2 Corĩ́tiucü̃ãꞌ 5:1-21
5 Rü nüxü̃ tacua̱xgü ega ngẽxguma ijanaxoxgu i nhaã toxone i paxaãchi nhu̱xma toxü̃́ ngẽxmaxü̃, rü dauxü̃guxü̃ i naãnewa tá tanajaxu i wüxi i toxone i tagutáma ijarüxoxü̃ i Tupanatama toxca̱x mexẽẽxü̃ rü tama i duü̃xü̃gü.
2 Rü ngẽmaca̱x i nhu̱xma i nhaã toxonemaã tamaxẽjane, rü tama aixcuma tataãẽgü. Erü tanaxwa̱xe na paxa toxü̃́ nangẽxmaxü̃ i ngẽma toxone i dauxü̃guxü̃ i naãnewa ngẽxmaxü̃.
3 Rü ngẽma toxone i dauxü̃guxü̃ i naãnewa tá toxü̃́ ngẽxmaxü̃ rü nhama wüxi i naxchirurüü̃ tá toxü̃ nidüxü, na ngẽmaãcü naxãxü̃nexü̃ca̱x i toõẽ.
4 Rü nhaã toxone i nhu̱xma toxü̃́ ngẽxmaxü̃wa tamaxẽjane, rü tanaxi̱xãchiãẽgü rü tama aixcuma tataãẽgü. Rü tama aixcuma ítanatáxchaü̃ i toxone i nhama i naãnewa toxü̃́ ngẽxmaxü̃, notürü tanaxwa̱xegü na tanajaxuxü̃ i toxone i ngexwacaxü̃xü̃ na ngẽmaãcü ngẽma maxü̃ i ngexwacaxü̃xü̃ ijanaxoxẽẽxü̃ca̱x i toxone i nhu̱xma toxü̃́ ngẽxmaxü̃.
5 Rü Tupana nixĩ ja toxü̃ imexẽẽcü naxca̱x i ngẽma ngexwacaxü̃xü̃ i maxü̃ rü ngẽma ngexwacaxü̃xü̃ i toxone. Rü toxna nanamu ga Naãẽ i Üünexü̃ na ngẽmawa nüxü̃ tacuáxü̃ca̱x na aixcuma tá tanajaxuxü̃ i ngẽma.
6 Rü ngẽmaca̱x taxuü̃ca̱xma taxoegaãẽgü. Erü nüxü̃ tacua̱x rü nhu̱xma nhaã toxonewa tamaxẽjane, rü taxucürüwama tórü Corixü̃tawa tangẽxmagü i dauxü̃guxü̃ i naãnewa.
7 Rü woo tama nüxü̃ tadaugügu ja jima tórü Cori i nhu̱xmax, notürü tajaxõgü na wüxi i ngunexü̃ rü tá nüxü̃ tadaugüxü̃. Rü ngẽma nixĩ i toxü̃ poraxẽẽxü̃ i nhaã torü maxü̃wa.
8 Rü ngẽmaca̱x taxuü̃ca̱xma taxoegaãẽgü ega tajuegu. Erü toxca̱x rü narümemaẽ nixĩ na nüxna ítachoxü̃xü̃ i nhaã toxone, na tórü Corixü̃tawa tajangẽxmagüxü̃ca̱x.
9 Rü ngẽmaca̱x, woo nhama i toxonewa tangẽxmagügu rü e̱xna tama nawa tangẽxmagügu, rü tanaxwa̱xe na guxü̃guma tórü Coriarü ngúchaü̃ na taxüxü̃. Rü ngẽmaca̱x naxca̱x tadaugü na tanaxüxü̃ i ngẽma nanaxwa̱xexü̃ i nümax.
10 Erü guxãtama i jixema rü Cristupe̱xewa tá tangugü na wüxichigü najaxuxü̃ca̱x i ngẽma tüxna üxü̃. Rü nüma tá wüxichigüxü̃ nangugüarü maxü̃ã̱x. Rü ngẽxgumarüü̃ na nhuxãcü meã imaxẽxü̃ rü e̱xna chixri imaxẽxü̃ ga jexguma nhama ga taxünewa ijexmagügu, rü ngẽmaãcü tá tüxna nanaxã ja wüxichigü.
Cristu rü taxca̱x Tupanaxü̃ narüngüxmüxẽẽ
11 Rü ngẽmaca̱x Tupanaãrü orearü uwa tapuracüe rü tajaxucu̱xẽgü i duü̃xü̃gü na jaxõgüãxü̃ca̱x. Erü toma rü aixcuma torü Corixü̃ tamuü̃ẽ. Rü Tupana toxü̃ nacua̱x na nhuxãcü jiĩxü̃ i tórü maxü̃, rü chierü i pema rü chi ta toxü̃ pecua̱xgux.
12 Rü tama tanaxwa̱xe i wenaxãrü togüétüwa tidexagü, notürü pexü̃ tarüngü̃xẽẽchaü̃ na pexü̃́ nangẽxmaxü̃ca̱x na ṯacüca̱x tomaã petaãẽgüxü̃ na nüxü̃ pecuáxü̃ca̱x na nhuxãcü penangãxü̃xü̃ i ngẽma duü̃xü̃gü i pepe̱xewa nügü írümegünetaxü̃ notürü norü maxü̃wa rü tama ixaixcumagüxü̃.
13 Rü woo duü̃xü̃gü toxü̃ daugügu na Tupanagu taxãũãẽgüxü̃, rü nüẽ́tama nixĩ i ngẽma erü nümatama ja Tupana rü meãma toxü̃ nacua̱x. Notürü i pema rü meãma toxü̃ pecua̱x na meãma toõẽxü̃ tacuáãcüma pemaã nüxü̃ tixuxü̃ ga norü ore.
14 Rü Cristu ja poraãcü toxü̃ ngechaü̃cü nixĩ ja nhu̱xma tomaã icuácü, erü tajaxõ na nüma rü guxããrü pecaduca̱x najuxü̃ na jexma janaxoxü̃ca̱x ga guxããrü chixexü̃gü.
15 Rü jemaãcü guxü̃ma ga duü̃xü̃güca̱x naju ga Cristu, na ngẽma duü̃xü̃gü i nhu̱xma maxẽxü̃, rü tama nümatama nagu naxĩnüẽxü̃gu namaxẽxü̃ca̱x, notürü naxca̱x na namaxẽxü̃ca̱x ja jima naxca̱x jucü rü wena írüdacü.
16 Rü ngẽmaca̱x i toma rü tama nhama i naãnecü̱̃ã̱x i duü̃xü̃gü nagu rüxĩnüẽxü̃rüü̃ texéxü̃ tangugüarü maxü̃ã̱x. Rü woo ga ü̃pa rü nhama ga naãnecü̱̃ã̱x ga duü̃xü̃gü nagu rüxĩnüẽxü̃rüü̃ Cristuxü̃ tangugü, notürü i nhu̱xma rü tama ngẽmaãcü namaã nagu tarüxĩnüẽ.
17 Rü ngẽxguma texé Cristuaxü̃́ jaxõ̱xgu, rü ngexwacaxü̃xü̃ i duü̃xü̃ tixĩ. Rü nuxcümaxü̃xü̃ ga tümacüma rü marü tüxna inajarüxo, rü ngexwacaxü̃xü̃ i maxü̃ tüxü̃́ nangẽxma.
18 Rü guxü̃ma i ngẽma rü Tupana nixĩ ja naxücü. Rü nüma nixĩ ga Cristugagu tamaã inangüxmüxü̃. Rü nhu̱xma rü toxü̃ namu na duü̃xü̃gümaã nüxü̃ tixuxü̃ na namaã inangüxmüẽxü̃ca̱x.
19 Jerü Tupana rü Cristugagu duü̃xü̃gümaã nügü narüngüxmüxẽẽ. Rü tama duü̃xü̃güarü pecadugu naxĩnüãcüma nanaxü ga jema. Rü nhu̱xma rü toxü̃ namu na ngẽmachigaxü̃ duü̃xü̃gümaã tixuxü̃.
20 Rü ngẽmaãcü Cristuarü orearü ngeruü̃gü tixĩgü, rü towa nixĩ i Tupana pexü̃ ca̱a̱xü̃xü̃ na namaã iperüngüxmüẽxü̃ca̱x. Rü ngẽmaca̱x Cristuégagu pexü̃ taca̱a̱xü̃gü na Tupanamaã iperüngüxmüẽxü̃ca̱x.
21 Cristu rü taguma pecadu naxü. Notürü tagagu nixĩ ga Tupana ga nhama pecaduã́xü̃rüü̃ãcüma namaã naxüãxü̃ na jemaãcü nagagu tüxü̃ ínanguxü̃xẽẽxü̃ca̱x nawa i tórü chixexü̃ na aixcuma nape̱xewa imexü̃ca̱x.
