1 Samuel 26:1-25
26 Rü yema duü̃xü̃gü ga ĩane ga Chípegu ãchiü̃güxü̃ rü Yibéawa naxĩ ga Chaú íyexmaxü̃wa rü nhanagürügü nüxü̃: —Dawí rü ma̱xpǘne ya Aquirágu nicu̱x i ngẽma taxúema íxãchiü̃xü̃arü to̱xma̱xtawa —nhanagürügü.
2 Rü yexguma ga Chaú rü inaxũãchi namaxã ga 3,000 ga Iraéuanecüã̱xgüarü churaragü ga nüxü̃ rücua̱xmaegüxü̃ ga daiwa, rü Chíarü chianexü̃wa naxĩ nax Dawíca̱x yadaugüxü̃ca̱x.
3 Rü nüma ga Chaú rü norü churaragümaxã ma̱xpǘne ya Aquirá ga namacüwawa yexmanegu nayape ga yema chianexü̃arü to̱xma̱xtawa. Notürü nüma ga Dawí ga yema chianexü̃wa nax nayexmaxü̃, rü nüxü̃ nacua̱x ga Chaú nawe yéma nax ngẽxü̃.
4 Rü yemaca̱x ga Dawí rü ngugütaeruü̃gü yéma namugü nax nüxü̃ nacuáxü̃ca̱x ga ngextá nax nayexmaxü̃ ga Chaú.
5 Rü yemawena ga Dawí rü Chaú íyexmaxü̃wa naxũ, rü nayangugü nax ngexta napegüxü̃ ga Chaú rü Abné ga Né nane ga Chaúarü churaragüarü ãẽ̱xgacü. Rü nüma ga Chaú rü norü duü̃xü̃güarü ngãxü̃tanügu nape.
6 Rü yexguma ga nüma ga Dawí rü nidexa namaxã ga Aimére ga Etéutanüxü̃ ixĩcü, rü Abichái ga Cheruá nane ga Yoábeenexẽ. Rü yemagüna naca rü nhanagürü: —¿Texé ya ímemarexe nax chawe tarüxũxü̃ nax Chaú íngexmaxü̃wa ixĩxü̃? —nhanagürü. Rü nüma ga Abichái nanangãxü̃ga rü nhanagürü: —Chama tá cuwe charüxũ —nhanagürü.
7 Rü yematama ga chütaxü̃gu ga Dawí rü Abichái rü yéma Chaú íyexmaxü̃wa naxĩ. Rü nüma ga Chaú rü norü churaragüarü ngãxü̃tanügu nape rü norü wocae rü naeruxü̃taguama napu. Rü nüma ga Abné rü norü churaragümaxã nüxü̃ ínacamaeguãchi.
8 Rü yexguma ga Abichái rü Dawíxü̃ nhanagürü: —Nhu̱xma ya Tupana rü cuxü̃́ nanatauxchaxẽxẽ nax cuyamáxü̃ca̱x i curü uanü. Chayama̱xtaxa̱x nixĩ, rü norü wocaemaxãtátama nhaxtüanewa chayapaitü, rü marü ngẽmamaxã tátama nayu —nhanagürü.
9 Notürü nüma ga Dawí rü nanangãxü̃ga rü nhanagürü: —¡Tauxü̃́ i cuyamáxü̃! Erü texé ya yíxema yamáxe i ngẽma ãẽ̱xgacü i Tupana nüxü̃ unetaxü̃, rü Tupana rü tautáma nanangupetüxẽẽmare nax tüxü̃ napoxcuxü̃.
10 Rü Cori ya Tupanaégagu cumaxã nüxü̃ chixu rü nüma ya Tupana tá nixĩ i norü maxü̃ nüxna nayaxuxü̃, rü woetátama nayuxẽẽmareã rüe̱xna daigu nayuxẽxẽã.
11 ¡Rü Cori ya Tupana choxü̃ rüngü̃xẽxẽ nax tama nagu charüxĩnüxü̃ca̱x nax chayamáxü̃ ya yimá ãẽ̱xgacü ya nümatama ya Cori ya Tupana nüxü̃ unetacü! ¡Rü nayaxu ya yima wocae ya naeruxü̃tagu pu̱xuxcü rü ngẽma dexápaxü̃, rü ngĩxã ítixĩ! —nhanagürü.
12 Rü yemaacü ga Dawí rü nanayaxu ga guma wocae rü dexápaxü̃ ga Chaúeruxü̃tagu nuxü̃, rü ínixĩ. Rü taxuxü̃ma nüxü̃ nadau rü bai nüxü̃ naxĩnü. Rü taxuxü̃ma naba̱i̱xãchi. Rü guxü̃ma napeexüchi, yerü Cori ya Tupana nanapeexẽxẽxü̃chi.
13 Rü yemawena ga Dawí rü namücü rü yema ngatexü̃arü tocutüwa naxĩ rü wüxi ga ma̱xpǘnetape̱xegu naxĩgü, rü yemaacü nüxna niyáxü̃tanüãchi.
14 Rü yexguma ga Dawí rü tagaãcü Abnéna rü norü churaragüna nacagü, rü nhanagürü: —¡Pa Abnéx, choxü̃ nangãxü̃ga! —nhanagürü. Rü nüma ga Abné rü nanangãxü̃ga rü nhanagürü: —¿Texé quixĩ i cumax eca̱x tagaãcü ãẽ̱xgacüna cuca̱xaxü̃? —nhanagürü.
15 Rü Dawí nanangãxü̃ga rü nhanagürü: —¿Tama ẽ̱xna cuma quixĩxü̃ i guxü̃ma i Iraéuanecüã̱xgüarü churaragümaxã icucuáxü̃? ¿Rü nhuxãcü tama mea nüxna cudauxü̃ ya curü cori ya ãẽ̱xgacüx? Erü wüxi i duü̃xü̃ ngẽxma naxücu nax yamáaxü̃ca̱x.
16 Rü tama name i ngẽma cuxüxü̃. Chama rü Cori ya Tupanaégagu cumaxã nüxü̃ chixu rü name nixĩ nax cuyuxü̃, erü tama mea nüxna cudau ya curü ãẽ̱xgacü ya Cori ya Tupana nüxü̃ unetacü. ¡Naxca̱x nadau ya norü wocae rü norü dexápaü̃ ga naeruxü̃taguama nuxü̃, rü ngoxita ngextá nüxü̃ cuyangaux! —nhanagürü.
17 Rü yexguma Chaú nüxü̃ cua̱xgu nax Dawí yixĩxü̃ ga yéma idexaxü̃, rü tagaãcü yexma nacagü rü nhanagürü: —¿Ẽ̱xna cuma quixĩxü̃, Pa Chaunex, Pa Dawíx? —nhanagürü. Rü nüma ga Dawí rü nanangãxü̃ga rü nhanagürü: —Ngü̃, Pa Ãẽ̱xgacüx, chama chixĩ.
18 ¿Notürü tü̱xcüü̃ chawe quingẽchigü Pa Ãẽ̱xgacüx, i chama nax curü duü̃xü̃ chixĩxü̃? ¿Rü ta̱xacü chaxü? ¿Rü ta̱xacürü chixexü̃ cumaxã chaxü?
19 Chama i curü duü̃xü̃ nax chixĩxü̃ rü cuxü̃ chaca̱a̱xü̃ Pa Ãẽ̱xgacüx nax choxü̃ cuxĩnüxü̃. Rü ngẽxguma chi Tupana cuxna ĩnügu, Pa Ãẽ̱xgacüx, nax chamaxã curüxuanüxü̃ca̱x ¡rü nayaxu i chorü ãmare nax chamaxã curüngüxmüxü̃ca̱x! Notürü ngẽxguma chi cumatama nagu curüxĩnügu nax chauxchi cuxaixü̃, rü Tupana tá nixĩ ya nüxü̃ cuácü nax cuxü̃́ naxütanüãxü̃ naxca̱x i ngẽma. Yerü cuma nixĩ ga Tupanaarü duü̃xü̃güarü naanewa choxü̃ ícuta̱xüchixü̃ nax ngẽmaãcü togü i tupanaxü̃ chicua̱xüüxü̃ca̱x.
20 Rü tama chanaxwa̱xe i Tupanaarü duü̃xü̃güarü naanearü yáxü̃gu chayu i ngextá tupananetaxü̃ íyacua̱xüü̃güxü̃wa. Notürü i cumax, Pa Ãẽ̱xgacüx, rü nhama wüxi i airuchica̱x idauxü̃rüxü̃ cha̱u̱xca̱x cudau rü nhama wüxi i ngugaca̱x idauxü̃rüxü̃ chawe quingẽchigü i daa ma̱xpǘnegüwa —nhanagürü.
21 Rü yexguma ga Chaú rü nhanagürü: —Pa Chaunex, Pa Dawíx, rü nüxü̃ chicua̱xãchi nax chixexü̃ chaxüxü̃. Rü nhama wüxi i duü̃xü̃ i ngeãxẽmarexü̃rüxü̃ chamaxü̃, rü poraãcü íchatü. ¡Ẽcü natáegu, rü taxuxü̃táma i chixexü̃ cumaxã chaxü! Erü nhama i ngunexü̃gu rü nüxü̃ cungechaü̃ i chorü maxü̃, rü tama choxü̃ quima̱x —nhanagürü.
22 Rü nüma ga Dawí rü nanangãxü̃ga, rü nhanagürü: —Daa nixĩ ya curü wocae, Pa Ãẽ̱xgacüx ¡rü wüxi i curü duü̃xü̃ nua ũ nax yayauãxü̃ca̱x!
23 ¡Rü Tupana tüxü̃́ naxütanü ya wüxíechigü naxca̱x i ngẽma mexü̃ nax taxüxü̃ rü ngẽma nax tixaixcumaxü̃! Erü chama rü nhama i ngunexü̃gu rü tama cuxü̃ chimáxchaü̃ ga yexguma Tupana choxü̃́ natauxchaxẽẽgu ga cuxü̃ nax chimáxü̃ca̱x.
24 Rü ngẽma nax nhu̱xmax curü maxü̃xü̃ changechaü̃xü̃rüxü̃ rü tama cuxü̃ nax chimáxü̃, Pa Ãẽ̱xgacüx, rü ngẽxgumarüxü̃ ta chanaxwa̱xe i Cori ya Tupana nüxü̃ nax ngechaü̃xü̃ i chorü maxü̃ rü nawa choxü̃ ínanguxuchixẽẽxü̃ i guxü̃ma i nhaa ngúxü̃gü —nhanagürü.
25 Rü yexguma nüma ga Chaú rü tagaãcü nhanagürü: —¡Tupana cuxü̃ rüngü̃xẽxẽ, Pa Chaunex, Pa Dawíx! Rü taxü̃ i mexü̃ tá cuxü, rü guxü̃watáma mea cuxü̃ ínanguxuchi —nhanagürü. Rü yemawena ga Chaú rü nachiü̃ca̱x natáegu. Rü nüma ga Dawí rü nixũchigüama.
