2 Timúteu 3:1-17
3 Rü chanaxwa̱xe i nüxü̃ cucua̱x rü ngẽxguma nagúxchaü̃gu i naãne rü tá nangẽxma i ãũcümaxü̃gü rü guxchaxü̃gü naxca̱x i duü̃xü̃gü.
2 Rü duü̃xü̃gü tá nügüguxicatama narüxĩnüẽ, rü norü dĩẽruguama tá narüxĩnüẽ, rü tá nügü ínarütagü, rü ngẽmaãcü tãũxü̃táma nüxü̃ nacua̱xgüchaü̃ i togü i duü̃xü̃gü i tama naxrüü̃ taarü dĩẽruã̱xgüxü̃. Rü chixri Tupanachiga tá nidexagü, rü tãũxü̃táma nanatüga rü naẽga naxĩnüẽchaü̃. Rü tãũxü̃táma moxẽ inaxã i ngẽxguma Tupana nüxü̃ rüngü̃xẽẽgu, rü ngẽmaãcü tãũxü̃táma nüxü̃ nacua̱xgüchaü̃ i Tupanaãrü ore.
3 Rü tãũxü̃táma nagu narüxĩnüẽ i togü i duü̃xü̃güxü̃ na nangechaü̃güxü̃, rü tãũxü̃táma nüxü̃́ nangechaü̃tümüü̃gü. Rü tá naxoregüta̱a̱xgü, rü tãũxü̃táma nügü naporaexẽẽ na jaxna namaã naxĩnüẽxü̃ca̱x i naxü̃neãrü ngúchaü̃gü. Rü tá nichixecüma, rü tá nachi naxaie i guxü̃ma i ṯacü i mexü̃.
4 Rü duü̃xü̃güechitawa̱xegüxü̃ tá nixĩgü, rü nuẽwa̱xexü̃ tá nixĩgü, rü nügü icua̱xüü̃güxü̃ tá nixĩgü. Rü tá norü ngúchaü̃ca̱xama nadaugü, rü tãũxü̃táma Tupanaxü̃ nacua̱xgüchaü̃.
5 Rü tá nügü najaxõgüxü̃chinetaxẽẽ notürü ngẽma norü chixexü̃ i naxügüxü̃wa tá nango̱xoma na tama aixcuma jaxõgüãxü̃ i ngẽma ore i mexü̃. Rü ngẽma duü̃xü̃gü i ngẽmaãcü maxẽxü̃, rü tama name i namaã cuxãmücü rü natanügu cuxã.
6 3:6-7 Erü ngẽma duü̃xü̃gütanüwa nangẽxmagü i nümaxü̃ i duü̃xü̃gü i ĩpatagu ichocuetanüxü̃. Rü norü ngu̱xẽẽtaemaã najawomüxẽẽgü i ngẽma ngexü̃gü i ngẽ́ma ngẽxmagüxü̃ i tama naãẽxü̃ icuáxü̃ rü ipecaduã̱xgüxü̃. Rü ngẽma ngexü̃gü, rü norü ngúchaü̃gütama rü chixexü̃wa nanagagü, rü ngẽmaca̱x woo guxü̃guma nangúegü notürü taguma aixcuma nüxü̃ nacua̱xgü i ngẽma ore i aixcuma ixĩxü̃.
7 Nüü̃ nadau 3:6
8 Rü ngẽma duü̃xü̃gü i chixexü̃maã ngu̱xẽẽtaegüxü̃, rü chixexü̃guxicatama narüxĩnüẽ, rü tama aixcuma najaxõgü i Tupanaãrü ore. Rü nachi naxaie i ngẽma ore i aixcuma ixĩxü̃, naxrüü̃ ga jema juüxü̃gü ga Jane rü Jãbre ga tama Muĩséga ĩnüẽchaü̃xü̃.
9 Notürü ngẽma togü i duü̃xü̃gü rü tãũxü̃táma poraãcü nüxü̃́ najaxõgü i ngẽma chixexü̃maã ngu̱xẽẽtaegüxü̃. Erü guxü̃wama i duü̃xü̃gü rü tá nüxü̃ nicua̱xãchitanü na ngẽãẽgümarexü̃ jixĩgüxü̃ jema taxre ga tama Muĩséga ĩnüẽchaü̃xü̃rüü̃.
Pauru rü inajacua̱xẽẽ na Timúteuna naxãgaxü̃
10 3:10-11 Notürü cumax, Pa Timúteux, marü nüxü̃ cucua̱x ga nhuxãcü meã na chanangúexẽẽxü̃ ga duü̃xü̃gü, rü nhuxãcü meã chamaxü̃xü̃, rü nhuxãcü nagu charüxĩnüxü̃, rü nhuxãcü meã chajaxõxü̃, rü nhuxãcü nüxü̃ changechaü̃xü̃ rü jaxna namaã chaxĩnüxü̃ ga duü̃xü̃gü, rü nhuxãcü nüxü̃ chixuamaxü̃ ga Tupanaãrü ore woo duü̃xü̃gü choxü̃ ima̱xgüchaü̃gu rü ngúxü̃ chingexgu. Rü nüxü̃ cucua̱x ga ṯacü choxü̃ na üpetüxü̃ ga Ãtioquíawa rü Icúniũwa rü Ristawa, rü nhuxãcü choxü̃ na jama̱xgüchaü̃xü̃ ga duü̃xü̃gü rü ngúxü̃ chingexü̃. Notürü tórü Cori ja Tupana choxü̃ narüngü̃xẽẽ na tama choxü̃ jama̱xgüxü̃chixü̃ca̱x.
11 Nüü̃ nadau 3:10
12 Rü aixcuma cumaã nüxü̃ chixu rü guxãma ja jíxema naxwa̱xegüe na Ngechuchu ja Cristuca̱x tamaxẽxü̃, rü togü tá tümachi naxaie rü chixri tá tümamaã nachopetü.
13 Notürü ngẽma duü̃xü̃gü i chixecümagüxü̃ rü ngẽma duü̃xü̃gü i idorata̱a̱xgüxü̃ rü jexeraxü̃ i chixexü̃gu tá naji. Erü Chataná marü najawomüxẽẽgü, rü ngẽmaca̱x nüxĩ togüxü̃ nawomüxẽẽgü.
14 Notürü i cuma rü name nixĩ i guxü̃guma meã nagu cuixũ i guxü̃ma i ngẽma ore i marü cungúxü̃. Erü cumatama rü nüxü̃ cucua̱x na aixcuma jiĩxü̃ i ngẽma ore, rü nüxü̃ cucua̱x na texégü tixĩgüxü̃ ga guxema namaã cuxü̃ ngu̱xẽẽgüxe.
15 Rü cuma nüxü̃ cucua̱x rü cubuxgumamatama nawa cungu̱x i ngẽma Tupanaãrü ore i üünexü̃. Rü ngẽmawa cunajaxu i cua̱x na nüxü̃ cucuáxü̃ca̱x i nhuxãcü tüxü̃́ na nangẽxmaxü̃ i maxü̃ i taguma gúxü̃ ega Ngechuchu ja Cristuaxü̃́ jaxõgügu.
16 Rü guxü̃ma i Tupanaãrü ore i ümatüxü̃ rü nügüãẽwatama nanajaxu ga Tupana. Rü ngẽma ore rü name na duü̃xü̃güxü̃ namaã ingúexẽẽxü̃, rü namaã jaxucu̱xẽgüxü̃ rü namaã ijanawe̱xãchixẽẽgüxü̃, rü namaã nangúexẽẽxü̃ na meã Tupanape̱xewa namaxẽxü̃ca̱x.
17 Rü ngẽmaãcü i ngẽma ore rü tüxü̃ narüngü̃xẽẽ ja jíxema Tupanaãrü ixĩxẽ, na meã nüxü̃ tacuáxü̃ca̱x i ngẽma Tupana naxwa̱xexü̃ rü ítamemarexü̃ na tanaxüxü̃ca̱x i nagúxü̃raü̃xü̃ i puracü i Tupana tümamaã nüxü̃ ixuxü̃.
