2 Reis 20:1-21
20 Rü nüma ga Echequía rü poraãcü nida̱xawe. Rü yemaca̱x ga orearü uruxü̃ ga Ichaía ga Amú nane, rü ínayadau, rü nhanagürü nüxü̃: —Cori ya Tupana rü nhanagürü cuxü̃: “Ẽcü ¡namaxã idexa i cuxacügüx, rü namaxã nüxü̃ ixu nax nhuxãcü tá cuwena namaxẽxü̃! Erü nhu̱xmax rü taxũtáma cuxca̱x nitaane, rü tá cuyu”, nhanagürü.
2 Rü nüma ga Echequía rü nadixeguãchi rü ĩxtapüguama nabuenü rü nhaãcü nayumüxẽ:
3 —Pa Corix, Pa Tupanax, rü cuxü̃ chaca̱a̱xü̃ nax nüxna cucua̱xãchixü̃ca̱x nax nhuxãcü cuxca̱x chapuracüxü̃ rü guxü̃guma chanaxüxü̃ ga yema cuma namaxã cutaãxẽxü̃ —nhanagürü. Rü yema nhaxguwena rü nhu̱xũchi poraãcü naxaxu.
4 Rü naxü̃pa ga Ichaía nax íxũxũxü̃ naã̱xtüwa ga guma ãẽ̱xgacüpata, rü nüma ga Cori ya Tupana rü Ichaíamaxã nidexa rü nhanagürü nüxü̃:
5 —¡Wena íyadau ya Echequía ya chorü duü̃xü̃güarü ãẽ̱xgacü ixĩcü! ¡Rü namaxã nüxü̃ ixu: “Rü chama ya nũxcümaü̃cü ga curü o̱xi ga Dawíarü Tupana rü marü cuxü̃́ nüxü̃ chaxĩnü i curü yumüxẽ, rü nüxü̃ chadau i cuxgüxü̃etü nax cuxaxuxü̃! Rü chama rü tá cuxca̱x chayataanexẽxẽ rü tamaepü̱x i ngunexü̃guwena rü tá marü ícurüda rü tá chapatawa cuxũ.
6 Rü cuxü̃́ tá chanaxǘnagü i 15 ya taunecü nax cumaxü̃xü̃. Rü chama rü tá cuxü̃ íchapoxü̃ rü tá íchanapoxü̃ ya yima ĩane ya Yerucharéü̃ nüxna i ngẽma Achíriaanecüã̱xarü ãẽ̱xgacü. Rü ngẽmaãcü chanaxü erü nüxü̃ changechaü̃ ya chorü duü̃ ya Dawí rü chayanguxẽxẽ i ngẽma nüxü̃ chixuxü̃” —nhanagürü ga Tupana.
7 Rü Ichaía rü nanamu nax naxügüãxü̃ ga wüxi ga fíguchara. Rü yemamaxã nanachagü ga yema ínataixnaã́xü̃wa ga ãẽ̱xgacü. Rü yemaacü naxca̱x nitaane.
8 Rü nüma ga Echequía rü Ichaíana naca rü nhanagürü: —¿Ta̱xacürü cua̱xruü̃wa tá nixĩ i nüxü̃ chacuáxü̃ nax Cori ya Tupana cha̱u̱xca̱x yataanexẽẽxü̃, rü tamaepü̱x i ngunexü̃guwena rü napatawa tá nax chaxũxü̃? —nhanagürü.
9 Rü nüma ga Ichaía rü nanangãxü̃ga rü nhanagürü: —Nhaa tá nixĩ i ngẽma cua̱xruxü̃ i nüma ya Cori ya Tupana tá cuxna ãxü̃ nax nawa nüxü̃ cucuáxü̃ca̱x rü aixcuma tá nayanguxẽxẽ i ngẽma cumaxã inaxunetaxü̃: ¿Cunaxwa̱xe i üa̱xcüpechita rü 10 i wüye nax naxĩnagüxü̃, rüe̱xna 10 i wüye nax natáeguxü̃? —nhanagürü.
10 Rü nüma ga Echequía nanangãxü̃ga rü nhanagürü: —Ngẽma üa̱xcüpechita nax naxĩnagüxü̃ rü natauxcha, notürü ngẽma nügü nax natáeguxü̃ nixĩ i guxchaxü̃ —nhanagürü.
11 Rü yexguma nüma ga orearü uruxü̃ ga Ichaía rü Cori ya Tupanana naca, rü nüma ga Cori ya Tupana rü 10 ga wüye nanatáeguxẽxẽ ga üa̱xcüpechita nawa ga yema Acáaarü üa̱xcüarü ngugüruxü̃ ga ãẽ̱xgacüpatawa yexmaxü̃.
Echequía nanayaxu ga duü̃xü̃gü ga Babiróniaanewa ne mugüxü̃
12 Rü yema ngunexü̃gügu rü nüma ga Babiróniaanearü ãẽ̱xgacü ga Merodá-Baradáü̃ ga ãẽ̱xgacü ga Baradáü̃ nane ixĩcü, rü Echequíaxü̃tawa nanamugü ga nhuxre ga norü duü̃xü̃gü nax norü moxẽ yéma nangegüxü̃ca̱x rü ãmare nüxna yaxãgüxü̃ca̱x, yerü nüxü̃ nacuáchiga ga nax yada̱xawexü̃.
13 Rü nüma ga Echequía rü meama nanayaxu ga yema ãẽ̱xgacüarü duü̃xü̃gü. Rü nüxü̃ nanawe̱x ga guxü̃ma ga norü yemaxü̃gü ga nüxü̃́ yexmaxü̃ ga diẽrumü, rü úiru, rü pumáragü rü chíxü̃. Rü yexgumarüxü̃ ta rü nüxü̃ nanawe̱x ga naxnegüpataxü̃, rü guxü̃ma ga norü yemaxü̃gü ga yexma namaxã nanguxü̃xü̃. Rü guxü̃ma ga norü yemaxü̃gü ga ãẽ̱xgacüpatawa yexmagüxü̃, rü nüxü̃ nanawe̱x rü taxuxü̃ma inicu̱x.
14 Rü yemawena ga nüma ga orearü uruxü̃ ga Ichaía rü ãẽ̱xgacü ga Echequíaxü̃tawa naxũ rü nüxna nayaca rü nhanagürü: —¿Ngextá ne naxĩ i ngẽma yatügü i cuxü̃tawa ngugüxü̃, rü ta̱xacüü̃ yixĩxü̃ i cumaxã yaxugüxü̃? —nhanagürü. Rü nüma ga Echequía rü nanangãxü̃ rü nhanagürü: —Ngẽma duü̃xü̃gü rü yáxü̃guxü̃ i nachixü̃ane i Babiróniaanewa nixĩ i ne naxĩxü̃ —nhanagürü.
15 Rü yexguma ga nüma ga Ichaía rü ãẽ̱xgacüna naca rü nhanagürü: —¿Rü ta̱xacü nixĩ ga nüxü̃ nadaugüxü̃ i nua cupatawa? —nhanagürü. Rü nüma ga Echequía rü nanangãxü̃ rü nhanagürü: —Nüxü̃ nadaugü i guxü̃ma i ngẽmaxü̃gü i chapatawa ngẽxmaxü̃. Rü guxü̃ma nüxü̃ chawe̱x rü taxuxü̃ma ichicu̱x —nhanagürü.
16 Rü yexguma ga nüma ga Ichaía rü nhanagürü nüxü̃: —¡Dücax, irüxĩnü i nhaa ore i Tupana cuxca̱x nua muxü̃!
17 “Rü tá ínangugü i ngunexü̃gü i nagu ngẽma Babiróniaanecüã̱x tá nadexü̃ i guxü̃ma i ngẽmaxü̃gü ga curü o̱xigü daa ãẽ̱xgacüpatagu nutaque̱xexü̃. Rü tá Babiróniaanewa nanana, rü taxuxü̃táma nua nayaxüãchi.
18 Rü woo ya cutaagü rü ngẽ́ma Babiróniaanewa tá tüxü̃ nagagü rü tá tüxü̃ nidegüpü̱xücharexe, rü ngẽmaãcü norü puracütanüxü̃xü̃ ãẽ̱xgacüpatagu tá tüxü̃ namugü” —nhanagürü.
19 Notürü Echequía rü tama poraãcü naxoegaãxẽ yerü nhaxü̃gu narüxĩnü: “Nhu̱xma nax chamaxü̃gu rü taxũtáma ngẽma nangupetü”, nhaxü̃gu narüxĩnü. Rü yemaca̱x Ichaíaxü̃ nangãxü̃ga rü nhanagürü: —Cha̱u̱xca̱x name i ngẽma Tupanaarü ore i chamaxã nüxü̃ quixuxü̃ —nhanagürü.
20 Rü guxü̃ma ga yema Echequíaarü puracü ga naxüxü̃ rü Yudáanecüã̱xarü ãẽ̱xgacügüarü poperagu naxümatü. Rü ngẽ́ma nango̱x ga nhuxãcü nax naxüãxü̃ ga yema ĩanearü dexápaxü̃ ga taxüchixü̃ rü wüxi ga dexámaxü̃ ga ĩanewa nadaxü̃.
Nayu ga Echequía
21 Rü yexguma nayu̱xgu ga Echequía, rü nane ga Manaché rü nachicüxü Yudáanecüã̱xarü ãẽ̱xgacüxü̃ ningucuchi.
