2 Crónicas 5:1-14
5 Rü yexguma marü yanguxgu ga guma Tupanapata, rü nüma ga Charumáu rü yéma nanana ga yema Tupanapataarü yemaxü̃gü ga úirunaxca̱x rü diẽrumünaxca̱x ga nanatü ga Dawí Cori ya Tupanana naxü̃. Rü Tupanaarü diẽrutanügu namaxã nanguxü̃.
Yema baú ga Tupanaarü mugü nagu nuxü̃ rü guma yexwaca̱xü̃ne ga Tupanapatawa nanangegü
2 Rü nüma ga Charumáu rü Yerucharéü̃gu nanangutaque̱xexẽxẽ ga yema Iraéuanecüã̱x ga ãẽ̱xgacütücumüwa ügüxü̃, rü guxü̃ma ga yema 12 ga Iraéutücumügüarü ãẽ̱xgacügüchigü, rü guxü̃ma ga papágü ga natanüxü̃eru ixĩgüxü̃. Rü yemaacü nanangutaque̱xexẽxẽ nax ma̱xpǘne ga Chiã́ũwa yayauxgüaxü̃ca̱x ga yema baú ga Tupanaarü mugü nagu nuxü̃, rü guma yexwaca̱xü̃ne ga napatawa nangegüãxü̃ca̱x.
3 Rü yema ngunexü̃ ga Iraéuanecüã̱xgü nagu naxüchigagüãxü̃ nax düxenügütüü̃wa nayexmagüxü̃ ga meama norü 7 ga tauemacügu (utúbru) rü yexguma nixĩ ga Charumáumaxã nangutaque̱xegüxü̃ ga yema Iraéuanecüã̱xgüarü ãẽ̱xgacügü.
4 Rü yéma ma̱xpǘne ga Chiã́ũwa nangugü ga guxü̃ma ga yema Iraéuanecüã̱xgüarü ãẽ̱xgacügü. Rü yema Lewítanüxü̃gü rü nayangegü ga yema baú ga Tupanaarü mugü nagu nucuxü̃.
5 Rü guma yexwaca̱xü̃ne ga napatawa nanangegü ga yema baú wüxigu namaxã ga guma nüxíraxü̃ne ga napata ga naxchirunaxca̱x rü guxü̃ma ga norü yemaxü̃gü. Rü yema chacherdótegü rü Lewítanüxü̃gü nixĩ ga yéma nanaxü̃.
6 Rü nüma ga ãẽ̱xgacü ga Charumáu rü guxü̃ma ga Iraéuanecüã̱xgü rü yexma nangutaque̱xegü nape̱xegu ga yema baú ga Tupanaarü mugü nagu nucuxü̃. Rü yema nax namuxũchixü̃ ga yema carnérugü, rü wocaxacügü i yatüxü̃ ga Tupanaca̱x daixü̃ rü taxucürüwa texé tayaxugü.
7 Rü yemawena ga yema chacherdótegü rü guma Tupanapataarü aixepewa nanangegü ga yema baú ga Tupanaarü mugü nagu nucuxü̃. Rü yema Nachica i Üünexü̃gu nayaxǘgü natüü̃gu ga guma naxpe̱xátü ga yema taxre ga dauxü̃cüã̱xchicüna̱xã.
8 Rü yema taxre ga dauxü̃cüã̱xchicüna̱xãgü rü guma naxpe̱xátügü rü baú íxüxü̃étüguama narüxunü rü nayadüxétügü ga yema baú rü guma naxpawerugü.
9 Notürü guma naxpawerugü rü nima̱x, rü yemaca̱x yema nape̱xegü rü nüxü̃ tadauama ga yexguma nüxíraxü̃xü̃ ga nachiãwa idawenügu, notürü yema norü ĩã̱xwa rü tama nüxü̃ tadau.
10 --
11 --
12 --
13 Rü yema wiyaetanüxü̃ rü paxetatanüxü̃ rü wüxigu nawiyaegü rü Tupanaxü̃ nicua̱xüxü̃gü rü Cori ya Tupanana moxẽ naxãgü. Rü yemaacü napaxetagü namaxã ga norü cornétagü rü norü botachinügü rü togü ga paxetaruü̃gü. Rü yexguma ínawiyaegüyane rü nhanagürügü: “¡Nüxü̃ pecua̱xüxü̃gü ya Cori ya Tupana erü nüma rü namecüma rü ngẽma norü ngechaü̃ rü taguma inayagu̱x!” nhanagürügü. Rü yexgumatama ga guma Cori ya Tupanapata rü caxixü̃maxã nanapá.
14 Rü yema caxixü̃gagu rü nüma ga chacherdótegü rü taxucürüwama yexma narücho nax yadaxẽẽgüaxü̃ca̱x ga yema puracü ga yéma Tupanaca̱x ínaxügüxü̃. Yerü Tupanaarü üünemaxã nanapá ga guma napata.
