2 Corĩ́tiucü̃ãꞌ 6:1-18
6 Rü nhu̱xma na Tupanaãrü ngü̃xẽẽruü̃ tixĩgüxü̃, rü pexü̃ taca̱a̱xü̃ na tama nüxü̃ pexoexü̃ca̱x ga jema pemaã na namecümaxü̃ ga jexguma naju̱xgu ga Nane.
2 Erü Tupana rü norü ore i ümatüxü̃wa, rü nhanagürü:“Rü jema ngunexü̃ ga nagu namexü̃gu na choxü̃ pejaxuxü̃, rü jexguma nixĩ ga pexü̃ chaxĩnüxü̃. Rü jexguma pexna chanaxuãxü̃gu ga maxü̃ i taguma gúxü̃, rü jexguma nixĩ ga pexü̃ charüngü̃xẽẽxü̃”,
nhanagürü. Rü nhu̱xma nixĩ i ngẽma ngunexü̃ i nagu namexü̃ na Tupanaxü̃ pejaxuxü̃, rü nhu̱xma nixĩ i ngẽma ngunexü̃ i pexna naxuaxü̃ãxü̃ i maxü̃ i taguma gúxü̃.
3 Rü toma rü guxü̃guma naxca̱x tadau na guxãpe̱xewa meã tamaxẽxü̃ na taxuü̃ca̱xma texé chixri torü puracüchiga idexaxü̃ca̱x.
4 6:4-5 Rü guxü̃wama duü̃xü̃güxü̃ nüxü̃ tadauxẽẽchaü̃ na aixcuma Tupanaãrü duü̃xü̃gü tixĩgüxü̃. Rü ngẽmaca̱x jaxna namaã taxĩnüẽ i ngẽxguma woo ngúxü̃ toxü̃ ngupetügu, rü e̱xna ṯacü toxü̃́ tau̱xgu, rü e̱xna ṯacü rü guxchaxü̃ toxü̃́ ngẽxmagu, rü e̱xna toxü̃ jac̱uaixgügu, rü e̱xna toxü̃ napocuegu, rü e̱xna naxi̱xãchiãẽtanügu rü tomaã nanuẽgu. Rü poraãcüxü̃chima tapuracüe, rü nhuxguacü rü tama tapee, rü nhuxguacü rü taija toxü̃́ nangu̱x. Notürü jaxna namaã taxĩnüẽ i guxü̃ma i ngẽma.
5 Nüü̃ nadau 6:4
6 Rü duü̃xü̃güxü̃ nüxü̃ tadauxẽẽ na aixcuma namexü̃ i torü maxü̃, erü aixcuma Tupanape̱xewa meã tamaxẽ, rü meã Tupanaxü̃ tacua̱x, rü jaxna duü̃xü̃gümaã taxĩnüẽ, rü namaã tamecüma. Rü nüxü̃ nüxü̃ tadauxẽẽ na towa nangẽxmaxü̃ i Tupanaãẽ i Üünexü̃ rü aixcuma guxü̃ i duü̃xü̃güxü̃ tangechaü̃xü̃.
7 Rü duü̃xü̃güxü̃ nüxü̃ tadauxẽẽ na aixcuma namexü̃ i torü maxü̃, erü namaã nüxü̃ tixu i ngẽma ore i aixcuma ixĩxü̃, rü itanawe̱x i Tupanaãrü pora i towa ngẽxmaxü̃. Rü ngẽma toxne ixĩxü̃ rü ngẽma nixĩ i torü maxü̃ i aixcuma mexü̃ i Tupanape̱xewa. Rü ngẽmamaã nixĩ i togü ítapoxü̃xü̃ i torü uwanügüpe̱xewa.
8 Rü nhuxguacü i duü̃xü̃gü rü toxü̃ nicua̱xüü̃gü, rü nhuxguacü rü ṯacü tomaã nixugüe. Rü nhuxguacü rü meã tochiga nidexagü, rü nhuxguacü rü chixri tochiga nidexagü. Rü woo aixcumachire̱x jixĩgu i ngẽma ore i nüxü̃ tixuxü̃, notürü dorata̱a̱x toxü̃ nawogüe.
9 Rü woo meã toxü̃ nacua̱xgüchire̱xgu, notürü nhama tama toxü̃ nacuáxü̃rüü̃ tomaã nixĩgü i duü̃xü̃gü. Rü nhuxguacü rü wixgutaa̱x tajue, notürü naẽ́tüwa tamaxẽãma. Rü toxü̃ napocue, notürü tama toxü̃ nadaixichi.
10 Rü woo tangechaü̃gügu, notürü guxü̃guma tataãẽgüama. Rü woo nhama i naãnewa tama tamuãrü ngẽmaxü̃ã̱xgügu, notürü muxü̃ma i duü̃xü̃na tanaxã i taxü̃ i mexü̃ erü togagu nanajaxu i maxü̃ i taguma gúxü̃. Rü woo taxuü̃ma toxü̃́ ngẽxma̱xgu i nhama i naãnewa, notürü dauxü̃guxü̃ i naãnewa rü toxü̃́ nangẽxma i guxü̃ma.
11 Pa Chaueneẽgü i Corĩ́tiucü̱̃ã̱x, dücax aixcuma pemaã nüxü̃ tixu rü pexü̃ tangechaü̃güxü̃chi.
12 Rü toma rü tama pexü̃ taxoe, notürü pema waxi nixĩ i tama petoxwa̱xexü̃.
13 Rü dücax, Pa Chaueneẽgüx, rü nhama wüxi i papa naxãcügüxü̃ ca̱a̱xü̃xü̃rüü̃ pexü̃ chaca̱a̱xü̃ na choxü̃ pengechaü̃güxü̃ca̱x ngẽma chama pexü̃ changechaü̃xü̃rüü̃.
Tupana ja maxü̃cüpata tixĩgü
14 ¡Rü tãũxü̃táma namaã pexãmücü i ngẽma duü̃xü̃gü i tama jaxõgüxü̃! Erü ngẽxguma chi ngẽmaãcü penaxü̱xgu rü tãũxü̃táma guxã wüxigu perüxĩnüẽ. ¿Rü nhuxãcü nawüxiguxü̃ i ngẽma mexü̃ namaã i ngẽma chixexü̃? ¿Rü nhuxãcü nawüxigu i ngóonexü̃ namaã i ẽãnexü̃?
15 ¿Rü nhuxãcü nawüxiguxü̃ ja Cristu namaã i Chataná? ¿Rü nhuxãcü nawüxiguxü̃ i wüxi i duü̃xü̃ i jaxõxü̃ namaã i wüxi i duü̃xü̃ i tama jaxõxü̃?
16 ¿Rü nhuxãcü Tupanapatawa nangẽxmaxü̃ i tupananetachicüna̱xãgü? Erü jixema rü Tupana ja maxü̃cüpata tixĩgü, rü tawa namaxü̃ i nümax. Rü Tupana rü pechiga nidexa ga jexguma nhaxgu:“Rü ngẽma duü̃xü̃güwa tá chamaxü̃, rü natanügu tá chajarüxũũxü̃. Rü norü Tupana tá chixĩ, rü nümagü rü tá chorü duü̃xü̃gü nixĩgü”,
nhaxgu.
17 Rü jemaca̱x nhanagürü ta ga tórü Cori:“¡Rü ípechoxü̃ i natanüwa i ngẽma duü̃xü̃gü i tama chorü duü̃xü̃gü ixĩgüxü̃! ¡Rü tãṹ i nüxü̃ peingõgüxü̃ i ngẽma chape̱xewa chixexü̃! Rü chama rü tá pexü̃ chajaxu.
18 Rü chama rü Penatü tá chixĩ, rü pemagü rü tá chauxacügü peixĩgü”,
nhanagürü ja tórü Cori ja Tupana ja guxü̃ãrü jexera poraxü̃chicü.
