2 Corĩ́tiucü̃ãꞌ 3:1-18
3 Rü nhu̱xma na pemaã nüxü̃ tixuxü̃ na aixcuma Tupana jiĩxü̃ ga toxü̃ mucü, rü bexmana tá nagu perüxĩnüẽ na wenaxãrü togüétüwa tidexagüxü̃. ¿E̱xna penaxwa̱xe na wüxi i carta i cua̱xruü̃ pexü̃ tawéxü̃ na nawa nüxü̃ pecuáxü̃ca̱x na aixcuma Tupanaãrü orearü uruü̃gü tixĩgüxü̃, rü e̱xna penaxwa̱xe na pexü̃tawa naxca̱x ítac̱axü̃ i cartagü na ngẽmawa duü̃xü̃gü toxü̃ cuáxü̃ca̱x ngẽxgumarüü̃ na naxügüãxü̃ i togü?
2 Rü pemaã nüxü̃ tixu rü tama tanaxwa̱xe i ṯacü rü carta na duü̃xü̃gü toxü̃ cuáxü̃ca̱x, erü pematama nixĩ i ngẽma cartarüü̃ peixĩgüxü̃, rü pewa nixĩ i nangóxü̃ na aixcuma Tupana jiĩxü̃ ga toxü̃ mucü. Rü meãma toõẽwa nüxü̃ tacua̱x i ngẽma. Rü jema na naxüchicüüxü̃ ga perü maxü̃, rü ngẽmawa guxü̃ma i duü̃xü̃gü nüxü̃ nadau na aixcuma wüxi ga mexü̃ ga puracü taxüxü̃ ga petanüwa.
3 Rü nhu̱xma rü meãma nango̱x na pema rü nhama wüxi i carta i Cristutama ümatüxü̃rüü̃ na peixĩgüxü̃. Rü torü puracügagu nixĩ i ngẽma. Notürü tama wüxi i carta i ṯacü rü ümatüxü̃maã ümatüxü̃ peixĩgü, notürü pema nixĩ i carta i Tupana ja Maxü̃cüãẽ i Üünexü̃ ümatüxü̃. Rü ngẽma carta rü tama popera rü e̱xna nutawa iwücuchixü̃ nixĩ, notürü perü maxü̃wa nixĩ i nangóxü̃ i ngẽma.
4 Rü ngẽmaca̱x tama tamuü̃ẽ na ngẽmaãcü togüca̱xtama tidexagüxü̃, erü tajaxõgü na Cristugagu Tupana toxü̃ dauxü̃ na timexü̃.
5 Rü tama toxrütama cua̱xmaã nixĩ i tanaxüxü̃ i ṯacü rü mexü̃. Notürü guxü̃ma i ngẽma taxüxü̃ rü Tupanaãrü ngü̃xẽẽmaã nixĩ i tanaxüxü̃.
6 Rü Tupana rü toxü̃ narüngü̃xẽẽ na duü̃xü̃gümaã nüxü̃ tixuxü̃ i ngẽma ngexwacaxü̃xü̃ i norü uneta na nhuxãcü Cristugagu tá tüxna naxããxü̃ i maxü̃ i taguma gúxü̃. Rü ngẽma maxü̃ rü tama jema mugü ga Muĩsé ümatüxü̃gagu tanajaxu, notürü tanajaxu erü Tupanaãẽ i Üünexü̃ tüxna nanaxã. Rü jema mugü ga Muĩsé ümatüxü̃ rü juwa tüxü̃ nagagü, notürü Tupanaãẽ i Üünexü̃ rü tüxna nanaxã i maxü̃ i taguma gúxü̃.
7 Rü jema mugü ga Muĩséna naxãxü̃ ga Tupana, rü nutagu nixĩ ga naxümatüxü̃. Rü jexguma Muĩsé najau̱xgu ga jema mugü, rü poraãcü nij̱aurachametücüxü. Rü jemaca̱x ga duü̃xü̃gü rü taxucürüwama Muĩséchametügu narüdaunü. Notürü jema norü j̱aurachametücüü rü nixochigü. Notürü ga jema mugü ga Muĩsé tüxna ãxü̃ i juwa tüxü̃ gagüxü̃, rü taxü̃ ga j̱auracüüxü̃maã ínangu. Rü jemaãcü namexẽchi ga jexguma ínanguxgu.
8 Notürü jexeraãcü namexẽchi nixĩ i ngẽma uneta i ngexwacaxü̃xü̃ i Tupanaãẽ i Üünexü̃ taxca̱x ngo̱xẽẽxü̃.
9 Rü jemaãcü woo namexẽchi ga jema mugü ga juwa tüxü̃ gagüxü̃, notürü jexeraãcü namexẽchi i ngẽma uneta i ngexwacaxü̃xü̃ i Tupanape̱xewa tüxü̃ mexẽẽxü̃.
10 Rü jema mugü ga noxri mexẽchixü̃, rü nhu̱xma rü taxuwama name, ega namaã nügü nangugügu i ngẽma Tupanaãrü uneta i ngexwacaxü̃xü̃ i jexeraãcü mexẽchixü̃.
11 Rü jemaãcü woo namexẽchi ga jema mugü ga paxaãchi ixĩxü̃, notürü jexeraãcü namexẽchi i ngẽma uneta i ngexwacaxü̃xü̃ i guxü̃gutáma ixĩxü̃.
12 Rü toma aixcuma nüxü̃ tacua̱x na guxü̃gutáma jiĩxü̃ i ngẽma Tupanaãrü uneta i ngexwacaxü̃xü̃ i mexẽchixü̃, rü ngẽmaca̱x tama cúãcüma duü̃xü̃gümaã nüxü̃ tixu.
13 Rü ngẽmaca̱x tama duü̃xü̃güchaxwa iticu̱xgü jema Muĩsé üxü̃rüü̃. Jerü ga Muĩsé rü nügü nidüxchametü na tama nüxü̃ nadaugüxü̃ca̱x ga jema Judéugü ga nhuxãcü na jaxochigüxü̃ ga norü j̱aurachametücüü.
14 Notürü ga jema duü̃xü̃gü ga Muĩséxü̃ íixümücügüxü̃ rü nhama jadüxgüchametüxü̃rüü̃ nixĩgü jerü tama nüxü̃ nacua̱xgüéga ga ṯacüchiga na jiĩxü̃ ga jema mugü. Rü nhu̱xma rü ta i ngẽma Judéugü rü tama nüxü̃ nacua̱xgüéga i ngẽxguma nawa nangúegu i ngẽma mugü. Erü nangẽxma i ṯacü i nhama jadüxgüchametüxü̃rüü̃ nüxü̃́ naguxchaxẽẽxü̃ na tama nüxü̃ nacua̱xgüxü̃ca̱x. Rü nhu̱xma rü ta tama nüxna ínanguéga i ngẽma nacüma erü Cristuxicatama nixĩ ja jima nüxna ínanguxẽẽcü.
15 Rü nhu̱xma rü ta i ngẽma Judéugü, rü ngẽxguma nawa nangúegu i ngẽma ore ga Muĩsé tüxna ãxü̃, rü nangẽxma i ṯacü i nhama jadüxgüchametüxü̃rüü̃ nüxü̃́ naguxchaxẽẽxü̃ na tama nüxü̃ nacua̱xgüégaxü̃ca̱x na ṯacüchiga jiĩxü̃ i ngẽma ore.
16 Notürü ngẽxguma wüxi i duü̃xü̃ nüxü̃ rüxoxgu i nacüma i chixexü̃, rü tórü Coriaxü̃́ jaxõõgu, rü ngẽxguma nixĩ i nüxna ínanguxü̃ i ngẽma nüxü̃́ naguxchaxẽẽxü̃.
17 Erü nüma ja tórü Cori rü Naãẽ i Üünexü̃ rü wüxitama nixĩ rü ngextá ínangẽxmaxü̃wa i tórü Coriãẽ i Üünexü̃, rü tüxü̃́ nanatauxchaxẽẽ na Tupanana ingaicamagüxü̃.
18 Rü ngẽmaca̱x guxãma i jixema na Cristuaxü̃́ jaxõgüxü̃ rü nhama wüxi i woruarüü̃ tawa nangóchipeta na nhuxãcü namexẽchixü̃ ja tórü Cori erü nataxuma i ṯacü i tüxü̃ idüxüxü̃ naxchaxwa. Rü nüma ja tórü Cori i Naãẽ i Üünexü̃ ixĩcü, rü guxü̃guma jexeraãcü tüxü̃ nimexẽẽchigü na naxrüü̃ aixcuma imexü̃ca̱x.
