2 Techarónicacü̃ãꞌ 3:1-18
3 Rü nhu̱xma Pa Chaueneẽgüx, rü chanaxwa̱xe na toxca̱x pejumuxẽgüxü̃ na paxa guxü̃wama nanguxü̃ca̱x i tórü Cori ja Ngechuchuarü ore i mexü̃, rü duü̃xü̃gü norü ngúchaü̃maã na najauxgüxü̃ca̱x ga jema pema na penajauxgüxü̃rüü̃.
2 ¡Rü toxca̱x pejumuxẽgü ta na tama ṯacü rü chixexü̃ tomaã naxügüxü̃ca̱x i ngẽma duü̃xü̃gü i chixexü̃gü! Erü tama guxü̃ma i duü̃xü̃gü najaxõgü.
3 Notürü tórü Cori ja Ngechuchu rü aixcuma najanguxẽẽ i ngẽma tamaã inaxunetaxü̃. Rü nüma tá pexü̃ naporaexẽẽ rü pexna nadau na tama chixexü̃gu pej̱ixü̃ca̱x.
4 Rü tórü Cori ja Ngechuchu toxü̃ nüxü̃ nacua̱xẽẽ na aixcuma penaxüxü̃ i ngẽma pexü̃ tamuxü̃ rü tagutáma nüxü̃ perüxoexü̃ na ngẽmaãcü penaxüxü̃.
5 Rü tanaxwa̱xe i tórü Cori ja Ngechuchu pexü̃ narüngü̃xẽẽ na aixcuma pegü pengechaü̃güxü̃ca̱x, ngẽma Tupana tüxü̃ ngechaü̃xü̃rüü̃. Rü naxca̱x ítaca na pexü̃ naporaexẽẽxü̃ca̱x na Cristurüü̃ namaã peporaexü̃ca̱x i ngẽma ngúxü̃gü nhu̱xmatata pexca̱x ínangu.
Name nixĩ na ipuracüexü̃ i wüxichigü
6 Pa Chaueneẽgüx, tórü Cori ja Ngechuchu ja Cristuégagu pexü̃ tamu na tama namaã pexãmücügüxü̃ca̱x i ṯacü i taeneẽ i tama puracüchaü̃xü̃ rü tama ngẽma pexü̃ tangúexẽẽãcüma maxü̃xü̃.
7 Erü pema rü marü nüxü̃ pecua̱x na nhuxãcü tá pemaxẽxü̃ na toxrüü̃ penaxüxü̃ca̱x. Jerü toma ga jexguma petanüwa tajexmagügu rü torü õnaca̱x tapuracüe, rü tama jexma tarüchomare.
8 Rü toma rü taguma texéarü õna ngetanüãcüma tangõ̱x. Notürü ngunecü rü chütacü rü torü õnaca̱x tapuracüe na tama wüxi ga guxchaxü̃ pexü̃́ tixĩgüxü̃ca̱x.
9 Rü woochire̱x Tupanape̱xewa rü name nixĩ ga perü ngü̃xẽẽca̱x na ítac̱axü̃, notürü tama jemaãcü tanaxü. Rü torü õnaca̱x tapuracüe jerü pexü̃ nüxü̃ tadauxẽẽchaü̃ na nhuxãcü meã imaxü̃xü̃.
10 Jerü jexguma petanüwa tajexmagügu, rü pemaã nüxü̃ tixu rü jíxema tama puracüchaü̃xẽ, rü noxtacüma ngexrüma nixĩ na tachibüxü̃.
11 Rü pexca̱x tanaxümatü i ngẽmachiga, erü marü nüxü̃ taxĩnüẽ na petanüwa nangẽxmaxü̃ i nhuxre i duü̃xü̃gü i oexü̃ rü tama puracüechaü̃xü̃ rü toguechigagumare rüxĩnüẽxü̃.
12 Rü tórü Cori ja Ngechuchu ja Cristuégagu tanamu na meãmare ínapuracüexü̃ca̱x i ngẽma duü̃xü̃gü na nümatama norü õnaca̱x nataxegüxü̃ca̱x.
13 Pa Chaueneẽgüx, ¡tama nüxü̃ perüchau na mexü̃ pexüexü̃!
14 Rü ngẽxguma texé tama naga ĩnügu i nhaã ore i poperawa pemaã nüxü̃ tixuxü̃ ¡rü marü tüxü̃ pecua̱x na texé tiĩxü̃! Rü tama name i tümamaã pexãmücü na taxãnexü̃ca̱x i tümax.
15 ¡Notürü tãũxü̃táma namaã perüxuwanü! Rü name nixĩ i nhama peeneẽxü̃ pexucu̱xẽxü̃ãcüma meã tüxü̃ pexucu̱xẽmare.
Pauru rü naxca̱x ínaca na Cori ja Ngechuchu nüxü̃ rüngü̃xẽẽxü̃ ga jema jaxõgüxü̃
16 Rü chanaxwa̱xe i nümatama ja tórü Cori ja tüxü̃ meãẽxẽẽcü pexü̃ narüngü̃xẽẽ na guxü̃guma i guxü̃wama pemeãẽmareechaxü̃ca̱x. Rü chanaxwa̱xe na nüma rü petanüwa na nangẽxmaxü̃ i guxãma i pemax.
17 Chama i Pauru rü cha̱xme̱xmaãtama pexca̱x chanaxümatü i nhaã chorü moxẽ. Rü ngẽmaãcü nixĩ i chaugü nagu chawüégaxü̃ i guxü̃ma i chorü popera. Rü ngẽmaãcü nixĩ i chanaxümatüxü̃.
18 Rü chanaxwa̱xe i tórü Cori ja Ngechuchu ja Cristu poraãcü pexü̃ narüngü̃xẽẽ i guxãma i pemax.
Rü nuãma pexna,
Pauru
