1 Samuel 18:1-30
18 Rü yexguma Dawí Chaúmaxã igúegagu ga nügümaxã nax yadexagüxü̃, rü nüma ga Chaú nane ga Yónataü̃ rü Dawímücüxü̃ nügü nixĩxẽxẽ, rü nüxü̃ nangechaü̃xü̃chi nhama nügütama nangechaü̃xü̃rüxü̃.
2 Rü nüma ga Chaú rü yematama ngunexü̃gu Dawíxü̃ nayaxu norü ngü̃xẽẽruü̃xü̃, rü tama nanatüca̱x nanamuegu.
3 Rü Yónataü̃ rü Dawí rü Tupanaégagu nügümaxã nanaxuegugü nax nügümücügü nax yixĩgüxü̃ca̱x yerü ga Yónataü̃ rü Dawíxü̃ nangechaü̃ nhama nügütama nangechaü̃xü̃rüxü̃.
4 Rü nhu̱xũchi nüma ga Yónataü̃ rü ínacuxuchi ga yema napa̱x ga nagu yacuxuuxü̃ rü Dawína nanaxã wüxigu namaxã ga yema norü tara rü norü würa rü norü goyexü̃.
5 Rü nüma ga Dawí rü Chaúarü ngü̃xẽẽruxü̃ nixĩ, rü guxü̃guma mea nayanguxẽxẽ ga yema namuaxü̃wa. Rü yemaca̱x nüma ga Chaú rü norü churaragüarü ãẽ̱xgacüxü̃ nayangucuchixẽxẽ. Rü yema duü̃xü̃gü rü churaragü rü naerugü rü namaxã nataãxẽgü rü nanapépünegü.
Nixãũxãchi ga Chaú yerü ga duü̃xü̃gü rü norü yexera Dawíxü̃ nangechaü̃gü
6 Notürü yexguma nawoegu̱xgu ga churaragü nawena ga yema Firitéutanüxü̃xü̃ nax yamáxü̃ ga Dawí, rü guxü̃nema ga Iraéuanecüã̱xgüarü ĩanegüwa norü ãẽ̱xgacüca̱x ínachoxü̃ ga ngexü̃gü ga taãxẽãcüma rü iyaxüãchitanüãcüma rü wiyaegüãcüma rü pãdérugü rü árpa napagüãcüma norü ãẽ̱xgacüxü̃ rümõxegüxü̃.
7 Rü yexguma yema ngexü̃gü wiyaegügu rü íyaxüãchitanüxü̃gu, rü nhaxü̃gu nawiyaegü: “Chaú rü 1,000 i churaragü nadai, rü Dawí rü 10,000 i churaragü nadai”, ngĩgürügügü.
8 Rü yema wiyae nixĩ ga Chaúãxẽwa ngúxü̃, rü poraãcü nanuãcüma nhanagürü: —Dawína nanaxugüe nax 10,000 i churaragü nadaixü̃, notürü choxna i 1,000 icatama. Rü nhu̱xmax ngẽma taxuxü̃ nixĩ nax chauchicüxü ãẽ̱xgacüxü̃ yangucuchigüxẽẽãxü̃ —nhanagürü.
9 Rü yexgumacürüwa ga Chaú rü Dawíxü̃ namuü̃.
10 Rü moxü̃ãcü ga Tupana rü Chaúca̱x yéma nanamu ga naãxẽ ga chixexü̃ rü nüxna nangu. Rü nüma ga Chaú rü nhama naxãũãẽxü̃rüxü̃ nixĩ ga nachiü̃wa. Rü yexguma ga Dawí rü norü árpa napaxü to ga ngunexü̃gurüxü̃. Rü nüma ga Chaú rü guma norü wocae nange.
11 Rü ngürüãchi Dawíxü̃ nanacu̱x ga guma norü wocae nax ĩxtapü̱xmaxã yapaitarexü̃ca̱x, notürü nüma ga Dawí rü taxree̱xpü̱xcüna nügü ínapoxü̃ama.
12 Rü nüma ga Chaú rü Dawíxü̃ namuü̃, yerü Cori ya Tupana rü Dawíxü̃ narüngü̃xẽẽ, notürü marü tama Chaúxü̃ narüngü̃xẽẽ.
13 Rü yemaca̱x ga nügüxü̃tawa rü nayamugachi rü wüxitücumü ga 1,000 icatama ga churaragüarü ãẽ̱xgacüxü̃ nayangucuchixẽxẽ. Rü yema churaragümaxã nixĩ ga Dawí ga daiwa naxũũũxü̃ rü natáeguxü̃xü̃.
14 Rü guxü̃ma ga ta̱xacü ga naxüxü̃wa ga Dawí rü meama nüxü̃́ ínanguxuchi yerü Cori ya Tupana nüxü̃ narüngü̃xẽẽ.
15 Rü yemaca̱x ga nüma ga Chaú rü nüxü̃ namuü̃, yerü nüxü̃ nadau ga nhuxãcü norü yexera natachigamaexü̃ ga Dawí.
16 Notürü guxü̃ma ga Iraéuanecüã̱xgü rü Yudátanüxü̃ rü Dawíxü̃ nangechaü̃gü, yerü nüma nixĩ ga namaxã inacuáxü̃ ga yexguma daiwa naxĩĩxü̱̃xgu.
17 Rü nüma ga Chaú rü wüxi ga ngunexü̃ Dawíxü̃ nhanagürü: —Cuxna tá ngĩxü̃ chamu cuxma̱xü̃ i ngẽma chauxacü irüyamaecü i Merá ega wüxi ya poracü quixĩxgu rü cunadaixgu i Cori ya Tupanaarü uanügü —nhanagürü. Rü nüma ga Chaú nagu narüxĩnü nax tama nümatama Dawíxü̃ yamáxü̃, notürü norü ĩnü chi nixĩ nax Firitéutanüxü̃gü yamáxü̃ca̱x nagu i dai.
18 Notürü ga Dawí rü nanangãxü̃ rü nhanagürü: —Taxuxü̃ma chixĩ i cupe̱xewa, rü chautanüxü̃gü rü taxuxü̃ma nixĩgü i Iraéuanegütanüwa nax cuxã̱xte nax chixĩxü̃ca̱x —nhanagürü.
19 Notürü yexguma nawa nanguxgu ga yema ngunexü̃ nax Dawína ngĩxü̃ namuxü̃ ga naxacü ga Merá, rü nüma ga Chaú rü ngĩxü̃ namu nüxna ga to ga yatü ga Meorácüã̱x ga Adriégu ãégaxü̃.
20 Notürü ga yema nai ga Chaúxacü ga Micá, rü Dawímaxã ixãarüã̱x. Rü yexguma Chaúmaxã nüxü̃ yaxugügügu ga ngĩchiga, rü nüma ga Chaú rü nataãxẽ.
21 Yerü nagu narüxĩnü ga Dawína ngĩxü̃ nax namuxü̃ nax Dawíma̱x yixĩxü̃ca̱x rü ngĩma Firitéutanüxü̃güme̱xẽgu nanguxẽẽãxü̃ca̱x. Rü yemaca̱x ga nüma ga Chaú rü wenaxarü Dawíxü̃ nhanagürü: —Rü nhu̱xmax táwaxi nixĩ i chãũã̱xte quixĩxü̃ —nhanagürü.
22 Rü yemawena rü nüma ga Chaú rü norü ngü̃xẽẽruü̃güxü̃ namu rü nhanagürü: —¡Pema rü pexicatama namaxã pidexagü i Dawí, rü namaxã nüxü̃ pexu rü chama i ãẽ̱xgacü nax chixĩxü̃ rü poraãcü nüxü̃ changechaü̃ rü guxãma i pema i chorü ngü̃xẽẽruü̃gü rü ta rü nüxü̃ nax pengechaü̃güxü̃ rü penaxwa̱xexü̃ nax nüma rü chãũã̱xte yixĩxü̃, nhapegürü tá nüxü̃! —nhanagürü.
23 Rü nüma ga yema Chaúarü ngü̃xẽẽruü̃gü rü yéma Dawíxü̃tawa naxĩ rü namaxã nüxü̃ nixugü ga yema ore ga Chaú namaxã nüxü̃ ixuxü̃. Notürü nüma ga Dawí rü nanangãxü̃ga rü nhanagürü: —¿Ẽ̱xna pema nagu perüxĩnüegu i natauxchaxü̃ nax wüxíe ya chauxrüxü̃ ngearü diẽruã́xe rü taxuxü̃ma ixĩxe nax ãẽ̱xgacüxã̱xte tixĩxü̃? —nhanagürü.
24 Rü nüma ga yema Chaúarü ngü̃xẽẽruü̃gü rü Chaúmaxã nüxü̃ nayarüxugüe ga yema ore ga Dawí namaxã nangãxü̃xü̃.
25 Notürü ga nüma ga Chaú ga nagu nax naxĩnüechaxü̃ ga nhuxãcü Dawíxü̃ Firitéutanüxü̃güme̱xẽgu nax nanguxẽẽchaü̃xü̃, rü yemaca̱x yema norü ngü̃xẽẽruü̃gümaxã nhanagürü: —¡Namaxã nüxü̃ pexu i Dawí rü tama chanaxwa̱xe i diẽru choxna ngĩxü̃ naxã ngĩxca̱x i chauxacü! Notürü ngẽma natanü i chanaxwa̱xexü̃ nixĩ i 100 i Firitéutanüxü̃gücha̱xmüxü̃pe̱xechiraü̃gü nax nua nanaxü̃ nax ngẽmaãcü nax chanayauxtanüxü̃ca̱x i ngẽma chorü uanügüarü chixexü̃ i chamaxã naxügüxü̃ —nhanagürü.
26 18:26-27 Rü nüma ga yema Chaúarü ngü̃xẽẽruü̃gü rü Dawímaxã nüxü̃ nayarüxugü ga yema Chaúarü ore. Rü nüma ga Dawí rü nataãxẽ namaxã ga yema Chaú naxca̱x íca̱xaxü̃, yerü yemaacü nüxü̃́ nanatauxchaxẽxẽama nax naã̱xte yixĩxü̃ca̱x. Rü naxü̃pa ga yema ngunexü̃ ga Chaú namaxã ixunetaxü̃, rü nüma ga Dawí rü nananutaque̱xe ga norü churaragü rü inaxũãchi, rü 200 ga Firitéutanüxü̃gü nayadai. Rü yema Firitéutanüxü̃gücha̱xmüxü̃pe̱xechiraü̃gü rü Chaúna nayana nax yemaacü naã̱xte yixĩxü̃ca̱x. Rü yexguma ga nüma ga Chaú rü yema naxacü ga Micá Dawína ngĩxü̃ namu naxma̱xü̃.
27 Nüü̃ nadau 18:26
28 Notürü nüma ga Chaú rü nüxü̃ nicua̱xãchi nax nüma ga Cori ya Tupana rü Dawíxü̃ nangü̃xẽẽxü̃, rü naxacü ga Micá rü Dawíxü̃ nangechaü̃xü̃chi.
29 Rü yemaca̱x yexeraãcü Dawíxü̃ namuü̃ rü naxchi naxai.
30 Rü yexguma Firitéutanüxü̃güarü churaragümaxã nügü nadaixü̃gu, rü nüma ga Dawí nixĩ ga guxü̃ma ga togü ga Chaúarü churaragüeruarü yexera norü uanügüxü̃ narüporamaexü̃. Rü yemaca̱x nixĩ ga guxü̃ma ga duü̃xü̃gü nüxü̃ ngechaü̃güxü̃.
