2 Corĩ́tiucü̃ãꞌ 4:1-18
4 Rü ngẽmaca̱x taguma nüxü̃ tarüchau i nhaã puracü, erü Tupana ja nüxü̃́ tangechaü̃tümüü̃cü nixĩ ga toxü̃ mucü na tanaxüxü̃ca̱x i nhaã puracü na duü̃xü̃gümaã nüxü̃ tixuxü̃ca̱x i norü ore.
2 Rü jemaca̱x nüxü̃ tarüxoe ga guxü̃ma ga ṯacü ga chixexü̃ i ãne tüxna ãxü̃ i cúãcü üxü̃. Rü tama tanawomüxẽẽãcüma nixĩ i namaã nüxü̃ tixuxü̃ i ore rü tama tanaxüchicüü i ngẽma ore. Notürü ngẽma ore i aixcuma ixĩxü̃xĩcatama nixĩ i nüxü̃ tixuxü̃. Rü ngẽmaãcü Tupanape̱xewa tamaxẽ rü duü̃xü̃güpe̱xewa togü itawe̱x na nüxü̃ nacua̱xgüxü̃ca̱x na nhuxãcü tixĩgüxü̃ i tomax.
3 Rü ngẽxguma chi texéca̱x naguxchagu i ngẽma ore i mexü̃ i nüxü̃ tixuxü̃, rü ngẽma duü̃xü̃gü i ijarütauxexü̃ca̱xicatama nixĩ i naguxchaxü̃.
4 Erü nümagü rü tama najaxõgü. Rü ngẽmaca̱x i nhama i naãneãrü ãẽ̱xgacü i Chataná rü nüxü̃́ nanaguxchaxẽẽ na tama nüxü̃ nacua̱xgüxü̃ca̱x na nhuxãcü namexẽchixü̃ i norü ore ja Cristu ja Üünecü. Rü Cristuwa nixĩ i nangóxü̃ na nhuxãcü na jiĩxü̃ ja Tupana.
5 Rü ngẽxguma duü̃xü̃gümaã nüxü̃ tixuxgu i ngẽma ore, rü tama tochigaxü̃tama tixugü. Notürü nüxü̃ tixu na Ngechuchu ja Cristu rü tórü Cori jiĩxü̃, rü nüma tüxü̃ na nangechaü̃xü̃gagu perü ngü̃xẽẽruü̃gü na tixĩgüxü̃.
6 Erü nümatama ja Tupana ga noxri naãne naxü̱xgux rü ẽãnexü̃wa nango̱xẽẽcü ga ngóonexü̃, rü nümatama nixĩ i nhu̱xma i tüxü̃ jango̱xnaãẽxẽẽgüxü̃ na ngẽmawa nüxü̃ icuáxü̃ca̱x na nhuxãcü namexẽchixü̃ i nümax. Rü ngẽma norü mexü̃ rü Ngechuchu ja Cristuchametüwa nixĩ i nüxü̃ idauxü̃.
Jaxõõcüma tamaxẽ
7 Rü ngẽma nüxü̃ na icuáxü̃ na nhuxãcü namexẽchixü̃ ja Tupana, rü ngẽma cua̱x rü wüxi i mexẽchixü̃ nixĩ. Notürü ngẽma cua̱x i mexẽchixü̃ rü taxüne i maĩraxü̃naxca̱xwa nangẽxma, na nangóxü̃ca̱x na Tupanawa ne naxũxü̃ i guxü̃ma i pora rü tama i tawatama.
8 Rü guxü̃wama toxü̃́ nangẽxma i guxchaxü̃gü, notürü taguma nüxü̃ tarüchau i nhaã puracü. Rü woo poraãcü taxoegaãẽgügu, notürü taguma ítanange̱x.
9 Rü woo togü towe ingẽxü̃tanügu, notürü ja Tupana rü taguma toxü̃ ínawogü. Rü woo duü̃xü̃gü toxü̃ napíexẽẽgu, notürü tama ngẽxma tajacua̱xẽẽ i nhaã puracü.
10 Rü guxü̃wama i ngextá ítaxĩxü̃wa rü ãũcümaxü̃wa tangẽxmagü, jexgumarüü̃ ga Ngechuchu na ãũcümaxü̃wa najexmaxü̃rüü̃. Notürü ngẽmaãcü toxü̃ naxüpetü na duü̃xü̃gü nüxü̃ daugüxü̃ca̱x na nhuxãcü towa namaxü̃xü̃ ja Ngechuchu.
11 Rü nhu̱xma na tamaxẽxü̃, rü guxü̃ i ngunexü̃gu rü Ngechuchugagu ãũcümaxü̃wa tangẽxmagü. Notürü ngẽmaãcü toxü̃ naxüpetü na Ngechuchu inawéxü̃ca̱x i norü pora nawa i nhaã toxone i juxwa̱xexü̃.
12 Rü ngẽmaãcü Tupanaãrü oreca̱x ãũcümaxü̃wa tangẽxmagü, notürü ngẽmaãcü toxü̃ naxüpetü na pema rü pexü̃́ nangẽxmaxü̃ca̱x i maxü̃ i taguma gúxü̃.
13 Tupanaãrü ore i ümatüxü̃wa rü nhanagürü:“Nüxü̃́ chajaxõ rü jemaca̱x Tupanachiga chidexa”,
nhanagürü. Rü ngẽxgumarüü̃tama tixĩgü i toma na tajaxõgüxü̃ rü Tupanachiga tidexagüxü̃.
14 Erü nüxü̃ tacua̱xgü rü Tupana ga juwa ínadaxẽẽcü ga Ngechuchu ja tórü Cori, rü jimatama Tupana tá nixĩ ja toxü̃ írüdagüxẽẽcü, erü Ngechuchuarü duü̃xü̃gü tixĩgü. Rü ngẽmaãcü wüxigu pemaã nügüxü̃tawa tá toxü̃ nagagü.
15 Rü guxü̃ma ga jema toxü̃ ngupetüxü̃ rü perü mexü̃ca̱x nixĩ na jexeraãcü jamuẽtanüxü̃ca̱x i ngẽma duü̃xü̃gü i Tupana nüxü̃ rüngü̃xẽẽgüxü̃. Rü ngẽmaãcü tá düxwa namuxũchi i ngẽma duü̃xü̃gü i moxẽ Tupanana ãgüxü̃ rü nüxü̃ icua̱xüü̃güxü̃.
16 Rü ngẽmaca̱x taguma nüxü̃ tarüxoe na nüxü̃ tixuxü̃ i ngẽma ore. Rü woo jajachigügu rü jaturachigügu i toxone, notürü toõẽwa rü guxü̃ i ngunexü̃gu rü jexeraãcü tiporaetanü.
17 Erü ngẽma ngúxü̃ i toxü̃ üpetüxü̃ i nhaã torü maxü̃wa, rü ngẽma rü wüxi i paxaãchimare nixĩ rü paxa tá nangupetü. Notürü ngẽmaãcü tá tanajaxu i wüxi i maxü̃ i mexẽchixü̃ i tagutáma gúxü̃ i nhama i naãnecü̱̃ã̱x i maxü̃ãrü jexeraxü̃chi ixĩxü̃.
18 Rü tama ngẽma nhu̱xma nüxü̃ idauxü̃gu nixĩ itarüxĩnüẽxü̃, notürü nagu tarüxĩnüẽ i ngẽma nhu̱xma tama nüxü̃ idauxü̃. Erü ngẽma nhu̱xma nüxü̃ idauxü̃ rü tama natai, notürü ngẽma nhu̱xma tama nüxü̃ idauxü̃, rü guxü̃gutáma nangẽxmaẽcha.
