2 Corĩ́tiucü̃ãꞌ 9:1-15
9 Rü taxuü̃ca̱xma tü̱xcüü̃ pexca̱x chanaxümatü ngĩchiga i ngẽma dĩẽru i ngĩxü̃ penutaque̱xegücü naxca̱x i ngẽma taeneẽgü i jaxõgüxü̃ i Judéaanewa ngẽxmagüxü̃.
2 Erü marü nüxü̃ chacua̱x rü perü ngúchaü̃maã ipenaxã i ngẽma dĩẽru. Rü guxü̃guma taãẽãcüma ngẽma jaxõgüxü̃ i Machedóniããnewa ngẽxmagüxü̃maã nüxü̃ chixu na nhuxãcü i pema i Acajaanewa ngẽxmagüxe rü naĩ ja taunecügutama marü ípememarexü̃ na ngĩxü̃ ipexãgüxü̃ i ngẽma dĩẽru. Rü jema rümumaẽxü̃ ga jaxõgüxü̃ ga Machedóniããnecü̱̃ã̱x, rü jexguma nüxü̃ naxĩnüẽgu na nhuxãcü taãẽãcüma togüca̱x ngĩxü̃ na ipexãgüxü̃ i perü dĩẽru, rü nümagü rü ta inanaxügü na ngĩxü̃ inaxãgüxü̃.
3 Notürü i nhu̱xma rü ngẽ́ma petanüwa chanamugü i ngẽma taeneẽgü na nüxü̃ nadaugüxü̃ca̱x, na aixcuma jiĩxü̃ i ngẽma nüxü̃ chixuxü̃ i pechiga. Rü chanaxwa̱xe na aixcuma ípememarexü̃ na ngĩxü̃ ipexãxü̃ i ngẽma dĩẽru, ngẽma taeneẽgümaã nüxü̃ chixuxü̃rüü̃.
4 Erü ngẽxguma chi nhuxre i taeneẽgü i Machedóniããnecü̱̃ã̱x rü ngürüãchi chamaã petanüwa naxĩxgu, rü tama chanaxwa̱xe na pexü̃ na ijaṉg̱auxü̃ na tama aixcuma ípememarexü̃ na ngĩxü̃ ipexãxü̃ i ngẽma dĩẽru. Rü toxü̃́ rü chi wüxi i ãnexü̃chi nixĩ, erü marüchire̱x namaã nüxü̃ tixu na nhuxãcü aixcuma ípememarexü̃ na ngĩxü̃ ipexãxü̃ i ngẽma dĩẽru. Rü maneca pexü̃́ rü chi ta wüxi i ãnexü̃chi nixĩ.
5 Rü ngẽmaca̱x nixĩ i chauxca̱x namexü̃ na naxca̱x íchac̱axü̃ i ngẽma taeneẽgü na nüxĩra petanüwa naxĩxü̃ca̱x rü nümatama pexü̃ janangü̃xẽẽgüxü̃ca̱x na ngĩxü̃ penutaque̱xegüxü̃ca̱x i ngẽma dĩẽru ga ü̃pamama ngĩxü̃ peixucü. Rü ngẽmaãcü aixcuma tá íimemare i ngẽma dĩẽru i ngẽxguma ngẽ́ma changuxgu. Rü togü tá nüxü̃ nadaugü na aixcuma perü ngúchaü̃maã jiĩxü̃ na ngĩxü̃ ipexãgüxü̃ rü tama aüãcüma na jiĩxü̃.
6 Notürü chanaxwa̱xe i nüxna pecua̱xãchie rü jíxema noxretama i nanetüchire itoxe, rü noxretama i norü o tajaxu. Notürü jíxema muxü̃ i nanetüchire itoxe, rü muxü̃ma i norü o tajaxu.
7 Rü wüxichigü tanaxwa̱xe na ngĩxü̃ itaxãxü̃ i ngẽma ngĩgu tarüxĩnücü na nhuxre ngĩxü̃ itaxãxchaü̃xü̃. Rü tama name i aüãcüma ngĩxü̃ itaxã rü e̱xna texé tüxü̃ muãcüma ngĩxü̃ itaxã. Erü Tupana rü nüxü̃ nangechaü̃ i ngẽma duü̃xü̃ i taãẽãcüma ngĩxü̃ ixãxü̃.
8 Rü Tupaname̱xẽwa nangẽxma na poraãcü pexna naxããxü̃ca̱x i guxü̃ma i mexü̃ i pexü̃́ taxuxü̃, na guxü̃guma pexü̃́ nangẽxmaxü̃ca̱x i ngẽma penaxwa̱xexü̃ rü naẽ́tü na pexü̃́ íjaxüxü̃ca̱x na togüxü̃ namaã perüngü̃xẽẽgüxü̃ca̱x.
9 Tupanaãrü ore i ümatüxü̃wa rü nhanagürü:“Jima jatü ja mecü rü norü ngúchaü̃maã meã inanaxã nüxna i ngẽma duü̃xü̃gü i taxuü̃ma nüxü̃́ ngẽxmaxü̃. Rü Tupana rü tá guxü̃gu nüxna nacua̱xãchi na nhuxãcü namecümaxü̃ i nümax”,
nhanagürü.
10 Tupana nixĩ ja tüxna naxãcü ja nanetüchire na inatoxü̃ca̱x, rü tüxna naxãcü i õna na nangṍxü̃ca̱x. Rü nüma tá nixĩ i pexna naxããxü̃ ja guxü̃nema ja nanetüchire ja penaxwa̱xene na ipenatoxü̃ca̱x. Rü nüma tá nanaxüxẽẽ rü nanajaxẽẽ ja jima nanetüchire. Rü tá nanamuxẽẽ i norü o, na muxũchixü̃ nawa pejaxuxü̃ca̱x na ngẽmamaã togüxü̃ perüngü̃xẽẽgüxü̃ca̱x.
11 Rü ngẽmaãcü i pema rü tá pexü̃́ nangẽxma i guxü̃ma i mexü̃ na tauxchaãcüma nüxü̃ perüngü̃xẽẽgüxü̃ca̱x i togü. Rü ngẽxguma ngẽma togü i taeneẽgüxü̃tawa ngĩxü̃ tangegügu i ngẽma dĩẽru i naxca̱x ngĩxü̃ ipexãcü, rü nümagü rü tá poraãcü Tupanana moxẽ naxãgü.
12 Erü ngẽxguma nüxna ngĩxü̃ taxãxgu i ngẽma dĩẽru i nüxü̃ ngĩmaã perüngü̃xẽẽgücü i ngẽma taeneẽgü, rü tama ṯacü i nüxü̃́ taxuxü̃ca̱xicatama ta nixĩ, notürü naẽ́tü i nümagü i taeneẽgü rü perü ãmaregagu tá poraãcü Tupanana moxẽ naxãgü.
13 Rü nümagü i ngẽma taeneẽgü rü tá Tupanaxü̃ nicua̱xüü̃gü, erü ngẽma perü ãmaremaã tá nüxü̃ nüxü̃ pedauxẽẽ na aixcuma naga pexĩnüẽxü̃ i Cristuarü ore i mexü̃. Rü nümagü rü tá Tupanana moxẽ naxãgü naxca̱x i ngẽma perü ãmare i perü ngúchaü̃maã nüxna rü guxü̃ma i jaxõgüxü̃na pexãgüxü̃.
14 Rü ngẽxgumarüü̃ i ngẽma taeneẽgü rü tá poraãcü pexca̱x najumuxẽgü, erü pexü̃ nangechaü̃gü. Rü tá Tupanana moxẽ naxãgü naxca̱x na nhuxãcü nüma ja Tupana poraãcü pexü̃ nangüxẽẽxü̃ na jemaãcü pexü̃́ natauxchaxü̃ca̱x na nüxü̃ perüngü̃xẽẽgüxü̃.
15 Rü ngẽmaca̱x i nhu̱xma rü Tupanana moxẽ taxã, jerü tüxna nanamu ga Nane na tórü ãmare jiĩxü̃ca̱x. Rü nataxuma i ore i nagu mexü̃ na nüxü̃ ixuxü̃ca̱x na nhuxãcü namaã itaãẽgüxü̃chixü̃ i ngẽma ãmare.
