2 Corĩ́tiucü̃ãꞌ 8:1-24
8 Rü nhu̱xmax, Pa Chaueneẽgüx, rü pemaã nüxü̃ tixuxchaü̃ na nhuxãcü Tupana namaã mecümaxü̃ i ngẽma jaxõgüxü̃ i Machedóniããneãrü ĩãnegüwa ngẽxmagüxü̃.
2 Rü woo taxü̃ ga guxchaxü̃gü nüxü̃ na üpetüxü̃, notürü nataãẽgüama. Rü woo tama na namuãrü dĩẽruã̱xgüxü̃, notürü jema nüxü̃́ jexmacü ga dĩẽrumaã meã togüxü̃ narüngü̃xẽẽgü.
3 Rü chama nüxü̃ chacua̱x rü pemaã nüxü̃ chixu rü nümagü rü taãẽãcüma ngĩxü̃ inaxãgü ga gu̱xcüma ga dĩẽru ga nüxü̃́ tauxchacü na ngixü̃ inaxãgüxü̃. Rü ngĩẽ́tü jemaãrü jexera taãẽãcüma ngĩxü̃ inaxãgü.
4 Rü poraãcü toxü̃ naca̱a̱xü̃gü na tama nüxna tanachu̱xuxü̃ca̱x na jemaãcü jema togü ga taeneẽgüxü̃ nangü̃xẽẽgüxü̃ca̱x.
5 Rü jema nagu tarüxĩnüẽxü̃ãrü jexera ngĩxü̃ inaxãgü ga jema jaxõgüxü̃ ga Machedóniããnecü̱̃ã̱x. Jerü Tupananaxĩra nügü naxãgü rü jemawena toxna nügü naxuaxü̃gü na toga naxĩnüẽxü̃ca̱x, jema Tupana naxwa̱xexü̃rüü̃.
6 Rü jemaca̱x Tituxü̃ taca̱a̱xü̃ na wena petanüwa naxũxü̃ca̱x na ngĩxü̃ peinguxẽẽxü̃ca̱x i ngẽma dĩẽru ga marü pemaã ngĩxü̃ inaxügücü na ngĩxü̃ penutaque̱xexü̃ naxca̱x i ngẽma togü i taeneẽgü i nüxü̃́ nataxuxü̃.
7 Pema rü guxü̃wama meã ipexĩ erü meã pejaxõgü, rü pexü̃́ natauxcha na meã nüxü̃ peixuxü̃ i Tupanaãrü ore erü meã nüxü̃ pecua̱x na ṯacüchiga jiĩxü̃. Rü aixcuma togüxü̃ perüngü̃xẽẽchaü̃, rü jema pexü̃ tangúexẽẽxü̃ãcüma pegü pengechaü̃gü. Rü nhu̱xma rü ngẽxgumarüü̃ ta penaxwa̱xe na aixcuma meã ipexĩxü̃ nawa i ngẽma mexü̃ i nacüma na dĩẽru ngĩxü̃ ipexãxü̃ naxca̱x i ngẽma taeneẽgü i nüxü̃́ nataxuxü̃.
8 Tama wüxi i mu nixĩ i ngẽma pemaã nüxü̃ chixuxü̃. Notürü chanaxwa̱xemare na nüxü̃ pecuáxü̃ na nhuxãcü taãẽãcüma ngĩxü̃ inaxãgüxü̃ ga togü ga jaxõgüxü̃. Rü pemaã nüxü̃ chixu i ngẽma na pema rü ta ngĩxü̃ ipexãgüxü̃ca̱x i ngẽma dĩẽru i togü i taeneẽgüarü ngü̃xẽẽca̱x ixĩcü, na ngẽmaãcü ipenawéxü̃ca̱x na aixcuma nüxü̃ pengechaü̃güxü̃.
9 Erü pema rü marü nüxü̃ pecua̱x na nhuxãcü tamaã namecümaxü̃ ga tórü Cori ja Ngechuchu ja Cristu. Rü woo nüxü̃́ najexma ga guxü̃ma, notürü nhama wüxi ga ngearü jemaxü̃ã́xü̃rüü̃ pexca̱x nügü nixĩxẽẽ na ngẽmaãcü pexü̃́ nangẽxmaxü̃ca̱x i muxü̃ma i mexü̃gü.
10 Rü nhu̱xma rü perü mexü̃ca̱x nixĩ i pemaã nüxü̃ chixuxü̃ i ngẽma dĩẽruarü nutaque̱xechiga. Rü taunecü ga ngupetücügutama nixĩ ga ipenaxügüxü̃ ga ngĩxü̃ na penutaque̱xexü̃. Rü jema rü aixcuma perü ngúchaü̃maã nixĩ ga penaxüxü̃.
11 Rü nhu̱xma rü jema noxri na meã ipenaxügüxü̃rüü̃, rü name nixĩ i taãẽãcüma rü perü ngúchaü̃maã pejanguxẽẽ rü ngẽma dĩẽru i pexü̃́ ngẽxmacüwa ngĩxü̃ ipexã naxca̱x i ngẽma peeneẽgü i nüxü̃́ nataxuxü̃.
12 Erü ngẽxguma aixcuma wüxi ja duü̃xẽ tümaãrü ngúchaü̃maã ngẽma dĩẽru i tüxü̃́ ngẽxma̱xcüwa tümaẽneẽca̱x ngĩxü̃ itaxãxgu, rü Tupana rü taãẽãcüma ngĩxü̃ najaxu. Erü nüma ja Tupana rü taguma tüxna ngĩxca̱x naca i ngẽma tüxü̃́ tau̱xcü.
13 Rü ngẽmaca̱x tama chanaxwa̱xe i ngẽma togüxü̃ na perüngü̃xẽẽxü̃gagu pexü̃́ nataxu i pemax.
14 Notürü chanaxwa̱xe i guxãma tüxü̃́ nangẽxma i ṯacü i tanaxwa̱xexü̃, erü tama name na texéaxü̃́ nataxuxü̃ i ṯacü. Rü nhu̱xma na pexü̃́ nangẽxmaxü̃ i perü dĩẽru, rü name nixĩ i nüxü̃ perüngü̃xẽẽgü i ngẽma taeneẽgü i nüxü̃́ nataxuxü̃. Rü ngürüãchi to i ngunexü̃gu i pema pexü̃́ natau̱xgu, rü nümagü rü tá nüxĩ nüxü̃́ nangẽxma na pexü̃ nangü̃xẽẽgüxü̃ca̱x. Rü ngẽmaãcü tá guxãtama tawüxigu.
15 Rü Tupanaãrü ore i ümatüxü̃wa rü nhanagürü:“Guxema muxü̃ma tüxü̃́ jexmaxẽ rü taxuü̃ma tüxü̃́ ínajaxü. Rü guxema noxretama tüxü̃́ jexmaxẽ rü tama tüxü̃́ inajataxu”,
nhanagürü.
Titu rü namücügüchiga
16 Notürü Tupanana moxẽ chaxã, erü nüma rü Tituxü̃ nagu narüxĩnüxẽẽ na aixcuma pexü̃ nangü̃xẽẽxü̃ca̱x, ngẽma chama pegu charüxĩnüxü̃rüü̃.
17 Rü nüma ga Titu rü: “Ngü̃” nhanagürü na wena petanüwa chanamuxü̃. Jerü nüma rü woetama poraãcü pegu narüxĩnü. Rü ngẽmaca̱x i nhu̱xma rü wena petanüwa naxũ, erü nüxü̃́ nangúchaü̃.
18 Rü Titumaã ngẽ́ma tanamu i wüxi i taeneẽ i guxü̃ma i jaxõgüxü̃ nüxü̃ ngechaü̃güxü̃ erü nüma rü aixcuma meã nüxü̃ nixu i Tupanaãrü ore i tüxü̃ maxẽxẽẽxü̃.
19 Rü tama ngẽmaca̱xicatama nixĩ. Erü guxü̃ma i ngẽma jaxõgüxü̃ rü ngẽma taeneẽxü̃ naxunetagü na toxü̃ íjaxümücüxü̃ca̱x rü toxü̃ nangü̃xẽẽxü̃ca̱x i ngẽxguma Jerucharéü̃wa ngĩxü̃ tangexgu i ngẽma dĩẽru, na ngẽmaãcü nüxü̃ ticua̱xüü̃güxü̃ca̱x ja tórü Cori, rü na guxãma nüxü̃ dauxü̃ca̱x na nhuxãcü taãẽãcüma jigü rüngü̃xẽẽgüxü̃.
20 Rü ítajaga i ngẽma taeneẽ, erü tama tanaxwa̱xe i texé toxü̃ tixu i jixcama ngĩxca̱x i ngẽma tacü i dĩẽru i taeneẽgüca̱x ngĩxü̃ inutaque̱xegücü.
21 Erü tama Tupanape̱xewaxicatama tanaxwa̱xe na meã tanaxüxü̃, notürü guxü̃ i duü̃xü̃güpe̱xewa rü ta tanaxwa̱xe na meã tanaxüxü̃.
22 Rü Titumaã rü ngẽma to i taeneẽmaã petanüwa tanamu i wüxi i to i taeneẽ i toxü̃ nüxü̃ dauxẽẽxü̃ na aixcuma nüxü̃́ nangúchaü̃ na naxüãxü̃ i Tupanaãrü puracü. Rü nhu̱xma rü jexeraãcü petanüwa naxũxchaü̃ i nümax, erü nüxü̃ nacua̱x na nhuxãcü pema rü taãẽãcüma togüxü̃ na perüngü̃xẽẽgüchaü̃xü̃.
23 Rü ngẽxguma texé pexna caxgu na texe jiĩxü̃ ja Titu, ¡rü tümamaã nüxü̃ peixu na nüma rü chamücü ja wüxiwa chamaã pexca̱x puracücü na jiĩxü̃! Rü ngẽma taxre i togü i namücügü, rü ngẽma nixĩ i jatügü i guxü̃ma i jaxõgüxü̃ nüxü̃ unetagüxü̃ na Cristuarü puracü naxügüxü̃ca̱x. Rü nümagü rü aixcuma norü maxü̃maã Cristuxü̃ nicua̱xüü̃gü.
24 Rü ngẽmaca̱x chanaxwa̱xe i ngẽma taeneẽgüxü̃ nüxü̃ pedauxẽẽ na aixcuma nüxü̃ pengechaü̃güxü̃, na guxü̃ma i jaxõgüxü̃ nüxü̃ cua̱xgüxü̃ca̱x i ngẽmachiga. Rü ngẽmaãcü guxü̃ma i ngẽma jaxõgüxü̃ tá nüxü̃ nacua̱xgü na aixcuma jiĩxü̃ i ngẽma mexü̃ i ore i pechiga namaã nüxü̃ tixuxü̃.
