1 Samuel 8:1-22
8 Rü yexguma marü naya̱xgu ga Chamué, rü nanegüxü̃ naxuneta nax Iraéuanecüã̱xgümaxã inacua̱xgüxü̃ca̱x.
2 Rü guma nüxíraxü̃cü ga nane rü Yoéugu naxãéga. Rü guma norü taxre ga nane rü Abíagu naxãéga. Rü Bechébawa nixĩ ga ãẽ̱xgacü yixĩgüxü̃.
3 Notürü tama nanatürüxü̃ nixĩgü, yerü norü yemaxü̃güguama narüxĩnüe. Rü yexguma ta̱xacürü guxchaxü̃ namexẽẽgügu rü nanayauxtanügü, rü tama aixcuma mea guxü̃ma ga duü̃xü̃güxü̃ narüngü̃xẽẽ.
4 Rü düxwa ga Iraéuanecüã̱xgüarü ãẽ̱xgacügü rü nügümaxã nangutaque̱xegü, rü ĩane ga Ramáwa naxĩ nax Chamuéxü̃ íyadaugüxü̃ca̱x.
5 Rü Chamuéxü̃ nhanagürügü: —Cuma rü marü cuya, rü cunegü rü tama cuxrüxü̃ mea namaxẽ. Rü ngẽmaca̱x ¡nüxü̃ naxuneta i wüxi i torü ãẽ̱xgacü i réi nax tomaxã inacuáxü̃ca̱x ngẽxgumarüxü̃ i ngẽma togü i nachixü̃anegü nax nüxü̃́ nangexmaxü̃ i norü ãẽ̱xgacü i réi! —nhanagürügü.
6 Rü yexguma ga nüma ga Chamué rü tama namaxã nataãxẽ yerü yema duü̃xü̃gü rü nanaxwa̱xegü nax nüxü̃́ nangexmaxü̃ ya wüxi ya ãẽ̱xgacü ya réi nax namaxã inacuáxü̃ca̱x. Rü yemaca̱x Tupanamaxã nüxü̃ nixu norü yumüxẽwa.
7 Notürü nüma ga Cori ya Tupana rü Chamuéxü̃ nangãxü̃ga rü nhanagürü: —¡Ẽcü naxü i ngẽma cuxna naxca̱x nacagüxü̃! Erü tama cuxü̃ nixĩ i naxoo̱xgüxü̃, rü choxü̃waxi nixĩ, erü tama nanaxwa̱xegü i norü ãẽ̱xgacü nax chixĩxü̃.
8 Rü yexguma Eyítuanewa íchanguxü̃xẽxẽ̱xgucürüwa nixĩ ga choxna yaxĩgachixü̃ nax tupananetawe nax naxĩxü̃ca̱x. Rü ngẽmatama nixĩ i nhu̱xmax cumaxã naxügüxü̃.
9 ¡Ẽcü naxü i ngẽma naxca̱x ínacagüxü̃! ¡Notürü mea namaxã nüxü̃ ixu i ngẽma duü̃xü̃gü i nhuxãcü tá ya namaxã naporae ega nangexmagu ya wüxi ya norü ãẽ̱xgacü ya réi poraãcü namuxü̃! —nhanagürü.
10 Rü nüma ga Chamué rü yema duü̃xü̃gümaxã nüxü̃ nixu ga yema Tupana namaxã nüxü̃ ixuxü̃.
11 Rü nhanagürü nüxü̃: —Ngẽxguma penaxwa̱xegu nax pexü̃́ nangexmaxü̃ i perü ãẽ̱xgacü i réi rü nhaãcü tá nixĩ i pemaxã inacuáxü̃ i ngẽma ãẽ̱xgacü: Rü tümaca̱x tá naca ya penegü nax churaragü tixĩgüxü̃ca̱x, rü tümáxegü rü churaragü i naweü̃ ya dairuü̃maxã icua̱xgüxü̃ nax tixĩgüxü̃ca̱x, rü tümáxegü rü cowarugü i dairuü̃maxã icua̱xgüxü̃ nax tixĩgüxü̃ca̱x, rü tümáxegü rü churaragü i noxrütama daruü̃gü nax tixĩgüxü̃ca̱x.
12 Rü ngẽxgumarüxü̃ tá ta tüxü̃ naxuneta ya toguxegü nax 1000 i churaragüarü ãẽ̱xgacü nax tixĩgüxü̃ca̱x, rü toguxegü nax 50 i churaragüarü ãẽ̱xgacü nax tixĩgüxü̃ca̱x. Rü pemagü, rü ngẽma ãẽ̱xgacü rü tümáxegü rü tá norü naanearü aimüanewa tüxü̃ napuracüexẽxẽ, rü toguxe rü tá norü nanetüarü buxgüwa tüxü̃ napuracüexẽxẽ, rü toguxe rü tá naxnegüarü üwa tüxü̃ napuracüexẽxẽ, rü toguxe rü tá naweü̃ ya dairuü̃arü üwa tüxü̃ napuracüexẽxẽ.
13 Rü tá tüxü̃ nade ya pexacügü nax nüxü̃́ taxüwemügüxü̃ca̱x, rü norü poũarü üwa nax tapuracüexü̃ca̱x, rü norü pumára nax taxügüxü̃ca̱x.
14 Rü nügüxü̃́ tá nanayaxu i ngẽma naanegü irümemaegüxü̃, rü ngẽma rümemaegüxü̃ i perü úwanecü rü oríwanecü, rü nhu̱xũchi ngẽma ãẽ̱xgacügü i natüü̃wa ügüxü̃na tá nanana.
15 Rü ngẽma 10 wetaxü̃ i perü tríguwa rü perü úwawa, rü ngẽma ãẽ̱xgacü tá pexna nanayaxu i wüxiwetaxü̃, rü nhu̱xũchi ngẽma ãẽ̱xgacügü i natüü̃wa ügüxü̃na tá nanana.
16 Rü ngẽxgumarüxü̃ tá ta pexna tüxü̃ napuxü̃ ya yíxema duẽxẽgü ya pexü̃́ puracüexe rü yíxema pexü̃taxü̃gü. Rü ngẽma rümemaexü̃ i perü woca i puracüruü̃gü, rü búrugü, rü tá pexna nanade nax nügüxü̃́ napuracüexẽẽãxü̃ca̱x.
17 Rü ngẽma 10 i perü carnérugüwa rü tá pexna nanayaxu i wüxi nax noxrüxü̃ yixĩxü̃ca̱x. Rü pema tátama nixĩ i nhu̱xmachi nüxü̃́ pepuracüexü̃.
18 Rü ngẽma i ngunexü̃gu i namaxã pechixeãẽgügu i ngẽma ãẽ̱xgacü i nhu̱xmax naxca̱x ípecagüxü̃ rü nüma ya Cori ya Tupana rü marü taxũtáma pexü̃ nacuáxchaü̃ —nhanagürü ga Chamué.
19 8:19-20 Notürü nüma ga yema duü̃xü̃gü, rü tama inarüxĩnüechaü̃ ga yema Chamué namaxã nüxü̃ ixuxü̃. Rü nhanagürügüama: —Nüétama, rü tanaxwa̱xegü i toxü̃́ nangexma ya wüxi ya ãẽ̱xgacü ya réi nax ngẽma togü i nachixü̃anerüxü̃ tixĩgüxü̃ca̱x. Rü nüma tá nixĩ i tórü ãẽ̱xgacü yixĩxü̃, rü tá tomaxã inacuáxü̃ ega ngẽxguma togümaxã togü tadaixgux —nhanagürügüama.
20 Nüü̃ nadau 8:19
21 Rü yexguma yema duü̃xü̃gügaxü̃ naxĩnüguwena ga Chamué, rü Cori ya Tupanamaxã nüxü̃ nixu ga yema duü̃xü̃güga.
22 Rü nüma ga Cori ya Tupana rü Chamuéxü̃ nangãxü̃ga rü nhanagürü: —¡Naxü i ngẽma naxca̱x ínacagüxü̃ rü nüxü̃ naxuneta ya wüxi ya norü ãẽ̱xgacü ya réi! —nhanagürü. Rü yexguma nüma ga Chamué rü yema Iraéuanecüã̱xgüxü̃ namu nax norü ĩanegüca̱x nawoeguxü̃.