2 Corĩ́tiucü̃ãꞌ 11:1-33
11 Rü nhu̱xma i ngẽma tá pemaã nüxü̃ chixuxü̃, rü bexmana pexca̱x rü wüxi i ngẽãẽ nixĩ, notürü chanaxwa̱xe i choxü̃́ iperüxĩnüẽmare rü jaxna chamaã pexĩnüẽ.
2 Erü Tupana pexü̃ inuxũxü̃rüü̃ pexü̃ chinuxũ. Erü chaugagu nixĩ i Cristuaxü̃́ pejaxõgüxü̃, rü marü Cristuna pexü̃ chaxuaxü̃ na noxrüxicatama peixĩgüxü̃ca̱x. Rü ngẽmaca̱x chanaxwa̱xe i ngearü chixexü̃ãẽ Cristuxü̃ pexü̃ chawe̱x nhama wüxi i pacü i taguma jatüxü̃ cua̱xcürüü̃.
3 Notürü chaxoegaãẽ rü jema ãxtape norü doramaã Ewaxü̃ na womüxẽẽxü̃rüü̃, ngürüãchi tá ta texé pexü̃ tawomüxẽẽ, na nüxü̃ perüxoexü̃ca̱x na Cristugu perüxĩnüẽxü̃ rü naxca̱xicatama na pemaxẽxü̃.
4 Erü pema rü tauxchaãcü nixĩ na pexü̃ nawomüxẽẽgüxü̃. Rü ngẽxguma ínangugügu i duü̃xü̃gü i pemaã nüxü̃ ixuxü̃ i to i Ngechuchuchiga ja tama jima toma nüxü̃ tixuchigacü, rü pema rü nüxü̃́ pejaxõgü i ngẽma duü̃xü̃gü. Rü pema rü taãẽãcüma penajaxu i to i naãẽ i tama Tupanaãẽ i Üünexü̃ ga marü pejaxuxü̃ ixĩxü̃. Rü pejaxõgü i to i ore i tama Tupanaãrü ore i mexü̃ ga noxri pejaxuxü̃ ixĩxü̃.
5 Dücax, rü woo nawe perüxĩxgu i ngẽma togü i orearü uruü̃güneta, notürü chauxca̱x rü taxuwama choxü̃ narüjexeragü.
6 Rü woo tama choxü̃́ nangẽxmagu i tauxcha na duü̃xü̃güpe̱xewa chidexaxü̃, notürü aixcuma meã nüxü̃ chacua̱x i ngẽma nachiga chidexaxü̃. Rü ngẽma rü guxü̃ma i torü puracüwa marü pexü̃ nüxü̃ tadauxẽẽ i guxü̃guma.
7 ¿Pexca̱x rü chixexü̃ pemaã chaxü ga jexguma chaugü ícharüxíragu na pexü̃ chataxẽẽxü̃ca̱x rü cha̱xme̱xmaã chapuracügu na ngetanüãcüma pemaã nüxü̃ chixuxü̃ ga Tupanaãrü ore i mexü̃ na jemaãcü penajaxuxü̃ca̱x ga maxü̃ i taguma gúxü̃?
8 Rü aixcuma jema togü ga jaxõgüxü̃ choxna ngĩxü̃ ãgücü ga dĩẽru ngĩxü̃ chajaxu na jemamaã petanüwa chapuracüxü̃ca̱x rü pexü̃ charüngü̃xẽẽxü̃ca̱x.
9 Rü jexguma petanüwa chajexmagu rü aixcuma choxü̃́ itaxu ga dĩẽru, notürü taguma texéna ngĩxca̱x chaca. Rü taeneẽgü ga Machedóniããnewa ne ĩxü̃ rü choxna ngĩxü̃ naxãgü ga jema choxü̃́ tau̱xcü. Rü jemaãcü tama pexü̃tawa ngĩxca̱x íchaca ga jexguma. Rü nhu̱xma rü ta tagutáma ṯacüca̱x pexna chaca.
10 Rü jema na ngetanüãcüma pemaã nüxü̃ chixuxü̃ ga jema ore, rü wüxi i chorü taãẽxü̃chi nixĩ. Rü ngẽma taãẽ rü taxuacüma texé choxna tanajaxu. Rü ngẽxgumarüü̃ na aixcuma Cristuxü̃ chacuáxü̃, rü ngẽxgumarüü̃tama guxü̃ i Acajaanewa tá chataãẽxü̃chi naxca̱x na ngetanüãcüma pemaã nüxü̃ chixuxü̃ ga jema ore.
11 ¿Rü ṯacüca̱x jiĩxü̃ i ngẽmaãcü chidexaxü̃? ¿E̱xna pexca̱x rü tama pexü̃ changechaü̃xü̃ca̱x jiĩxü̃ i ngẽmaãcü chidexaxü̃? Dücax, pemaã nüxü̃ chixu rü Tupana nüxü̃ nacua̱x na nhuxãcü aixcuma pexü̃ changechaü̃xü̃.
12 Notürü ngẽma na ngetanüãcüma pemaã nüxü̃ chixuxü̃ i ngẽma ore, rü ngẽmaãcü tá chanaxüecha na taxucürüwa chixri chauchiga jadexagüxü̃ca̱x i ngẽma togü i orearü uruü̃güneta i nügü ixuxü̃ na toxrüü̃ naxügüãxü̃ i Tupanaãrü puracü.
13 Nümagü rü aixcuma orearü uruü̃güneta nixĩgü, rü duü̃xü̃güxü̃ nawomüxẽẽgü. Rü nümagü rü togu nügü nicu̱xgü, rü nügü nixugü na Cristu jamugüxü̃.
14 Rü ngẽma rü taxuü̃ca̱xma namaã peḇaixãchiãẽgü. Jerü woo ga Chataná rü ta jexgumarüü̃ Tupanaãrü orearü ngeruü̃ ga dauxü̃cü̱̃ã̱x ga ngóonexẽẽruü̃gu nügü nicu̱x.
15 Rü ngẽmaca̱x woetama ngẽmaãcü nixĩgü i ngẽma duü̃xü̃gü i Chatanáãxü̃́ puracüexü̃. Rü nümagü rü duü̃xü̃gü i mexü̃ ügüxü̃gu nügü nicu̱xgü. Notürü ngẽma ngẽmaãcü ixĩgüxü̃, rü Tupana tá nanapocue naxca̱x i ngẽma chixexü̃ i naxügüxü̃.
Pauru rü jema puracü ga Ngechuchu nawa namuxü̃wa ngúxü̃ ninge
16 Rü wena pemaã nüxü̃ chixu rü tama chanaxwa̱xe i nagu perüxĩnüẽ na wüxi i ãũãẽxü̃ chiĩxü̃. Notürü ngẽxguma chi ngẽmaãcü chamaã nagu perüxĩnüẽgu, rü tama chanaxwa̱xe i choxna penachu̱xu na nhama wüxi i ãũãẽxü̃rüü̃ chaugüétüwa chidexaxü̃, na ngẽmaãcü chama rü ta íraruwa chaugütama chicua̱xüüxü̃ca̱x.
17 Rü nhu̱xma na chaugüétüwa chidexaxü̃ rü ngẽma rü tama tórü Coriarü mu nixĩ. Notürü nhama wüxi i ãũãẽxü̃ nügü icua̱xüüxü̃rüü̃ nixĩ i chidexaxü̃.
18 Rü nhu̱xma na nangẽxmaxü̃ i muxũchixü̃ i duü̃xü̃gü i nhama i naãnewa nügü icua̱xüü̃güxü̃, rü chama rü tá ta íraruwa chaugü chicua̱xüü̃.
19 Pema rü nagu perüxĩnüẽ rü nüxü̃ cua̱xü̃chigüxü̃ peixĩgü. Notürü taãẽãcüma jaxna namaã pexĩnüẽ i ngẽma duü̃xü̃gü i tama naãẽxü̃ icuáxü̃.
20 Rü jaxna namaã pexĩnüẽ i ngẽma duü̃xü̃gü i nügüxü̃́ pexü̃ puracüexẽẽxü̃, rü ngẽma ngetanüãcüma pexü̃ puracüexẽẽmarexü̃, rü ngẽma pexü̃ womüxẽẽgüxü̃, rü ngẽma chixri pexü̃ jauxgüxü̃, rü ngẽma pemaã guxchigagüxü̃.
21 Rü woo wüxi i ãnexü̃chi nixĩ na pemaã nüxü̃ chixuxü̃, notürü chauxca̱x rü tama aixcuma pexü̃ nüxü̃ tadauxẽẽ ga torü pora ga jexguma petanüwa tajexmagügu. Notürü nhu̱xma na tama namuü̃ẽxü̃ na nügü jacua̱xüü̃güxü̃ i ngẽma togü i duü̃xü̃gü, rü chama rü ta taxuü̃ca̱xma chamuü̃ na chaugüétüwa chidexaxü̃ woo pexca̱x rü taxuwama namexgu i ngẽma nüxü̃ chixuxü̃.
22 Nümagü rü nügü jaxugügu rü Judéugü nixĩgü. Notürü chama rü ta Judéu chixĩ. Rü nümagü nügü jaxugügu rü Iraéutanüxü̃gü nixĩgü. Notürü chama rü ta rü Iraéutanüxü̃ chixĩ. Rü nümagü rü nügü jaxugügu rü Abrã́ũtanüxü̃ nixĩgü. Notürü chama rü ta Abrã́ũtanüxü̃ chixĩ.
23 Nümagü rü nügü jaxugügu rü Cristuaxü̃́ napuracüe. Notürü chama rü norü jexera Cristuaxü̃́ chapuracü. Rü ngẽma nhachagürü pexü̃ woo pema nagu perüxĩnüẽgu na nhama wüxi i ãũãẽxü̃rüü̃ chidexaxü̃. Rü ngẽma duü̃xü̃güarü jexera poraãcü Tupanaãxü̃́ chapuracü. Rü norü jexera chapocu, rü norü jexera choxü̃ nac̱uaixgü ga duü̃xü̃gü. Rü muẽ̱xpü̱xcüna rü ãũcümaxü̃chixü̃wa chajexma rü wixguxü̃chi taa̱x choxü̃ nima̱xgü.
24 Rü 5 e̱xpü̱xcüna nixĩ ga 39 ga c̱uaximaã choxü̃ napocugüxü̃ ga chautanüxü̃gü ga Judéugü.
25 Rü tamaẽ̱xpü̱xcüna nixĩ ga naĩmaã choxü̃ nac̱uaixgüxü̃, rü wüxicana ga nutamaã choxü̃ ínamuxũchigüxü̃. Rü tamaẽ̱xpü̱xcüna nixĩ ga guma wapuru ga nagu chixũxü̃ne rü chamaã inanguxü̃. Rü wüxicana ga jexguma chamaã inanguxgu ga wapuru rü wüxi ga chütaxü̃ rü wüxi ga ngunexü̃ chinge na taxü̃ ga taxtüarü ngãxü̃tügu mürapewaétügu chatunagüãcüma chiwẽxẽxü̃.
26 Rü poraãcü nu ne chanaxũ, rü poraãcü ãũcümaxü̃wa chajexma jerü natügü ga ãũcümaxü̃gu chixũgü, rü ngĩ́ta̱a̱xgüxü̃ rü chixexü̃ chamaã naxügüchaü̃. Rü woo chautanüxü̃gü ga Judéugütanüwa, rü woo jema duü̃xü̃gü ga tama Judéugü ixĩgüxü̃tanüwa, rü woo ĩãnegüwa, rü woo namagüwa, rü woo taxtü i taxü̃wa rü ãũcümaxü̃wa chajexma. Rü jema duü̃xü̃gü ga chamücügüneta ixĩgüxü̃tanüwa rü ta ãũcümaxü̃wa chajexma.
27 Rü poraãcü chataarü puracüã̱x, rü muxũchixü̃ ga guxchaxü̃gü choxü̃ nangupetü. Rü muẽ̱xpü̱xcüna rü tama chape, rü chataija, rü chiṯawa. Rü muẽ̱xpü̱xcüna rü tama chachibü, rü choxü̃ nanadeju, rü choxü̃́ nataxu ga chauxchiru.
28 Rü naẽ́tüwa i guxü̃ma i ngẽma, rü guxü̃ i ngunexü̃gu rü chaxoegaãẽ naxca̱x i guxü̃ma i ngẽma jaxõgüxü̃ i guxü̃ i ĩãnewa ngẽxmagüxü̃.
29 Rü ngẽxguma chi texé tama poragu, rü choxü̃́ rü ta nangu̱x. Rü ngẽxguma chi wüxie texéxü̃ pecadugu nguxẽẽgu, rü chauãẽwa nangu̱x i ngẽma.
30 Notürü ngẽxguma chi chaugü chicua̱xüü̃chaü̃gu, rü tá chaugü chicua̱xüü̃ naxca̱x na duü̃xü̃gü choxü̃ dauxü̃ na taxuwama chamexü̃.
31 Rü Tupana ja tórü Cori ja Ngechuchu ja Cristunatü ja mecü na guxü̃guma nüxü̃ icua̱xüü̃güxü̃, rü nüxü̃ nacua̱x na aixcuma jiĩxü̃ i ngẽma nüxü̃ chixuxü̃.
32 Rü jexguma Damacuwa chajexmagu, rü guma ĩãneãrü ãẽ̱xgacü ga Aretaarü ngü̃xẽẽruü̃, rü norü churaragüxü̃ namu na nüxna nadaugüxü̃ca̱x ga guma ĩãneãrü poxeguxü̃ãrü ĩã̱xgü na choxü̃ jajauxgüxü̃ca̱x ga jexguma chi jéma íchaxũũxgu.
33 Notürü jema ĩãneãrü poxeguxü̃ãrü ĩã̱xãcüwa rü wüxi ga pexchigu choxü̃ ínarüc̱ẖüxüetaü̃gü ga chamücügü. Rü jemaãcü chinha naxchaxwa ga jema ãẽ̱xgacü.
