2 Corĩ́tiucü̃ãꞌ 2:1-17
2 Rü jemaca̱x nixĩ ga tama wena pexü̃tawa chaxũxü̃, jerü tama chanaxwa̱xe ga pexü̃ na changechaü̃xẽẽxü̃.
2 Erü ngẽxguma chi pexü̃ changechaü̃xẽẽgu, ¿rü texé tá choxü̃ tataãẽxẽẽ? Erü pexicatama nixĩ i choxü̃ petaãẽxẽẽxü̃. ¿Rü nhuxãcü tá choxü̃ petaãẽxẽẽ, ega pexü̃ changechaü̃xẽẽgu?
3 Rü jemaca̱x nixĩ ga jemaãcü pexca̱x popera chaxümatüxü̃ na penamexẽẽgüxü̃ca̱x i perü guxchaxü̃gü naxü̃pa na pexü̃tawa chaxũxü̃. Jerü tama chanaxwa̱xe ga jexguma chi jéma chaxũxgu na choxü̃ pengechaü̃xẽẽxü̃. Erü pema nixĩ i chanaxwa̱xexü̃ na choxü̃ petaãẽxẽẽgüxü̃. Rü aixcuma nagu charüxĩnü rü ngẽxguma chama chataãẽxgu rü pema rü tá ta petaãẽgü.
4 Rü jexguma pexca̱x chanaxümatügu ga jema popera, rü poraãcü chanaxi̱xãchiãẽ, rü düxwa jema chorü ngechaü̃maã chaxaxu. Notürü tama pexca̱x chanaxümatü na pexü̃ changechaü̃xẽẽxü̃ca̱x, notürü pexca̱x chanaxümatü na nüxü̃ pecuáxü̃ca̱x na nhuxãcü poraãcü pexü̃ changechaü̃xü̃.
Pauru rü nüxü̃́ nüxü̃ nangechaü̃ ga jema duü̃xü̃ ga chixexü̃ namaã üxü̃
5 Notürü jema jatü ga choxü̃ ngechaü̃xẽẽxü̃, rü tama choxü̃xĩcatama nixĩ ga nangechaü̃xẽẽxü̃. Notürü maneca meãrüwa pexü̃ rü ta nangechaü̃xẽẽ. Rü: “Meãrüwa” nhacharügü erü tama chanaxwa̱xe na poraãcü nüxü̃́ nangúxü̃.
6 Rü jema pocu ga nüxna pexãxü̃ ga jexguma pengutaque̱xegügu, rü chauxca̱x rü marü name na ngẽxĩcatama na jiĩxü̃.
7 Rü ngẽmaca̱x i nhu̱xma rü chanaxwa̱xe i nüxü̃́ nüxü̃ pengechaü̃ i norü chixexü̃ rü nüxü̃ perüngü̃xẽẽ na tama jexeraxü̃ i chixexü̃wa nagaãxü̃ca̱x i ngẽma norü ngechaü̃.
8 Rü ngẽmaca̱x chanaxwa̱xe i wenaxãrü noxrirüü̃ nüxü̃ nüxü̃ pedauxẽẽ na aixcuma nüxü̃ pengechaü̃xü̃.
9 Rü jemaca̱x nixĩ ga jemachiga marü pexca̱x chanaxümatüxü̃, jerü pexü̃ chaxüxchaü̃, rü nüxü̃ chacuáxchaü̃ ngoxi marü aixcuma chauga pexĩnüẽ.
10 Rü nhu̱xma pemaã nüxü̃ chixu rü jíxema pema tüxü̃́ nüxü̃ pengechaü̃xẽ i tümaãrü chixexü̃, rü chama rü tá ta tüxü̃́ nüxü̃ changechaü̃. Rü ngẽxguma chi ṯacü rü chixexü̃xü̃ tüxü̃́ changechaü̃gu, rü pegagu nixĩ i Cristupe̱xewa tüxü̃́ nüxü̃ changechaü̃xü̃ i ngẽma.
11 Rü ngẽmaãcü chanaxü na tama najoxniẽxü̃ca̱x i Chataná na chixexü̃gu tüxü̃ najixẽẽxü̃ca̱x. Erü jixema rü meãma nüxü̃ tacua̱x i nacüma i Chataná na nhuxãcü chixexü̃gu tüxü̃ najixẽẽchaü̃xü̃.
Truádearü ĩãnewa rü nanaxi̱xãchiãẽ ga Pauru
12 Rü jexguma Truádearü ĩãnewa changuxgu na nüxü̃ chixuxü̃ca̱x ga Cristuarü ore, rü poraãcü choxü̃́ natauxcha na jéma tórü Coriaxü̃́ chapuracüxü̃.
13 Notürü tama aixcuma chataãẽ ga jéma, jerü tama jexma nüxü̃ chajangau ga taeneẽ ga Titu. Rü jemaca̱x nüxü̃ charümoxẽ ga jémacü̱̃ã̱x ga duü̃xü̃gü, rü ichaxũãchi, rü Machedóniããnewa chaxũ.
Cristu rü Paurumaã napora
14 Rü Tupanana moxẽ taxãgü erü norü duü̃xü̃güxü̃ toxü̃ nixĩgüxẽẽ. Rü nhu̱xma na Cristuarü duü̃xü̃gü tixĩgüxü̃, rü nüma ja Tupana rü guxü̃guma tomaã nanaxũpe̱xe. Rü nüma nixĩ i toxü̃ namuxü̃ na duü̃xü̃güxü̃ nüxü̃ tacua̱xẽẽxü̃ca̱x i norü ore. Rü ngẽma norü ore rü guxü̃wama nangu rü guxü̃guma nipuema nhama wüxi i pumara i paacaxü̃chixü̃rüü̃.
15 Rü nhu̱xma i toma i Cristugagu Tupanape̱xewa na timexü̃, rü guxü̃wama toxü̃ narüdaunü i ngẽma duü̃xü̃gü i marü najauxgüxü̃ i maxü̃ i taguma gúxü̃ rü ngẽma duü̃xü̃gü i tama najauxgüxü̃ i ngẽma maxü̃.
16 Rü ngẽma duü̃xü̃gü i tama jaxõgüxü̃ca̱x rü nhama wüxi i ore i juexẽẽruü̃ãrü ngeruü̃gü tixĩgü. Notürü ngẽma jaxõgüxü̃ca̱x rü nhama wüxi i ore i maxẽxẽẽruü̃ãrü ngeruü̃gü tixĩgü. ¿Rü ngẽmaca̱x texémaã nanguxü̃ i nhaã puracü na nüxü̃ tixuxü̃ i ngẽma ore?
17 Rü jíxema toxrüü̃ ixĩgüxexicatama tixĩ ja tümamaã nanguxü̃́xẽ. Rü toma rü tama Tupanaãrü oregu dĩẽru ngĩxü̃ tajaxu ngẽma muxü̃ma i togü na naxügüxü̃rüü̃. Notürü Tupanape̱xewa rü aixcuma meã nüxü̃ tixu i ngẽma norü ore, erü nüma toxü̃ nimugü rü Cristuarü tixĩgü.
