1 Samuel 17:1-58
17 Rü nüma ga Firitéutanüxü̃gü rü nananutaque̱xexẽẽgü ga norü churaragü nax Iraéuanecüã̱xgüarü churaragümaxã nügü nadaixü̃ca̱x. Rü Efedamíü̃gu nayangutaque̱xegü ga ĩanegü ga Chocú rü Achécaarü ngãxü̃machate̱xewa ga Yudáanewa.
2 Rü nüma ga Chaú rü Iraéuanecüã̱xgümaxã nügü nanutaque̱xegü ga Eláarü ngatexü̃gu. Rü yéma nügü namexẽẽgü ga Firitéutanüxü̃gümaxã nügü nax nadaixü̃ca̱x.
3 Rü nümagü ga Firitéutanüxü̃gü rü wüxi ga ma̱xpǘnegu nügü ninu, rü yexgumarüxü̃ ta ga Iraéuanecüã̱xgü, rü nái ga ma̱xpǘnegu nügü ninu. Rü guma taxre ga ma̱xpǘnegüarü ngate rü ngãxü̃wa naxü.
4 Rü yema Firitéutanüxü̃gütanüwa nixũxũ ga wüxi ga churara ga 3 métrugu ixüchanexü̃, rü yema ngatexü̃wa naxũ. Rü Goriáx nixĩ ga naéga, rü ĩane ga Gáyicüã̱x nixĩ.
5 Rü napate̱xe rü brṍchenaxca̱x nixĩ. Rü naxü̃newa rü yexgumarüxü̃ ta brṍchemaxã natüxü̃ne. Rü yema norü tüxü̃nexü̃ rü 55 quíru nixĩ ga nayaxü̃.
6 Rü yema norü tüperemaxü̃ rü guma norü wocae ga nügüãtü yangeãcü rü brṍchenaxca̱x nixĩgü.
7 Rü guma norü wocae rü natamena̱xã rü ga nape̱xe rü férunaxca̱x nixĩ rü 6 quíru naya. Rü Goriáxpe̱xegu nixũchigü ga yema norü poxü̃ruü̃arü ngeruxü̃.
8 Rü nüma ga Goriáx rü yema ngatexü̃arü ngãxü̃wa ínayachaxãchi rü yéma tagaãcü Iraéuanecüã̱xgüarü churaragüxü̃ nhanagürü: —¿Ta̱xacüca̱x mea pegü ipinu nax tomaxã pegü pedaixü̃ca̱x? Erü chama rü wüxi i Firitéutanüxü̃ chixĩ rü name nixĩ i pema i Iraéuanecüã̱xgü rü Chaúarü churaragütanüxü̃wa nüxü̃ pexuneta i wüxi nax nua naxũxü̃ca̱x nax togü namaxã tadaixü̃ca̱x.
9 Rü ngoxi tá choxü̃ naporamae rü choxü̃ yamá nax ngẽmaãcü pexme̱xwa nax tangexmagüxü̃ca̱x. Notürü ngẽxguma chama nüxü̃ charüporamaegu, rü pema tá nixĩ i toxme̱xwa pengexmagüxü̃.
10 Rü nhama i ngunexü̃gu, Pa Iraéuanecüã̱xgüarü Churaragüx, rü pexca̱x chaca rü ¡ẽcü nua penamu̱x i wüxi i perü churara nax togü namaxã tadaixü̃ca̱x! —nhanagürü.
11 Rü yexguma yema Firitéutanüxü̃arü dexaxü̃ naxĩnüegu ga Chaú rü guxü̃ma ga yema namücügü ga Iraéuanecüã̱xgü, rü narümaxãchitanü rü namuü̃e.
12 Rü nayexma ga wüxi ga yatü ga Beréü̃cüã̱x ixĩcü rü Yeché nixĩ ga naéga. Rü nüma rü marü naya ga yexguma Chaú ãẽ̱xgacü ixĩxgu. Rü nüma ga Yeché rü nüxü̃́ nayexma ga 8 ga nanegü, rü wüxi ga nane rü Dawí nixĩ.
13 17:13-14 Rü guma tamaepü̱x ga nane ga rüyamaegüxü̃ ga Eriabé rü Abinadábi rü Chamá rü marü Chaúwe narüxĩ ga daiwa.
14 Nüü̃ nadau 17:13
15 Rü nüma ga Dawí ga rübumaecü rü Iraéuanecüã̱xgüarü churaragü íyexmagüxü̃wa naxũũxü̃ rü nhu̱xũchi Beréü̃ca̱x natáeguaxü̃ nax nanatüarü carnérugüna yadauuuxü̃ca̱x.
16 Rü yoxni yexguma yéma naxũũxü̃yane ga Dawí, rü nüma ga yema Firitéutanüxü̃ rü Iraéuanecüã̱xgüxü̃ nachixewe ga pa̱xmama rü yáuanecü. Rü yemaacü tümamaxã nixĩ nhu̱xmata 40 ga ngunexü̃wa nangu.
17 Rü wüxi ga ngunexü̃gu ga Yeché rü nane ga Dawíxü̃ nhanagürü: —¡Ẽcü nayaxu i wüxiwetaxü̃ i trígu i igoxtanüxü̃, rü nhaa 10 i poũ rü yéa nügü ínadaixchaü̃xü̃wa cueneegüca̱x nana!
18 ¡Rü nhu̱xmachi ngẽ́ma nana ta i nhaa 10 pǘta i quéyu naxca̱x ya yimá churaragüarü ãẽ̱xgacü! ¡Rü cueneegüxü̃ íyadau rü nhuxãcü nüxü̃ nangupetügü, rü wüxi i norü popera nua nange nax ngẽmawa nüxü̃ chacuáxü̃ca̱x nax meama nüxü̃ nax ínangupetügüxü̃! —nhanagürü ga Yeché.
19 Rü nüma ga Chaú rü yema Iraéuanecüã̱xgüarü churaragü rü yema ma̱xpǘnearü tuãchixü̃ ga Elágu ãégaxü̃wa nayexmagü.
20 Rü moxü̃ãcü ga nüma ga Dawí rü yexwaca̱x yangóonechaxü̃gu rü to ga daruü̃me̱xẽgu tüxü̃ namugü ga guxema nanatüarü carnérugü rü inaxũãchi. Rü nayana ga yema õna ga nanatü ga Yeché nüxna naxü̃. Rü yéma naeneegü íyexmagüxü̃wa nangu ga yexguma inaxĩãchichaü̃xgux ga Firitéutanüxü̃gümaxã nügü nax nadaixü̃ca̱x.
21 Rü nüma ga Iraéuanecüã̱xgü rü ga Firitéutanüxü̃gü rü nügüarü to̱xma̱xtagu nügü ninu.
22 Rü nüma ga Dawí rü yema Iraéuanecüã̱xgüarü churaragüarü yemaxü̃güarü daruü̃xü̃tagu nananu ga yema trígu, rü poũ, rü quéyu ga yéma nanaxü̃, rü nhu̱xũchi nanhaãchiãcüma Iraéuanecüã̱xgüarü churaragütanügu nayangaxi nax naeneegüna naca̱xaxü̃ca̱x rü nhuxãcü nüxü̃ nangupetügü.
23 Rü yexguma naeneegümaxã ídexayane, rü nüma ga yema Firitéutanüxü̃ ga Goriáx ga Gáyicüã̱x ixĩxü̃, rü Firitéutanüxü̃güarü churaragütanüwa nichixichi. Rü wenaxarü Iraéuanecüã̱xgüca̱x naca rü tüxü̃ naxãxũne rü yema aixrüguma naxüxü̃rüü̃ãcüma nidexa. Rü nüma ga Dawí rü nüxü̃ naxĩnü.
24 Rü nümagü ga Iraéuanecüã̱xgü ga yexguma yema yatüxü̃ nadaugügu rü poraãcü namuü̃e, rü naxcha̱xwa nibuxmü.
25 Rü nügümaxã nhanagürügü: —¿Marü nüxü̃ pedauxü̃ i ngẽma yatü i ngẽxma ichixichixü̃ nax nhuxãcü tüxü̃ naxãxũnexü̃ i yixema i Iraéuanecüã̱xgü? Rü texé ya yíxema nüxü̃ rüporamaexe, rü nüma ya tórü ãẽ̱xgacü rü muxü̃táma i ngẽmaxü̃gü tá tüxna nana, rü naxacümaxã tá tüxü̃ naxü̱xma̱x rü taxũtáma tüxü̃ nanaxütanüxẽxẽ i ngẽma diẽru i ãẽ̱xgacüna üxü̃ —nhanagürügü.
26 Rü yexguma ga Dawí rü yema naxü̃tawa yexmagüxü̃na naca rü nhanagürü: —¿Ta̱xacümaxã tá nüxü̃́ naxãtanü ya yimá yatü ya nhaa Firitéutanüxü̃xü̃ imácü rü naxoxẽẽcü nax ngẽma Iraéuanecüã̱xgümaxã ta̱xacü nax yaxugüxü̃? ¿Erü ta̱xacü nixĩ i nhaa Firitéutanüxü̃ i tama Tupanaxü̃ cuáxü̃ eca̱x Tupana ya maxü̃cüarü churaragümaxã ta̱xacü yaxugüxü̃? —nhanagürü.
27 Rü nümagü ga Iraéuanecüã̱xgüarü churaragü rü Dawíxü̃ nangãxü̃gü, rü yema noxri namaxã nüxü̃ yaxugüexü̃maxãtama nanangãxü̃gagü, rü namaxã nüxü̃ nixu ga ta̱xacümaxã tá nüxü̃́ nax naxütanüãxü̃ i ngẽma Goriáxü̃ imáxü̃.
28 Notürü nüma ga Eriabé ga Dawíenexẽ ga yacü, rü nüxü̃ naxĩnü ga yema yatügümaxã nax íyadexaxü̃ ga Dawí. Rü yemaca̱x naeneemaxã nanu rü nhanagürü nüxü̃: —¿Ta̱xacüwa nua cuxũ? ¿Rü texémaxã ngẽ́ma ínachianexü̃wa cunawogü i ngẽma tanatüarü carnérugü? Chama rü marü nüxü̃ chacua̱x i ngẽma cucüma nax nua cuxũxü̃ nax icuyadawenümarexü̃ca̱x nax togü tadaixü̃ —nhanagürü.
29 Rü nüma ga Dawí rü nanangãxü̃ga rü nhanagürü: —¿Ta̱xacü ẽ̱xna chaxü eca̱x ngẽma nhacuxü̃ choxü̃? Rü nua chidexamare —nhanagürü.
30 Rü yemawena ga Dawí rü naeneena nixũgachi, rü to ga churarana naca. Rü yemaacütama nanangãxü̃ga.
31 Rü nümaxü̃ ga Iraéuanecüã̱xgü ga Dawíxü̃ ĩnüexü̃ ga nax ínacaxü̃, rü Chaúmaxã nüxü̃ narüxugüe. Rü nüma ga Chaú rü Dawíca̱x nangema.
32 Rü yexguma ga Dawí rü Chaúxü̃ nhanagürü: —Tama name nax texé oégaãẽxü̃ nagagu i nhaa Firitéutanüxü̃, erü chamax i cuxü̃́ puracüxe nax chixĩxü̃, Pa Ãẽ̱xgacüx, rü ngẽ́ma tá chaxũ rü namaxã tá togü tadai —nhanagürü.
33 Rü nüma ga Chaú rü nanangãxü̃ga rü nhanagürü: —Rü taxuacüma cuxica ngẽma Firitéutanüxü̃maxã pegü pedai. Erü cuma rü cungextü̱xüxüchi, notürü i nüma rü norü ngextü̱xügucürüwa da̱i̱xca̱x nangu̱x —nhanagürü.
34 17:34-35 Rü nüma ga Dawí rü nanangãxü̃ga rü nhanagürü: —Yexguma chaunatüarü carnérugüna chada̱xgu, rü wüxi ga leã́ũ rüe̱xna wüxi ga ósu i düraxü̃ yéma ne ũxgu rü wüxi ga carnéru tüxü̃ yayaxugu, rü chama rü nawe changẽ, rü naa̱xwa tüxü̃ chanapu. Rü yexguma cha̱u̱xca̱x yanhaxgu nax choxü̃ yayaxuxü̃ca̱x, rü nachicürawa chatüxüe rü chayachi̱xgü rü nhu̱xmata chayama̱x.
35 Nüü̃ nadau 17:34
36 Rü chama i curü duü̃xü̃, Pa Ãẽ̱xgacüx, rü woo leã́ũ yixĩgu rü ósu i düraxü̃ yixĩgu rü chayama̱x. Rü nhaa Firitéutanüxü̃ i tama Tupanaxü̃ cuáxü̃ rü ngẽmaãcü tá namaxã chanaxü, erü Tupana ya maxü̃cüarü churaragüxü̃ naxãxũne.
37 Rü gumá Cori ya Tupana ga leã́ũna rü ósu i düraxü̃na choxü̃ ípoxü̃cü, rü yimatátama nixĩ i nhaa Firitéutanüxü̃me̱xẽwa choxü̃ ipoxü̃cü —nhanagürü. Rü yexguma ga Chaú nanangãxü̃ga rü nhanagürü: —¡Ẽcü ngẽ́ma naxũ rü Cori ya Tupana cuxü̃ íxümücü! —nhanagürü.
38 Rü yemawena nanamu nax Dawíxü̃ yacu̱xcuchigüxü̃ nagu ga yema naxchiru ga brṍchenaxca̱x ga nümatama ga Chaú nagu yacu̱xuuxü̃. Rü brṍchenaxca̱x ga napate̱xemaxã nanaxüpate̱xe. Rü naremüarü poxü̃ruxü̃ rü naxca̱xwe̱xarü poxü̃ruü̃gu nayacu̱xẽẽgü.
39 Rü yemawena ga Dawí rü norü goyexü̃wa norü tara ninga̱xcuchi. Rü nüxü̃ naxü ga nax yaxũxü̃ namaxã ga yema nügüxü̃newa nanucuxü̃. Notürü tama namaxã nixü ga guxü̃ma ga yema nügüxü̃newa nanucuxü̃ yerü taguma yema nügü naxǘ. Rü yexgumatama Chaúxü̃ nhanagürü: —Taxuacüma chixũ namaxã i nhaa chaxunewa ngẽxmagüxü̃ erü tama chamaxã nixü —nhanagürü. Rü yexguma rü nügü ínacuxü̃xü̃ne ga Dawí.
40 Rü yemawena rü nanayaxu ga guma norü naixmena̱xã rü nixũgachi. Rü yema ngatexü̃wa nanade ga 5 pü̱xü ga nutaxacü ga ibáipü̱xücü rü norü chacu ga yangechigüxü̃gu nananucu. Rü nhu̱xũchi norü maxgütaexü̃ ga naxme̱xgu yangexü̃maxã yema Firitéutanüxü̃ca̱x nixũ.
41 Rü nüma ga Firitéutanüxü̃ rü meamare Dawíca̱x nixũchigü. Rü nape̱xegu nixũchigü ga yema norü poxü̃ruü̃arü ngeruxü̃.
42 17:42-43 Rü yexguma Dawíxü̃ nada̱xgux ga yema Firitéutanüxü̃ nax wüxi ya ngextü̱xücü ga idauü̃chametücüücü nax yixĩxü̃ rü mecü nax yixĩxü̃, rü tama nayaxaixcumaãxü̃ nax nügü namaxã nadaixü̃. Rü nhanagürü nüxü̃: —¿Ẽ̱xna cuxca̱x rü wüxi i airu chixĩ eca̱x naimaxã nua cha̱u̱xca̱x cuxũxü̃? —nhanagürü. Rü yexgumatama Dawímaxã chixexü̃ naxuegu norü tupanaégagu.
43 Nüü̃ nadau 17:42
44 Rü nhu̱xũchi nhanagürü: —¡Nua nanha rü ngurucugüna rü aigüna tá chanaxã i cumachi! —nhanagürü.
45 Rü nüma ga Dawí nanangãxü̃ga rü nhanagürü: —Cuma rü cha̱u̱xca̱x quixũ taramaxã rü wocaemaxã. Notürü i chamax rü cuxca̱x chixũ naégagu ya yimá Iraéuanecüã̱x i churaragüarü Tupana ya guxü̃étüwa ngẽxmacü ya cuma norü churaragüxü̃ cuxãxũneã́xü̃cü quixĩ.
46 Rü nhu̱xmax ya Cori ya Tupana rü tá cha̱xme̱xgu cunanguxẽxẽ nax cuxü̃ chimáxü̃ca̱x. Rü tá cuxü̃ íchadaeeru rü ngẽma curü churaragü i yuexü̃ rü tá ngurucugüna rü aigüna chanana. Rü ngẽmaãcü tá guxü̃ i naanewa nüxü̃ nacua̱xgü nax Iraéuanewa nangexmaxü̃ ya wüxi ya Tupana.
47 Rü guxãma ya yíxema núma ngẽxmagüxe rü tá nüxü̃ tacua̱xgü ya Cori ya Tupana rü tama taramaxã, rüe̱xna wocaxemaxã nixĩ i naxüãxü̃ i ngẽma nüma nagu naxĩnüxü̃. Erü nüma ya Tupana rü tama duü̃xü̃gürüxü̃ ãxneãcü texémaxã nügü nadai. Rü nüma tátama nixĩ i tome̱xgu pexü̃ nayixẽẽxü̃ i nhu̱xmax —nhanagürü.
48 17:48-49 Rü yexguma ga nüma ga Firitéutanüxü̃ rü nayuxnagü rü Dawíca̱x ninha. Rü yexgumarüxü̃ ta ga nüma ga Dawí rü paxama Firitéutanüxü̃ca̱x ninha. Rü norü chacugu nixu rü wüxi ga nuta nayaxu, rü norü maxgütaeruü̃gu nanaxǘ. Rü yemamaxã Firitéutanüxü̃xü̃ namaxü̃, rü meama nacatümaxã namexchinü. Rü guma nuta rü nacatüwa narüwa̱x, rü nüma ga Firitéutanüxü̃ rü nachametümaxã nhaxtüanegu nayangu.
49 Nüü̃ nadau 17:48
50 17:50-51 Rü yemaacü nixĩ ga Dawí ga Firitéutanüxü̃xü̃ naporamaexü̃ namaxã ga wüxi ga maxgütaexü̃ rü wüxi ga nuta. Rü nüma ga Dawí rü nangearü taraã̱x, rü yemaca̱x yema Firitéutanüxü̃ca̱x ninha rü nanayaxu ga norü tara rü yemamaxãtama ínanadaeeru, rü yemaacü nayama̱x. Rü yemaxü̃ nadaugügu ga Firitéutanüxü̃gü ga marü nax nayuxü̃ ga yema norü churara ga namaxã poraxü̃, rü nibuxmü.
51 Nüü̃ nadau 17:50
52 Rü yexguma ga Iraéuanecüã̱xgüarü churaragü rü Yudátanüxü̃ ga churaragü rü aita naxüe yerü marü Firitéutanüxü̃güxü̃ narüporamaegü. Rü nawe nangẽgü nhu̱xmata ĩanegü ga Gáyi rü Ecróü̃arü ũũchiwa. Rü yema Firitéutanüxü̃güarü churaragü ga yuexü̃ rü nanuquegü nawa ga yema nama ga Charaíü̃wa ne daxü̃ rü nhu̱xmata ĩanegü ga Gáyi rü Ecróü̃wa nguxü̃.
53 Rü nüma ga Iraéuanecüã̱xgü rü yema Firitéutanüxü̃güwe nangẽgüguwena, rü yema ínapegüxü̃wa naxĩ rü nanade ga guxü̃ma ga norü yemaxü̃gü ga yéma nüxna yabuxmüxü̃.
54 Rü yexguma ga nüma ga Dawí rü nanayaxu ga Goriáxeru rü Yerucharéü̃wa nanange. Notürü ga guma naxnegü rü norü pegüpataü̃gu nayanu.
55 Rü yexguma Dawí rü Firitéutanüxü̃ca̱x inhaxgu, rü nüma ga Chaú rü norü churaragüeru ga Abnéna naca rü nhanagürü: —¿Texé tixĩ ya nanatü ya yimá ngextü̱xücü? —nhanagürü.
56 Rü nüma ga yema norü churaragüeru ga Abné rü nanangãxü̃ rü nhanagürü: —Pa Ãẽ̱xgacüx, tama nüxü̃ chacua̱x nax texé nane yixĩxü̃ —nhanagürü. Rü nüma ga Chaú rü nhanagürü nüxü̃: —¡Ẽcü, naxca̱x ícagüchigü nax texé nane yixĩxü̃! —nhanagürü.
57 Rü yexguma Dawí rü yema Firitéutanüxü̃arü ma̱xwa ne ũxgu, rü nüma ga Abné rü Chaúpe̱xewa nanaga namaxã ga yema Firitéutanüxü̃eru ga yangechigüxü̃.
58 Rü nüma ga Chaú rü nüxna naca rü nhanagürü: —Pa Ngextü̱xücüx ¡chamaxã nüxü̃ ixu rü texé nane quixĩxü̃! —nhanagürü. Rü nüma ga Dawí nanangãxü̃ rü nhanagürü: —Chama rü yimá curü duü̃ ya Yeché ya Beréü̃cüã̱x nane chixĩ —nhanagürü.
