1 Samuel 3:1-21
3 Rü nüma ga ngextü̱xücü ga Chamué rü Cori ya Tupanaaxü̃́ napuracü yema Erí namuxü̃ãcüma. Rü yexguma ga Tupana rü nhuxguacürica texémaxã nidexa. Rü nhuxguacürica texéca̱x nanango̱xẽxẽ ga ẽxü̃guxü̃.
2 Rü nüma ga Erí rü marü naya rü yemaca̱x marü nixoxetü rü tama mea ta̱xacüxü̃ nadau. Rü wüxi ga chütaxü̃gu rü norü ucapuwa ínape ga Tupanapatawa.
3 Rü nüma ga Chamué rü yema baú ga Tupanaarü mugü nawa yexmaxü̃xü̃taguama nape. Rü yema norü omü ga guma Tupanapata rü nanaiecha.
4 Rü wüxi ga chütaxü̃ rü nüma ga Cori ya Tupana rü Chamuéxü̃ naca rü nhanagürü: —Pa Chamué, Pa Chamué —nhanagürü. Rü nüma ga Chamué rü nanangãxü̃: —Daxe chixĩ —nhanagürü.
5 Rü yexgumatama ínarüda ga yema ínapexü̃wa rü Erí íyexmaxü̃wa nanha, rü nhanagürü: —Daxe chixĩ rü nua changexma. ¿Rü ta̱xacüca̱x cha̱u̱xca̱x cuca? —nhanagürü. Rü nüma ga Erí rü nanangãxü̃ga rü nhanagürü: —Taguma nixĩ i cuxca̱x chaca̱xü̃. ¡Ẽcü natáegu rü yape! —nhanagürü. Rü yexguma ga nüma ga Chamué rü natáegu rü nayape.
6 Notürü nüma ga Cori ya Tupana rü wenaxarü Chamuéna naca rü nhanagürü: —Pa Chamué —nhanagürü. Rü nüma ga Chamué rü ínarüda, rü Erí íyexmaxü̃wa nanha rü nhanagürü: —Daxe chixĩ rü nua changexma. ¿Ta̱xacüca̱x cha̱u̱xca̱x cuca? —nhanagürü. Rü nüma ga Erí rü nanangãxü̃ga rü nhanagürü: —Taguma nixĩ i cuxca̱x chaca̱xü̃, Pa Chaunex. ¡Ẽcü natáegu rü yape! —nhanagürü.
7 Rü nüma ga Chamué rü tama nüxü̃ nacua̱x nax Cori ya Tupana yixĩxü̃ ga namaxã idexaxü̃ yerü ga aixrügumaãcü taguma namaxã nidexa.
8 Notürü yema chütaxü̃gu rü nüma ga Cori ya Tupana rü norü tamaepü̱xcüna Chamuéna naca. Rü nüma ga Chamué rü ínarüda rü Eríxü̃tawa nanha rü nhanagürü: —Daxe chixĩ, rü nua changexma. ¿Rü ta̱xacüca̱x cha̱u̱xca̱x cuca? —nhanagürü. Rü nüma ga Erí rü nüxü̃ nicua̱xãchi ga Cori ya Tupana nax yixĩxü̃ ga gumá Chamuéna ca̱xacü.
9 Rü nüma ga Erí rü Chamuéxü̃ nhanagürü: —¡Ẽcü yape! Rü ngẽxguma Cori ya Tupana wena cuxna caxgu ¡rü nangãxü̃ga rü nhacuxü̃ tá: “Rü idexa rü yimá curü duü̃ rü nüxü̃ naxĩnü nixĩ”, nhacuxü̃ tá! —nhanagürü. Rü yexguma nüma ga Chamué rü natáegu rü nayape.
10 Rü yemawena ga nüma ga Cori ya Tupana rü wenaxarü Chamuéxü̃ naca ga yema noxri nüxü̃ naca̱xgurüü̃tama, rü nhanagürü: —Pa Chamué, Pa Chamué —nhanagürü. Rü nüma ga Chamué rü nanangãxü̃ga rü nhanagürü: —¡Idexa! Rü cuxü̃ naxĩnü nixĩ ya curü duü̃ —nhanagürü.
11 Rü nüma ga Cori ya Tupana rü nhanagürü: —Nhu̱xma rü Iraéuanecüã̱xgütanüwa tá chanaxü i ta̱xacü i guxãtáma namaxã ba̱i̱xãchiexü̃. Rü guxãma ya nüxü̃ ĩnüxe rü tá namaxã tangu̱xmachi̱xẽgü.
12 Rü ngẽma ngunexü̃gu rü taxũtáma chanangupetüxẽxẽ i guxü̃ma ga yema Erímaxã nüxü̃ chixuxü̃ ga nanegüchiga.
13 Rü namaxã nüxü̃ chixu rü tá chanapoxcue i ngẽma nanegü naxca̱x i ngẽma chixexü̃ i nüma marü nüxü̃ nacuáxü̃. Yerü ga nanegü rü chixexü̃ chamaxã nixugüxe rü nüma rü tama nüxna nachogü naxca̱x ga yema chixexü̃ ga naxügüxü̃.
14 Rü ngẽmaca̱x i nhu̱xmax rü Erí nanegümaxã chanaxuegu nax taxũtáma nüxü̃́ nüxü̃ nax changechaü̃xü̃ i norü chixexü̃gü woo naxü̃nagü cha̱u̱xca̱x ínaguxgu rüe̱xna ãmaregü choxna naxuaü̃gügu —nhanagürü ga Tupana.
15 Rü yemawena ga Chamué rü nape nhu̱xmata moxü̃ãcü yangune. Rü yexguma ínadaxgu rü inanawãxã ga Tupanapataarü ĩã̱xgü. Notürü nüma ga Chamué rü namuü̃ ga Erímaxã nüxü̃ nax yaxuxü̃ ga yema dexa ga Tupana namaxã nüxü̃ ixuxü̃.
16 Notürü nüma ga Erí rü Chamuéca̱x naca rü nhanagürü nüxü̃: —Pa Chaunex, Pa Chamué —nhanagürü. Rü nüma ga Chamué nanangãxü̃ga rü nhanagürü: —Daxe chixĩ —nhanagürü.
17 Rü nüma ga Erí rü Chamuéna naca rü nhanagürü: —¿Nhuxũ nhaxü̃ yixĩxü̃ cuxü̃ ya Cori ya Tupana? ¡Rü guxü̃xü̃táma chamaxã quixu, rü taxuxü̃táma iquicu̱x! Rü Tupana poraãcü cuxü̃ poxcu̱x ega taxũtáma guxü̃ i ngẽma cumaxã nüxü̃ yaxuxü̃xü̃ chamaxã quixuxgu —nhanagürü.
18 Rü nüma ga Chamué rü guxü̃xü̃ma Erímaxã nixu rü taxuü̃ma iniicu̱x. Rü nüma ga Erí rü naba̱i̱xãchi rü nhanagürü: —Nüma nixĩ i Cori ya Tupana yixĩxü̃. ¡Ẽcü naxüã i ngẽma naxca̱x rümemaexü̃! —nhanagürü.
19 Rü nüma ga Chamué rü niyachigü, rü Cori ya Tupana rü nanaxü̃tagu. Rü guxü̃ma ga duü̃xü̃gü rü meama nüxü̃́ inarüxĩnüe ga norü ucu̱xẽgü.
20 Rü Dáü̃wa inaxügü, rü nhu̱xmata Bechébawa nangu ga Chamuéxü̃ nax nacua̱xgüxü̃ ga guxü̃ma ga Iraéuanecüã̱xgü ga nax aixcuma Tupanaarü orearü uruxü̃ nax yixĩxü̃.
21 Rü nüma ga Cori ya Tupana rü inayadaxẽxẽ ga Chamuémaxã nüxü̃ nax yaxuxü̃ ga norü ore nawa ga guma Tupanapata ga Chíruwa yexmane. Rü nüma ga Chamué rü nhu̱xũchi duü̃xü̃gümaxã nüxü̃ nixu ga yema norü ore ga Tupana.
