1 Reis 17:1-24
17 Rü nüma ga Tupanaarü orearü uruxü̃ ga Ería, ga Yiriáyiarü naanewa yexmane ga ĩane ga Tibécüã̱x, rü Acábixü̃ nhanagürü: —Yimá nüxü̃́ chapuracücü ya Cori ya Iraéuanecüã̱xgüarü Tupanaégagu cumaxã nüxü̃ chixu, rü dama taunecügu rü tagutáma napu rü bai tá i cherena nax rünguxü̃ nhu̱xmatáta chama wena nüxü̃ chixu —nhanagürü.
2 Rü yemaca̱x ga Cori ya Tupana rü Eríaxü̃ nhanagürü:
3 17:3-4 —¡Ínaxũxũ i nua rü üa̱xcü ne ũxü̃waama naxũ! ¡Rü natü i Yurdáũarü léstewaama ngẽxmaxü̃ i natüxacü i Queríchigu yarücu̱x! Rü ngẽma natüxacüwa tá cuxaxe rü nangurucuraxü̃xü̃ tá chamu nax ngẽ́ma cuxü̃ nangewemügüxü̃ca̱x —nhanagürü.
4 Nüü̃ nadau 17:3
5 Rü nüma ga Ería rü nanaxü ga yema Cori ya Tupana namaxã nüxü̃ ixuxü̃. Rü natü ga Yurdáũarü léstewaama naxũ, rü yema natüxacü ga Queríchixü̃tawa nayayexma.
6 Rü nümagü ga nangurucuraxü̃xü̃ rü pa̱xmama rü yáuanecü poũ rü namachi Eríaca̱x yéma nangegüxü̃. Rü yema natüxacüwa naxaxe ga Ería.
7 Notürü marü nhuxre ga ngunexü̃ ngupetü̱xgux rü yema natüxacü rü nipa yerü taguma napu ga yema nachixü̃anewa.
Ería rü yutecü ga ĩane ga Charépacüã̱x
8 Rü yexguma ga Cori ya Tupana rü Eríaxü̃ nhanagürü:
9 —¡Ĩane ya Charépa ya Chidóü̃anewa ngexmanewa naxũ, rü ngẽxma yarüxã̱ũ̱x rü ngẽxma nape! Rü marü ngĩxü̃ chamu i wüxi i yutecü i ngẽxma ãchiü̃cü nax cuxü̃ nachibüxẽẽxü̃ca̱x —nhanagürü.
10 Rü nüma ga Ería rü inaxũãchi, rü ĩane ga Charépawa naxũ. Rü yexguma guma ĩanearü ũũchiwa nanguxgu, rü yéma ngĩxü̃ nadau ga wüxi ga yutecü ga yéma üxüwa ũcü. Rü ngĩxca̱x naca rü nhanagürü ngĩxü̃: —¿Taxũchima cuxü̃́ name i wüxi i axepáxü̃gu dexá choxü̃́ nuata cunge nax chaxaxexü̃ca̱x? —nhanagürü.
11 Rü yemata̱a̱x marü yéma nangeagu, rü nüma ga Ería rü wenaxarü ngĩxna naca, rü nhanagürü ngĩxü̃: —¿Tauchi cuxü̃́ name ega wüxichipe̱xe ta i poũ nua choxü̃́ cungexgu? —nhanagürü.
12 Notürü ga ngĩma rü inangãxü̃ga rü ngĩgürügü: —Cori ya Tupanaégagu cumaxã nüxü̃ chixu rü choxü̃́ nataxuma i poũ. Rü wüxime̱xẽãcu i trígute̱xexicatama choxü̃́ nangexma ya wüxi ya tü̃xü̃wa, rü íxraxü̃ i chíxü̃ i naxchiü̃wa. Rü ngẽmaca̱x nixĩ i üxüta chayayaxuxü̃ nax íxraxü̃ i poũ chaxüxü̃ca̱x nüxü̃́ ya chaune rü chaugüca̱x rü ngẽmawena rü taiyamaxã tá tayue —ngĩgürügü.
13 Rü nüma ga Ería rü ngĩxü̃ nangãxü̃ga rü nhanagürü: —¡Taxuca̱xma cumuü̃! ¡Rü cü yaxü i ngẽma nüxü̃ quixuxü̃! Notürü i ngẽma curü trígute̱xe i cuxü̃́ ngẽxmaxü̃wa ¡rü choxü̃́ naxüxíra i wüxi i íxraxü̃ i poũ i maixcuraxü̃ rü nua choxü̃́ nange, rü ngẽmawena rü cugüaxü̃́ rü cuneaxü̃́ naxü!
14 Erü nüma ya Cori ya Iraéuanecüã̱xarü Tupana, rü nüxü̃ nixu rü ngẽma curü trígute̱xe i tü̃xü̃wa ngẽxmaxü̃ rü ngẽma curü chíxü̃ i naxchiü̃wa ngẽxmaxü̃ rü tagutáma nagu̱x, rü nhu̱xmatáta Cori ya Tupana nhama i naanegu napuxẽẽx —nhanagürü.
15 Rü ngĩma ga yema yutecü rü iyaxũ rü inaxü ga yema Ería ngĩmaxã nüxü̃ ixuxü̃. Rü yemaacü ga ngĩma rü ngĩne rü Ería rü muxü̃ma ga ngunexü̃güca̱x naxãwemügü.
16 Rü taguma nagu̱x ga trígute̱xe ga tü̃xü̃wa rü yema chíxü̃ ga naxchiü̃wa yema Cori ya Tupana Eríawa nüxü̃ yaxuxü̃rüxü̃.
17 Notürü wüxi ga ngunexü̃gu rü nida̱xawe ga yema yutecü ngĩne rü nayu.
18 Rü yexguma ga ngĩma ga yema yutecü rü Eríaxü̃ ngĩgürügü: —¿Ta̱xacü chamaxã cuxü Pa Tupanaarü Orearü Ngeruxü̃x? ¿Rü nua cuxũ nax choxna nüxü̃ cucua̱xãchixẽẽxü̃ i chorü chixexü̃gü rü ngẽmagagu cunayuxẽẽxü̃ ya chaune? —ngĩgürügü.
19 Rü nüma ga Ería ngĩxü̃ nangãxü̃ga rü nhanagürü: —¡Nua namu ya cune! —nhanagürü. Rü yema yutecüxünewa nanaganagü, rü yema ucapu ga nagu napexü̃gu nanagacuchi, rü norü pechicaxü̃gu nayacaxẽxẽ.
20 Rü yemawena ga Ería rü tagaãcü Cori ya Tupanana naca rü nhanagürü: —Pa Cori ya Chorü Tupanax ¿rü ngúxü̃ tá ẽ̱xna ngĩxü̃ quingexẽxẽ i nhaa yutecü i ngĩchiü̃gu chapecü, rü ngẽmaca̱x cunayuxẽẽxü̃ ya ngĩne? —nhanagürü.
21 Rü yexgumatama ga Ería rü tamaepü̱xcüna guxema buxeétü nayarünhuãchi rü tagaãcü Cori ya Tupanana naca rü nhanagürü: —Pa Corix, Pa Chorü Tupanax, rü cuxü̃ chaca̱a̱xü̃ nax wena cunamaxẽẽxü̃ca̱x i nhaa buxü̃ —nhanagürü.
22 Rü nüma ga Cori ya Tupana rü nüxü̃ naxĩnü ga Ería nüxü̃ naca̱a̱xü̃xü̃. Rü wenaxarü tüxü̃ namaxẽxẽ ga guxema buxe.
23 Rü yexgumatama ga Ería rü tüxü̃ naganagü ga guxema buxe rü yema ínapexü̃wa tümamaxã ínarüxĩ rü ĩpatachiü̃ ga nhaxtüguxü̃wa tüxü̃ naga. Rü tümaéna tüxü̃ nayamu, rü ngĩxü̃ nhanagürü: —¡Dücax, nüxü̃ nadau ya cune rü namaxü̃! —nhanagürü.
24 Rü ngĩma ga yema nge rü inangãxü̃ga rü ngĩgürügü: —Nhu̱xmawaxi nixĩ i meama nüxü̃ chacuáxü̃ i Tupanaarü duü̃xü̃ nax quixĩxü̃ rü ngẽma nüxü̃ quixuxü̃ rü Cori ya Tupanawa ne naxũxü̃ —ngĩgürügü.
