2 Reis 11:1-21
11 Rü yexguma ngĩma ga Ataría ga Acachía naé nüxü̃ cua̱xgu ga ngĩne rü marü nax nayuxü̃, rü duü̃xü̃güxü̃ imu nax nadaiaxü̃ca̱x ga guxü̃ma ga Acachíaxacügü.
2 Notürü ga Yochába ga ãẽ̱xgacü ga Yoráü̃acü ga Acachíaeya̱x rü wüxi ga ucapugu Ataríacha̱xwa iyacu̱x ga Yoá ga Acachía nane norü daruü̃maxã. Rü yemaacü tama nayama̱xgü.
3 Rü ngĩma ga Yoáarü daruxü̃ rü 6 ga taunecü Tupanapatagu namaxã iyacu̱x. Rü yexgumayane ga Ataría rü Iraéuanewa ãẽ̱xgacü iyixĩ.
4 Rü yexguma marü 7 ga taunecü ngĩxü̃́ inguxgu ga ãẽ̱xgacü nax yixĩxü̃ ga Ataría, rü nüma ga chacherdóte ga Yoiáda rü naxca̱x nangema ga yema churaragüerugü ga ãẽ̱xgacüpatamaxã icua̱xgüxü̃ rü yema capitáü̃gü ga ãẽ̱xgacüna daugüxü̃, rü Cori ya Tupanapatagu nanamucu ga yema nüma ínayexmaxü̃wa. Rü yéma Tupanaégagu yema churaragümaxã inaxüga nax tama nüxü̃ yaxugüexü̃ca̱x nax namaxü̱̃xü̃ ga Acachía nane ga Yoá. Rü yemawena rü Yoáxü̃ nango̱xẽxẽ nax nüxü̃ nadaugüxü̃ca̱x.
5 Rü nhu̱xũchi nayaxugücu̱xẽ rü nhanagürü nüxü̃: —Nhaãcü tá nixĩ i pedauxü̃taegüxü̃. Rü ngẽxguma wüxichigü i yüxügu ãẽ̱xgacüpataarü dauwa pichocu̱xgux rü wüxitücumü i pema rü tá ngẽma ĩã̱x i ãẽ̱xgacüpatape̱xewa ngẽxmaxü̃na pedaugü.
6 Rü ngẽma toxchimüxü̃ rü ngẽma ĩã̱x i Chúgu ãégaxü̃wa tá nadauxü̃taegü. Rü ngẽma perü tamaepü̱xchimüxü̃ rü ãẽ̱xgacüpataca̱xwena üxü̃ i ĩã̱xwa tá nadauxü̃taegü. Rü ngẽmaãcü tá nixĩ i nüxna pedauxü̃ ya yima ãẽ̱xgacüpata.
7 Rü pema i ngü̃xchigaarü ngunexü̃gu ãẽ̱xgacüpataarü dauwa ípechoxü̃xü̃, rü tá pexí Tupanapatana pedaugü ya daa bucü ya ãẽ̱xgacü tá ixĩcü íngexmaxü̃wa.
8 Rü ãxnexãcü tá nüxü̃ ípechomaeguãchi ya daa Tupanapata ya daa bucü nawa ngexmane. Rü texé ya nagu ücuchaü̃xe rü tá tüxü̃ pima̱x. Rü nawe tá pexĩxü̃tanü ya daa bucü i nüma ínaxũxü̃wa —nhanagürü.
9 Rü nüma ga yema churaragüeru rü chacherdóte ga Yoiádaga naxĩnüe rü nanaxügü ga yema namaxã nüxü̃ yaxuxü̃. Rü wüxichigü ga yema churaragüeru rü norü churaragütücumümaxã inacua̱x. Rü yemaacü yema chocuxü̃ ga churaragü ga ãẽ̱xgacüpatawa dauxü̃taegüxü̃, rü yema churaragü ga yema puracüwa íchoxü̃xü̃, rü wüxichigü ga ngü̃xchigaarü ngunexü̃gu gumá chacherdótepe̱xewa naxĩĩxü̃.
10 Rü nüma ga chacherdóte ga Yoiáda rü yema churaragüeruna nanana ga guma wocaegü rü poxü̃ruü̃gü ga guma Tupanapatagu nuxü̃ ga ãẽ̱xgacü ga Dawíarü ixĩgüxü̃.
11 Rü nüma ga yema churaragü ga dauxü̃taegüxü̃ rü nachicawa nixũchigü ga Tupanapataarü tügünecüwawa rü norü to̱xwecüwawa. Rü yexgumarüxü̃ ta nüxü̃ ínachomaeguãchi nax nüxna nadaugüxü̃ ga yema ãmarearü guchicaxü̃. Rü wüxichigü ga yema dauxü̃taexü̃ rü nixãxne nax nüxna nadaugüxü̃ ga gumá bucü.
12 Rü yexguma nüma ga Yoiáda rü ínanamuxũchi ga gumá bucü ga taue̱xta ãẽ̱xgacü ga Acachía nane rü naeruwa nayanga̱xcuchi ga nanatüpate̱xe. Rü nananucu ga norü cua̱xruxü̃ ga ãẽ̱xgacü nax yixĩxü̃. Rü chíxü̃maxã nanabaeru rü yemawena rü nanaxunagü nax ãẽ̱xgacü yixĩxü̃. Rü guxü̃ma ga duü̃xü̃gü rü nanacapünegü rü tagaãcü nhanagürügü: —¡Namaxü̱̃x ya ãẽ̱xgacü! —nhanagürügü.
13 Rü yexguma Ataría nüxü̃ ĩnügu ga nax ínacapünetaegüxü̃ rü tagaãcü nataãxẽgüxü̃ ga yema churaragü rü duü̃xü̃gü, rü ngĩma ga Ataría rü Tupanapatawa ixũ ga yema ínangutaque̱xegüxü̃wa.
14 Rü nüxü̃ idau ga yema nacüma ga peta ga ãẽ̱xgacüarü ngucuchichiga rü nüma ga gumá ãẽ̱xgacü ga Tupanapataarü caxtaxü̃tagu nax nachixü̃. Rü nüxü̃ idau ta nax naxü̃tagu nachigüxü̃ ga churaragüeru rü paxetaruü̃gü rü duü̃xü̃gü ga poraãcü taãxẽgüxü̃ ga norü cornétagu icuegüxü̃. Rü yexguma ga Ataría rü ngĩgü irügáutechiru rü tagaãcü ngĩgürügü: —Taechitawa̱xegüxü̃. Taechitawa̱xegüxü̃ —ngĩgürügü.
15 11:15-16 Rü yexguma nüma ga Yoiáda rü tagaxãcü yema churaragüeruxü̃ namu rü nhanagürü: —¡Ngĩxü̃ ipegaxüchi i nua! ¡Rü taxũtáma nuxã Tupanapatachiãgu ngĩxü̃ pima̱x! Rü ngẽxguma texé ngĩétüwa chogügu ¡rü peyama̱xama! —nhanagürü. Rü yemaca̱x ga nümagü rü guma Tupanapatawa ngĩxü̃ ínagaxüchigü, rü yema nachica ga ãẽ̱xgacüarü cowarugümaxã ínanguxü̃güxü̃wa ngĩxü̃ natúchigügü. Rü yexma ngĩxü̃ nayarüma̱xgü.
16 Nüü̃ nadau 11:15
17 Rü yemawena nüma ga chacherdóte ga Yoiáda rü Tupanamaxã inaxüga rü nüma ga ãẽ̱xgacü rü norü duü̃xü̃gü rü tá Tupanaga naxĩnüexü̃. Rü yexgumarüxü̃ ta rü ãẽ̱xgacümaxã rü duü̃xü̃gümaxã inaxüga nax duü̃xü̃gü rü tá mea ãẽ̱xgacüga naxĩnüexü̃ rü nüma ya ãẽ̱xgacü rü tá mea duü̃xü̃gümaxã inacuáxü̃.
18 Rü nhu̱xũchi guxü̃ma ga duü̃xü̃gü rü Baáarü ngutaque̱xepataü̃wa naxĩ rü nagu napogüe. Rü nagu napogüe ta ga guxü̃ma ga yema Baáarü ãmarearü guchicaxü̃gü rü naxchicüna̱xãgü. Rü guma Baáarü chacherdóte ga Matáü̃ rü Baáarü ãmarearü guchicaxü̃xü̃tagu nayama̱xgü. Rü yemawena rü Tupanapataca̱x nawoegu, rü nüma ga chacherdóte ga Yoiáda rü yexma Tupanapatagu nanamugü ga dauxü̃taeruü̃gü nax nüxna nadaugüxü̃ca̱x.
19 Rü nhu̱xũchi nüma ga chacherdóte ga Yoiáda rü naxca̱x naca ga yema churaragüeru ga ãẽ̱xgacüpatamaxã icua̱xgüxü̃ rü ga capitáü̃ ga ãẽ̱xgacüna daugüxü̃ rü guxü̃ma ga duü̃xü̃gü. Rü wüxigu guma Tupanapatawa inaxĩãchi nax ãẽ̱xgacüpatawa nagagüaxü̃ca̱x ga gumá ãẽ̱xgacü. Rü yema ĩã̱x ga ãẽ̱xgacüpatape̱xewaama yexmaxü̃wa namaxã nichocu. Rü nüma ga ãẽ̱xgacü ga Yoá rü norü tochicaxü̃wa nayarüto.
20 Rü guxü̃ma ga duü̃xü̃gü rü nataãxẽgü. Rü yemaacü Ataríaarü yuwena rü guxü̃ma ga guma ĩanecüã̱x rü taxuxü̃ma ga guxchaxü̃gu narüxĩnüe.
21 Rü nüma ga Yoá rü 7 ga taunecü nüxü̃́ nayexma ga yexguma ãẽ̱xgacüxü̃ yangucuchigu.
