2 Timúteu 4:1-22
4 4:1-2 Rü nüma ja Ngechuchu ja Cristu ja núma tá ũcü na nüxü̃ jacagüxü̃ca̱x i ngẽma duü̃xü̃gü i maxẽxü̃ rü ngẽma marü juechiréxü̃, rü jimape̱xewa rü Tupanape̱xewa cuxü̃ chamu na nüxü̃ cuixuxü̃ca̱x i ngẽma ore i mexü̃. Rü ngẽxguma cuxü̃́ jatauxchaãchigu rü woo cuxü̃́ naguxchagu, rü chanaxwa̱xe i nüxü̃ cuixuama i ngẽma ore. Rü ngẽmaãcü chanaxwa̱xe na icujanawe̱xãchixẽẽgüxü̃ rü meã cujaxucu̱xẽgüxü̃ rü nüxü̃́ cunangúchaü̃xẽẽxü̃ i duü̃xü̃gü. Rü name nixĩ i jaxna namaã cuxĩnüãcüma meã cunangúexẽẽ.
2 Nüü̃ nadau 4:1
3 Erü jixcüra i duü̃xü̃gü rü tãũxü̃táma nüxü̃ naxĩnüẽchaü̃ i ngẽma ngu̱xẽẽtae i mexü̃. Erü ngẽma duü̃xü̃gü rü nichixecüma. Rü ngẽmaca̱x naxca̱x nadaugü i norü ngúexẽẽruü̃gü i nüma nanaxwa̱xegüxü̃ãcüma nangúexẽẽxü̃.
4 Rü tãũxü̃táma nüxü̃ naxĩnüẽchaü̃ i Tupanaãrü ore i aixcuma ixĩxü̃. Erü nüxü̃́ najaxõgü i ngẽma ore i doramare ixĩxü̃ rü ngẽmaguama narüxĩnüẽ.
5 ¡Notürü cuma rü meã cugüna nadau, rü ínaxuãẽ, rü namaã napora ega ngúxü̃ cuxü̃ üpetügu! ¡Rü nüxü̃ ixuama i ore i mexü̃ i tüxü̃ maxẽxẽẽxü̃, rü meã janguxẽẽ i ngẽma puracü i Tupana cuxna ãxü̃!
6 Tãũxü̃táma muxü̃ i ngunexü̃ nhama i naãnewa changẽxma erü marü choxü̃ ningaica na Tupanaãrü puracü chaxüxü̃gagu chajuxü̃ rü choxü̃ na jama̱xgüxü̃ i duü̃xü̃gü.
7 Rü chama rü marü guxü̃wama nüxü̃ chixuchigü rü íchajapoxü̃chigü ga Tupanaãrü ore i mexü̃ ga woo jemaca̱x duü̃xü̃gü chauchi na aiexü̃. Rü guxü̃guma aixcuma Tupanaca̱x chamaxãma rü nüxü̃́ chajaxõõma. Rü nhu̱xma rü marü nawa nangu na chajuxü̃.
8 Rü nhu̱xma rü marü Tupana choxü̃́ namaã nanguxü̃ i ngẽma ãmare i mexẽchixü̃ ja tórü Cori ja Ngechuchu ja ãẽ̱xgacü ja mecü tá choxna ãxü̃ i ngẽxguma wenaxãrü nhama i naãnewa naxũxgu. Rü tãũxü̃táma chaxica choxna nanaxã i ngẽma ãmare, notürü tá tüxna nanaxã ja guxãma ja jíxema tümaãrü ngúchaü̃maã ínaṉg̱uxẽẽgüxe na wenaxãrü núma naxũxü̃.
Timúteuxü̃ naxucu̱xẽ ga Pauru
9 Cumaã nüxü̃ chixu rü chanaxwa̱xe i paxa nuã cuxũ, rü choxü̃ ícujadau.
10 Dema rü nhama i naãneãrü ngẽmaxü̃gu naxĩnüxü̃gagu choxna nixũ rü ĩãne ga Techarónicawa naxũ. Rü Cresẽte rü Gárataanewa naxũ, rü Titu i Darmáchiaanewa.
11 Rü Lucaxicatama nixĩ i nhu̱xma chauxü̃tawa ngẽxmaxü̃. Rü chanaxwa̱xe i naxca̱x cudau i Marcu na nuã cunagaxü̃ca̱x. Erü nüma rü chauxca̱x name na choxü̃ na nangü̃xẽẽxü̃ i nhaã puracüwa.
12 Rü Tíquicu rü ĩãne i Epéchiuwa chanamu.
13 ¡Ngẽxguma nuã cuxũxgu rü nuã nange i chorü dejuxü̃chiru ga ĩãne i Truádewa ngẽxmaxü̃ ga Cárpupatawa chatáxü̃! Rü chanaxwa̱xe i nuã cunana i chorü poperagü. Rü guxü̃ãrü jexera chanaxwa̱xe i nuã cunana i ngẽma chorü poperagü i idixgüpǘtaxü̃.
14 Alejã́dru i cobrenaxca̱x i buetarearü üwa puracüxü̃ rü poraãcü chixri chamaã naxüpetü. Notürü Tupana nüxü̃ nacua̱x i nhuxãcü tá na napocuãxü̃ naxca̱x ga jema chixexü̃ ga chamaã naxüxü̃.
15 ¡Meã cugüna nadau na tama chixexü̃ cumaã naxüxü̃ca̱x! Erü poraãcüxü̃chima nachi naxai i Tupanaãrü ore i mexü̃.
16 Jexguma noxrixü̃chima ãẽ̱xgacügüpe̱xewa chaugüétüwa chidexagu rü taxúema choxü̃ tarüngü̃xẽẽ. Guxü̃ma choxna nibuxmü. Notürü tama chanaxwa̱xe i Tupana nagu narüxĩnü i ngẽma.
17 Notürü tórü Cori choxü̃ naporaxẽẽ rü choxü̃ narüngü̃xẽẽ na choxü̃́ natauxchaxü̃ca̱x na nüxü̃ chixuxü̃ca̱x ga norü ore i mexü̃ i tüxü̃ maxẽxẽẽxü̃. Rü jemaãcü guxü̃ma ga jema duü̃xü̃gü ga tama jaxõgüxü̃ ga jéma jexmagüxü̃ rü nüxü̃ naxĩnüẽ ga jema ore. Rü jemaãcü tórü Cori ja Ngechuchu choxü̃ ínanguxuchixẽẽ ga jexguma taxü̃ ga ãũcümaxü̃wa chajexmagu.
18 Rü nüma ja tórü Cori tá choxü̃ ínanguxuchixẽẽ nawa i guxü̃ma i chixexü̃gü. Rü tá choxna nadau na ngextá ãẽ̱xgacü íjiĩxü̃wa choxü̃ nagaxü̃ca̱x. Rü tanaxwa̱xe i guxü̃guma nüxü̃ ticua̱xüü̃gü. Rü ngẽmaãcü jiĩxü̃.
Pauru rü wenaxãrü Timúteuxü̃ narümoxẽ rü naxca̱x ínaca na Cori ja Ngechuchu ja Cristu nüxü̃ rüngü̃xẽẽxü̃
19 Chanaxwa̱xe i chauégagu nüxü̃ curümoxẽ i Prichira, rü Aquiru, rü Onechéperutanüxü̃gü.
20 Erastu rü ĩãne i Corĩ́tiugu narüxã̱ũ̱x. Rü Trófimu rü iḏaawexü̃ma ĩãne i Miretuwa chanata̱x.
21 Rü naxü̃pa i gáuanexü̃ rü chanaxwa̱xe i nuã cuxũ. Rü cuxü̃ narümoxẽgü i Eúburu, rü Prudẽti, rü Rinu, rü Cráudia, rü guxü̃ma i taeneẽgü i jaxõgüxü̃.
22 Rü chanaxwa̱xe i tórü Cori ja Ngechuchu ja Cristu cumaã nangẽxma, rü Tupana pexü̃ narüngü̃xẽẽ ja guxãma i pemax.
Rü nuãma pexna,
Pauru
