta̱x —nhanagürü.
22 Nüü̃ nadau 13:21
23 Rü yexguma marü chibüwa rü axewa yanguxgu ga guma orearü uruxü̃ ga Yudáanecüã̱x, rü nüma ga orearü uruxü̃ ga yacü rü nüxü̃́ nanamexẽxẽ ga norü búru.
24 Rü nüma ga gumá orearü uruxü̃ ga Yudáanecüã̱x rü ínixũ. Notürü namagu nüxü̃ nangau ga wüxi ga ai rü yexma nayama̱x. Rü yema naxü̃ne rü namagu naxǘ. Rü yema búru rü yema ai rü naxü̃tagu narücho ga yema naxü̃ne.
25 Rü yexgumayane yéma nachopetü ga nhuxre ga duü̃xü̃gü rü nüxü̃ nadaugü ga naxü̃ne ga namagu ǘxü̃ rü yema ai ga naxü̃nexü̃tagu irüxã́ũxü̃. Rü yexguma guma ĩane ga guma orearü uruxü̃ ga yacü nagu pexü̃newa nangugügu ga yema duü̃xü̃gü, rü nüxü̃ nixuchigagü ga yema nüxü̃ nadaugüxü̃.
26 Rü yexguma guma orearü uruxü̃ ga yacü nüxü̃ nacua̱xgu ga gumá nax yixĩxü̃ ga gumá orearü uruü̃xü̃ ga natáeguxẽẽãcü, rü aita naxü rü nhanagürü: —Yimá yixĩxü̃ ya yimá orearü uruxü̃ ya tama Cori ya Tupanaga ĩnücü. Rü ngẽmaca̱x i nüma ya Cori ya Tupana rü wüxi i ai nape̱xegu namu nax ngẽmaãcü nagu nawagüxü̃ca̱x rü yamáaxü̃ca̱x, yema Cori ya Tupana namaxã nüxü̃ ixuxü̃ãcüma —nhanagürü.
27 Rü yexgumatama nanegüxü̃ namu ga naxca̱x nax namexẽẽgüaxü̃ca̱x ga wüxi ga búru. Rü nüma ga nanegü rü naxca̱x nanamexẽẽgü.
28 Rü yexguma ga guma orearü uruxü̃ ga yacü rü ínayadau. Rü yexma namagu nüxü̃ nayangau ga naxü̃ne rü yema búru rü yema ai ga yema naxü̃nexü̃tagu írüchoxü̃. Rü nüma ga ai rü tama yema naxü̃nexü̃ nangõ̱x rü tama tüxü̃ nima̱x ga guxema búru.
29 Rü yexguma ga nüma ga orearü uruxü̃ ga yacü rü gumá orearü uruxü̃ ga Yudáanecüã̱xü̃ne nangenagü rü búrutagu nanaxǘnagü. Rü norü ĩanewa nanange nax naxca̱x naxaxuxü̃ca̱x rü inatáãxü̃ca̱x.
30 Rü nüma naxüxü̃ ga naxmaxü̃gu nayaxücuchi ga naxü̃ne. Rü naxca̱x naxaxu rü nhanagürü: —Poraãcü cuxca̱x changechaü̃, Pa Chauenexẽ —nhanagürü.
31 Rü yexguma marü yexma yaxücuchiãguwena, rü nanegüxü̃ nhanagürü: —Ngẽxguma chama chayu̱xgu ¡rü ngẽma naxmaxü̃ i ngẽma Tupanaarü orearü uruxü̃ nagu chixücuchixü̃gu tátama choxü̃ pixücuchi! ¡Rü yima chauxchina̱xãgü rü naxchina̱xãxü̃tagu tátama penanu!
32 Erü aixcuma tá ningu i guxü̃ma ga yema Cori ya Tupana nüxü̃ nüxü̃ ixuxẽẽxü̃ nachiga i ngẽma tupananetaarü ãmarearü guchicaxü̃ i Betéuwa ngẽxmaxü̃, rü nachiga i guxü̃ma i ngẽma togü i ãmarearü guchicaxü̃ i Chamáriaanecüã̱xarü ĩanegüwa ngẽxmagüxü̃ —nhanagürü.
33 Rü woo yemaacü Tupana nüxü̃ nax nüxü̃ dauxẽẽxü̃, rü nüma ga ãẽ̱xgacü ga Yerubuã́ũ rü tama nüxü̃ narüxo ga yema chixexü̃ ga nagu naxĩnüxü̃. Rü wenaxarü duü̃xü̃güxü̃ naxuneta ga chacherdóte nax yixĩgüxü̃ca̱x nawa ga guma ngutaque̱xepataxü̃ ya norü tupananetachicüna̱xãca̱x ixĩgüne. Rü guxema tüxü̃́ nangúchaü̃xe, rü nüma ga Yerubuã́ũ rü chíxü̃maxã tüxü̃ nabaeru, rü chacherdótexü̃ tüxü̃ ningucuchixẽxẽ nawa ga guma ngutaque̱xepataü̃gü.
34 Rü yema Yerubuã́ũ üxü̃gagu nixĩ ga chixexü̃gu nayi̱xü̃ ga nataagü rü yanaxoxü̃ ga guxü̃ma.
