2 Juã́ũ 1:1-13
1 Pa Chaueneẽgü i Jaxõgüxe ja Tupana Pexü̃ Dexex, pexca̱x chanaxümatü i chama i Juã́ũ i jaxõgüxü̃ãrü ãẽ̱xgacü na chiĩxü̃. Chama rü aixcuma pexü̃ changechaü̃. Rü tama i chaxica, notürü guxü̃ma i ngẽma nüxü̃ cua̱xgüxü̃ i Tupanaãrü ore i aixcuma ixĩxü̃, rü ngẽxgumarüü̃ ta pexü̃ nangechaü̃gü.
2 Pexü̃ tangechaü̃ erü toxrüü̃ nüxü̃ pecua̱xgü i ngẽma ore i aixcuma ixĩxü̃ i guxü̃gutáma tawa ngẽxmaxü̃.
3 Rü nüma ja Tanatü ja Tupana rü Nane ja Ngechuchu ja Cristu rü poraãcü tá pexü̃ narüngü̃xẽẽgü rü nüxü̃́ pengechaü̃tümüü̃gü rü pexü̃ nataãẽxẽẽgü, erü nüxü̃ pecua̱x i ngẽma ore i aixcuma ixĩxü̃ rü pegü pengechaü̃gü.
4 Rü poraãcü chataãẽ ga jexguma nüxü̃ chada̱xgu na nhuxãcü nhuxre i petanüxü̃gü rü aixcuma meã naga na naxĩnüẽxü̃ i ngẽma ore i aixcuma ixĩxü̃, jema Tanatü ja Tupana tüxü̃ muxü̃rüü̃.
5 Rü nhu̱xmax, Pa Chaueneẽgü ja Pexü̃ Changechaü̃güxex, rü pexna nüxü̃ chacua̱xãchixẽẽ na namexü̃ na jigü ingechaü̃güxü̃. Rü ngẽma rü tama wüxi i ngexwacaxü̃xü̃ i Tupanaãrü mu nixĩ. Notürü jematama nixĩ ga mu ga noxriarü ügügumama Tupana tüxna ãxü̃.
6 Ngẽxguma Tupanaxü̃ ingechaü̃gügu, rü tanaxü i guxü̃ma i ngẽma tüxü̃ namuxü̃. Erü nüma rü noxriarü ügügumama tamaã nüxü̃ nixu na jigü ingechaü̃güxü̃ca̱x i wüxichigü.
Orearü uruü̃gü i womüxẽẽruü̃chiga
7 Guxü̃wama i nhama i naãnewa rü nanaxĩãne i muxü̃ma i womüxẽẽruü̃gü ixĩgüxü̃. Rü nüxü̃ nixuchigagü na tama Tupana duü̃xü̃xü̃ jaxĩxẽẽxü̃ ga Ngechuchu ja Cristu. Rü ngẽma ngẽmaãcü idexaxü̃, rü wüxi i womüxẽẽruü̃ nixĩ, rü Cristuarü uwanü nixĩ.
8 ¡Ipexuãẽgü na taxúema pexü̃ womüxẽẽgüxü̃ca̱x rü na tama notüca̱xma jiĩxü̃ca̱x i tórü puracü! ¡Notürü meã pejaxõgüama na aixcuma penajaxuxü̃ca̱x i guxü̃ma i ngẽma Tupana pexna ãxchaü̃xü̃!
9 Rü jíxema nangupetüxẽẽ́xẽ ga jema Cristu tüxü̃ ngúexẽẽxü̃, rü tama aixcuma Tupanaxü̃ tacua̱x. Notürü jíxema tama nüxna íchoxü̃xẽ ga jema Cristu tüxü̃ ngúexẽẽxü̃, rü aixcuma nüxü̃ tacua̱x ja Tanatü ja Tupana rü Nane ja Ngechuchu.
10 Rü ngẽxguma chi wüxi i duü̃xü̃ petanüwa nguxgu rü tama jema Cristu tüxü̃ ngúexẽẽxü̃maã pexü̃ nangúexẽẽgu, rü ¡tãũxü̃táma penajaxu i pechiü̃wa rü bai i nüxü̃ perümoxẽgü!
11 Erü ngẽxguma wüxie tümachiü̃wa najau̱xgu, rü tananaãẽraxü̃ rü natanüxü̃ tügü tixĩxẽẽ nawa i ngẽma norü chixexü̃.
Juã́ũãrü ore ga nawa ijacuáxü̃
12 Choxü̃́ nangẽxma i muxü̃ma i to i ore i pemaã nüxü̃ chixuxchaü̃xü̃. Notürü tama chanaxwa̱xe na nhaã poperawa pemaã nüxü̃ chixuxü̃, erü paxa tá petanüwa íchajadauxchaü̃ na chamatama pemaãxü̃chi nüxü̃ chixuxü̃ca̱x na ngẽmaãcü wüxigu aixcuma itaãẽgüxü̃ca̱x.
13 Rü ngẽma nuã natanüwa changẽxmaxü̃ i jaxõgüxü̃ i peeneẽgü ixĩgüxü̃ i Tupana dexü̃, rü pexü̃ narümoxẽgü. Rü ngẽxĩcatama nixĩ i chorü ore i pemaã nüxü̃ chixuxü̃.
Rü nuãma pexna,
Juã́ũ
