1 Samuel 24:1-22
24 Rü yexguma natáegugu ga Chaú ga Firitéutanüxü̃gümaxã nügü ínadaixü̃wa, rü namaxã nüxü̃ nixugügü ga Egádiarü chianexü̃wa nax nayexmaxü̃ ga Dawí.
2 Rü yexguma ga Chaú rü 3,000 ga churaragü nidexechi ga guxü̃ma ga Iraéuanecüã̱xgütanüwa, rü Dawíca̱x nayadaugü nagu ga guma ma̱xpǘnegü.
3 Rü yexguma namagu naxĩxgu ga Chaú, rü yexma nüxü̃ nangau ga nhuxre ga carnérutücumügü norü ngaicamagu ga wüxi ga ma̱xpǘnearü ãxmaxü̃ ga nagu yacúxü̃ ga Dawí norü churaragümaxã. Rü nüma ga Chaú rü yema ãxmaxü̃gu nangaxi nax yexma íyawo̱xéxü̃ca̱x.
4 Rü nüma ga Dawíarü churaragü rü nhanagürügü Dawíxü̃: —Nhu̱xmawaxi nixĩ i yanguxü̃ ga yema uneta ga Cori ya Tupana cumaxã nüxü̃ ixuxü̃ nax cuxme̱xgu nanguxẽẽãxü̃ i ngẽma curü uanü. ¡Rü ẽcü yama̱x cuma nagu curüxĩnüxü̃ãcüma! —nhanagürügü. Rü nüma ga Dawí rü bexma yama̱xcüxchigüãcüma yéma naxũ rü Chaúarü deyuxü̃chiru íxraxü̃ niwíepechinü.
5 Notürü ga yixcüama ga Dawí rü poraãcü nüxü̃́ nangu̱x ga yema naxüxü̃.
6 Rü nhanagürü norü churaragüxü̃: —¡Cori ya Tupana choxü̃ rüngü̃xẽxẽ nax tama ta̱xacü namaxã chaxüxü̃ca̱x i ngẽma chorü ãẽ̱xgacü! Nüma rü ãẽ̱xgacü nixĩ yerü Cori ya Tupanatama nüxü̃ naxuneta —nhanagürü.
7 Rü yemaacü ga Dawí rü nüxna nachogü ga norü churaragü yerü tama nanaxwa̱xe nax Chaúxü̃ nax yama̱xgüxü̃. Rü nüma ga Chaú rü ínaxũxü̃ ga yema ãxmaxü̃wa rü inaxĩ.
8 Notürü nüma ga Dawí rü Chaúwetama inayago ga yema ãxmaxü̃wa rü nüxna naca rü nhanagürü: —Pa Ãẽ̱xgacüx, Pa Ãẽ̱xgacüx —nhanagürü. Rü nüma ga Chaú rü nügü nadauegu. Rü nüma ga Dawí rü nhaxtüanegu yangücuchiãcüma nüxü̃ narümoxẽ.
9 Rü nhanagürü nüxü̃: —¿Tü̱xcüü̃ i naga cuxĩnüxü̃, Pa Ãẽ̱xgacüx, i ngẽma duü̃xü̃gü i cumaxã nüxü̃ ixuxü̃ nax chama rü naxca̱x chadauxü̃ nax cuxü̃ chimáxü̃?
10 Pa Chorü Ãẽ̱xgacüx, nhu̱xmawaxi nixĩ i aixcuma nüxü̃ cucuáxü̃ nax tama cuxü̃ chimáxchaü̃. Rü woo Cori ya Tupana rü cha̱xme̱xgu cuxü̃ nax nanguxẽẽchiréxü̃ i nua ma̱xpǘnearü ãxmaxü̃wa, notürü i chama rü tama cuxü̃ chima̱x, Pa Ãẽ̱xgacüx. Erü nagu charüxĩnü nax cuma rü ãẽ̱xgacü quixĩxü̃ erü Cori ya Tupana rü marü ngẽmaca̱x cuxü̃ naxuneta.
11 ¡Rü dücax, mea nuxã nadawenü, Pa Ãẽ̱xgacüx, i nhaa cha̱xme̱xwa ngẽxmaxü̃! ¿Tama ẽ̱xna curü gáuxü̃chirutüchi yixĩxü̃ i nhaa? Rü ngẽmawa nüxü̃ cucua̱x nax marü chi cuxü̃ nax chimáxü̃. Rü ngẽmawa nüxü̃ cucua̱x, Pa Ãẽ̱xgacüx, nax taxuxü̃ma i chixexü̃ cumaxã chaxüxchaü̃xü̃, rü tama chanaxwa̱xexü̃ nax chacuechitaexü̃ rü bai i nhuxgu ta̱xacürü chixexü̃ cumaxã chaxüxü̃. Notürü i cumax, Pa Ãẽ̱xgacüx, rü chawe quingẽchigü nax choxü̃ quimáxü̃ca̱x.
12 ¡Rü Tupana nangugü i ngẽma yigümaxã ixüxü̃! Rü nüma nixĩ i nüxü̃ nacuáxü̃ i ta̱xacü tá cumaxã naxüxü̃, notürü i chamax, Pa Ãẽ̱xgacüx, rü tagutáma ta̱xacürü chixexü̃ cumaxã chaxü —nhanagürü.
13 --
14 --
15 --
16 Rü yexguma Dawí rü chianegu nax yadexaxü̃, rü nüma ga Chaú rü tagaãcü nanangãxü̃ga rü nhanagürü: —¿Ẽ̱xna cuma quixĩxü̃, Pa Chaunex, Pa Dawíx, i chamaxã quidexaxü̃? —nhanagürü. Rü nhu̱xũchi inanaxügü ga nax naxaxuxü̃.
17 Rü nhanagürü Dawíxü̃: —Ngẽma cuma nüxü̃ quixuxü̃ nixĩ i aixcuma ixĩxü̃. Erü cuma rü mexü̃ choxü̃ cudauxẽxẽ nax woo chixexü̃ cumaxã chaxüxü̃ i chamax.
18 Rü nhu̱xmax rü aixcumaxü̃chi choxü̃ cunawe̱x nax cuma rü naxca̱x cudauxü̃ nax mexü̃ chamaxã cuxüxü̃. Erü nüma ya Cori ya Tupana rü marü cuxme̱xgu choxü̃ nanguxẽẽchire̱x nax choxü̃ quimáxü̃ca̱x, notürü tama choxü̃ quima̱x.
19 Rü aixcuma nixĩ i nataxuxü̃ma i duü̃xü̃ i norü uanüxü̃ maxẽẽxü̃ ega naxme̱xẽgu nanguxgu. Rü ngẽmaca̱x ¡Tupana cuxü̃́ naxütanü naxca̱x i ngẽma mexü̃ i nhu̱xmax chamaxã cuxüxü̃!
20 Rü nhu̱xmawaxi nixĩ i aixcuma nüxü̃ chicua̱xãchixü̃ nax cuma tá yixĩxü̃ i Iraéuanecüã̱xgüarü ãẽ̱xgacü quixĩxü̃. Rü cuma tá nixĩ i namaxã icucuáxü̃, rü cuxme̱xwa mea tá Iraéuanecüã̱xgüxü̃ nangupetü.
21 ¡Rü ẽcü Tupanaégagu chamaxã nüxü̃ ixu rü tagutáma cuyanaxoxẽxẽ i ngẽma chautaagü nax ngẽmaãcü tagutáma iyanaxoxü̃ca̱x i chauéga i chautanüxü̃gütanüwa! —nhanagürü.
22 Rü nüma ga Dawí rü Tupanaégagu Chaúmaxã inaxuneta. Rü yemawena ga nüma ga Chaú rü napataca̱x natáegu. Rü nüma ga Dawí rü norü churaragümaxã wenaxarü yema ma̱xpǘnearü ãxmaxü̃wa naxũ.