1 Samuel 6:1-21
6 Rü yema baú ga Tupanaarü mugüchixü̃ rü 7 ga tauemacü Firitéutanüxü̃güarü naanewa nayexma.
2 Rü nüma ga Firitéutanüxü̃gü rü nanangutaque̱xexẽxẽ ga norü chacherdótegü rü yuüxü̃gü nax yemagüna nacagüexü̃ca̱x, rü nhanagürügü: —¿Ta̱xacü tá namaxã taxüxü̃ i ngẽma Iraéuanecüã̱xgüarü Tupanaarü mugüchixü̃? ¡Tomaxã nüxü̃ pexu nax nhuxãcü tá wena nachixü̃aneca̱x tanatáeguxẽẽxü̃! —nhanagürügü.
3 Rü nüma ga yema chacherdótegü rü yuüxü̃gü rü nanangãxü̃gagü, rü nhanagürügü: —Ngẽxguma penatáeguxẽẽgu i ngẽma baú i Iraéuanecüã̱xgüarü Tupanaarü mugüchixü̃, rü ¡taxũtáma ngẽmaãcümare penatáeguxẽxẽ! Rü name nixĩ nax nüxna penaxãxü̃ i wüxi i ãmare nax ngẽmaãcü Iraéuanecüã̱xgüarü Tupanaxü̃ namaxã perüngüxmüxẽẽxü̃. Rü ngẽxguma i pema rü tá pexca̱x nitaanegü rü tá nüxü̃ pecua̱xãchitanü nax ngẽmagagu yixĩxü̃ i Tupana i pexü̃ yada̱xaweexẽẽxü̃ —nhanagürügü.
4 Rü nüma ga duü̃xü̃gü rü yema chacherdótegüna rü yuüxü̃güna nacagüe, rü nhanagürügü nüxü̃: —¿Ta̱xacü tá nixĩ i nüxna taxãmarexü̃ nax namaxã tanangüxmüxẽẽxü̃ca̱x? —nhanagürügü. Rü nümagü ga chacherdótegü rü yuüxü̃gü nanangãxü̃gü rü nhanagürügü: —Penaxwa̱xe i penaxü i 5 i naxchicüna̱xãgü i úirunaxca̱x i nataixnapü̱xügüraxü̃xü̃. Rü ngẽma naxchicüna̱xãgü rü ngẽma 5 i perü ãẽ̱xgacügüe̱xpü̱x tá nixĩ i penaxüxü̃. Rü nhu̱xũchi 5 i ü̃cachicüna̱xã i úirunaxca̱x tá pexü. Erü ngẽma taixnagümaxã nixĩ i Tupana i pexü̃ yada̱xaweexẽẽxü̃, rü ü̃cagümaxã nixĩ i guxchaxü̃ pexna naxãxü̃ i guxãma i pemax rü perü ãẽ̱xgacügü.
5 Rü ngẽmaca̱x name nixĩ i ípenaxüxü̃ i ngẽma taixnachicüna̱xãgü rü naxchicüna̱xãgü i ngẽma ü̃cagü i guxchaxü̃ pexna ãxü̃ i perü ĩanewa. ¡Rü nüxü̃ pecua̱xüxü̃ ya yimá Iraéuanecüã̱xgüarü Tupana! Rü bexmana ngẽmaãcü tá nüxü̃ narüchau nax pexü̃ yada̱xaweexẽẽxü̃, rü pexü̃ napoxcuexü̃ i pemax rü perü tupanagü rü perü naanegü.
6 ¿Rü tü̱xcüü̃ pegü ípenataiãchiarü maxü̃ã̱xgü narüxü̃ ga yema Eyítuanecüã̱xgü rü norü ãẽ̱xgacü ga Faraóũ? Yerü yexguma Tupana düxwa guxchaxü̃ naxca̱x ínguxẽẽguxicatama nixĩ ga Iraéutanüxü̃güxü̃ yangexgüxü̃.
7 ¡Rü ngexwaca̱xü̃ne ya peweü̃ ya ãchicune pexü̱x! ¡Rü yima peweü̃ rü taxre i woca i ãxacüxü̃ rü taguma ü̃paacü nhuxgu ta̱xacü i túgüxü̃wa peyanga̱xcuchi̱x! Notürü ngẽma naxacügü ¡rü naxpǘü̃gu namaxã penguxü̃ nax tama naéwe nangẽgüxü̃ca̱x!
8 ¡Rü nhu̱xmachi yima peweü̃gu peyaxǘe i ngẽma baú i Cori ya Tupanaarü mugü nawa ngẽxmaxü̃! ¡Rü ngẽma baúcüwagu peyaxǘechixü̃ i ngẽma naxchicüna̱xãgü i úirunaxca̱x ixĩgüxü̃ i norü Tupanaarü ngüxmüxẽẽruxü̃ ixĩxü̃! ¡Rü ngẽmawena rü peyangexgü i ngẽma wocagü nax nüma ínanaxwa̱xexü̃wa naxĩxü̃ca̱x namaxã i ngẽma baú!
9 Rü pema rü mea tá penangugü rü ngextáama naxĩ i ngẽma wocagü namaxã i ngẽma baú. Rü ngẽxguma Iraéuanecüã̱xgüarü naanewaama naxĩxgu i Becheméwaama, rü ngẽmawa tá nüxü̃ tacua̱x nax yimá Iraéuanecüã̱xgüarü Tupana yixĩxü̃ i taxca̱x ínanguxẽẽxü̃ i ngẽma da̱xaweane. Notürü ngẽxguma tama ngẽ́maama naxĩxgu rü ngẽmawa tá nüxü̃ tacua̱x nax tama Iraéuanecüã̱xgüarü Tupana yixĩxü̃ ga tüxü̃ poxcucü rü woetama ngẽma taxca̱x ínangumare —nhanagürügü.
10 Rü yemaacü nanaxügü ga yema yatügü. Rü taxre ga woca ga ixãxacüxü̃ niyauxgü rü tümapǘü̃gu tüxü̃ nawocu ga guxema naxacügü. Rü yemawena ga yema wocagü rü guma naweü̃wa nayangacuchigü.
11 Rü nhu̱xmachi guma naweü̃gu nayaxüegü ga yema baú ga Cori ya Tupanaarü mugü nawa yexmaxü̃. Rü yexma nayaxüechixü̃gü ta ga yema ü̃cachicüna̱xãgü ga úirunaxca̱x, rü yema taixnachicüna̱xãgü.
12 Rü yemawena ga yema wocagü rü ĩane ga Becheméwa nadaxü̃ ga namagu naxĩ, rü nixáietanü, rü we̱xgu naxĩ rü taxuwama ínachocu. Rü nüma ga Firitéutanüxü̃güarü ãẽ̱xgacügü rü naweama nixĩxü̃tanü nhu̱xmata Becheméarü üyeanewa nangugü.
13 Rü yema duü̃xü̃gü ga Bechemécüã̱xgü ga naanegüwa tríguarü buxuwa puracüexü̃, rü yexguma nüxü̃ nadaugügu ga yema baú ga Cori ya Tupanaarü mugü nawa yexmaxü̃, rü nataãxẽgü.
14 Rü yexguma Yuchuéarü naanewa nanguxgu ga Becheméwa, rü yéma nayachaxãchi. Rü yéma nayexma ga wüxi ga nuta ga tacü. Rü nüma ga Bechemécüã̱xgü ga duü̃xü̃gü rü nagu napogüe ga guma naweü̃ rü üxüxü̃ nayaxĩxẽẽgü. Rü ga yema wocagü rü Tupanaca̱x nanadai rü ínanagu.
15 Rü nümagü ga Lewítanüxü̃ rü marü ínanaxüegü ga yema baú ga Tupanaarü mugüchixü̃ rü yema caichaũ ga nawa nayexmagüxü̃ ga yema ü̃cachicüna̱xãgü, rü yema úirupü̱xügü ga nataixnapü̱xügüraxü̃xü̃. Rü guma nuta ga tacüétügu nananugü. Rü yema ngunexü̃gu ga yema Bechemécüã̱xgü rü Cori ya Tupanaca̱x ínanagu ga naxü̃nagü rü muxü̃ma ga togü ga norü ãmaregü.
16 Rü nüma ga yema 5 ga ãẽ̱xgacügü ga Firitéutanüxü̃gü rü yáxü̃wa nüxü̃ narüdaunü. Rü yexguma marü nüxü̃ nadaugügu ga marü Iraéuanecüã̱xgüme̱xẽwa nax nanguxü̃ ga yema baú, rü yemawena rü Ecróü̃ca̱x nawoegu ga yematama ngunexü̃gu.
17 Rü yema 5 ga taixnachicüna̱xãgü ga úirunaxca̱x ga Firitéutanüxü̃gü Cori ya Tupanana naxuaxü̃güxü̃ norü ngüxmüxẽẽruxü̃, rü yema rü guma ĩanegü ga Asdóde, rü Gácha, rü Acarúü̃, rü Gáyi, rü Ecróü̃arü ãmaregü nixĩ.
18 --
19 Notürü nüma ga Cori ya Tupana rü nanadai ga nhuxre ga duü̃xü̃gü ga Bechemécüã̱xgü yerü yema Tupanaarü mugüchixü̃ ga baúgu nadacu. Rü 70 ga yatügü nixĩ ga yuexü̃. Rü nüma ga yema ĩanecüã̱xgü rü poraãcüxüchima naxauxe naxca̱x ga yema duü̃xü̃gü ga Cori ya Tupana natanüwa daixü̃.
20 Rü yemaca̱x ga nüma ga Bechemécüã̱xgü rü nhanagürügü: —¿Texé tame nax Cori ya Tupana ya üünecüpe̱xegu tachixü̃? ¿Rü ngextá tá ínamuxü̃ i ngẽma baú i nhu̱xmax? —nhanagürügü.
21 Rü yemaca̱x ĩane ga Quiriáte-Yearíü̃cüã̱xgüca̱x yéma namugagü rü nhanagürügü: —Ngẽma Firitéutanüxü̃gü rü marü nanatáeguxẽẽgü i ngẽma baú i Cori ya Tupanaarü mugüchixü̃. Rü ngẽmaca̱x name i nua pexĩ rü peyayaxu —nhanagürügü.