1 Samuel 10:1-27
10 Rü yexguma ga nüma ga Chamué rü wüxiwexü̃ ga chíxü̃ nayaxu, rü Chaúxü̃ namaxã nabaeru, rü nhanagürü nüxü̃: —Cori ya Tupana cuxü̃ nayaxu nax norü duü̃xü̃gü i Iraéuanecüã̱xgüarü ãẽ̱xgacü i réi nax quixĩxü̃ca̱x i nhu̱xmax. Rü cuma tá namaxã icucua̱x rü norü uanügü i nüxü̃ íchomaeguãchixü̃wa tá ícunapoxü̃. Rü ngẽma cua̱xruxü̃ i nawa nüxü̃ cucuáxü̃ nax aixcuma Cori ya Tupana cuxü̃ unetaxü̃ nax norü duü̃xü̃gü i Iraéuanecüã̱xgüarü ãẽ̱xgacü nax quixĩxü̃, rü nhaãcü tá nixĩ:
2 Rü nhu̱xmax nax choxna íquixũxü̃ rü Bẽyamíarü naanewa i Chéchawa tá nüxü̃ icuyangau i taxre i yatügü i Raquéuchique̱xearü ngaicamagu chigüxü̃. Rü nümagü tá cumaxã nüxü̃ nixugü: “Rü marü nüxü̃ nax iyanga̱u̱xü̃ i ngẽma búrugü i naxca̱x cudauxü̃. Rü tüma ya cunatü rü marü tama naxca̱x taxoégaãẽ i ngẽma búrugü, notürü pexca̱x nixĩ i taxoégaãẽxü̃ i nhu̱xmax, rü nagu tarüxĩnüxü̃ nax nhuxãcü tá pexü̃ itayangauxü̃”, nhanagürügü tá cumaxã.
3 Rü ngẽ́ma nax cuxüpetüxü̃ rü ngẽxguma Tabúarü carabáyu íngexmaxü̃wa cunguxgu, rü tá ngẽxma pegü namaxã peyangaugü i tamaepü̱x ya yatü i Betéuwa ĩxü̃ nax Tupanaxü̃ yanacua̱xüü̃güxü̃ca̱x. Rü ngẽma wüxi rü tamaepü̱x i bóyi niga, rü ngẽma to rü tamaepü̱x i poũ ninge, rü ngẽma to rü wüxipü̱xüwexü̃ ya wíũ ninge.
4 Rü nümagü rü tá cuxü̃ narümoxẽgü, rü tá cumaxã nangau i taxre i poũ. Rü name nixĩ i nüxü̃́ cunayaxu.
5 Rü ngẽmawena rü tá Yibéa ya Tupanaarü Ma̱xpǘnegu ãéganewa cungu i Firitéutanüxü̃güarü dauxü̃taechica íngexmaxü̃wa. Rü ngẽxguma yima ĩanewa pichocu̱xgux, rü ngẽxma tá nüxü̃ cungau i nhuxre i Tupanaarü orearü uruü̃gü i Tupanaãxẽ i Üünexü̃ namaxã icuáxü̃ i Tupanaarü cua̱xüxü̃wa ne ĩxü̃. Rü ngẽmape̱xegu tá naxĩ i duü̃xü̃gü i paxetaetanüxü̃ i norü árpamaxã, rü árpaxacümaxã, rü pãdérumaxã rü wowerumaxã.
6 Rü ngẽxguma tátama cuxna nangu i Tupanaãxẽ i Üünexü̃, rü tá cumaxã inacua̱x narüxü̃ i ngẽma togü i Tupanaarü orearü uruü̃gü. Rü tá Tupanaarü oremaxã quidexa rü to i ĩnü tá cuxü̃́ nangexma.
7 Rü ngẽxguma ngẽma cuxü̃ ngupetü̱xgu ¡rü naxü i ngẽma cuxca̱x mexü̃! Rü Tupana tá cuxü̃ narüngü̃xẽẽ nax ngẽma cuxüxü̃.
8 ¡Rü nhu̱xũchi Yigáwa naxũ! ¡Rü 7 i ngunexü̃ ngẽ́ma choxü̃ rüngu̱xẽxẽ! Erü ngẽ́ma tá chaxũ nax ngẽ́ma Cori ya Tupanaca̱x naxü̃na íchayaguxü̃ca̱x, rü ãmaregü nüxna chayanaxü̃ca̱x nax nangüxmüxü̃ca̱x. Rü ngẽ́ma tá nixĩ i cumaxã nüxü̃ chixuxü̃ nax ta̱xacü tá cuxüxü̃ —nhanagürü.
9 Rü nüma ga Chaú rü Chamuéxü̃ narümoxẽ nax íyaxũxü̃ca̱x. Rü yemawena rü Tupana rü ngexwaca̱xü̃xü̃ ga ĩnü nüxna naxã. Rü guxü̃ma ga yema ore ga Chamué namaxã nüxü̃ ixuxü̃, rü ningu ga yema ngunexü̃gu.
10 Rü yexguma Chaú rü yema norü duü̃xü̃maxã Yibéawa nangugügu, rü nüxü̃ nadaugü ga yema orearü uruü̃gü ga yexma nügü namaxã yanga̱u̱xü̃. Rü Tupanaãxẽ rü Chaúna nangu, rü nüma rü ta inanaxügü ga Tupanaarü oremaxã nax yadexaxü̃.
11 --
12 --
13 Rü yexguma Chaúna iyachü̱xüãchigu ga Tupanaãxẽ ga yadexaxẽẽxü̃, rü nüma ga Chaú rü nawa nangu ga guma ma̱xpǘne ga Tupanaarü cua̱xüxü̃chica.
14 Rü nanepü rü nüxna naca rü nhanagürü: —¿Ngextá nixĩ ga pexĩxü̃? —nhanagürü. Rü nüma ga Chaú rü nanangãxü̃ rü nhanagürü: —Naxca̱x tayadaugü ga yema búrugü. Notürü yexguma tama nüxü̃ itayangaugügu rü Chamuéxü̃tawa ítayadaugü —nhanagürü.
15 Rü nüma ga nanepü rü nüxna nacaama rü nhanagürü: —¿Rü nhuxũ nhaxü̃ pexü̃ ga Chamué? ¡Rü mea chamaxã nüxü̃ ixu! —nhanagürü.
16 Rü nüma ga Chaú rü nanepüxü̃ nangãxü̃ga rü nhanagürü: —Meama tomaxã nüxü̃ nixu ga marü nüxü̃ nax iyanga̱u̱xgüxü̃ ga búrugü —nhanagürü. Notürü tama nüxü̃ nixu ga Chamué nax chíxü̃maxã nabáeruxü̃ nax Iraéuanecüã̱xgüarü ãẽ̱xgacü i réi yixĩxü̃ca̱x.
17 Rü yemawena ga Chamué rü Iraéuanecüã̱xgüca̱x nangema nax Míspawa naxĩxü̃ca̱x rü yéma Cori ya Tupanaxü̃ yanacua̱xüü̃güxü̃ca̱x.
18 Rü yexguma yéma nangugügu rü nüma ga Chamué rü yema Iraéuanecüã̱xgüxü̃ nhanagürü: —Nüma ya Cori ya tórü Tupana rü nhanagürü: “Chama nixĩ ga Eyítuanewa pexü̃ íchagaxü̃xü̃, Pa Iraéuanecüã̱xgüx. Rü chama nixĩ ga naxme̱xwa pexü̃ íchanguxü̃xẽẽ̱xü̃ ga yema Eyítuanecüã̱xgü rü guxü̃ma ga yema togü ga ãẽ̱xgacügü ga pexü̃ chixeãxẽgüxü̃.
19 Notürü i nhu̱xmax i pemax rü nüxü̃ pexo ya yimá perü Tupana ga guxü̃ma ga perü guxchaxü̃güwa rü perü i̱xãchiãẽgüwa pexü̃ ínguxü̃xẽẽcü. Rü ngẽmaca̱x wüxi i perü ãẽ̱xgacü i réica̱x ípeca nax pemaxã inacuáxü̃ca̱x. Rü ngẽmaca̱x i nhu̱xmax rü Cori ya Tupanape̱xewa ípengugü ya wüxitücumüchigü rü tügütanüxü̃chigü” —nhanagürü.
20 Rü yemawena ga nüma ga Chamué rü guxü̃ma ga Iraéuanecüã̱xgütücumüca̱x naca nax naxü̃tagu nangutaque̱xegüxü̃ca̱x nax naxca̱x nadaugüxü̃ca̱x ga ngexü̃rüüxü̃tücumüwa tá ne naxũxü̃ ga norü ãẽ̱xgacü. Rü Bẽyamítücumügu nangu.
21 Rü yexguma ga Chamué rü Bẽyamítücumüca̱x naca nax naxü̃tawa naxĩxü̃ca̱x, rü yema Bẽyamítücumüwa rü Matítanüxü̃gu nangu. Rü yematanüwa rü Chaú ga guma Quíchi nane ixĩcügu nangu nax Iraéuanecüã̱xgüarü ãẽ̱xgacü yixĩxü̃. Notürü yexguma naxca̱x nadaugügu ga Chaú, rü tama nüxü̃ inayangaugü.
22 Rü yemaca̱x wenaxarü Cori ya Tupanana nacagüe ga nüxü̃ nax nacua̱xgüxü̃ca̱x ngoxi nayexma ga Chaú. Rü nüma ga Cori ya Tupana rü nüxü̃ nixu ga yéma nax nayexmaxü̃, rü Iraéuanecüã̱xgüarü yemaxü̃tanügu nax yacúxü̃.
23 Rü yexgumatama naxca̱x nayadaugü rü nayagagü ga yema íyacúxü̃wa. Rü nüma ga Chaú ga yexguma duü̃xü̃güpe̱xewa nanguxgu, rü nüxü̃ nadaugü ga Iraéuanecüã̱xgütanüwa rü taxúema naatüxü̃ ngupetüxü̃ ga tümaarü máchanewa.
24 Rü nüma ga Chamué rü guxãna naca rü nhanagürü: —¿Marü nüxü̃ pedauxü̃ ya yimá Cori ya Tupana nüxü̃ unetacü nax perü ãẽ̱xgacü i réi yixĩxü̃ca̱x? Rü nataxuma i wüxi i Iraéuanecüã̱x i namaxã wüxiguxü̃ —nhanagürü. Rü nüma ga duü̃xü̃gü rü: —¡Namaxü̃x ya tórü ãẽ̱xgacü ya réi! —nhaxü̃maxã nanangãxü̃gagüama.
25 Rü yexguma ga nüma ga Chamué rü duü̃xü̃gümaxã nüxü̃ nixu ga yema mugü ga nagu tá yaxũxü̃ ga gumá ãẽ̱xgacü norü duü̃xü̃gümaxã. Rü nhu̱xũchi wüxi ga poperagu nanaxümatü ga yema mugü rü Tupanapatagu nayaxǘ. Rü yemawena ga Chamué rü ínayamugü ga guxü̃ma ga yema Iraéuanecüã̱xgü nax napatawa naxĩxü̃ca̱x.
26 Rü yexguma ga nüma ga Chaú rü nachiü̃ca̱x natáegu ga Yibéawa. Rü nawe narüxĩ ga nhuxre ga yatü ga daiwa imexü̃ ga Cori ya Tupana norü maxü̃gu ingṍgügüxü̃ nax íyaxümücügüãxü̃ca̱x.
27 Notürü nayexmagü ta ga duü̃xü̃ ga Chaúmaxã chixexü̃gu rüxĩnüexü̃ rü nhagüxü̃: —¿Nhuxãcü tá i nhaa yatü i tamaxã inacuáxü̃? —nhagüxü̃. Rü yemaacü nüxü̃ naxoo̱xgü rü tama namaxã nataãxẽgü. Notürü nüma ga Chaú rü tama yemagu narüxĩnü.