1 Samuel 28:1-25
28 --
2 --
Chaú rü Eü̃dúwa naxũ ngĩxü̃tawa ga wüxi ga ngecü ga yuücü
3 Rü yexguma ga Chamué rü marü nayu. Rü guxü̃ma ga Iraéuanecüã̱xgü rü naxca̱x naxauxe, rü yemawena rü guma ĩane ga nagu nabuxü̃ne ga Ramágu nanata̱xgü. Rü nüma ga Chaú rü ga ü̃paacü marü ínanawoxü̃ ga guxü̃ma ga yema ẽxü̃guxü̃xü̃ cua̱xgüxü̃ rü yema yuetaãẽgüca̱x ngẽmagüxü̃.
4 Rü nüma ga Firitéutanüxü̃güarü churaragü rü nangutaque̱xegü rü Chunéü̃wa naxĩ rü yexma nayapegü. Rü nüma ga Chaú rü guxü̃ma ga Iraéuanecüã̱xgüarü churaragüxü̃ nangutaque̱xexẽxẽ rü Yibóagu nügü ninu.
5 28:5-6 Notürü nüma ga Chaú rü yexguma yema Firitéutanüxü̃güarü churaragüxü̃ nada̱xgu, rü poraãcü naba̱i̱xãchi rü namuü̃. Rü Tupanana naca ga ta̱xacü tá nax naxüxü̃. Notürü nüma ga Tupana rü tama nanangãxü̃ga woo nanegüwa, rü woo yema cua̱xruxü̃ ga chacherdótegüarü ãẽ̱xgacü ingexü̃ ga Uríü̃wa, rü woo Tupanaarü orearü uruü̃güwa.
6 Nüü̃ nadau 28:5
7 Rü yemaca̱x ga Chaú rü norü churaragüxü̃ namu rü nhanagürü: —¡Ẽcü ngĩxca̱x peda̱u̱x i wüxi i nge i nüxü̃ cua̱xcü nax yuetaca̱x nangemaxü̃, nax ngẽ́ma chaxũxü̃ca̱x, rü ngĩxna chayaca̱xü̃ca̱x! —nhanagürü. Rü nüma ga churaragü rü nanangãxü̃gü rü nhanagürügü: —Rü Eü̃dúwa ingexma i wüxi i nge i nüxü̃ cuáxü̃ nax yuetaãẽca̱x nangemaxü̃ —nhanagürügü.
8 Rü nüma ga Chaú rü nügü nanatoxchiruraxü̃xẽxẽ, rü taxre ga namücügü ínigagü, rü chütacü yema ngexü̃xü̃tawa naxũ, rü nhanagürü ngĩxü̃: —Namaxã chidexachaü̃ i wüxi i duü̃xü̃ i yuxü̃. ¿Rü cuxü̃́ natauxchaxü̃ i naãxẽca̱x nax cungemaxü̃? —nhanagürü.
9 Rü ngĩma ga yema nge rü inangãxü̃ rü ngĩgürügü: —¿Ta̱xacü nixĩ? ¿Ẽ̱xna cunaxwa̱xe nax choxü̃ yama̱xgüxü̃? Cuma nüxü̃ cucua̱x ga Chaú rü guxü̃ma ga yema ẽxü̃guxü̃xü̃ cua̱xgüxü̃ rü duü̃xẽ ga yuetaca̱x ngẽmagüxü̃ rü nanadai. Cuma rü wüxi i ngugütaeruü̃mare quixĩ —ngĩgürügü.
10 Notürü nüma ga Chaú rü Cori ya Tupanaégagu nhanagürü ngĩxü̃: —Tupanaégagu cumaxã nüxü̃ chixu rü taxutáma i ta̱xacü cuxü̃ nangupetü —nhanagürü.
11 Rü ngĩma ga yema nge rü inangãxü̃ga rü ngĩgürügü: —¿Rü texé cutümawa̱xe nax tümaca̱x changemaxü̃? —ngĩgürügü. Rü nüma ga Chaú rü ngĩxü̃ nangãxü̃ga rü nhanagürü: —¡Chamuéca̱x nangema! —nhanagürü.
12 Rü ngürüãchi ga yema nge rü Chamuéxü̃ idau, rü aita ixü. Rü nhu̱xũchi Chaúxü̃ ngĩgürügü: —¿Tü̱xcüü̃ choxü̃ cuwomüxẽxẽ? Cuma rü Chaú quixĩ —ngĩgürügü.
13 Notürü nüma ga ãẽ̱xgacü rü nhanagürü ngĩxü̃: —¡Tauxü̃́ i cumuü̃xü̃! ¿Ta̱xacüxü̃ cudau? —nhanagürü. Rü ngĩma ga nge rü inangãxü̃ga rü ngĩgürügü: —Nüxü̃ chadau i wüxi i tupana i nhama i naanewa chü̱xnagüxü̃ —ngĩgürügü.
14 Rü nüma ga Chaú rü ínaca rü nhanagürü: —¿Nanhuxraxü̃xü̃? —nhanagürü. Rü ngĩma ga yema nge rü inangãxü̃ga rü ngĩgürügü: —Wüxi i yaxguã̱x i ma̱xpáxü̃ nixĩ —ngĩgürügü. Rü nüma ga Chaú rü yexgumatama nüxü̃ nicua̱xãchi ga Chamué nax yixĩxü̃. Rü nhaxtüanegu nanangücuchi.
15 Rü yexguma ga Chamué rü nhanagürü: —¿Ta̱xacüca̱x i choxü̃ cuchixewexü̃ rü nua choxü̃ cuxũxẽẽxü̃? —nhanagürü. Rü nüma ga Chaú nanangãxü̃ga rü nhanagürü: —Poraãcü chaxoégaãxẽ, erü nüma i Firitéutanüxü̃gü rü toxca̱x ínayaxüãchi, notürü nüma ya Tupana rü marü choxna nixũgachi rü tama choxü̃ nacuáxchaü̃, rü tama choxü̃ nangãxü̃ga i orearü uruü̃güwa rüe̱xna chaunegüwa. Rü ngẽmaca̱x nixĩ i cuxca̱x changemaxü̃ nax cuxna chaca̱xaxü̃ca̱x nax ta̱xacü tá chaxüxü̃ —nhanagürü.
16 Rü nüma ga Chamué nanangãxü̃ga rü nhanagürü: —¿Tü̱xcüü̃ choxna cuca ega Tupana rü marü cuxü̃ naxoxgu rü curü uanüxü̃ nügü yaxĩxẽẽgu?
17 Rü Cori ya Tupana cumaxã nayanguxẽxẽ ga yema chawa cumaxã nüxü̃ yaxuxü̃. Rü cuxna nanayaxu nax ãẽ̱xgacü quixĩxü̃ rü yimá naxchi cuxaicü ya Dawína nanaxã.
18 Rü ngẽmaãcü cumaxã naxüpetü ya Tupana, yerü tama naga cuxĩnü ga yema cuxü̃ namuxü̃wa rü tama cuyanguxẽxẽ ga Amaréchitanüxü̃güxü̃ nax cudaixü̃.
19 Rü ngẽmaca̱x i nüma ya Tupana rü tá Firitéutanüxü̃güme̱xẽgu pexü̃ nayixẽxẽ i cuma rü cunegü rü guxü̃ma i Iraéuanecüã̱xgüarü churaragü. Rü tá pexü̃ nadai rü ngẽmaca̱x i moxü̃ i cuma rü cunegü rü nua chauxü̃tawa tá marü pengexmagü. Rü ngẽmawena i ngẽma Firitéutanüxü̃gü rü tá pexna nanapuxü̃ i guxü̃ma i ta̱xacü pexü̃́ ngẽxmaxü̃ i cuma rü curü churaragü —nhanagürü.
20 Rü yexguma yema Chamuéarü orexü̃ naxĩnügu ga Chaú, rü poraãcü namaxã naba̱i̱xãchiãxẽ rü yexma niyuãchi rü nhama wüxi ya nai i wáxü̃nerüxü̃ niwa̱x. Rü naétü rü naturaxü̃ne yerü taguma nachibü ga wüxi ga ngunexü̃ rü wüxi ga chütaxü̃.
21 Rü yexguma Chaúxü̃ nada̱xgux ga yema nge ga nhuxãcü nax naxi̱xãchiãẽxü̃, rü naxca̱x iyaxũ rü ngĩgürügü nüxü̃: —Chama nax curü duü̃xü̃ chixĩxü̃ rü marü chanaxü i ngẽma naxca̱x ícuca̱xaxü̃. Rü woo ãũcümaxü̃wa nangexma i chorü maxü̃ rü chanaxüama i ngẽma choxü̃ cumuxü̃.
22 Rü ngẽmaca̱x i nhu̱xmax rü cuxna chaca nax choxü̃́ icurüxĩnüxü̃. Rü íxraxü̃ i õna tá cuxna chaxã nax ngẽmaãcü cuporaxü̃ca̱x nax cutáeguxü̃ca̱x —ngĩgürügü.
23 Rü nüma ga Chaú rü tama nachibüchaü̃, notürü ga yema norü churaragü rü yema nge rü nüxü̃ ica̱a̱xü̃güama, rü yemaca̱x düxwa: —Ngü̃ —nhanagürü. Rü yexgumatama inachi ga nhaxtüanegu nax nanguxü̃, rü wüxi ga pechicaxü̃wa narüto.
24 Rü yexgumayane ga ngĩma ga yema nge rü iyama̱x ga wüxi ga wocaxacü ga ingüxü̃ ga ngĩchiü̃wa yexmaxü̃. Rü iyanhumü ga trígute̱xe, rü poũ ga ngearü pu̱xẽẽruü̃ã́xü̃ ta ixü.
25 Rü yemawena rü inaxüwemü ga guma ãẽ̱xgacü rü norü duü̃xü̃gü. Rü nümagü rü nachibüe, rü nhu̱xũchi nawoegu yematama chütaxü̃gu.
