2 Techarónicacü̃ãꞌ 1:1-12
1 Pa Techarónicawa Ngẽxmagüxü̃ i Toeneẽgü i Jaxõgüxü̃ i Tanatü ja Tupana rü tórü Cori ja Ngechuchu ja Cristuarü Duü̃xü̃gü Ixĩgüxü̃x, chama i Pauru rü namaã i taeneẽ i Siuwánu rü Timúteu nixĩ i pexca̱x tanaxümatüxü̃ i nhaã popera.
2 Rü tanaxwa̱xe i Tanatü ja Tupana rü tórü Cori ja Ngechuchu ja Cristu pexü̃ narüngü̃xẽẽ rü pexü̃ nataãẽxẽẽ.
Ngẽma chixexü̃ ügüxü̃ rü Tupana tá nanapocue i ngẽxguma wenaxãrü núma naxũxgu ja Cristu
3 Pa Toeneẽgüx, rü guxü̃guma pexca̱x Tupanana moxẽ taxã, erü name nixĩ na ngẽmaãcü tanaxüxü̃. Erü guxü̃guma jexeraãcü pejaxõgüetanü rü jexeraãcü pegü peingechaü̃güetanü.
4 Rü ngẽmaca̱x tomatama taãẽãcüma pechigaxü̃ tixu natanüwachigü i ngẽma duü̃xü̃gü i Tupanaãxü̃́ jaxõgüxü̃. Rü namaã nüxü̃ tixu na nhuxãcü meã pejaxõgüxü̃, rü nhuxãcü namaã peporaexü̃ i guxü̃ma i ngẽma guxchaxü̃gü rü ngúxü̃gü i pexü̃ ngupetüxü̃.
5 Rü ngẽma guxchaxü̃gü i pexü̃ ngupetüxü̃wa nüxü̃ tacua̱x na aixcumacü jiĩxü̃ ja Tupana, erü pexü̃ nangugü na aixcuma pemexü̃ na peichocuxü̃ca̱x i ngextá nüma ãẽ̱xgacü íjiĩxü̃wa. Rü ngẽ́ma na peichocuxü̃ca̱x nixĩ i ngúxü̃ peingegüxü̃ i nhu̱xmax.
6 Rü aixcuma name nixĩ na Tupana napocuexü̃ i ngẽma duü̃xü̃gü i ngúxü̃ pexü̃ ingegüxẽẽxü̃.
7 Notürü i pema i nhu̱xma ngúxü̃ ingegüxe rü name nixĩ i wüxigu tomaã pexü̃ inarüngü̃güxẽẽ ja Tupana. Rü ngẽma rü tá nanaxü ja Tupana i ngẽxguma üxüemagu dauxü̃wa ne naxũxgu ja tórü Cori ja Ngechuchu ja Cristu wüxigu namaã i norü orearü ngeruü̃gü i poraexü̃.
8 Rü aixcuma núma tá naxũ i nüma ja tórü Cori ja Ngechuchu na napocueãxü̃ca̱x i ngẽma duü̃xü̃gü i tama Tupanaxü̃ cuáxchaü̃güxü̃ rü tama naga ĩnüẽxü̃ i ngẽma ore i mexü̃ i tórü Cori ja Ngechuchu ja Cristuchiga.
9 Rü ngẽma duü̃xü̃gü rü wüxi i pocu i taguma gúxü̃gu tá napocue erü tórü Cori ja Ngechuchuarü jaxü̃wa tá nawogü. Rü ngẽ́ma rü tagutáma nüxü̃ nadaugü na nhuxãcü namexẽchixü̃ rü naporaxü̃ ja tórü Cori ja Ngechuchu.
10 Rü ngẽmaãcü tá ngẽma duü̃xü̃gümaã nangupetü i ngẽxguma tórü Cori ja Ngechuchu núma ũxgu. Rü núma tá nangu na nórü duü̃xü̃gü nüxü̃ icua̱xüü̃güxü̃ca̱x, rü tá naḇaixãchiãẽgü rü nataãẽgü erü tá nüxü̃ nadaugü na nhuxãcü namexẽchixü̃ i nümax. Rü pema rü tá ta wüxigu namaã pengẽxmagü, jerü pejaxõgü ga jema Tupanaãrü ore ga pemaã nüxü̃ tixuxü̃.
11 Rü ngẽmaca̱x guxü̃guma pexca̱x tajumuxẽgü. Rü Tupanana taca na nüma pexü̃ nadauxü̃ na aixcuma mexü̃ i norü duü̃xü̃gü peixĩgüxü̃ i nhu̱xma na pexü̃ jadexechixü̃. Rü ngẽxgumarüü̃ ta nüxna taca na nümatama norü poramaã janguxẽẽãxü̃ca̱x i guxü̃ma i ngẽma mexü̃ i peãẽwa nagu perüxĩnüẽxü̃ rü guxü̃ma i ngẽma puracügü i mexü̃ i perü õgagu pexüxü̃.
12 Rü ngẽxguma Tupana ngẽmaãcü pexü̃ rüngü̃xẽẽgu, rü perü maxü̃ i mexü̃gagu rü guxü̃ma i duü̃xü̃gü tá nüxü̃ nicua̱xüü̃gü ja tórü Cori ja Ngechuchu ja Cristu. Rü nümatama ja tórü Cori rü tá pemaã nataãẽ erü nüma rü wüxigu Tanatü ja Tupanamaã pexü̃ nangechaü̃gü.
