2 Corĩ́tiucü̃ãꞌ 7:1-16
7 Rü dücax, Pa Chaueneẽgü ja Pexü̃ Changechaü̃güxex, rü ngẽma Tupanaãrü unetagü i pemaã nüxü̃ chixuxü̃, rü taxca̱x nixĩgü. Rü ngẽmaca̱x tanaxwa̱xe na jigüna idaugüxü̃ na tama taxünemaã rü e̱xna taãẽmaã naxüxü̃ca̱x i ngẽma Tupanape̱xewa tama mexü̃. Rü tanaxwa̱xe i aixcuma Tupanaxü̃ imuü̃ẽãcüma nüxna jigü taxãgü rü naxca̱xicatama tamaxẽ.
Corĩ́tiucü̱̃ã̱xgü rü wenaxãrü Tupanaca̱x nawoegu
2 Rü tanaxwa̱xe i toxü̃ pengechaü̃gü. Rü dücax ga toma rü taxúxemaãma chixexü̃ taxügü. Rü taxúxexü̃ma chixexü̃gu tanguxẽẽ. Rü taxúxexü̃ma tawomüxẽẽgü.
3 Rü tama pexü̃ chixuxü̃ca̱x nixĩ i pemaã nüxü̃ chixuxü̃ i ngẽma. Jerü marü pemaã nüxü̃ chixu na nhuxãcü poraãcü pexü̃ changechaü̃xü̃. Rü ngẽma pexü̃ na changechaü̃xü̃gagu rü íchamemare na petanüwa chamaxü̃xü̃ rü e̱xna wüxigu pemaã chajuxü̃.
4 Rü nhu̱xma rü taxuü̃ca̱xma pexü̃ chaxãneãcüma pemaã chidexa erü poraãcü pemaã chataãẽ. Rü woo ngúxü̃ na tingegüxü̃, notürü aixcuma choxü̃́ penangúchaü̃xẽẽ rü choxü̃ petaãẽxẽẽ.
5 Rü jexguma Machedóniããnewa ne taxĩxgumama rü taguma itarüngü̃ẽcüraxü̃ na guxchaxü̃gü toxü̃ ngupetüxü̃. Jerü guxü̃wama ga ngexta ítixĩgüxü̃wa rü nüxü̃ itajangau ga guxchaxü̃gü. Rü chixri tomaã nachopetü ga duü̃xü̃gü, rü tamuü̃ẽ.
6 Notürü ja Tupana ja tüxü̃ taãẽxẽẽcü ja jíxema ngechaü̃güxe, rü toxü̃ rü ta nataãẽxẽẽ ga jexguma toxü̃tawa nanguxgu ga taeneẽ ga Titu.
7 Rü tama jema toxü̃tawa na nanguxü̃ca̱xicatama tataãẽgü, notürü tataãẽgü ta jerü ga pema rü poraãcü nüxü̃́ penangúchaü̃xẽẽ rü penataãẽxẽẽ ga guma taeneẽ ga Titu. Rü nüma ga Titu rü tomaã nüxü̃ nixu na nhuxãcü poraãcü penaxwa̱xexü̃ na toxü̃ pedauxü̃. Rü tomaã nüxü̃ nixu na nhuxãcü naxca̱x pengechaü̃güxü̃ ga jema chamaã pexüxü̃, rü na nhuxãcü chauxca̱x pexoegaãẽgüxü̃. Rü guxü̃ma ga jema oremaã rü jexeraãcü chataãẽ.
8 Chama nüxü̃ chacua̱x rü jema popera ga pexca̱x chaxümatüxü̃ rü pexü̃ nangechaü̃güxẽẽ, notürü nhu̱xma rü marü tama naxca̱x changechaü̃ na chanaxümatüxü̃ ga jema popera. Rü noxri rü jemáãcü naxca̱x changechaü̃ ga jexguma nüxü̃ chacua̱xgu ga na pexü̃ nangechaü̃güxẽẽxü̃ ga jema popera ga jexguma penajau̱xgu.
9 Notürü i nhu̱xma rü chataãẽ na pexca̱x chanaxümatüxü̃ ga jema popera. Rü tama jema na pengechaü̃güxü̃ca̱x chataãẽ, notürü chataãẽ jerü jema perü ngechaü̃gagu Tupanana pecua̱xãchie rü penaxüchicüü ga perü maxü̃. Rü pema rü aixcuma Tupanana pecua̱xãchieãcüma namaã peporae ga jema ngechaü̃, rü jemaãcü taxuü̃ma ga chixexü̃ pemaã taxü ga jexguma pexca̱x tanaxümatügu ga jema popera.
10 Rü ngẽma ngechaü̃ i Tupana naxwa̱xexü̃ãcüma namaã iporaexü̃, rü name nixĩ, erü ngẽma ngechaü̃gagu naxüchicüü i tórü maxü̃ rü ngẽmagagu tanajaxu i maxü̃ i taguma gúxü̃. Rü ngẽmaca̱x taxuü̃ca̱xma naxca̱x peixauxãchie i ngẽma ngechaü̃. Notürü ngẽma ngechaü̃ i nhama i naãnecü̱̃ã̱x i duü̃xü̃gü nüxü̃́ ngẽxmaxü̃ rü taxuwama name erü juwa nanaga.
11 Rü jexguma jema poperamaã pexü̃ changechaü̃xẽẽgu, rü Tupana naxwa̱xexü̃ãcüma nixĩ ga namaã peporaexü̃ ga jema ngechaü̃. ¡Rü dücax i nhu̱xma i ṯacü Tupana pemaã üxü̃ i ngẽma perü ngechaü̃gagu! Jerü jema perü ngechaü̃gagu rü aixcuma nagu perüxĩnüẽ ga jema chixexü̃ ga petanüwa üpetüxü̃, rü meãma chamaã nüxü̃ peixu ga jema. Rü jema perü ngechaü̃gagu rü peãẽwa nangu̱x ga jema chixexü̃, rü poraãcü Tupanaxü̃ pemuü̃ẽ. Rü jemaca̱x penaxwa̱xe na jéma chaxũxü̃ na pexü̃ chajarüngü̃xẽẽxü̃ca̱x jerü penamexẽẽgüchaü̃ ga jema chixexü̃. Rü jema perü ngechaü̃gagu rü aixcuma penaxucu̱xẽ ga jema duü̃xü̃ ga chixexü̃ üxü̃. Rü guxü̃ ga jemawa rü ipenawe̱x na tama pegagu jiĩxü̃ ga jema chixexü̃ ga ngupetüxü̃.
12 Rü jemaca̱x, jexguma pexca̱x chanaxümatügu ga jema popera, rü tama jema duü̃xü̃ ga chixexü̃ üxü̃gu charüxĩnüãcüma chanaxümatü, rü tama jema duü̃xü̃ ga namaã chixexü̃ naxüxü̃gu charüxĩnüãcüma chanaxümatü. Notürü chanaxümatü ga jema popera na jemawa Tupanape̱xewa nüxna pecua̱xãchiexü̃ca̱x na nhuxãcü aixcuma toxü̃ pengechaü̃güxü̃.
13 Rü jema na toxü̃ pengechaü̃güxü̃, rü wüxi ga taãẽ nixĩ ga toxca̱x. Notürü jema taãẽãrü jexera nixĩ ga jema taãẽ ga toxü̃́ jexmaxü̃ ga jexguma nüxü̃ tada̱xgu ga Titu ga nhuxãcü taxü̃ ga taãẽ petanüwa na najaxuxü̃. Rü aixcuma guxãma ga pema nixĩ ga wenaxãrü poraãcü nüxü̃́ penangúchaü̃xẽẽxü̃.
14 Rü noxri taũta jéma naxũxgu ga Titu, rü namaã nüxü̃ chixu na mexü̃ i duü̃xü̃gü na peixĩgüxü̃. Rü nhu̱xma rü taxuü̃ca̱xma chaxãne, erü guxü̃ma ga jema Titumaã nüxü̃ chixuxü̃ ga pechiga rü aixcuma ngẽmaãcü peixĩgü, jexgumarüü̃ na aixcuma jiĩxü̃ ga guxü̃ma ga jema Tupanaãrü ore ga pemaã nüxü̃ tixuxü̃ ga tomax.
15 Rü nhu̱xma i Titu rü jexeraãcü pexü̃ nangechaü̃ i ngẽxguma nüxna nacua̱xãchigu na nhuxãcü meã naga pexĩnüẽxü̃ rü nhuxãcü nüxü̃ pengechaü̃ãcüma meã penajaxuxü̃.
16 Rü chama rü ta poraãcü pemaã chataãẽxü̃chi, erü nüxü̃ chacua̱x na aixcuma pejanguxẽẽxü̃ ga guxü̃ma ga jema pemaã nüxü̃ chixuxü̃.
