1 Reis 3:1-28
3 --
2 --
3 --
4 --
Charumáu rü Tupanaxü̃tawa naxca̱x ínaca i cua̱x
5 Rü wüxi ga chütaxü̃gu rü ĩane ga Gabaóũwa rü Cori ya Tupana rü Charumáuca̱x nango̱x ga nanegüwa, rü nhanagürü nüxü̃: —¡Choxna naxca̱x naca i ngẽma cunaxwa̱xexü̃ rü chama rü tá cuxna chanaxã! —nhanagürü.
6 Rü nüma ga Charumáu rü nanangãxü̃ga rü nhanagürü: —Cumax, Pa Chorü Tupanax, rü nüxü̃ cungechaü̃xü̃chi ga chaunatü ga Dawí ga curü duü̃xü̃ ixĩcü, yerü nüma rü meama cupe̱xewa inixũ, rü mexü̃ naxü, rü cupe̱xewa rü mea iniwe̱x ga norü maxü̃. Rü yemaca̱x poraãcü nüxü̃ cungechaü̃ rü wüxi ya nanena cunaxã nax nachicawa natoxü̃ca̱x rü Iraéuanecüã̱xgüarü ãẽ̱xgacü yixĩxü̃ca̱x.
7 Rü cumax, Pa Corix, Pa Chorü Tupanax, rü choxü̃ cumu nax chaunatü ya Dawíchicüxü ãẽ̱xgacü nax chixĩxü̃ca̱x, woo i chama rü wüxi i ngextü̱xüxü̃ i taxuxü̃ cuáxü̃ nax chixĩxü̃.
8 Notürü i nhu̱xmax rü cha̱xme̱xwa nangexmagü i guxü̃ma i ngẽma Iraéuanecüã̱xgü i cuma nüxü̃ cuxunetaxü̃. Rü nüma i ngẽma duü̃xü̃gü i nhu̱xmax rü namuxũchi rü ngẽmaca̱x taxucürüwa texé tayaxugü.
9 Rü ngẽmaca̱x chanaxwa̱xe i choxna cunaxã i cua̱x nax ngẽmaãcü mea namaxã ichacuáxü̃ca̱x i curü duü̃xü̃gü rü nüxü̃ nax chacuáxü̃ca̱x i ngẽma mexü̃ rü chixexü̃. ¿Erü texéaxü̃́ natauxcha nax namaxã itacuáxü̃ i nhaa curü duü̃xü̃gü i muxũchixü̃? —nhanagürü.
10 Rü nüma ga Cori ya Tupana rü namaxã nataãxẽ ga yema Charumáu naxca̱x íca̱xaxü̃.
11 3:11-12 Rü yemaca̱x nhanagürü nüxü̃: —Ngẽma nax choxna naxca̱x cuca̱xaxü̃ i ngẽma, rü tama naxca̱x ícucaxü̃ nax namáxü̃ca̱x i curü maxü̃, rüe̱xna cumuarü diẽruã́xü̃ca̱x, rüe̱xna curü uanügü chadaixü̃ca̱x, notürü naxca̱x ícucaxü̃ i cua̱x nax mea namaxã icucuáxü̃ca̱x i ngẽma curü duü̃xü̃gü, rü ngẽmaca̱x tá cuxna chanaxã i ngẽma choxna naxca̱x ícuca̱xaxü̃. Rü chama rü tá cuxna chanaxã i cua̱x ga ü̃pa taguma texéaxü̃́ yexmaxü̃ rü cuwena tagutáma texéaxü̃́ ngẽxmaxü̃.
12 Nüü̃ nadau 3:11
13 Rü naétü tá cuxna chanaxã i ngẽma tama naxca̱x ícucachiréxü̃. Rü tá cuxna chanaxã i muxü̃táma i curü ngẽmaxü̃gü i mexü̃, rü tá cuxü̃ charüngü̃xẽẽ nax cumaxã nataãxẽgüxü̃ca̱x i ngẽma curü duü̃xü̃gü i Iraéuanecüã̱xgü. Rü ngẽmaãcü i cuma rü guxü̃ma i curü maxü̃gu rü nataxutáma i to i ãẽ̱xgacü i cumaxã wüxiguxü̃.
14 Rü ngẽxguma mea cunaxü̱xgux i chorü ngúchaü̃ rü cuyanguxẽẽ̱xgu i chorü mugü, yema cunatü ga Dawí naxüxü̃rüxü̃, rü chama rü tá chanama̱xẽxẽ i curü maxü̃ —nhanagürü.
15 Rü yexguma naba̱i̱xãchigu ga Charumáu, rü nüxü̃ nicua̱xãchi ga nanegü nax yixĩxü̃ ga yema. Rü yexguma Yerucharéü̃wa nanguxgu, rü Tupanapatawa naxũ rü yema baú ga Cori ya Tupanaarü mugüchixü̃pe̱xewa nangu. Rü naxü̃na nadai rü ínanagu rü yemaacü Tupanaxü̃ namaxã nicua̱xüxü̃. Rü yemawena rü taxü̃ma ga õna naxü naxca̱x ga guxü̃ma ga norü ngü̃xẽẽruü̃gü.
Charumáu nanamexẽxẽ ga taxre ga ngexü̃arü guxchaxü̃
16 3:16-17 Rü wüxicana rü taxre ga nge ga ingeãxẽmarecü rü Charumáuxü̃tawa ixĩ. Rü yexguma nape̱xewa nayexmagügu, rü wüxi ga yema nge rü ngĩgürügü: —Pa Ãẽ̱xgacüx, chama rü nhaa nai i nge rü wüxi ya ĩpatawatama tangexmagü. Rü yexguma yéma tayexmagüyane, rü chaxíraxacü.
17 Nüü̃ nadau 3:16
18 Rü tamaepü̱x ga ngunexü̃guwena ga nax chaxíraxacüxü̃, rü ngĩma i nhaa nai i nge rü ixíraxacü. Rü toxicatama yéma tayexmagü, rü nataxuma ga to ga duü̃xü̃gü ga guma ĩpatawa. Rü toxicatama tixĩgü.
19 Notürü wüxi ga chütaxü̃gu rü tayu ga guxema ngĩxacü i nhaa nge yerü tümaétü ica.
20 Rü yexguma ga ngĩma rü bexma ngãxü̃cü íirüda. Rü yexguma chama íchapeyane rü bexma chauechita tüxü̃ iyaxu ga guxema chauxacüxe rü ngĩgüxü̃tagu tüxü̃ iyacaxẽxẽ. Rü guxema ngĩxacüxe ga yuxe rü chauxü̃tagu tüxü̃ iyacaxẽxẽ.
21 Rü yexguma pa̱xmama ícharüdaxgu nax tüxü̃ chama̱i̱xü̃ca̱x ga guxema chauxacüxe, rü tüxü̃ chadau ga nax tayuxü̃. Notürü ga mea nax yangóonexü̃, rü mea tüxü̃ chadau rü nüxü̃ chicua̱xãchi nax guxema buxe rü tama chauxacüxe nax tixĩxü̃ —ngĩgürügü.
22 Rü ngĩma ga yema nai ga nge rü ngĩgürügü: —Tama nixĩ. Rü chauxacüxe tixĩ ya yíxema maxü̃́xẽ rü yíxema yuxe rü cuxacü tixĩ —ngĩgürügü. Notürü ga ngĩma ga yema nge ga ngĩxíra idexacü rü ngĩgürügüama: —Tama nixĩ. Rü cuxacüe tixĩ ya yíxema yúxe rü chauxacüe tixĩ ya yíxema maxü̃́xẽ —ngĩgürügüama. Rü yemaacü ngĩgümaxã yéma iyaporagatanücüxü ãẽ̱xgacüpe̱xewa.
23 Rü yexguma ga nüma ga ãẽ̱xgacü rü meama nagu narüxĩnü rü nügüãẽwa nhanagürü: “Nhaa nge rü ngĩgürügü: ‘Ngĩxacüxe tixĩ ya yíxema maxü̃́xẽ rü yíxema yuxe rü ngẽma nai i ngexacü tixĩ’, ngĩgürügü. Notürü ngẽma nai i nge rü tõõcü nüxü̃ iyaxu”, nhanagürü ga nügüãxẽwa.
24 3:24-25 Rü nhu̱xũchi ga nüma ga ãẽ̱xgacü rü nhanagürü: —¡Nua penange i wüxi i tara! —nhanagürü. Rü yexguma ãẽ̱xgacüxü̃tawa nangegüã̱xgu ga tara, rü nanamu rü nhanagürü: —¡Ẽcü ngãxü̃gu tüxü̃ perüdate ya daxe buxe rü wüxichipanü ngĩxna pexãchigü i ngẽma nge! —nhanagürü.
25 Nüü̃ nadau 3:24
26 Notürü ga yema nge ga tümaé ixĩcü ga guxema buxe yamaxü̃́xẽ rü poraãcü ingechaü̃xü̃chi tümaca̱x ga guxema ngĩxacüxe, rü ãẽ̱xgacüxü̃ ica̱a̱xü̃ rü ngĩgürügü: —Pa Chorü Ãẽ̱xgacüx ¡tauxü̃́ i tüxü̃ quimáxü̃ ya yíxema buxe! Rü narümemae nixĩ i ngĩxna tüxü̃ cumu i ngẽma nai i nge —ngĩgürügü. Notürü ga yema nai ga nge rü ngĩgürügüama: —Marü name i cunadate i ngẽma buxü̃ nax taxuearüma nax yixĩxü̃ca̱x —ngĩgürügü.
27 Rü yexguma nüma ga ãẽ̱xgacü rü nhanagürü: —¡Ngĩxna tüxü̃ pemu i ngẽma tama naxwa̱xecü nax tüxü̃ rüdatexü̃ ya yíxema buxe, erü ngẽma iyixĩ i aixcuma tümaé ixĩcü! —nhanagürü.
28 Rü guxü̃ma ga Iraéuanecüã̱xgü rü nüxü̃ nacuáchigagü ga yema ãẽ̱xgacü üxü̃ ga nhuxãcü nanamexẽẽãxü̃ ga yema taxüchixü̃ ga guxchaxü̃. Rü yemaca̱x nüxü̃ nangechaü̃gü yerü nüxü̃ nacuáchigagü ga nhuxãcü Tupana cua̱x nüxna ãxü̃ nax namexẽẽãxü̃ca̱x ga guxchaxü̃gü.
