1 Samuel 16:1-23
16 Rü yemawena ga Tupana rü Chamuéxü̃ nhanagürü: —Marütama nax Chaúca̱x nax cungechaü̃echaxü̃, erü marü tama chanaxwa̱xe nax Iraéuanecüã̱xgüarü ãẽ̱xgacü nax yixĩxü̃. ¡Rü wüxi i carnéruchatacu̱xre nayaxu rü oríwaarü chíxü̃maxã naxüãcu! ¡Rü Beréü̃wa naxũ rü ngẽxma naxca̱x yadau ya wüxi ya yatü ya Yechégu ãégacü! Erü wüxi ya nane chanayaxu nax ngexwaca̱xü̃cü ya Iraéuanecüã̱xgüarü ãẽ̱xgacü nax yixĩxü̃ca̱x —nhanagürü.
2 --
3 --
4 Rü nüma ga Chamué rü nanaxü ga yema Tupana namaxã nüxü̃ ixuxü̃. Rü yexguma Beréü̃wa nanguxgu, rü guma ĩanearü ãẽ̱xgacügü rü namuü̃eãcüma nanayauxgü, rü nüxna nacagüe rü nhanagürügü: —¿Ta̱xacü nangupetü? ¿Rü ta̱xacüwa nua cuxũ? —nhanagürügü.
5 Rü nüma ga Chamué rü nanangãxü̃ga rü nhanagürü: —Taxuxü̃ma nixĩ i ngupetüxü̃. Rü nua chaxũ nax Tupanaca̱x wüxi i naxü̃na chimáxü̃ca̱x. ¡Rü ngẽmaca̱x Tupanaca̱x pegü pemexẽẽgü rü choxü̃ ípixümücü nax ngẽma naxü̃naarü ma̱xwa rü Tupanaarü cua̱xüü̃wa ipexãgüxü̃ca̱x! —nhanagürü. Rü yemawena ga Chamué rü nacümagüãcü Yechéxü̃ rü nanegüxü̃ Tupanaca̱x nimexẽxẽ, rü nüxna naxu nax íyaxümücügüãxü̃ca̱x ga Tupanaarü cua̱xüü̃wa.
6 Rü yexguma Tupanaxü̃ íyacua̱xüü̃güchaü̃xü̃wa nangugügu ga Yeché rü nanegü, rü nüma ga Chamué rü Yeché nane ga Eriábexü̃ nadawenü rü nhaxü̃gu narüxĩnü: “Cuxá daa nixĩ ya yimá yatü ya Tupana nayaxucü nax Iraéuanecüã̱xgüarü ãẽ̱xgacü yixĩxü̃ca̱x”, nhaxü̃gu narüxĩnü.
7 Notürü ga Tupana rü Chamuéxü̃ nhanagürü: —Tama name i norü düxétümare rü norü máchanemare nax cungugüxü̃ ya wüxi ya yatü. Tama daa nixĩ. Chama rü tama duü̃xü̃gü nangugüxü̃ãcüma chanayaxu ya wüxi ya yatü. Duü̃xü̃gü rü ngẽma düxétüxünemare nixĩ inangugügüxü̃, notürü i chama rü ngẽma norü maxü̃ rü norü ĩnü nixĩ i ngẽma changugüxü̃ —nhanagürü.
8 Rü yexguma ga Yeché rü nane ga Abinadábica̱x naca, rü Chamuéxü̃tawa nanaga. Notürü nüma ga Chamué rü nüxü̃ nixu ga tama gumá nax yixĩxü̃ ga Tupana nayaxucü.
9 Rü yemawena ga Yeché rü nane ga Chamáxü̃ Chamuéxü̃tawa naga, notürü nüma ga Chamué rü nhanagürü: —Tama daa nixĩ ya Tupana nayaxucü —nhanagürü.
10 Rü nüma ga Yeché rü 7 ga nane Chamuépe̱xewa nagagü, notürü nüma ga Chamué rü nüxü̃ nixu nax taxucüma ga gumatanüwa Tupana nayaxuxü̃.
11 Rü nüma ga Chamué rü Yechéna naca rü nhanagürü: —¿Nangexmaxü̃ ya nai ya cune? —nhanagürü. Rü nüma ga Yeché nanangãxü̃ga rü nhanagürü: —Yimá rübumaecüxicatama nixĩ i yataxucü, erü yéa naanewa carnérügüna nadau —nhanagürü ga Yeché. Rü yexguma ga nüma ga Chamué rü nhanagürü: —¡Ẽcü nhu̱xmatama wüxi i duü̃xü̃xü̃ ngẽ́ma namu nax naxca̱x yaca̱xaxü̃ca̱x! Erü taxũtáma ítarütogü nax ichibüexü̃ca̱x nhu̱xmatáta ínangu i nümax —nhanagürü.
12 Rü yexguma ga nüma ga Yeché rü wüxi ga duü̃xü̃ yéma namu nax naxca̱x yaca̱xaxü̃ca̱x. Rü nüma ga guma ngextü̱xücü rü nacho̱x, rü nacho̱xyae rü nidauü̃chametücüxü rü namecümachametü. Rü nüma ga Tupana rü Chamuéxü̃ nhanagürü: —Daa nixĩ. ¡Rü ẽcü nabaeru! —nhanagürü.
13 Rü nüma ga Chamué rü nanayaxu ga yema carnéruchatacu̱xre ga chíxü̃maxã ããcuxü̃, rü Dawíerugu nanaba ga naeneegüpe̱xewa. Rü yexgumatama ga Tupanaãxẽ rü Dawína nangu rü namaxã inacua̱x. Rü nhu̱xũchi ga nüma ga Chamué rü norü ĩane ga Ramáca̱x natáegu.
14 Rü yexgumayane ga Tupanaãxẽ rü Chaúna nixũgachi. Rü nüxna nangu ga wüxi ga naãxẽ ga chixexü̃ ga naxi̱xãchiãẽxẽẽxü̃ ga Cori ya Tupana yéma muxü̃.
15 Rü yemaca̱x ga yema norü duü̃xü̃gü ga ngü̃xẽẽruü̃gü ixĩgüxü̃ rü nhanagürügü nüxü̃: —Pa Ãẽ̱xgacüx, wüxi i chixexü̃ i naãxẽ i Tupana nua muxü̃ cuxna nangu, rü ngẽma nixĩ i cuxü̃ naxi̱xãchiãẽxẽẽxü̃.
16 ¿Rü tü̱xcüü̃ tama toxü̃ cumu nax wüxi i meama paxetaxü̃ cuáxü̃ca̱x nax tadauxü̃ rü cupe̱xewa árpa nax napaxüxü̃ca̱x ega ngẽxguma cuxna nanguuxü̃gu i ngẽma naãxẽ i chixexü̃? Rü ngẽma paxeta tá cuxü̃ nataãxẽxẽxẽ rü mexü̃ tá cumaxã naxü —nhanagürügü.
17 Rü nüma ga Chaú rü nhanagürü: —Marü name ¡Rü naxca̱x choxü̃́ peda̱u̱x i wüxi i paxetatanüxü̃ i árpaarü paxüxü̃ mea cuáxü̃, rü nua penaga! —nhanagürü.
18 Rü yexguma ga wüxi ga norü duü̃xü̃ rü nhanagürü: —Chama nüxü̃ chadau i wüxi i Yeché nane i Beréü̃wa ngẽxmaxü̃, rü meama paxetaxü̃ nacua̱x. Rü nhu̱xmachi wüxi i poracü nixĩ i daiwa rü nüxü̃ cuácü nixĩ ega yadexagu. Rü nüma rü mecü nixĩ rü Cori ya Tupana nüxü̃ rüngü̃xẽẽcü nixĩ —nhanagürü.
19 Rü yexguma ga Chaú rü Yechéxü̃tawa nanamugü ga norü duü̃xü̃gü nax nüxü̃ nhagüxü̃ca̱x: “¡Nua namu ya cune ya Dawí ya yimá carnérugüarü daruxü̃ ixĩcü!”
20 Rü nüma ga Yeché rü nane ga Dawíxü̃ Chaúxü̃tawa namu. Rü guma nanemaxã Chaúca̱x yéma nanamu ga wüxi ga búru ga poũmaxã ã́xwetaxü̃ rü wüxiwexü̃ ga wíũ rü wüxi ga bóyixacü.
21 Rü yemaacü ga Dawí rü Chaúxü̃tawa naxũ, rü yéma naxü̃tawa nayexma. Rü nüma ga Chaú rü Dawíxü̃ nangechaü̃xü̃chi, rü norü ngü̃xẽẽruxü̃ nayaxĩxẽxẽ.
22 Rü nüma ga Chaú rü Yechéxü̃tawa namuga rü Dawíca̱x ínaca nax nügüxü̃tawa nayexmaxẽẽãxü̃ca̱x, yerü poraãcü norü me nixĩ.
23 Rü yexguma Chaúna nanguuxü̃gu ga yema naãxẽ ga chixexü̃ ga Tupana naxca̱x yéma muxü̃, rü nüma ga Dawí rü nanayaxuxü̃ ga árpa rü nanapaxüxü̃. Rü yemamaxã ga nüma ga Chaú rü nataãxẽãxü̃ rü naxca̱x nitaaneãxü̃, rü nüma ga naãxẽ ga chixexü̃ rü nüxna nixũgachiãxü̃.
