2 Crônicas 1:1-17
1 Rü Charumáu ga Dawí nane, rü wüxi ga poracü ga ãẽ̱xgacü nixĩ, yerü Cori ya Tupana nüxü̃ narüngü̃xẽẽ, rü yemaca̱x natachiga.
2 Rü yexguma ga nüma ga Charumáu rü naxca̱x nangema ga guxü̃ma ga Iraéuanecüã̱xgüarü ãẽ̱xgacügü ga churaragüerugü, rü ĩanegüarü ãẽ̱xgacügü, rü chacherdótegüarü ãẽ̱xgacügü, rü papágü ga ãẽ̱xgacü ixĩgüxü̃ ga Iraéuanewa.
3 Rü yexguma marü yema duü̃xü̃gü ga yexma ngutaque̱xexü̃maxã yadexaguwena ga Charumáu, rü Gabaóũwa namaxã naxũ yerü yéma nixĩ ga nayexmaxü̃ ga guma Tupanapata ga naxchirunaxca̱x ga nũxcüma norü duü̃ ga Moiché chianexü̃gu naxüxü̃ne.
4 Rü marü tama Gabaóũwa nayexma ga yema baú ga Tupanaarü mugü nagu nuxü̃, yerü nüma ga Dawí rü ü̃paacü marü Quiriá-Yearíü̃wa nayayaxu rü Yerucharéü̃wa nanange nawa ga guma ĩpata ga naxchirunaxca̱x ga yema baúca̱x yexma naxüxü̃ne.
5 Notürü Gabaóũwatama nayexma ga yema ãmarearü guchicaxü̃ ga brṍchenaxca̱x ga naxüxü̃ ga Becharéu ga Urí nane ga Úrutaxa ixĩcü. Rü yema ãmarearü guchicaxü̃ rü Cori ya Tupanapatape̱xewa nayexma ga Gabaóũwa. Rü nüma ga Charumáu rü guxü̃ma ga yema duü̃xü̃gü ga íyaxümücügüxü̃ rü yéma Gabaóũwa naxĩ nax Tupanamaxã yanadexagüxü̃ca̱x.
6 Rü nüma ga Charumáu rü nagu nachinagü ga yema ãmarearü guchicaxü̃ ga brṍchenaxca̱x ga Tupanapatape̱xewa yexmaxü̃. Rü yemawa ínanagu ga 1,000 ga ãmaregü ga naxü̃nagü ga Tupanaca̱x daixü̃.
7 Rü yematama chütaxü̃gu, rü nüma ga Tupana rü Charumáuca̱x nango̱x rü nhanagürü nüxü̃: —¡Choxna naxca̱x naca i ta̱xacü i cunaxwa̱xexü̃! Rü chama rü tá cuxna chanaxã —nhanagürü.
8 Rü nüma ga Charumáu rü Tupanaxü̃ nangãxü̃ga rü nhanagürü: —Cumax, Pa Tupanax, rü poraãcü chaunatü ga Dawí cuxü̃́ nangechaü̃tümüxü̃. Rü nhu̱xmax rü chaunatüchicüxü ãẽ̱xgacüxü̃ choxü̃ quingucuchixẽxẽ.
9 Rü nhu̱xmax, Pa Cori Pa Tupanax ¡ẽcü yanguxẽxẽ ga yema chaunatü ga Dawímaxã nüxü̃ quixuxü̃ rü tá nüxü̃ curüngü̃xẽẽ i nanegü rü nataagü! Erü nhu̱xmax rü marü ãẽ̱xgacüxü̃ choxü̃ cuxuneta natanüwa i ngẽma muxũchixü̃ i curü duü̃xü̃gü i nhama naxnecüte̱xerüxü̃ imuxü̃.
10 ¡Rü ẽcü choxna naxã i cua̱x nax guxü̃xü̃ma chacuáxü̃ca̱x rü ngẽmaãcü mea namaxã ichacuáxü̃ca̱x i ngẽma curü duü̃xü̃gü! ¿Erü texé tüxü̃́ natauxcha nax namaxã itacuáxü̃ i nhaa curü duü̃xü̃gü i muxũchixü̃? —nhanagürü.
11 Rü nüma ga Tupana rü Charumáuxü̃ nangãxü̃ rü nhanagürü: —Nhu̱xma nax chauxü̃tawa naxca̱x ícuca̱xaxü̃ i cua̱x nax mea chorü duü̃xü̃gümaxã icucuáxü̃ca̱x rü chataãxẽ, erü tama naxca̱x ícuca nax cumuarü ngẽmaxü̃ã́xü̃ rüe̱xna cuxü̃ chatachigaxẽẽxü̃, rü tama naxca̱x ícuca nax chanadaixü̃ca̱x i curü uanügü rü tama naxca̱x ícuca nax cumáarü maxü̃ã́xü̃ca̱x. Notürü ngẽma naxca̱x ícuca̱xaxü̃ nixĩ i cua̱x rü cuãẽxü̃ nax cucuáxü̃ nax ngẽmaãcü mea namaxã icucuáxü̃ca̱x i chorü duü̃xü̃gü i naxca̱x ãẽ̱xgacüxü̃ cuxü̃ chingucuchixẽẽxü̃.
12 Rü nhu̱xmax rü cuxna chanaxã i cua̱x nax guxü̃xü̃ma cucuáxü̃ca̱x. Notürü naétü cuxna chanaxã i diẽru rü ngẽmaxü̃gü rü cuxü̃ chatachigaxẽxẽ. Rü yema nüxíraxü̃güxü̃ ga ãẽ̱xgacügü rü tama cuxrüxü̃ chanatachigaxẽxẽ, rü ngẽma cuwena ãẽ̱xgacügü ixĩgüxü̃ rü taxũtáma ngẽxgumarüxü̃ chanatachigaxẽxẽ —nhanagürü ga Tupana.
13 Rü yemawena rü nüma ga Charumáu rü natáegu nawa ga guma Tupanapata ga Gabaóũwa yexmane. Rü Yerucharéü̃wa naxũ rü yéma Iraéuanecüã̱xgüarü ãẽ̱xgacü nixĩ.
14 --
15 --
16 --
17 --
