2 Timúteu 2:1-26
2 Rü nhu̱xma, Pa Chaune, Pa Timúteux, ¡rü cugü naporaxẽẽ namaã i ngẽma pora i Ngechuchu ja Cristu cuxna ãxü̃!
2 Jema ore ga chauxü̃tawa nüxü̃ cuxĩnüxü̃ ga jexguma muxü̃ma ga duü̃xü̃güpe̱xewa nüxü̃ chixuxgu, rü chanaxwa̱xe i nhu̱xma cuxi ngẽma oremaã cunangúexẽẽ i togü i jatügü i meã naãẽxü̃ cua̱xgüxü̃ na nüxĩ togüxü̃ nangúexẽẽxü̃ca̱x namaã i ngẽma ore.
3 Rü tama name i naxca̱x cumuü̃ na Ngechuchu ja Cristuarü oregagu ngúxü̃ cuingexü̃. Notürü cunaxwa̱xe i namaã cupora nhama wüxi i mexü̃ i norü churararüü̃.
4 Rü wüxi i duü̃xü̃ i churarawa ngẽxmaxü̃, rü taxucürüwama to i puracü i tama churaraarü ixĩxü̃gu narüxĩnü. Notürü ngẽma norü ãẽ̱xgacü nagu namuxü̃ i puracügu nixĩ i naxĩnüxü̃ na ngẽmaãcü norü ãẽ̱xgacüxü̃ nataãẽxẽẽxü̃ca̱x.
5 Rü ngẽxgumarüü̃ ta wüxi i duü̃xü̃ i wüxi i cuxgütaexü̃wa nügü ingucuchixẽẽxü̃, rü taxuacüma nanajaxu i norü ãmare ega chixri nacuxgütaegu rü tama ngẽma cuxgütaearü ãẽ̱xgacüga naxĩnügu.
6 Rü texé ja naãnewa puracüxe rü name nixĩ i tüxira tanajaxu i tümanetüarü o.
7 ¡Rü guxü̃guma nagu rüxĩnü i nhaã ore i cumaã nüxü̃ chixuxü̃! Rü nüma ja Cori ja Ngechuchu tá cumaã inananguxü̃xẽẽ i guxü̃ma na nüma nanaxwa̱xexü̃ãcüma cunaxüxü̃ca̱x i ngẽma puracü.
8 ¡Rü nüxna nacua̱xãchi ja Ngechuchu ja Cristu ja Dawítanüxü̃ ga guma juwa írüdacü! Rü jimachiga nixĩ i ngẽma ore i mexü̃ i duü̃xü̃gümaã nüxü̃ chixuxü̃.
9 Rü ngẽma oregagu nixĩ i ngúxü̃ na chingexü̃ rü nhama wüxi i máẽtaxü̃rüü̃ núma pocupataü̃wa curẽtimaã chichotaxü̃. Notürü Tupanaãrü ore i mexü̃, rü guxü̃wama nanguama rü taxucürüwama texé tajachota.
10 Rü ngẽmaca̱x jaxna namaã chaxĩnü i ngẽma ngúxü̃ i chingexü̃ naxca̱x i ngẽma duü̃xü̃gü i Tupana idexechixü̃. Erü chanaxwa̱xe i nümagü rü ta Ngechuchu ja Cristuaxü̃́ najaxõgü, rü ngẽmaãcü na najauxgüãxü̃ca̱x i maxü̃ i mexü̃ i taguma gúxü̃.
11 Rü pemaã nüxü̃ chixuxchaü̃ i wüxi i ore i aixcuma ixĩxü̃. Rü ngẽxguma Cristu juxü̃rüü̃ norü oreca̱x ijuegu, rü naxrüü̃ tá ta wena tamaxẽ na nüma ínangẽxmaxü̃wa ingẽxmagüxü̃ca̱x.
12 Rü ngẽxguma nhama i naãnewa jaxna namaã ixĩnüẽgu ega ngúxü̃ ingexgu, rü dauxü̃guxü̃ i naãnewa rü wüxigu namaã ãẽ̱xgacü tá tixĩgü. Rü ngẽxguma tama Cristuxü̃ icuáxchaü̃gu i nhama i naãnewa, rü nüma rü tãũxü̃táma tüxü̃ nacuáxchaü̃ i dauxü̃guxü̃ i naãnewa.
13 Notürü woo nhuxguacü i jixema rü tama aixcuma naxü̱xgu i ngẽma Tupanamaã ixunetaxü̃, notürü nüma ja Tupana rü guxü̃guma najanguxẽẽ i ngẽma tamaã inaxunetaxü̃, erü taxuacüma nügütama nawomüxẽẽ.
Wüxi i mexü̃ i puracütanüxü̃ i Tupana namaã taãẽxü̃chiga
14 Rü ngẽma jaxõgüxü̃ i cuxü̃tawa ngẽxmagüxü̃, rü name nixĩ i Tupanaẽ́gagu nüxna nüxü̃ cucua̱xãchixẽẽ na tama nuxcümaxü̃güxü̃ i ore i taxuwama mexü̃ca̱x nügümaã na japoragatanücüüxü̃ca̱x. Erü ngẽma rü wüxi i chixexü̃ nixĩ, rü nanachixeãẽxẽẽ i ngẽma duü̃xü̃gü i nüxü̃ ĩnüẽxü̃.
15 ¡Rü cugü naporaxẽẽ na meã cunaxüxü̃ca̱x i Tupanaãrü puracü na nüma cumaã nataãẽxü̃ca̱x i ngẽxguma nape̱xewa cunguxgux! Erü tama cunaxwa̱xe i ṯacüca̱x nüxü̃ cuxãne i ngẽxguma nüma cuxna nacaxgu i curü puracüchiga. ¡Rü ngẽmaca̱x cunaxwa̱xe i aixcuma meã namaã cungúexẽẽtae i ngẽma ore i mexü̃ i aixcuma ixĩxü̃!
16 ¡Rü nüxü̃ rüxo i nhama i naãnecü̱̃ã̱xãrü dexagümare i taxuwama mexü̃! Erü ngẽma duü̃xü̃gü i ngẽma dexagümaregu ĩxü̃, rü guxü̃guma jexeraãcü chixexü̃gu naji.
17 Rü ngẽma norü ngu̱xẽẽtae i ngẽma duü̃xü̃gü, rü nhama wüxi i ḏaaweane i tüxü̃ íjimachixẽẽxü̃rüü̃ nixĩ. Rü jema nixĩ ga nüxü̃ ngupetüxü̃ ga Imenéu rü Firetu.
18 Jerü nidoragümare ga nüxü̃ na jaxugüexü̃ rü marü na nangupetüxü̃ i juetaarü dachiga. Rü jemaãcü nanawomüxẽẽgü ga nhuxre ga duü̃xü̃gü na tama noxrirüü̃ jaxõgüãxü̃ca̱x i Tupanaãrü ore.
19 Notürü Tupanaãrü ore rü taguma inajarüxo rü taguma naxüchicüü. Rü ngẽma norü orewa rü nhanagürü:“Tórü Cori ja Tupana nüxü̃ nacua̱x i texé tixĩ ja norü duü̃xü̃gü ixĩgüxe. Rü guxãma ja jíxema nüxü̃ ixuxe na Ngechuchu ja Cristu rü tümaãrü Cori jiĩxü̃, rü name nixĩ i nüxna tixĩgachi i guxü̃ma i chixexü̃”,
nhanagürü i ngẽma norü orewa.
20 Wüxi i duü̃xü̃ i dĩẽruã̱xü̃chixü̃ rü napatawa nangẽxma i poratu i uirunaxca̱x rü dĩẽrumünaxca̱x. Rü nangẽxma ta i poratu i naĩnaxca̱x rü waixü̃münaxca̱x. Rü ngẽma poratu i uirunaxca̱x rü dĩẽrumünaxca̱x rü mexü̃ i norü õnaca̱x nixĩ. Notürü ngẽma poratu i naĩnaxca̱x rü waixü̃münaxca̱x rü guxchirechixü̃ nixĩ.
21 Rü ngẽxguma wüxi i jaxõxü̃ naxwa̱xegu na aixcuma mexü̃ i Tupanaãrü puracütanüxü̃ na jiĩxü̃, rü name nixĩ i nüxna nixũgachi i guxü̃ma i chixexü̃. Rü ngẽxguma tá nixĩ i Tupanape̱xewa aixcuma naxüünexü̃ na naxüãxü̃ca̱x i nagúxü̃raü̃xü̃ i puracü i Tupana namaã nüxü̃ ixuxü̃.
22 ¡Nüxü̃ rüxo i guxü̃ma i ngẽma chixexü̃ i ngextü̱xücügü nagu rüxĩnüẽxü̃! ¡Rü meã Tupanape̱xewa namaxü̃ rü aixcuma nüxü̃́ jaxõ! ¡Rü nüxü̃ nangechaü̃ i guxü̃ma i duü̃xü̃gü, rü tãṹ i namaã cunuxü̃! Rü ngẽmaãcü chanaxwa̱xe i cumaxü̃ wüxigu namaã i guxü̃ma i ngẽma duü̃xü̃gü i ngearü pecaduã̱xãcüma Tupanamaã jumuxẽgüxü̃.
23 Rü tama name i icurüxĩnü i ngẽma dexagü i taxuwama mexü̃. Erü ngẽma dexagügagu rü düxwa nügüchi naxaie i duü̃xü̃gü.
24 Rü wüxi i Tupanaãrü puracütanüxü̃ rü tama name na namücüchi naxaixü̃. Notürü name nixĩ i guxü̃ma i duü̃xü̃gümaã namecüma. Rü nanaxwa̱xe i jaxna namaã naxĩnüãcüma meã duü̃xü̃güxü̃ nangúexẽẽ i Tupanaãrü ore.
25 2:25-26 Rü wüxi i Tupanaãrü puracütanüxü̃ rü nanaxwa̱xe i jaxna namaã naxĩnüãcüma meã najaxucu̱xẽ i ngẽma duü̃xü̃gü i tama irüxĩnüẽchaü̃xü̃. Rü nanaxwa̱xe i ngẽmaãcü ínanaṉg̱uxẽẽ na Tupana nüxü̃ rüngü̃xẽẽxü̃ i ngẽma duü̃xü̃gü na nüxü̃ naxoexü̃ca̱x i norü chixexü̃ rü nüxü̃ nacua̱xgüxü̃ca̱x i ngẽma ore i aixcuma ixĩxü̃. Erü Tupana nanaxwa̱xe na naxuãẽgüxü̃ i ngẽma duü̃xü̃gü rü nawa ínanguxü̃xü̃ i ngẽma chixexü̃ i ṉg̱oxo i Chataná nagu najixẽẽxü̃ na noxrütama ngúchaü̃ namaã naxüxü̃ca̱x.
26 Nüü̃ nadau 2:25
