1 Samuel 5:1-12
5 Rü yexguma marü yapugüã̱xgu ga yema baú ga Tupanaarü mugüchixü̃, rü nüma ga Firitéutanüxü̃gü rü ĩane ga Ebenéchewa nanayauxgü rü norü ĩane ga Asdódewa nanangegü.
2 Rü nhu̱xũchi norü tupana ga Dagóũpatawa nanangegü rü yema naxchicüna̱xãxü̃tagu nanaxǘgü.
3 Rü moxü̃ãcü ga yexguma ínangugügu ga yema Asdódecüã̱xgü, rü Dagóũchicüna̱xãxü̃ inayangaugü ga nhaxtümüanegumare nguxü̃ nape̱xegu ga yema baú ga Tupanaarü mugü nawa yexmaxü̃. Rü yexguma ga yema duü̃xü̃gü rü nanayauxgü ga yema Dagóũchicüna̱xã rü wena nachicagu nanachixẽẽgü.
4 Notürü yexguma moxü̃ãcü pa̱xmama yéma naxĩxgu ga yema Asdódecüã̱xgü, rü nüxü̃ inayangaugü ga Dagóũchicüna̱xã ga wenaxarü nhaxtümüanegu ümarexü̃ nape̱xegu ga yema baú ga Tupanaarü mugü nawa yexmaxü̃. Rü ga naeru rü guma taxre ga naxme̱x rü nabüü̃ rü ĩã̱xgu nayanúmare. Rü yema naxü̃nerica nixĩ ga mexü̃.
5 Rü ngẽmaca̱x nixĩ i woo i nhu̱xmax i ngẽma Dagóũarü chacherdótegü rü ngẽxguma yima tupauca ya Asdódewa ngexmanegu nachocu̱xgu rü tama ngẽma mürapewa i ĩã̱xwa itoxexü̃wa nangagüxü̃.
6 Notürü nüma ga Cori ya Tupana rü nanapoxcue rü ínanaba̱i̱xgü ga yema duü̃xü̃gü ga Asdódecüã̱xgü, rü taixnamaxã nayada̱xaweexẽxẽ.
7 Rü yemaxü̃ nadaugügu ga yema duü̃xü̃gü ga Asdódecüã̱xgü rü nhanagürügü: —Ngẽma baú ya Iraéuanecüã̱xgüarü Tupanaarü ixĩxü̃ rü tama tanaxwa̱xe i tatanüwa nax nangexmaxü̃ erü ngẽmagagu nixĩ i ngẽma Tupana rü taxca̱x rü tórü tupana i Dagóũca̱x rü poraãcü guxchaxü̃ ínanguxẽẽxü̃ —nhanagürügü.
8 Rü yemaca̱x ga yema Asdódecüã̱xgü rü guxü̃ma ga Firitéutanüxü̃güarü ãẽ̱xgacügüca̱x nangema nax namaxã nangutaque̱xegüxü̃ca̱x. Rü nüxna nacagüe rü nhanagürügü: —¿Ta̱xacü tá namaxã ixügüxü̃ i ngẽma baú i ngẽma Iraéuanecüã̱xgüxü̃arü Tupanaarü mugüchixü̃? —nhanagürügü. Rü yema ãẽ̱xgacügü rü nanangãxü̃ga rü nhanagürügü: —¡Ẽcü ĩane ya Gáyiwa penangegü! —nhaxü̃maxã nanangãxü̃gü. Rü nüma ga yema Firitéutanüxü̃gü rü yéma guma ĩanewa nanangegü.
9 Notürü yexguma marü yéma nangegüã̱xguwena, rü nüma ga Cori ya Tupana rü yema ĩanecüã̱xgüxü̃ nayaxĩ̱xãchiãẽxẽẽgü, yerü taixnamaxã nayada̱xaweexẽxẽ ga guxü̃ma ga duü̃xü̃gü ga ibuxü̃ rü iyaxü̃.
10 Rü yexguma ga nüma ga Firitéutanüxü̃gü rü ĩane ga Ecróü̃waama nanangegü ga yema baú ga Tupanaarü mugüchixü̃. Notürü yexguma Ecróü̃wa nanguxgu ga yema baú, rü yema duü̃xü̃gü ga Ecróü̃cüã̱xgü rü nixaixcha rü nhanagürügü: —¿Tü̱xcüü̃ nua penange i ngẽma Iraéuanecüã̱xgüarü Tupanaarü mugüchixü̃ nax toxü̃ nadaixü̃ca̱x ya guxãma? —nhanagürügü.
11 Rü guma ĩanewa rü guxü̃ma ga duü̃xü̃gü rü nanaxĩ̱xãchiãxẽgü, yerü Tupana rü poraãcü nanapoxcue. Rü yemaca̱x ga yema ĩanecüã̱xgü rü guxü̃ma ga Firitéutanüxü̃güarü ãẽ̱xgacügüca̱x nangema rü nhanagürügü nüxü̃: —¡Nua torü ĩanewa ípenangexechi i ngẽma baú i Iraéuanecüã̱xgüarü Tupanaarü mugüchixü̃, rü nachixü̃aneca̱xtama penatáeguxẽxẽ nax tama toxü̃ nadaixü̃ca̱x i guxãma i tomax! —nhanagürügü.
12 Rü poraãcü naxauxe ga guma ĩanecüã̱x, yerü yema tama yuexü̃ rü guxü̃wama nataixnaxü̃negü.