1 Reis 21:1-29
21 Rü wüxi ga yatü ga ĩane ga Yerécüã̱x ga Nabúchigu ãégacü rü guma ĩanewa nüxü̃́ nayexma ga wüxi ga úwanecü ga ãẽ̱xgacü ga Acábipataarü ngaicamána.
2 Rü wüxi ga ngunexü̃ ga Acábi rü Nabúchixü̃ nhanagürü: —¡Choxna naxã i curü úwanecü nax ngẽmaãcü choxü̃́ nangexmaxü̃ca̱x i chorü nanetünecü erü chapatana nangaicama! Rü ngẽmachicüxü tá cuxna chanaxã i wüxi i úwanecü i irümemaexü̃, rüe̱xna ega cunaxwa̱xegu rü diẽrumaxã cuxü̃́ chanaxütanü —nhanagürü.
3 Notürü ga Nabúchi rü Acábixü̃ nangãxü̃ga rü nhanagürü: —Rü Tupana tama nanaxwa̱xe nax cuxna chanaxãxü̃ i nhaa naane i chaunatü choxna ãxü̃ —nhanagürü.
4 Rü yema Nabúchiarü ngãxü̃gagu rü nüma ga Acábi rü nangechaü̃ãcüma rü nanuãxẽãcüma napataca̱x natáegu, yerü Nabúchi rü namaxã nüxü̃ nixu ga tagutáma nüxna nax naxããxü̃ ga yema naane ga nanatü nüxna ãxü̃. Rü nüma ga Acábi rü nachiü̃wa nangu, rü naxchiãü̃gu nayaca, rü ĩxtapü̱xguama nabuenü, rü tama nachibüchaü̃.
5 Rü yexguma ga naxma̱x ga Yechabé rü naxca̱x iyaxũ rü ngĩgürügü nüxü̃: —¿Ta̱xacüca̱x cuma rü tama cuchibüchaxü̃? —ngĩgürügü.
6 Rü nüma ga Acábi rü ngĩxü̃ nangãxü̃ga rü nhanagürü: —Nabúchimaxã chidexa, rü nüxna naxca̱x chaca nax choxü̃ namaxã nataxexü̃ca̱x i norü úwanecü. Rü ngẽxgumachi choxna naxãã̱xgu rü to i úwanecümaxã nüxü̃́ chanaxüchicüxü. Notürü i nümax rü tama choxna nanaxãxchaü̃ —nhanagürü.
7 Rü yexguma ga naxma̱x ga Yechabé rü inangãxü̃ga rü ngĩgürügü nüxü̃: —Notürü cuma quixĩ i nua Iraéuanewa ãẽ̱xgacü quixĩxü̃. ¡Rü yachibü rü nataãxẽ! Rü marü chama cuxü̃́ tá chanayaxu i Nabúchiarü úwanecü —ngĩgürügü.
8 Rü yexgumatama ga ngĩma rü Acábiégagu inaxümatü ga nhuxre ga popera. Rü yemagu iyaxǘcuchi ga Acábiarü cua̱xruxü̃ ga norü ãnerawa yexmaxü̃. Rü nhu̱xũchi iyamu naxca̱x ga guma ĩane ga Yeréarü ãẽ̱xgacügü.
9 21:9-10 Rü yema ngĩrü poperagüwa rü nhanagürü: —¡Ẽcü, guxü̃ma i duü̃xü̃gümaxã nüxü̃ pexu nax nangutaque̱xegüxü̃ca̱x nax tama pechibueãcüma peyumüxẽgüxü̃ca̱x! ¡Rü nüxna pexu ya Nabúchi nax petanüwa naxũxü̃ca̱x! ¡Rü naxca̱x peda̱u̱x i taxre i yatü i nüxü̃ ixugüxü̃ nax nüma ya Nabúchi rü Tupanamaxã naguxchigaxü̃ rü ãẽ̱xgacümaxã chixexü̃ naxueguxü̃! ¡Rü ngẽmaxü̃ pexĩnüeguwena, rü ípenagaxüchi rü nutamaxã ípenamuxũchi rü peyamá! —nhanagürü ga yema ngĩrü poperagüwa.
10 Nüü̃ nadau 21:9
11 Rü nüma ga yema ãẽ̱xgacügü ga guma ĩanecüã̱x rü nayanguxẽẽgü ga yema ngĩrü poperagüwa namaxã nüxü̃ yaxuxü̃.
12 Rü nanaxügü ga yema ngutaque̱xe rü yéma Nabúchina nacagüe.
13 Rü nüma ga yema taxre ga yatügü rü guxü̃ma ga duü̃xü̃güpe̱xewa doraxü̃mare nixugüe Nabúchichiga. Rü nhanagürügü: —Nhaa Nabúchi rü Tupanamaxã naguxchiga rü ãẽ̱xgacü ya Acábimaxã rü ta naguxchiga —nhanagürügü. Rü yemaxü̃ naxĩnüegu ga duü̃xü̃gü, rü Nabúchixü̃ niyauxgü rü ĩanepechinüwa nanagáuchigügü. Rü yexma nutamaxã ínanamuxũchigü rü yemaacü nanayuxẽxẽ.
14 Rü yexü̃ nawagüeguwena ga guma ĩanearü ãẽ̱xgacügü, rü Yechabéxü̃tawa namugagü rü nhanagürügü: —Nabúchi rü marü nutamaxã ínanamuxũchigü i duü̃xü̃gü, rü marü nayu —nhanagürügü.
15 Rü yexguma Yechabé nüxü̃ cuáchigagu ga Nabúchi rü marü nax nayuxü̃ rü ngĩgürügü nüxü̃ ga gumá ngĩte ga Acábi: —Yema úwanecü ga Nabúchi tama cuxü̃ namaxã taxechaü̃xü̃, rü nhu̱xmax rü ngetanüãcüma cuxrü nixĩ. Erü nüma ya Nabúchi rü marü nayu —ngĩgürügü.
16 Rü yemaxü̃ naxĩnügu ga Acábi rü ínayadau ga yema Nabúchiarü úwanecü, rü noxrüxü̃ nayaxĩxẽxẽ.
17 Notürü nüma ga Cori ya Tupana rü Eríaxü̃ nhanagürü:
18 —Dücax, rü nhu̱xmatama Chamáriawa naxũ i naxü̃tawa i Iraéuanecüã̱xgüarü ãẽ̱xgacü ya Acábi. Rü nüma i nhu̱xmax rü nawa nangexma i ngẽma Nabúchiarü úwanecü i noxrüxü̃ yaxĩxẽẽxü̃.
19 Rü nhacurügü tá nüxü̃: “Pa Acábi, rü Cori ya Tupana rü nhanagürü cuxü̃: ‘Nhu̱xma nax cuyamáxü̃ ya Nabúchi rü nüxna nax cuyapuxü̃ i ngẽma noxrütama ixĩxü̃, rü ngẽmaca̱x i nhu̱xmax i cumax rü tá ta cugügu nade̱xgüe i airugü yematama nachica ga Nabúchigü nawa nade̱xgüãxü̃wa’ ” —nhanagürü ga Tupana. Rü nüma ga Ería rü yéma Acábixü̃tawa naxũ nax namaxã nüxü̃ yanaxuxü̃ca̱x.
20 Rü nüma ga Acábi rü Eríaxü̃ nangãxü̃ rü nhanagürü: —¿Cumax, Pa Chorü Uanüx, rü choxü̃ icuyangauama? —nhanagürü. Rü nüma ga Ería rü nanangãxü̃ rü nhanagürü nüxü̃: —Ngü̃, cuxü̃ ichayangau nax cumaxã nüxü̃ chayarüxuxü̃ca̱x nax Cori ya Tupanape̱xewa poraãcü chixexü̃ nax cuxüxü̃.
21 Rü ngẽmaca̱x ya Cori ya Tupana rü nhanagürü cuxü̃: “Rü tá cuxca̱x íchananguxẽxẽ i taxü̃ i guxchaxü̃ i chixexü̃ rü cugagu tá chanadai i guxü̃ma i cutanüxü̃gü i yatüxü̃gü i Iraéuanewa ngẽxmagüxü̃.
22 Rü yema Nabá nane ga Yerubuã́ũtanüxü̃maxã, rü yema Aía nane ga Baáchatanüxü̃maxã chaxüxü̃rüxü̃ tá chanaxü namaxã i ngẽma cutanüxü̃gü. Erü yema ãẽ̱xgacügürüxü̃ choxü̃ cunuxẽxẽ nagagu nax chixexü̃gu cunayi̱xẽẽxü̃ i Iraéuanecüã̱xgü”, nhanagürü ga Tupana.
23 Rü Yechabéchiga rü Cori ya Tupana rü nhanagürü: “Rü ngẽma airugü rü tá ngĩxü̃ nangṍmachigü i Yeréarü ĩanechipenüwa.
24 Rü ngẽma cutanüxü̃gü i ĩanegu yuexü̃, rü airugü tá nanangṍmachi. Rü ngẽma cutanüxü̃gü i ĩanearü düxétügu yuexü̃, rü ẽxchagü tá nanangṍmachigü” —nhanagürü.
25 Rü nataxuma ga to ga Iraéuanecüã̱xarü ãẽ̱xgacü ga Acábirüxü̃ naxma̱xgagu chixexü̃ üxü̃ ga Tupanape̱xewa.
26 Rü nüma ga Acábi rü poraãcü Tupanape̱xewa chixexü̃ naxü ga yexguma yema tupananetachicüna̱xãxü̃ yacua̱xüxü̃gu naxrüxü̃ ga yema Amuréutanüxü̃gü ga Cori ya Tupana Iraéutanüxü̃gütanüwa íwoxü̃xü̃.
27 Rü yexguma yema Ería namaxã nüxü̃ ixuxü̃xü̃ naxĩnügu ga Acábi rü nügüchirugu nagáugü. Rü témüxü̃ ga naxchirugu nicu̱x rü tama nachibü. Rü yema témüxü̃ ga naxchirumaxã napeexü̃ rü nangechaü̃ãcüma inarüxũũxü̃.
28 Rü yexguma ga Cori ya Tupana rü Eríaxü̃ nhanagürü:
29 —¿Nüxü̃ cudauxü̃ yixĩxü̃ ya Acábi nax nhuxãcü chape̱xewa nügü ínaxíxraxü̃? Rü ngẽma nax chape̱xegu nügü ínaxíxraxü̃gagu rü taxũtáma chixexü̃ naxacügütanüwa changuxẽxẽ i nhu̱xmax nax namaxü̱̃xü̃gu i nüma ya Acábi. Notürü ngẽxguma marü nayu̱xguwena rü nane ãẽ̱xgacü ixĩxgu tá nixĩ i Acábiacügüca̱x íchananguxẽẽxü̃ i ngẽma chixexü̃ nax ngẽmaãcü yanaxoxü̃ca̱x i natanüxü̃gü —nhanagürü.
