2 Corĩ́tiucü̃ãꞌ 13:1-14
13 Nhu̱xma rü norü tamaẽ̱xpü̱xcüna tá nixĩ na petanüwa chaxũxü̃. Rü Tupanaãrü ore rü tamaã nüxü̃ nixu rü ngẽxguma texé chixexü̃ ü̱xgu rü taxre rü e̱xna tamaẽ̱xpü̱x i duü̃xü̃gü nüxü̃ daugügu rü nüxü̃ jaxugügu na aixcuma jiĩxü̃, rü aixcuma tá tapocu ja jíxema chixexü̃ üxe.
2 Rü ngẽmaca̱x i pema i ü̃pamamatama pecadu ügüechaxe rü guxãma i pema ja chixri maxẽxẽ, rü nhu̱xma na woo pexna chajaxü̃guxü̃ rü wenaxãrü pexü̃ chaxucu̱xẽ rü pemaã nüxü̃ chixu rü ngẽxguma ngẽ́ma chaxũxgu rü aixcuma tá chanamexẽẽ i guxü̃ma i ngẽma chixexü̃ i petanüwa ngẽxmaxü̃, rü tãũxü̃táma chanangupetüxẽẽmare i ngẽma.
3 Rü pema na naxca̱x iperüdaunüxü̃ na Cristu chawa idexaxü̃, rü ngẽxguma ngẽ́ma chaxũxgu, rü ngẽxguma tá nixĩ i nüxü̃ pedauxü̃ na aixcuma chawa na jadexaxü̃ ja Cristu. Rü nüma ja Cristu rü chawa tá pexü̃ nüxü̃ nadauxẽẽ na tama naturaxü̃ notürü aixcuma janguxẽẽãxü̃ i norü ore rü tüxü̃ napocuexü̃ ja jíxema chixexü̃ ügüxe.
4 Rü aixcuma nixĩ ga Cristu ga nhama wüxi ga turaxü̃rüü̃ jiĩxü̃ ga jexguma curuchawa japotagu. Notürü i nhu̱xma rü Tupanaãrü poragagu namaxü̃. Rü jexgumarüü̃ ga Cristu ga wüxi ga turaxü̃rüü̃ na jiĩxü̃ ga jexguma curuchawa japotagu, rü ngẽxgumarüü̃ i toma na norü duü̃xü̃gü tixĩgüxü̃, rü taturae i toxonewa. Notürü ngẽma na norü duü̃xü̃gü tixĩgüxü̃, rü Tupanaãrü poragagu tá tamaxẽ na pexü̃ tarüngü̃xẽẽgüxü̃ca̱x.
5 Rü name nixĩ i pegütama pengugü na nüxü̃ pecuáxü̃ca̱x ngoxi aixcuma meã pejaxõgü. Rü name nixĩ i pegü pengugüarü maxü̃ã̱x rü ngoxi Tupanape̱xewa peime. ¿Tama e̱xna nüxna pecua̱xãchie na Ngechuchu ja Cristu rü pewa nangẽxmaxü̃ ega aixcuma pejaxõgügu?
6 Rü chierü nüxü̃ pecua̱xgu na toma rü tama orearü uruü̃günetamare na tixĩgüxü̃.
7 Rü Tupanana naxca̱x taca na taxuü̃ma i chixexü̃ na pexügüxü̃ca̱x. Rü tama duü̃xü̃güpe̱xewa togü ítarütagüxü̃ca̱x nixĩ na ngẽmaãcü tajumuxẽgüxü̃. Notürü Tupanana naxca̱x taca i ngẽma na aixcuma meã naxca̱x pemaxẽxü̃ca̱x woo duü̃xü̃gü nagu rüxĩnüẽgu na toma rü ítatüemarexü̃.
8 Toma rü taxucürüwama chixri nachiga tidexagü i Tupanaãrü ore i aixcuma ixĩxü̃, erü toma rü naẽ́tüwa tachogü i ngẽma ore.
9 Rü tá tataãẽgü ega aixcuma peporaegu i perü maxü̃wa rü ngẽmaca̱x natau̱xgu i ṯacüca̱x pemaã na taporagaexü̃. Rü Tupanana tá naxca̱x tacaama na pexü̃ naporaexẽẽxü̃ca̱x i perü maxü̃wa na düxwa aixcuma mexü̃ i norü duü̃xü̃gü na peixĩgüxü̃ca̱x.
10 Rü naxü̃pa na pexü̃ na íchajadauxü̃ nixĩ i pexca̱x chanaxümatüxü̃ i nhaã popera, na ngẽxguma ngẽ́ma changuxgu rü nataxuxü̃ca̱x i ṯacüca̱x pemaã na chaporagaxü̃. Erü tórü Cori choxü̃ namu na pexü̃ charüngü̃xẽẽxü̃ na jexeraãcü meã pejaxõgüxü̃ca̱x, rü tama chixexü̃ pemaã na chaxüxü̃ca̱x nixĩ i choxü̃ namuxü̃.
11 Rü nhu̱xma na ichajacua̱xẽẽxü̃ i nhaã popera, Pa Chaueneẽgüx, rü chanaxwa̱xe i meã pexü̃ naxüpetü rü naxca̱x pedau na nhuxãcü aixcuma meã Tupanaca̱x pemaxẽxü̃. Rü name nixĩ i pegü petaãẽxẽẽgü rü wüxigu perüxĩnüẽ rü meã jaxna pegümaã pexĩnüẽ rü aixcuma pegü pengechaü̃gü. Rü nüma ja Tupana ja tüxü̃ ngechaü̃cü rü tüxü̃ rüngüxmüẽxẽẽcü, rü guxü̃gutáma pemaã inarüxã̱ũ̱x.
12 Rü chanaxwa̱xe i wüxichigü i pema rü pegü pengechaü̃güãcüma pegü perümoxẽgü.
13 Rü guxü̃ma i togü i taeneẽgü i jaxõgüxü̃ rü pexü̃ narümoxẽgü.
14 Rü nhu̱xma rü chanaxwa̱xe i tórü Cori ja Ngechuchu ja Cristu pexü̃ narüngü̃xẽẽ, rü Tanatü ja Tupana rü pexü̃ nangechaü̃, rü Naãẽ i Üünexü̃ rü guxü̃guma pemaã inarüxã̱ũ̱x.
Rü nuãma pexna,
Pauru
