1 Samuel 1:1-28
1 Rü nayexma ga wüxi ga duü̃ ga Eucánagu ãégacü. Rü nüma rü Efraĩ́tanüxü̃ nixĩ rü ĩane ga Ramágu naxãchiü̃. Rü guma ĩane rü máxpü̱xanexü̃ ga Efraĩ́tanüxü̃wa nayexma. Rü nüma ga Eucána rü Yeruáũ nane nixĩ, rü Yeruáũ rü Eriú nane nixĩ, rü Eriú rü Tóu nane nixĩ, rü Tóu rü Chúfe nane nixĩ.
2 Rü guma Eucána rü nüxü̃́ iyexma ga taxre ga naxma̱x. Rü wüxi ga naxma̱x rü Ána nixĩ ga ngĩéga, rü yema nai ga naxma̱x rü Peniná nixĩ ga ngĩéga. Rü yema naxma̱x ga Peniná rü ixãxacü, notürü ga yema naxma̱x ga Ána rü ingexacü.
3 Rü guxcüma ga taunecügu rü nüma ga Eucána rü wüxigu naxma̱xgümaxã guma ĩane ga Chíruwa naxũũxü̃ nax Tupana ya guxãétüwa ngẽxmacüxü̃ yacua̱xüü̃xü̃ca̱x, rü naxca̱x yamáaxü̃ca̱x rü yaguãxü̃ca̱x ga norü ãmare. Rü guma ĩanewa nayexma ga wüxi ga chacherdóte ga Erígu ãégacü. Rü nüma rü nüxü̃́ nayexma ga taxre ga nanegü ga chacherdótegü ixĩgüxü̃. Rü wüxi rü Opíni nixĩ ga naéga, rü yema to rü Finéya nixĩ ga naéga.
4 Rü yexguma Eucána norü ãmare Tupanana naxãxgu, rü naxma̱x ga Peniná rü ngĩxü̃ naxüarü ãmareã̱x, rü ga naxacügü rü ta nayaxüarü ãmareã̱x.
5 Notürü ga naxma̱x ga Ána rü taxre ga ãmare ngĩxna naxã yerü poraãcü ngĩxü̃ nangechaü̃ woo Tupana ngĩxü̃ nax ngexacüxẽẽxü̃.
6 Rü yema nax nangexacüxü̃ca̱x ga Ána, rü ngĩma ga Peniná rü guxü̃guma Ánagu iyadauxcüraxü̃ rü ngĩxü̃ icugü.
7 Rü guxcüma ga taunecügu ga yexguma Tupanapatawa naxĩĩxü̃gu rü ngĩma ga Peniná rü yemaacü Ánaxü̃ icugüaxü̃. Rü yemaca̱x ga Ána rü ngĩgümaxã ingechaü̃ rü ixaxu rü tama ichibüchaü̃.
8 Rü nüma ga Eucána rü naxma̱x ga Ánana naca rü nhanagürü ngĩxü̃: —¿Ta̱xacüca̱x cuxaxu? ¿Rü ta̱xacüca̱x cungechaü̃ rü tama cuchibü? ¿Tama ẽ̱xna i chama rü 10 ya cunearü yexera cuxü̃́ chamexü̃? —nhanagürü.
9 Rü yexguma ĩane ga Chíruwa nayexmagügu, rü wüxi ga yáuanecü ga chibüwena rü ngĩma ga Ána rü Tupanapatawa ixũ. Rü nüma ga chacherdóte ga Erí rü norü tochicaxü̃ ga nawa natoooxü̃wa narüto ga Tupanapataarü ĩã̱xarü ngaicamána.
10 Rü ngĩma ga Ána rü poraãcü ixaxu, rü ngĩgümaxã ingechaü̃, rü yemaacü iyumüxẽ, rü Tupanana ica.
11 Rü ngĩrü yumüxẽwa rü Tupanamaxã ixuneta rü ngĩgürügü: —Pa Tupana ya Daxũwa Ngẽxmacüx, rü ngẽxguma chi nüxü̃ cucua̱xgu nax nhuxãcü ngúxü̃ nax chingexü̃ naxca̱x i ngẽma nax changexacüxü̃ ¡rü choxü̃́ nüxü̃ naxĩnü i nhaa chorü yumüxẽ, rü choxna namu ya wüxi ya chaune! Rü yimá rü tá cuxna chanamu nax cuxrüxü̃ yixĩxü̃ca̱x. Rü ngẽma norü cua̱xruxü̃ nax aixcuma cuxna chanamuxü̃ rü tagutáma niyoeru —ngĩgürügü.
12 Rü ngĩma ga Ána rü imáarü yumüxẽã̱x nax Tupanamaxã yadexaxü̃, rü nüma ga Erí rü ngĩã̱xgu nadawenü.
13 Rü ngĩma rü ngĩãxẽwa iyumüxẽ, rü tama nüxü̃ taxĩnü ga ngĩga. Rü ngĩã̱xicatama nixĩ ga ixĩã̱xcüüxü̃. Rü yemaca̱x ga Erí rü nagu narüxĩnü ga nax nangãxü̃xü̃.
14 Rü nhanagürü ngĩxü̃: —¿Nhuxãcü i ngãxãcü nua cuxũxü̃? ¡Rü marütama nax cungãxechaxü̃! —nhanagürü ngĩxü̃.
15 Rü ngĩma ga Ána rü inangãxü̃ rü ngĩgürügü: —Tama nixĩ i changãxü̃xü̃, Pa Corix. Tama nixĩ i ta̱xacü rü axchiü i ngúchixáxü̃ rüe̱xna wíũ ya ngúchixacü chayaxaxüxü̃. Rü ngẽma choxü̃ ngupetüxü̃ nixĩ nax changexacüxü̃ rü ngẽmaca̱x changechaü̃, rü Tupanamaxã nüxü̃ chixuxü̃ i ngẽma guxchaxü̃.
16 ¡Rü tauxü̃́ i nagu curüxĩnüxü̃ rü chama rü wüxi i nge i chixecü chixĩxü̃! Rü guxü̃ma i nhaa ngunexü̃gügu rü íchayumüxẽ naxca̱x i ngẽma chorü oégaãxẽ rü i̱xãchiãxẽ —ngĩgürügü.
17 Rü yexguma ga Erí rü ngĩxü̃ nangãxü̃ rü nhanagürü: —¡Ẽcü taãxẽãcü natáegu! ¡Rü nüma ya Iraéuanecüã̱xgüarü Tupana rü cuxna naxãã i ngẽma nüxna naxca̱x cuca̱xaxü̃! —nhanagürü.
18 Rü ngĩma ga Ána rü inangãxü̃ rü ngĩgürügü: —Moxẽxü̃chi naxca̱x i ngẽma dexa —ngĩgürügü. Rü nhu̱xũchi itáegu rü iyachibü rü marü taguma wena ingechaü̃.
19 Rü moxü̃ãcü rü nangunetüxü̃egü ga Tupanapatawa nax naxĩxü̃ nax nüxü̃ yanacua̱xüü̃güxü̃ca̱x. Rü yemawena rü napataca̱x nawoegu ga ĩane ga Ramáwa. Rü nüma ga Eucána rü naxma̱x ga Ánaxü̃ nape. Rü nüma ga Tupana rü nanangãxü̃ ga ngĩrü yumüxẽ.
20 Rü yemaca̱x ga Ána rü ixãxacü. Rü yexguma nawa nanguxgu ga nax nabuxü̃ ga guma ngĩne, rü inaxüéga rü Chamué nixĩ ga naéga yerü Tupanana naxca̱x ica. Rü ngẽma naéga rü “Naxca̱x ínaca̱xacü”, nhaxü̃chiga nixĩ.
21 Rü guma nai ga taunecügu rü nüma ga Eucána rü naxma̱x ga Peninámaxã rü guxü̃ma ga naxacügümaxã rü ĩane ga Chíruwa naxĩ nax Tupanana yéma yaxããxü̃ca̱x ga norü ãmaregü, rü nüxü̃ yanacua̱xüü̃güxü̃ca̱x yema guxcüma ga taunecügu naxüüüxü̃rüxü̃.
22 Notürü ga naxma̱x ga Ána rü tama yéma ixũ, rü ngĩgürügü nüxü̃ ga ngĩte: —Taxũtáma ngẽ́ma chaxũ i chama nhu̱xmatáta yamaie ya daa bucü. Rü ngẽxgumaxica tá nixĩ i ngẽ́ma chanagaxü̃ nax Cori ya Tupanana chayamuxü̃ca̱x rü ngẽxma nax yanaxã̱ũ̱xũchixü̃ca̱x —ngĩgürügü.
23 Rü nüma ga ngĩte ga Eucána rü ngĩxü̃ nangãxü̃ rü nhanagürü: —¡Ẽcü naxü i ngẽma cuma nagu curüxĩnügu rümexü̃! Rü marü name i nuxã curüxã̱ũ̱x rü nhu̱xmatáta cuyamaie ya yimá cune nax ngẽmaãcü yanguxẽẽãxü̃ca̱x i norü ngúchaü̃ ya Cori ya Tupana. Rü yemaacü ga ngĩma rü yexma irüxã̱ũ̱x, rü inayaxẽxẽ ga guma ngĩne rü nhu̱xmatáta yamaie —nhanagürü.
24 Rü yexguma marü yamaieãguwena ga guma bucü rü Cori ya Tupanapatawa inaga ga ĩane ga Chíruwa. Rü yexgumarüxü̃ ta yéma inagagü ga tamaepü̱x ga wocaxacü ga iyatüxü̃, rü wüxiwetaxü̃ ga trígu, rü wüxi ga tü̃xü̃acu ga wíũ.
25 Rü yexguma wüxi ga wocaxacü Tupanaca̱x yama̱xgüguwena, rü chacherdóte ga Erína nayamugü ga guma bucü.
26 Rü ngĩma ga Ána rü ngĩgürügü nüxü̃ ga guma chacherdóte: —Pa Corix ¿choxü̃ cucuáxü̃ yixĩxü̃? Rü chama nixĩ ga yema nge ga ü̃pa cupe̱xewa Tupanana chaca̱xaxü̃ chorü yumüxẽwa.
27 Rü nüxna chaca̱xaxü̃ nax choxna namuaxü̃ca̱x ya daa chaune, rü nüma rü marü choxü̃ nangãxü̃ ga yema naxca̱x íchaca̱xaxü̃.
28 Rü ngẽmaca̱x i nhu̱xmax rü nua cuxü̃tawa chanaga ya daa chaune nax nüxna chayamuxũchixü̃ca̱x ya Tupana —ngĩgürügü. Rü nhu̱xũchi ga nüma ga Erí rü nhaxtüanegu nayangücuchi rü Cori ya Tupanaxü̃ nicua̱xüxü̃.
