2 Corĩ́tiucü̃ãꞌ 12:1-21
12 Taxuwama name na texé tügü icua̱xüüxü̃. Notürü tá pemaã nüxü̃ chixuama na nhuxãcü tórü Cori choxü̃ nango̱xetüxẽẽxü̃ rü nhuxãcü choxü̃ nüxü̃ na nacua̱xẽẽxü̃ ga ṯacü ga ẽxü̃guxü̃.
2 Rü 14 ga taunecü marü nangupetü ga na Tupana dauxü̃guxü̃ ga naãnewa ga nüma ínajexmaxü̃wa choxü̃ nagaxü̃. Notürü tama nüxü̃ chacua̱x rü chauãẽwaxicatama nixĩ ga jéma choxü̃ nagaxü̃, rü e̱xna guxü̃ ga chaxunemaã jiĩxü̃ ga jéma choxü̃ nagaxü̃. Rü Tupanaxĩcatama nüxü̃ nacua̱x i ngẽma.
3 12:3-4 Rü aixcuma meãma nüxü̃ chacua̱x na dauxü̃guxü̃ ga naãnewa choxü̃ nagaxü̃ ga Tupana, notürü tama nüxü̃ chacua̱x rü guxü̃ ga chaxunemaã jéma choxü̃ naga rü e̱xna tama. Rü Tupanaxĩcatama nixĩ ja nüxü̃ cuácü i ngẽma. Rü jéma nüxü̃ chaxĩnü ga ore ga ẽxü̃guxü̃ i guxü̃ma i duü̃xü̃güna chu̱xuxü̃ na nüxü̃ jaxugüxü̃.
4 Nüü̃ nadau 12:3
5 Rü chama rü chi name na chaugü naxca̱x chicua̱xüüxü̃ i ngẽma, notürü tãũxü̃táma ngẽmaãcü chanaxü. Erü ngẽma ngúxü̃ na chingexü̃maãxĩcatama tá nixĩ i chaugü chicua̱xüüxü̃.
6 Notürü ngẽxguma chi chaugü chicua̱xüü̃chaü̃gu, rü tau chima wüxi i ngẽãẽmare nixĩ i ngẽma, erü aixcuma nixĩ i ngẽma ore i nüxü̃ chixuxü̃ i chauchiga. Notürü tama chaugü chicua̱xüü̃ na taxúema nagu rüxĩnüxü̃ca̱x na ngẽma chawa nüxü̃ naxĩnüẽxü̃ rü nüxü̃ nadaugüxü̃ãrü jexera chiĩxü̃.
7 Notürü tórü Cori rü tama nanaxwa̱xe i poraãcüxü̃chima chaugü namaã chicua̱xüüxü̃ ga jema ẽxü̃guxü̃ ga mexẽchixü̃ ga choxü̃ nüxü̃ nacua̱xẽẽxü̃. Rü jemaca̱x chaxunewa nananguxẽẽ ga wüxi ga choxü̃́ ngúxü̃ nhama wüxi ja tuxu chaxunewa ingaxixü̃rüü̃. Rü jema rü nhama wüxi ga Chatanáãrü orearü ngeruü̃rüü̃ chauxü̃tawa nangu na choxü̃ nachixewexü̃ca̱x na tama chaugü chicua̱xüüxü̃ca̱x.
8 Rü tamaẽ̱xpü̱xcüna tórü Corina chaca na choxü̃́ ijanaxoxẽẽãxü̃ca̱x ga jema choxü̃́ ngúxü̃.
9 Notürü nüma ja tórü Cori rü nhanagürü choxü̃:
“Rü cuma nüxü̃ cucua̱x na guxü̃guma cuxü̃ changechaü̃, rü ngẽxĩcatama nixĩ i cunaxwa̱xexü̃. Rü ngẽma duü̃xü̃gü i tama poraexü̃wa nixĩ i aixcuma chanango̱xẽẽxü̃ i nhuxãcü na chaporaxü̃”, nhanagürü choxü̃. Rü ngẽmaca̱x chataãẽ ega tama chaporagu. Erü ngẽxguma tama chaporagu rü ngẽxguma nixĩ i chawa inawéãxü̃ i norü pora ja Cristu.
10 Rü ngẽma na Cristuxü̃ na changechaü̃xü̃gagu nixĩ i jaxna namaã chaxĩnüxü̃ ega woo chaturagu rü woo ṯacü chamaã jaxugüegu i duü̃xü̃gü. Rü woo choxü̃́ natau̱xgu i chorü ngẽmaxü̃gü, rü woo duü̃xü̃gü rü chawe jangẽxü̃tanügu, rü woo guxchaxü̃gü choxü̃́ ngẽxmagu rü Cristuca̱x rü jaxna namaã chaxĩnü i guxü̃ma i ngẽma. Erü ngẽxguma chaturagu, rü ngẽxguma nixĩ i jexeraãcü Cristu choxü̃ poraxẽẽxü̃.
Pauru rü naxca̱x naxoegaãẽ ga jema jaxõgüxü̃ ga Corĩ́tiuwa jexmagüxü̃
11 Maneca nhama wüxi i ãũãẽxü̃rüü̃ chidexa, erü ngẽmaãcü chaugü chicua̱xüü̃. Notürü pegagutama nixĩ i düxwa ngẽmaãcü chaugüétüwa chidexaxü̃, jerü pema chi nixĩ ga choxü̃ peicua̱xüü̃güxü̃, rü tama i chamax. Rü woo taxuwama chame i chamax, notürü taxuwama choxü̃ narüjexeragü i ngẽma orearü uruü̃güneta i nawe perüxĩxü̃.
12 Rü jexguma petanüwa chajexmagu, rü jaxna pemaã chaxĩnüãcüma pexü̃ nüxü̃ chadauxẽẽ na aixcuma Cristu choxü̃ muxü̃ na nüxü̃ chixuxü̃ca̱x ga norü ore. Rü cua̱xruü̃gümaã pexü̃ nüxü̃ chacua̱xẽẽ ga jema. Rü pexü̃ nüxü̃ chadauxẽẽ ga taxü̃ ga mexü̃gü ga Tupanaãrü poramaã üxü̃.
13 Rü jexguma petanüwa chajexmagu rü pemaã chamecüma jema guxü̃ma ga togü ga jaxõgüxü̃maã na chamecümaxü̃rüü̃tama. Notürü wüxiwaxicatama nixĩ ga íchatüxü̃ jerü ga petanüwa rü tama ngĩxü̃ chajaxu ga dĩẽru jema togü ga jaxõgüxü̃tanüwa ngĩxü̃ chajaxuxü̃rüü̃. Rü chanaxwa̱xe i choxü̃́ nüxü̃ pengechaü̃ i ngẽma.
14 Rü nhu̱xma rü marü íchamemare na norü tamaẽ̱xpü̱xcüna pexü̃ íchajadauxü̃. Rü tãũxü̃táma ṯacüca̱x pexna chajaca. Erü tama perü ngẽmaxü̃güca̱x petanüwa chaxũ, notürü pexca̱xü̃chi nixĩ i ngẽ́ma chaxũxü̃. Pema rü chauxacügü peixĩgü i Tupanaãrü orewa. Rü ngẽma papa rü mamaãrü puracü nixĩ na naxãcügüna naxããxü̃ i ngẽma nüxü̃́ taxuxü̃. Rü tama naxãcügüarü puracü nixĩ na nanatüna rü naẽna naxãgüãxü̃.
15 Rü chama rü íchamemare na chorü ngúchaü̃maã pexca̱x ichanaxãxü̃ i guxü̃ma i ṯacü i choxü̃́ ngẽxmaxü̃ rü woo chaugütama rü ta na ichaxãxü̃ na aixcuma meã pejaxõgüxü̃ca̱x. Notürü chauxca̱x rü ngẽxguma jexeraãcü pexü̃ changechaü̃gu, rü pema rü jexeraãcü nüxü̃ perüxoetanü na choxü̃ pengechaü̃xü̃.
16 Rü nümaxü̃ i duü̃xü̃gü i petanüwa, rü woo nüxü̃ nacua̱xgü na taguma ṯacüca̱x pexü̃tawa íchac̱axü̃, notürü nümagü rü nüxü̃ nixugüama na pexü̃ chawomüxẽẽãcüma perü dĩẽru ngĩxü̃ chajaxuxü̃.
17 ¿E̱xna pema nagu perüxĩnüẽgu rü jema duü̃xü̃gü ga petanüwa chamugüxü̃wa pexü̃ chawomüxẽẽ?
18 Rü Titumaã nüxü̃ chixu na petanüwa íjadauxü̃ca̱x. Rü namaã jéma chanamu ga jema to ga taeneẽ. ¿E̱xna pema nagu perüxĩnüẽgu ga Titu rü pexü̃ jéma najawomüxẽẽ? ¿Tama e̱xna aixcuma jiĩxü̃ na chauxrüü̃ meã na namaxü̃xü̃ rü chauxrüü̃ mexü̃gu naxĩnüxü̃ ga Titux?
19 Bexmana pema tá nagu perüxĩnüẽ rü ngẽmaãcü tidexagü, erü togüétüwatama tachogüchaü̃. Notürü, Pa Chaueneẽgü ja Pexü̃ Tangechaü̃güex, rü Tupanape̱xewa rü Cristuégagu nixĩ i tidexagüxü̃ na jexeraãcü meã Tupanaãxü̃́ pejaxõgüxü̃ca̱x rü jexeraãcü meã na pemaxẽxü̃ca̱x.
20 Erü chaxoegaãẽ rü ngẽxguma wena pexü̃ íchajada̱xgu, rü ngürüãchi tama chama chanaxwa̱xexü̃ãcüma ípemaxẽ, rü ngẽmaca̱x i pema rü tãũxü̃táma chamaã petaãẽgü. Rü chaxoegaãẽ erü ngürüãchi tá pexü̃ ichajangau na pegüchi ípexaiexü̃, rü pegüarü ngẽmaxü̃ca̱x peixauxãchigüxü̃, rü pegümaã penuẽxü̃, rü pegüguxicatama íperüxĩnüẽxü̃, rü pexoregüta̱a̱xgüxü̃, rü ṯoguã̱xü̃ peixuxü̃, rü pegü peicua̱xüü̃güxü̃, rü chixexü̃ ípexüexü̃ rü ngẽmaãcü chixri ípemaxẽxü̃.
21 Rü chaxoegaãẽ rü ngẽxguma wena petanüwa chaxũxgu, rü ngürüãchi Tupana rü pegagu tá choxü̃ naxãnexẽẽ. Rü ngürüãchi ngechaü̃ tá choxna pexã, erü muxẽma i petanüwa rü marü nhuxgumama pecadu taxügüecha, rü tama nüxü̃ tarüxoechaü̃ na Tupanape̱xewa chixexü̃ taxügüxü̃ rü naĩ i ngemaãmare na tamaxẽxü̃ rü guxü̃ma i togü i chixexü̃ na taxügüxü̃.
