2 Techarónicacü̃ãꞌ 2:1-17
2 2:1-2 Rü nhu̱xma Pa Chaueneẽgüx, rü pemaã nüxü̃ chixuxchaü̃ i nachiga na nhuxãcü tá na jiĩxü̃ i ngẽxguma tórü Cori ja Ngechuchu ja Cristu wena núma ũxgu rü tüxü̃ nangutaque̱xexẽẽgügu na wüxiwa namaã ingẽxmagüxü̃ca̱x. Rü pexü̃ taca̱a̱xü̃gü na tama ngürüãchi togumare perüxĩnüẽxü̃ rü paxa pejaxõgüxü̃ i ṯacü rü ore i tama toma pemaã nüxü̃ tixuxü̃. Erü tama tanaxwa̱xe na peḇaixãchiãẽgüxü̃ ega texé pemaã idoraegu rü pemaã nüxü̃ ixuxgu na marü ínanguxü̃ ja tórü Cori ja Ngechuchu. Rü ngẽxguma texé pemaã nüxü̃ ixuxgu na nagu taxãnegüxü̃ na Cristu rü marü ínanguxü̃, rü tama name i tümaga pexĩnüẽ. Rü woo pemaã nüxü̃ tixugügügu na tanajauxgüxü̃ i wüxi i torü popera i nüxü̃ ixuxü̃ na marü ínanguxü̃ ja tórü Cori ja Ngechuchu, ¡rü tãũxü̃táma tüxü̃́ pejaxõgü!
2 Nüü̃ nadau 2:1
3 ¡Rü tãũxü̃táma naga pexĩnüẽ i ngẽma duü̃xü̃gü i ngẽmaãcü pexü̃ womüxẽẽgüchaü̃xü̃! Erü naxü̃pa na Ngechuchu núma ũxü̃ rü tá ínangu i ngẽma jatü i Tupanaãrü uwanü ixĩxü̃, rü tá nananuẽxẽẽ i muxü̃ma i duü̃xü̃gü i jaxõgüchiréxü̃. Notürü ngẽma jatü rü Tupana marü namaã nanaxuegu rü tá napocu.
4 Rü ngẽma Tupanaãrü uwanü rü tá Tupanamaã rü guxü̃ma i ngẽma Tupanaãrü ixĩxü̃maã narüxuwanü. Rü tá nachi naxai i guxü̃ma i ṯacü i mexü̃ i duü̃xü̃gü Tupanaxü̃ namaã icua̱xüü̃güxü̃. Rü Tupanaãrü tupauca ja taxü̃newa tá najarüto nhama Tupana jiĩxü̃rüü̃. Rü tá nügü nixu na Tupana jiĩxü̃.
5 ¿Tama e̱xna nüxna pecua̱xãchie rü jexguma petanüwa chajexmagu rü marü meãma pemaã nüxü̃ chixu nachiga ga jema?
6 Rü pema marü nüxü̃ pecua̱x na tü̱xcüü̃ jiĩxü̃ i taũta núma naxũxü̃ i ngẽma Tupanaãrü uwanü. Taũta núma naxũ, erü taũta nawa nangu i ngunexü̃ na ínanguxü̃.
7 Rü ngẽma chixexü̃ i Tupanaãrü uwanü üxü̃, rü marü cúãcü inaxügü. Notürü nümatama i Tupanaãrü uwanü rü tãũxü̃táma nango̱x nhu̱xmatáta ngẽma norü chogüruü̃ nüxü̃ ingé.
8 Rü ngẽxguma tá nixĩ i ínanguxü̃ i ngẽma Tupanaãrü uwanü. Notürü nüma ja tórü Cori ja Ngechuchu rü wüxi i naã̱xwa “cue” nhaxü̃maã tá najama̱x. Rü ngẽxguma ínanguxgu ja tórü Cori ja Ngechuchu rü ngẽma norü j̱auxracüüxü̃maã tá inajanaxoxẽẽ i ngẽma norü uwanü.
9 Rü ngẽma Tupanaãrü uwanü, rü ngẽxguma ínanguxgu rü tá nüxü̃́ nangẽxma i Chatanáãrü pora rü ngẽmaca̱x tá naporaxü̃chi. Rü tá nanaxü i nagúxü̃raü̃xü̃ i cua̱xruü̃gü i Chatanáãrü poramaã naxüxü̃.
10 Rü nagúxü̃raü̃xü̃ i chixexü̃ tá naxü na nawomüxẽẽãxü̃ca̱x i ngẽma duü̃xü̃gü i Tupana tá pocuexü̃. Rü ngẽmaãcü tá nüxü̃ naxüpetü i ngẽma duü̃xü̃gü, erü tama nanajauxgüchaü̃ rü tama nüxü̃ nangechaü̃ i ngẽma Tupanaãrü ore i aixcuma ixĩxü̃ i tüxü̃ maxẽxẽẽxü̃.
11 Rü ngẽmaca̱x ja Tupana rü nanangexrü i ngẽma duü̃xü̃gü na poraãcü ínatüexü̃ca̱x rü jaxõgüãxü̃ca̱x i ngẽma ore i doramare ixĩxü̃.
12 Rü ngẽmaca̱x düxwa Tupana tá namaã nanaxuegu na napocuexü̃ i guxü̃ma i nümagü i tama jaxõgüchaü̃xü̃ i ore i aixcuma ixĩxü̃ rü namaã taãẽgüxü̃ i ngẽma chixexü̃ na naxügüxü̃.
Tupana tüxü̃ nidexechi na tüxü̃́ nangẽxmaxü̃ca̱x i maxü̃ i taguma gúxü̃
13 Notürü, Pa Chaueneẽgüx i Tórü Cori ja Ngechuchu Pexü̃ Ngechaü̃güxex, rü guxü̃guma Tupanana moxẽ pexca̱x taxã jerü nüma ga Tupana rü noxritama naãne ixügügumama pexü̃ nidexechi na pexira penajauxgüxü̃ca̱x i maxü̃ i taguma gúxü̃ ga jexguma pexü̃ nangü̃xẽẽgu ga Naãẽ i pexü̃ üünexẽẽxü̃ rü pejaxõgügu ga jema ore i aixcuma ixĩxü̃.
14 Rü jemaca̱x Tupana pexca̱x naca ga jexguma pemaã nüxü̃ tixuxgu ga norü ore i mexü̃ i tüxü̃ maxẽxẽẽxü̃. Erü nüma nanaxwa̱xe na pexü̃́ nangẽxmaxü̃ca̱x i pechica i tórü Cori ja Ngechuchu ja Cristuxü̃tawa i ngextá ínamexẽchixü̃wa.
15 Rü ngẽmaca̱x, Pa Chaueneẽgüx, rü chanaxwa̱xe i meã pejaxõgüama rü tama nüxü̃ ipejarüngümaẽ ga jema ore ga tomatama pexü̃ tangúexẽẽxü̃ rü jema ore ga poperagu pexca̱x taxümatüxü̃.
16 2:16-17 Rü chanaxwa̱xe i tórü Cori ja Ngechuchu ja Cristu rü Tanatü ja Tupana pexü̃ nataãẽxẽẽgü rü pexü̃ narüngü̃xẽẽ na guxü̃guma mexü̃ i oremaã peidexagüxü̃ca̱x rü mexü̃ pexügüxü̃ca̱x. Rü jima Tanatü ja Tupana nixĩ ja tamaã namecümaãcüma tüxü̃ ngechaü̃cü rü guxü̃guma tüxü̃ taãẽxẽẽcü rü tamaã ixunetacü na wüxi i ngunexü̃ tá naxü̃tawa ingẽxmagüxü̃.
17 Nüü̃ nadau 2:16
