2 Corĩ́tiucü̃ãꞌ 10:1-18
10 Rü nhu̱xma rü jema Cristu jaxna tamaã naxĩnüxü̃rüü̃ rü tamaã namecümaxü̃rüü̃, rü chama rü ta pemaã jaxna chaxĩnüãcüma rü pemaã chamecümaãcüma pexü̃ chaca̱a̱xü̃ na chauga pexĩnüẽxü̃ca̱x. Erü nümaxü̃ i duü̃xü̃gü rü nüxü̃ nixugü na pexü̃ chamuü̃xü̃ ega pexü̃tawa changẽxmagu notürü ngẽxguma pexna chajaxü̃gu rü tama pexü̃ chamuü̃.
2 Notürü ngẽxguma ngẽ́ma petanüwa chaxũxgu, rü chierü natau̱xguma na ṯacüca̱x namaã chaporagaxü̃ rü na chanaxucu̱xẽxü̃ i ngẽma duü̃xü̃gü i petanüwa toxü̃ ixuxü̃ na nhama tama jaxõgüxü̃rüü̃ na tamaxẽxü̃. Erü chama rü íchamemare na namaãxü̃chi na chidexaxü̃.
3 Rü aixcuma nixĩ i nhama i naãnecü̱̃ã̱x tixĩgüxü̃. Notürü ngẽxguma Tupanaãrü orearü uwanümaã togü tadaixgu, rü tama nhama i naãnecü̱̃ã̱x nügü ḏaixü̃rüü̃ãcüma tanaxü.
4 10:4-5 Erü ngẽma toxne i namaã ítanapoxü̃xü̃ i Tupanaãrü ore rü tama nhama i naãnecü̱̃ã̱x namaã ãxnexü̃ nixĩ. Erü toma rü toxü̃́ nangẽxma i Tupanaãrü pora na ngẽmamaã itajanaxoxẽẽxü̃ca̱x i Chatanáãrü pora. Rü ngẽmaãcü itajanaxoxẽẽ i guxü̃ma i chixexü̃ i ore i Tupanaxü̃ namaã jaxugügüxü̃ i duü̃xü̃gü. Rü ngẽmaãcü itajanaxoxẽẽ i guxü̃ma i Tupanaãrü uwanügüarü ore i nügü namaã jacua̱xüü̃güãcüma duü̃xü̃gümaã nüxü̃ jaxugügüxü̃ na tama Tupanaãxü̃́ jaxõgüãxü̃ca̱x. Rü guxü̃ma i ṯacü i nagu naxĩnüẽxü̃ i ngẽma duü̃xü̃gü i chixexü̃, rü Cristuna tanaxuaxü̃ na nüma namaã inacuáxü̃ca̱x.
5 Nüü̃ nadau 10:4
6 Rü wüxicana marü meã Cristuga pexĩnüẽgu, rü toma rü ítamemare na tüxü̃ tapocuexü̃ ja guxãma ja texé ja tama naga ĩnüẽxẽ i Cristuarü ore.
7 Pema rü norü düxétüxü̃newaxicatama nixĩ i penangugüxü̃ i wüxi i duü̃xü̃. Notürü ngẽxguma texé tügü cua̱xgu na Cristuarü duü̃xü̃ tiĩxü̃, rü name nixĩ i nüxü̃ tacua̱x na toma rü ta tümarüü̃ Cristuarü duü̃xü̃gü tixĩgüxü̃.
8 Rü woo íraruwa chanangupetüxẽẽ na chaugü chicua̱xüü̃xü̃ namaã i ngẽma na Tupana toxü̃ muxü̃, notürü taxuü̃ca̱xma naxca̱x chaxãne. Erü aixcuma Cori nixĩ ja toxü̃ mucü na pexü̃ tarüngü̃xẽẽgüxü̃ca̱x na jexeraãcü meã pejaxõgüxü̃ca̱x. Rü tama ṯacü rü chixexü̃gu pexü̃ na tajixẽẽxü̃ca̱x nixĩ i toxü̃ namuxü̃.
9 Rü tama chanaxwa̱xe i nagu perüxĩnüẽ na pexü̃ íchaḇaixgüchaü̃xü̃ namaã i ngẽma poperagü i pexca̱x chaxümatüxü̃.
10 Erü nümaxü̃ i duü̃xü̃gü rü nüxü̃ nixugü na chorü poperawa pemaã chaporagaxü̃ notürü chamatama rü tama aixcuma na chaporaxü̃ rü tama aixcuma nüxü̃ na chacuáxü̃ na meã chidexaxü̃, nhanagürügü choxü̃.
11 Notürü jíxema ngẽma nhagüxe rü tanaxwa̱xe i nüxü̃ tacua̱x rü ngẽma pexna tajaxü̃guãcüma torü poperawa pemaã nüxü̃ tixuxü̃rüü̃ tátama pemaã tixĩgü i ngẽxguma petanüwa tangẽxmagügu.
12 Toma rü tama tanaxwa̱xe i namaã togü tawüxiguxẽẽ rü e̱xna nagu togü tangugü i ngẽma duü̃xü̃gü i nügütama icua̱xüü̃güxü̃. Nümagü rü nügütama nawomüxẽẽgü, erü nügümaã nügü nawüxiguxẽẽ rü nügügutama nügü nangugü.
13 Notürü toma rü tama togü namaã ticua̱xüü̃gü i ngẽma jaxõgüxü̃ i tama Tupana toxme̱xwa ngẽxmagüxẽẽxü̃. Jerü Tupana nixĩ ga tomaã nüxü̃ ixucü na ngextá nanaxwa̱xexü̃ na tapuracüexü̃. Rü nüma nixĩ ga noxri Corĩ́tiuwa ga petanüwa toxü̃ nangugüxẽẽxü̃ na pemaã nüxü̃ tixuxü̃ca̱x ga norü ore.
14 Rü jemaãcü toxira nixĩ ga noxri petanüwa tangugüxü̃ na pemaã nüxü̃ tixuxü̃ca̱x ga jema Cristuarü ore. Rü ngẽmaca̱x i nhu̱xma na petanüwa taxĩxü̃, rü tama tanangupetüxẽẽ ga jema Tupana tomaã nüxü̃ ixuxü̃, jerü nüma nixĩ ga toxü̃ namuxü̃ na pexü̃ tarüngü̃xẽẽgüxü̃ca̱x.
15 Rü tama togüarü puracümaã togü ticua̱xüü̃güchaü̃, erü tama tachopetüchaü̃ i ngẽma Tupana tomaã ixunetaxü̃wa. Notürü petanüwa i Tupana toxü̃ ímuxü̃wa tanaxwa̱xe na jexeraãcü tapuracüexü̃ na jexeraãcü meã pejaxõgüetanüxü̃ca̱x.
16 Rü ngẽxguma marü petanüwa tangugüguwena rü tanaxwa̱xe i ngẽma duü̃xü̃gü i perü jéamaxü̃ra ngẽxmagüxü̃ i ngextá taguma texé nüxü̃ íixuxü̃wa taxĩ na ngẽmamaã rü ta nüxü̃ tixuxü̃ca̱x i ore i mexü̃. Erü tama tanaxwa̱xe i togüarü puracümaã togü ticua̱xüü̃gü.
17 Erü Tupanaãrü ore i ümatüxü̃wa rü nhanagürü:“Rü ngẽxguma texé tügü icua̱xüü̃chaü̃gu, rü name nixĩ i tórü Corixü̃ ticua̱xüü̃, erü nüma nixĩ i tüxü̃ nangü̃xẽẽxü̃”,
nhanagürü i ngẽma ore.
18 Erü ngẽma jatü i aixcuma Tupanape̱xewa mexü̃ rü tama nügütama nicua̱xüü̃. Notürü ngẽma jatü i tórü Cori nüxü̃ icua̱xüüxü̃ nixĩ i aixcuma Tupanape̱xewa mexü̃.
