1 Samuel 11:1-15
11 Rü nüma ga Amóũtanüxü̃güarü ãẽ̱xgacü ga Naá rü norü churaragüxü̃ nangutaque̱xexẽxẽ nax yadaiãcuãxü̃ca̱x ga Iraéuanecüã̱xgüarü ĩane ga Yabé ga Yibéaanewa yexmane. Notürü ga yema duü̃xü̃gü ga Yabécüã̱xgü rü nhanagürügü: —¡Tomaxã naxü i wüxi i üga, rü ngẽxguma tá nixĩ i cuxme̱xwa togü tangexmagüxẽẽxü̃! —nhanagürügü.
2 Rü nüma ga Amóũtanüxü̃güarü ãẽ̱xgacü ga Naá rü nanangãxü̃ rü nhanagürü: —Marü name i pemaxã ichaxüga ega chi pexü̃́ namexgu nax perü tügünexetü chayaxuxü̃ i wüxichigü i pema nax ngẽmaãcü wüxi i cugüruxü̃ pexĩgüxü̃ca̱x i guxãma i pema i Iraéuanecüã̱xgü —nhanagürü.
3 Rü nüma ga Yabéarü ãẽ̱xgacügü rü nanangãxü̃gü rü nhanagürügü: —¡Toxna naxã i 7 i ngunexü̃ nax naxca̱x tadauxü̃ca̱x i ngü̃xẽẽ i totanüxü̃ i Iraéuanegütanüwa! Rü ngẽxguma chi nataxuguma i toeneegü i toxü̃ rüngü̃xẽẽxü̃, rü marü name i tomaxã cunaxü i ngẽma cuma nagu curüxĩnüxü̃ —nhanagürügü.
4 Rü nhuxre ga yema Yabécüã̱x rü guma ĩane ga Yibéa ga Chaú nawa yexmanewa nanangegü ga yema ore. Rü duü̃xü̃gümaxã nüxü̃ nixugüe ga yema Yabéwa ngupetüxü̃. Rü yexguma nüxü̃ naxĩnüegu rü guxü̃ma ga duü̃xü̃gü rü poraãcü naxauxe.
5 Rü nüma ga Chaú rü naanewa ne naxũ namaxã ga norü wocagü ga puracüruxü̃. Rü norü duü̃xü̃güna naca rü nhanagürü: —¿Ta̱xacü nüxü̃ nangupetü i duü̃xü̃gü? ¿Ta̱xacüca̱x naxauxe? —nhanagürü. Rü nüma ga norü duü̃xü̃gü rü Chaúmaxã nüxü̃ nixugüe ga yema ore ga yatügü ga Yabécüã̱x yéma ngegüxü̃.
6 Rü yexguma yema orexü̃ naxĩnügu ga Chaú, rü Tupanaãxẽ nüxna nangu rü poraãcü nanu ga Chaú.
7 Rü yexguma ga Chaú rü taxre ga woca niyaxu rü ãgümücügu tegü nanache̱x. Rü nhu̱xũchi nhuxre ga orearü ngeruü̃gümaxã guxü̃ ga Iraéuanecüã̱xgütanüwa nanamu ga yema namachigü. Rü yema orearü ngeruü̃gü rü nhaa orexü̃ nixuetanü: —Nhaatátama tümaarü wocamaxã taxü ya yíxema tama Chaúwe rü Chamuéwe rüxũxchaü̃xe —nhanagürügü. Rü nüma ga duü̃xü̃gü rü poraãcü namuü̃e rü nhama wüxitama ga yatürüxü̃ inaxĩãchi, rü Chaúwe rü Chamuéwe narüxĩ.
8 Rü yexguma Bechéwa Chaú yaxugü̱xgu ga norü duü̃xü̃gü ga yexma ngutaque̱xegüxü̃, rü nayexma ga 300,000 ga yatügü ga Iraéuanecüã̱xgü rü naétü 30,000 ga Yudáanewa ne ĩxü̃.
9 Rü yemawena rü yema duü̃xü̃gü ga Yabécüã̱xgü ga orearü ngeruü̃güxü̃ nhanagürü: —¡Namaxã nüxü̃ pexu i duü̃xü̃gü i Yabécüã̱xgü rü moxü̃ tocuchigu tá ngẽ́ma tangugü nax ítanapoxü̃xü̃ca̱x! —nhanagürü. Rü yema duü̃xü̃gü rü natanüxü̃ ga Yabécüã̱xgümaxã nüxü̃ narüxugüe ga yema ore. Rü nümagü rü poraãcü nataãxẽgüxüchi.
10 Rü nüma ga yema Yabéarü ãẽ̱xgacügü rü Amóũtanüxü̃güarü ãẽ̱xgacü ga Naámaxã nüxü̃ nayarüxugü, rü nhanagürügü: —Moxü̃ rü tá cuxna togü tana nax cuma cunaxwa̱xexü̃ tomaxã cuxüxü̃ca̱x —nhanagürügü.
11 Rü moxü̃ãcü rü nüma ga Chaú rü norü churaragüxü̃ mea ininu, rü tamaepü̱xtücumügu nayayauxye. Rü naxü̃pa ga nax yangóonexü̃ rü norü uanügü ípegüxü̃gu nachocu. Rü tüxü̃ nadai ga guxãma ga Amóũtanüxü̃gü nhu̱xmata tocuchiwa nangu. Rü guxema maxẽxe, rü tügümaxã tanawoone, rü yemaca̱x taxúema ãmücüxe tinha.
12 Rü yemawena ga nümaxü̃ ga duü̃xü̃gü rü Chamuéxü̃ nhanagürügü: —¿Texégü tixĩ ya yíxema tama yaxõgüxe nax Chaú yixĩxü̃ ya mecü nax tórü ãẽ̱xgacü yixĩxü̃? ¡Rü toxna penamugü i ngẽma yatügü nax tanadaixü̃ca̱x! —nhanagürügü.
13 Notürü nüma ga Chaú rü naétüwa nachogü rü nhanagürü: —Nhama i ngunexü̃gu rü taxúetáma tayu, erü Cori ya Tupana rü Iraéuanecüã̱xgüxü̃ narüngü̃xẽẽ nax norü uanüxü̃ nax naporamaegüxü̃ca̱x —nhanagürü.
14 Rü nüma ga Chamué rü guxü̃ma ga Iraéuanecüã̱xgüxü̃ nhanagürü: —¡Ngĩxã rü Yigáwa taxĩ nax ngẽ́ma yanangucuchixẽẽxü̃ca̱x ya tórü ãẽ̱xgacü! —nhanagürü.
15 Rü yemaca̱x guxü̃ma ga duü̃xü̃gü ga Iraéuanecüã̱xgü rü Yigáwa naxĩ. Rü yéma Cori ya Tupanape̱xewa Chaúxü̃ ningucuchixẽẽgü nax norü ãẽ̱xgacü yixĩxü̃ca̱x. Rü yemawena rü Tupanaca̱x nayagugü ga ãmaregü ga Tupanaarü ngüxmüxẽẽruü̃gü ixĩgüxü̃. Rü nüma ga Chaú rü guxü̃ma ga nümagü ga Iraéuanecüã̱xgü rü poraãcü nataãxẽgü.
