2 Pedru 3:1-18
3 Pa Chaueneẽgü ja Pexü̃ Changechaü̃güxex, nhaã nixĩ i ngẽma norü taxre i popera i pexca̱x chaxümatüxü̃. Rü jema nüxĩraü̃xü̃ ga poperawa pemaã nüxü̃ chixuxü̃rüü̃, rü wena pexü̃ chixucu̱xẽgü rü pexna nüxü̃ chacua̱xãchixẽẽ na aixcuma meã Tupanaãrü oregu perüxĩnüẽxü̃ca̱x.
2 Rü chanaxwa̱xe i nüxna pecua̱xãchie i ngẽma ore ga nuxcümaxü̃güxü̃ ga Tupanaãrü orearü uruü̃gü ga ixüünexü̃ nüxü̃ ixugügüxü̃. Rü ngẽxgumarüü̃ ta chanaxwa̱xe i nüxna pecua̱xãchie i ngẽma tórü Cori ja Ngechuchu ja tórü Maxẽxẽẽruü̃ãrü mugü ga pexü̃ nangúexẽẽxü̃ ga norü orearü uruü̃gü ga nüma pexü̃tawa namugüxü̃.
3 3:3-4 Notürü chanaxwa̱xe i guxü̃ãrü jexera nagu perüxĩnüẽ i nhaã ore i pemaã tá nüxü̃ chixuxü̃. Rü dücax, rü ngẽxguma nagúxchaü̃gu i nhama i naãne, rü tá ínangugü i duü̃xü̃gü i chixexü̃ i nagu ĩxü̃ i naxü̃neãrü ngúchaü̃gü. Rü nümagü rü tá nacugüeãcüma nhanagürügü:“Dücax, Cristu inaxuneta na wena núma naxũẽ́gaxü̃. ¿Rü ṯacü namaã nangupetü i nhu̱xma na tama ínanguxü̃? Rü marü düxwa najue ga tórü o̱xigü ga jaxõgüxü̃, notürü noxri naãne ü̱xgumama rü nanangẽxgumaraü̃ẽchatama i guxü̃ma”, nhanagürügü tá.
4 Nüü̃ nadau 3:3
5 3:5-6 Notürü ngẽma duü̃xü̃gü i ngẽmaãcü idexagüxü̃ rü tama nüxü̃ nacua̱xgüchaü̃ ga jema ngupetüxü̃ ga jexguma Tupana nhama ga naãnewa namuãgu ga guma mucü ga tacü ga ijanaxoxẽẽcü ga guxü̃ma ga ṯacü ga nhama ga naãnewa jexmaxü̃. Rü nuxcümaxü̃chima naxü̃pa ga guma mucü rü woetama najexma ga nhama ga naãne rü guxü̃ma i dauxü̃wa nüxü̃ idauxü̃ ga Tupana ngo̱xẽẽxü̃ ga jexguma namuãgu na nangóxü̃ca̱x. Rü jemaãcü dexáchiüwa nango̱x ga nhama ga naãne rü dexáarü ngãxü̃tüchiüwa najexma, jerü jemaãcü nanamu ga Tupana.
6 Nüü̃ nadau 3:5
7 Notürü ngẽma nhu̱xma ngẽxmaxü̃ i dauxü̃wa nüxü̃ idauxü̃ rü nhama i naãne rü Tupana namaã nanguxü̃ na jixcama üxüwa jaxaxü̃ca̱x, jerü jemaãcü namaã nanaxuegu. Rü ngẽma nhama i naãne rü ngẽma dauxü̃wa nüxü̃ idauxü̃, rü jima üxü ja Tupana nüxü̃ ixuxü̃newa tá nixĩ i aixcuma ínaguãxü̃ i ngẽma ngunexü̃ i nagu naxunetaxü̃gu na napocueãxü̃ rü chixexü̃wa nawogüãxü̃ i ngẽma duü̃xü̃gü i tama naga ĩnüẽchaü̃xü̃.
8 Rü nhu̱xmax, Pa Chaueneẽgü ja Pexü̃ Changechaü̃güxex, tama chanaxwa̱xe i nüxü̃ ipejarüngümaẽ na wüxitama i ngunexü̃ rü tórü Corica̱x rü 1000 ja taunecürüü̃ jiĩxü̃. Rü ngẽxgumarüü̃ ta, 1000 ja taunecü rü tórü Corica̱x rü wüxitama i ngunexü̃rüü̃ jiĩxü̃.
9 Rü nhuxre i duü̃xü̃gü rü nagu narüxĩnüẽ na tãũxü̃táma paxa ínanguxü̃ ja tórü Cori jema tamaã inaxunetaxü̃rüü̃. Notürü nüma ja tórü Cori rü tama nanuxcüãẽ na janguxẽẽãxü̃ i ngẽma norü uneta, notürü nüma rü tamaã jaxna naxĩnümare. Erü nüma rü tama nanaxwa̱xe na texé ijarütaxuxü̃, notürü nanaxwa̱xe na guxãma nüxü̃ rüxoexü̃ i tümacüma i chixexü̃.
10 Notürü ngẽma ngunexü̃ i tórü Cori nagu ínguxü̃, rü taxúema nagu ínanguxẽẽxü̃gu tá nixĩ. Erü ngürüãchimare tá ínangu nhama wüxi i ngĩ́ta̱xáxü̃ ínguxü̃rüü̃. Rü nhu̱xmachi guxü̃ma i ṯacü i dauxü̃guxü̃ i naãnewa ngẽxmagüxü̃ rü tá tagaãcü niwã̱ĩ̱xgü rü ngẽmaãcü tá inajarütauxe. Rü jima üa̱xcü rü tawemacü rü woramacurigü rü ẽxtagü rü tá nixae rü ngẽxma tá najarüxogü. Rü ngẽxgumarüü̃ tá ta i nhama i naãne rü tá nixa namaã i guxü̃ma i ṯacü i nawa ngẽxmagüxü̃.
11 Rü nhu̱xma na ngẽmaãcü tá namaã nangupetüxü̃ i guxü̃ma i ṯacü i ngẽxmaxü̃, rü jexeraãcü penaxwa̱xe na aixcuma Tupanape̱xewa peixüünexü̃ rü nüma nanaxwa̱xexü̃ãcüma na pemaxẽxü̃.
12 Rü name nixĩ i meã ípenaṉg̱uxẽẽ i ngẽma ngunexü̃ i nagu tá ínanguxü̃ ja tórü Cori ja Tupana. ¡Rü paxa guxü̃wama nüxü̃ peixu i norü ore rü aixcuma naxca̱x pemaxẽ na ngẽmaãcü ípenaṉg̱uxẽẽxü̃ca̱x! Rü ngẽma ngunexü̃gu rü guxü̃ma i dauxü̃wa nüxü̃ idauxü̃ rü tá nixa rü tá inachaxichigü. Rü nhama i naãne rü üa̱xcü rü tawemacü rü ẽxtagü rü jima üxümaã tá inachaxichigü.
13 Notürü jixema na jaxõgüxü̃ rü ítanaṉg̱uxẽẽ i ngẽma ngexwacaxü̃xü̃ i dauxü̃guxü̃ i naãne rü ngexwacaxü̃xü̃ i nhama i naãne ga Tupana tamaã ixunetaxü̃. Rü ngẽ́ma rü guxü̃táma name, rü jixema rü tá ta aixcuma time.
14 Rü ngẽmaca̱x, Pa Chaueneẽgü ja Pexü̃ Changechaü̃güxex, rü nhu̱xma na ípenaṉg̱uxẽẽxü̃ i ngẽma, rü name nixĩ i aixcuma meã pemaxẽ rü aixcuma pegü pengechaü̃gü na taxuwama nachixexü̃ca̱x i perü maxü̃ rü aixcuma petaãẽgüxü̃ca̱x i ngẽxguma wena núma naxũxgu.
15 Rü name nixĩ i nüxna pecua̱xãchie na jaxna tamaã naxĩnüxü̃ ja tórü Cori, erü nanaxwa̱xe na tüxü̃́ nangẽxmaxü̃ i tórü maxü̃ i taguma gúxü̃. Rü ngẽmatama pexca̱x chanaxümatüxü̃rüü̃ ta nixĩ ga pexca̱x naxümatüãxü̃ ga taeneẽ ja nüxü̃ ingechaü̃gücü ja Pauru ga jexguma Tupana naporaxẽẽãcüma pexca̱x naxümatüãgu.
16 Rü guxü̃ma ga norü poperawa rü nhaã pexca̱x chaxümatüxü̃chiga nanaxümatü ga Pauru. Notürü jema pexca̱x naxümatüxü̃wa rü nangẽxma i nhuxre i ore i guxchaxü̃ na nüxü̃ icuáxü̃ na ṯacüchiga jiĩxü̃. Rü ngẽma duü̃xü̃gü i tama aixcuma Tupanaxü̃ cua̱xgüxü̃ rü tama aixcuma jaxõgüxü̃, rü nanaxüchicüügü i ngẽma ore ngẽxgumarüü̃ na guxü̃ma i Tupanaãrü ore i ümatüxü̃ naxüchicüügüxü̃rüü̃. Notürü ngẽma chixexü̃ na naxügüxü̃gagu rü nügü tátama inajarütauxexẽẽ.
17 Rü ngẽmaca̱x, Pa Chaueneẽgü ja Pexü̃ Changechaü̃güxex, rü nhu̱xma na nüxü̃ pecuáxü̃ i ṯacü tá na ngupetüxü̃, rü name nixĩ i pexuãẽgü na tama pexü̃ nawomüxẽẽgüxü̃ca̱x i ngẽma chixexü̃ i duü̃xü̃gü rü tama nüxü̃ perüxoexü̃ca̱x na meã pejaxõgüxü̃.
18 Rü ngẽmaca̱x, Pa Chaueneẽgüx, penaxwa̱xe na pegü peporaexẽẽxü̃ na wüxichigü i ngunexü̃ jexeraãcü tórü Cori ja Ngechuchu ja Cristu ja tórü Maxẽxẽẽruü̃xü̃ pecuáxü̃ca̱x rü jexeraãcü nüxü̃ peicuáetanüxü̃ca̱x na nhuxãcü aixcuma pexü̃ nangechaü̃xü̃. ¡Rü ngẽmaca̱x rü guxü̃gutáma rü ngĩxã nüxü̃ ticua̱xüü̃gü! Rü ngẽmaãcü jiĩxü̃.
Rü nuãma pexna,
Pedru
