1 Reis 19:1-21
19 Rü nüma ga Acábi rü naxma̱x ga Yechabémaxã nüxü̃ nixu ga guxü̃ma ga yema Ería üxü̃, rü nhuxãcü nax nadaü̃naãxü̃ ga yema Baáarü orearü uruü̃gü.
2 Rü yexguma ga Yechabé rü wüxi ga ngĩrü duü̃xü̃xü̃ imu ga Eríamaxã nüxü̃ nax yanaxuxü̃ca̱x ga ngĩrü dexa rü nhanagürü: —Cuma rü Ería quixĩ rü chamax rü Yechabé chixĩ. Rü cumaxã nüxü̃ chixu rü name nixĩ i chorü tupanagü poraãcü choxü̃ napoxcu ega moxü̃ nhama i oragu tama cumaxã chanaxü̱xgu i ngẽma Baáarü orearü uruü̃gümaxã cuxüxü̃ —ngĩgürügü.
3 Rü nüma ga Ería rü nüxü̃ nicua̱xãchi ga ãũcümaxü̃wa nax nayexmaxü̃, rü yemaca̱x ĩane ga Bechéba ga Yudáanewa yexmanewa nanha. Rü yéma nanata̱x ga gumá norü ngü̃xẽẽruxü̃.
4 Rü yemawena rü taxúema íxãchiü̃xü̃wa naxũ. Rü wüxi ga ngunexü̃ inixũ, rü wüxi ga naixtüü̃wa nayarütoõchi. Rü nügügu naxĩnügu rü nayuxchaü̃. Rü yemaca̱x Cori ya Tupanaxü̃ nhanagürü: —¡Marütama Pa Corix, rü choxna nayaxu i nhaa chorü maxü̃! Erü woetátama chayu rü narümemae nax nhu̱xmatama chayuxü̃ —nhanagürü.
5 Rü yexma naixtüü̃gu naca rü yéma nape. Notürü wüxi ga dauxü̃cüã̱x ga Tupanaarü orearü ngeruxü̃ rü yéma nangu rü nüxü̃ yangṍgüãcüma nhanagürü nüxü̃: —¡Írüda rü nachibü! —nhanagürü.
6 Rü Ería rü nanadauáane, rü nüxü̃ nadau ga naeruxü̃tagu naxǘxü̃ ga wüxi ga poũ ga maixcuraxü̃ ga üxüétüwa iguxü̃ rü dexá ga yexma üweü̃xü̃. Rü yexguma ga nümax rü ínarüda rü nachibü rü naxaxe. Rü yemawena rü wena inaca.
7 Notürü ga Cori ya Tupanaarü orearü ngeruxü̃ ya dauxü̃cüã̱x rü wenaxarü Eríaxü̃tawa naxũ. Rü ínayaba̱i̱xgü, rü nhanagürü nüxü̃: —¡Írüda rü nachibü! Erü yáxü̃gu tá quixũ i ngẽma ícuxũxü̃wa —nhanagürü.
8 Rü nüma ga Ería rü ínarüda, rü nachibü rü naxaxe. Rü yema õna rü pora nüxna naxã. Rü 40 ga ngunexü̃ rü 40 ga chütaxü̃ nixũ nhu̱xmata nawa nangu ga guma ma̱xpǘne ga Orébi. (Rü gumawa nixĩ ga Tupana ga Moichéca̱x nangóxü̃.)
9 Rü yexguma guma ma̱xpǘnewa nanguxgu ga Ería rü wüxi ga ãxmaxü̃gu naxücu, rü yéma nanangupetüxẽxẽ ga chütaxü̃. Rü nüma ga Cori ya Tupana rü namaxã nidexa, rü nhanagürü nüxü̃: —¿Ta̱xacü nua cuxü, Pa Eríax? —nhanagürü.
10 Rü nüma ga Ería nanangãxü̃ga rü nhanagürü: —Poraãcü naétüwa chachogü i curü ore, Pa Chorü Cori ya Tupana ya Guxü̃étüwa Ngẽxmacüx. Erü ngẽma Iraéuanecüã̱xgü rü marü nüxü̃ inarüngümae i ngẽma curü uneta ga namaxã cuxüxü̃, rü nagu napogüe i ngẽma curü ãmarearü guchicaxü̃gü, rü taramaxã tüxü̃ nadai ya yíxema curü orearü uruü̃gü. Rü chaxicatama íchayaxü, rü nhu̱xmax rü cha̱u̱xca̱x rü ta nadaugü nax choxü̃ yama̱xgüxü̃ca̱x —nhanagürü.
11 Rü nüma ga Cori ya Tupana rü nhanagürü nüxü̃: —¡Ínaxũxũ rü chaupe̱xe yachi ya daa ma̱xpǘneétüwa! —nhanagürü. Rü nüma ga Ería rü yemaacü nanaxü. Rü nüma ga Cori ya Tupana rü yéma naxüpetü. Rü wüxi ga poraxüchicü ga buanecü rü nagu nangu ga guma ma̱xpǘne, rü nabu rü ga nutagü rü nipue rü narüyiixü̃chipanü, notürü nüma ga Tupana rü tama gumá buanecüwa nayexma. Rü gumá buanecüwena rü naxĩã̱xãchiane, notürü nüma ga Tupana rü tama yema ĩã̱xãchianewa nayexma.
12 Rü yema ĩã̱xãchianewe naxã ga wüxi ga üxüema, notürü nüma ga Tupana rü nataxuma ga yema üxüemawa. Rü yema üxüemawena rü yéma inanaxũ ga wüxi ga ígaxü̃ ga naga ga mexechixü̃.
13 Rü yexguma yema nagaxü̃ naxĩnügu ga Ería, rü nügü nidüxchametü norü gáuxü̃chirumaxã. Rü ínaxũxũ ga yema ma̱xpǘnearü ãxmaxü̃wa rü naa̱xgu nayachi. Rü yexma nachiyane rü nüxü̃ naxĩnü ga wüxi ga naga ga nüxü̃ nhaxü̃. —¿Ta̱xacü ngẽ́ma cuxü, Pa Eríax?
14 Rü nüma ga Ería rü nanangãxü̃ rü nhanagürü: —Nüxü̃ chicua̱xãchi nax poraãcü cuxü̃́ chachu̱xuxü̃, Pa Corix Pa Tupana ya Guxãétüwa Ngẽxmacüx. Notürü ngẽma Iraéuanecüã̱xgü rü marü nüxü̃ inayarüngümae ga yema namaxã nax icuxügaxü̃. Rü nagu napogüe i ngẽma curü ãmarearü guchicaxü̃gü, rü yimá curü orearü uruü̃gü rü taramaxã nanadai. Rü chaxicatama íchayaxü i nhu̱xmax notürü cha̱u̱xca̱x rü ta nadaugü nax choxü̃ yama̱xgüxü̃ca̱x —nhanagürü.
15 Rü yexguma ga Cori ya Tupana rü Eríaxü̃ nhanagürü: —¡Ẽcü natáegu nagu i ngẽma nama ga noxri nagu quixũxü̃ i Damácuarü chianexü̃wa daxü̃! Rü ngẽxguma Damácuarü ĩanewa cunguxgu ¡rü chíxü̃maxã nabaeru ya Achaéu nax Chíriaanearü ãẽ̱xgacü nax yixĩxü̃ca̱x!
16 ¡Rü ngẽxgumawena rü chíxü̃maxã nabaeru ya Yeú ya Níchi nane, nax Iraéuanecüã̱xgüarü ãẽ̱xgacü nax yixĩxü̃ca̱x! ¡Rü ngẽxgumarüxü̃ ta chíxü̃maxã nabaeru ya Erichéu ya Cháfachi nane ya Abe-Meúracüã̱x nax cuchicüxü chorü orearü uruxü̃ nax yixĩxü̃ca̱x!
17 Rü yíxema Achaéume̱xẽwa inhaxe rü Yeú tá tüxü̃ nima̱x. Rü yíxema Yeúme̱xẽwa inhaxe rü Erichéu tá nixĩ i tüxü̃ da̱i̱xcü.
18 ¡Rü dücax, rü cumaxã nüxü̃ chixu rü chama rü marü íchayaxügüxẽxẽ i 7,000 i Iraéuanecüã̱xgü i taguma Baápe̱xegu caã́pü̱xügüxü̃ nax nüxü̃ yacua̱xüü̃güxü̃ca̱x! —nhanagürü ga Tupana.
Tupana rü Erichéuxü̃ nayaxu
19 Rü yexguma ga nüma ga Ería rü inaxũãchi, rü Erichéu ga waixümüanearü aiegumüanewa puracücüxü̃ yexma nangau. Rü gumá Erichéupe̱xegu naxĩ ga 12 chimüxü̃ ga woca ga taxrechigü nügüwa ngacuxü̃, rü nümatama ga Erichéu namaxã nixũ ga yema nawa iyacuáxü̃. Rü nüma ga Ería rü Erichéuca̱x nixũ rü Erichéuétügu nanacha̱xanagü ga norü gáuxü̃chiru.
20 Rü nüma ga Erichéu rü nüxna yéma ninha ga norü wocagü, rü Eríawe nangẽ, rü nhanagürü nüxü̃: —Chanaxwa̱xe i choxü̃ cuxüchica nax chaunatüxü̃ rü chauéxü̃ chayameãẽxü̃ca̱x, rü nhu̱xmachi tá cuwe charüxũ —nhanagürü. Rü yexguma ga nüma ga Ería rü nhanagürü nüxü̃: —Marü name i ngẽ́ma cuxũ, notürü ¡nüxna nacua̱xãchi nax Tupana marü cuxca̱x ca̱xaxü̃ nax norü orearü uruxü̃ quixĩxü̃ca̱x! —nhanagürü.
21 Rü nüma ga Erichéu rü Eríana nixũgachi rü taxre ga woca ga yatüxü̃ niyaxu, rü nanadai, rü ãgümücügu inanachexcu. Rü yema naixmena̱xãgü ga wocawa ina̱i̱xgüxü̃maxã nanaxüxü̃xü̃. Rü yemawa ínanagu ga namachi, rü namücügüxü̃ nanangõ̱xẽxẽ. Rü yemawena rü Eríawe narüxũ norü ngü̃xẽẽruxü̃.
